ආවට ගියාට උළුවහු තියන්න එපා.

 කොයි දීපංකරේ ගියත් හිතට බලාපොරත්තු වන සතුට සැනසුම හරියට දැනෙන්නේ තමන්ගේ ගෙදරට ආවම යි. කොහේ හරි ගිහින් ගෙදරට ආවට පස්සෙ 'නිවන් ගියා වගේ ...' කියල කියවෙන්නේ අන්න ඒ හින්දයි. තමන්ගේ නිවස හැමෝටම බකිංහැම් මාළිගාවටත් වඩා වටිනවා. හිතේ සතුටින් නිදහසේ ඉන්න තියෙන තමන්ගේ අදරණීයම නිවහනේ දුකින් කනස්සල්ලෙන් විඳවන අයත් මොන තරම් ඉන්නවද... දහසක් බලාපොරොත්තු තියාගෙන දුක් මහන්සියෙන් හදාගත්තු සෙවන යට හිතේ සතුටින් කල් ගෙවන්න බැරි වෙන විදියට හරස් වෙන දේවල් බොහොමයක් තියෙනවා. නොසැලකිලිමත්ව ස්ථාන ගතකරන දේවල්, දුරදිග නොබලා කරන ඉදිකිරීම් ආදී බොහෝ දේවල් ගෙදරට අහිතකර විදියට බලපානවා. ඉන් එක් සුවිශේෂ වැදගත් අංගයක් ගැනයි මේ කතා කරන්න හදන්නෙ. ඒ තමයි නිවසේ ප්‍රධාන දොරටුව.

නිවසක ප්‍රධාන දොරටුව තියන කොට මඟ හැරිය යුතු 'ද්වාර වේධ දෝෂ' 18 ක් ගැන වාස්තු විද්‍යාවේ සඳහන් වෙනවා. මේ ද්වාර වේධ දෝෂ එකකට හෝ ප්‍රධාන දොරටුව හසු වෙනවා නම් නිවසට අහිතකර බලපෑම් එල්ල වෙනවා. ඒ වේධ දෝෂ මෙන්න මේව යි.

01. මාර්ග දෝෂය
02. තරු දෝෂය
03. කෝණ දෝෂය
04. කූප දෝෂය
05. ස්ථම්භ දෝෂය
06. භ්‍රම දෝෂය
07. වර්චස් කුටි දෝෂය
08. තිරස්චීන දෝෂය
09. පංක දෝෂය
10. ම්ලේජ්ජ දෝෂය
11. අභිමුඛද්වාර දෝෂය
12. සුසාන දෝෂය
13. රජක දෝෂය
14. රාජ දෝෂය
15. කුම්භකාර දෝෂය
16. දේවතා දෝෂය
17. ගණිකා දෝෂය
18. බ්‍රහ්ම දෝෂය

දැන් මේ වේධ දෝෂ ගැන වෙන වෙනම පැහැදිලි කර ගනිමු.

මාර්ග දෝෂය.
නිවසක ප්‍රධාන දොරටුවට මුහුණ ලා නිවස දිශාවට විහිදෙන මාර්ගයක් දොර ඉදිරියේදී වම් පැත්තට හෝ දකුණු පැත්තට හැරිලා යනව නම් මාර්ග වේධ දෝෂය යෙදෙනවා. හැබැයි ප්‍රධාන දොරටුවේ ඉඳලා අඩි 15 කට වඩා දුරින් ඒ විදියේ වංගුවක් යෙදුණට දෝෂයක් ඇතිවෙන්නෙ නෑ.මේ වේධ දෝෂය හේතුවෙන් නිවැසියන්ගේ මානසික නිරවුල්තාවය බිඳ වැටෙනවා. පවුලේ සාමය සමගිය අඩු වෙනවා. අද කාලෙ නම් මේ විදියේ මාර්ග දෝෂයක් තියෙන එක ගොඩක්ම භයානකයි. ගේ ඇතුළටම ඉගිල්ලිලා එන එක අද කාලයේ රියැදුරන්ට එච්චර දෙයක් නෙමෙයි.

තරු දෝෂය.
ප්‍රධාන දොරටුවට කෙළින් අතු පතර විහිදුනු විශාල ගසක් තියෙනවා නම් තරු වේධ දෝෂය යෙදෙනවා.හැබැයි දොරටුවට අඩි 15 කට වඩා ඈතින් ගහක් තිබුණට දෝෂයක් ඇතිවෙන්නෙ නෑ. දොර ඉදිරියෙ කුඩා මල් ගස්, පඳුරු තිබුණත් වේධ දෝෂයක් ඇතිවෙන්නෙ නෑ. තරු වේධ දෝෂය යෙදිලා තියෙනවා නම් නිවසේ වාසනා බලය අවහිර වෙනවා. ලැබීම් දුර්වල වෙනවා.

කෝණ දෝෂය.
ප්‍රධාන දොරටුව ඉදිරියෙන් තවත් නිවසක මුල්ලක්, ඉඩමක කොනක් පිහිටලා තියෙනවා නම් කෝණ දෝෂය යෙදෙනවා. කරන කියන කටයුතුවල සාර්ථකත්වය අඩු වීමට, මානසික සතුට ප්‍රබෝධය හීන වීමට වගේම දියුණුව අඩු වීමට මේ දෝෂය හේතු වෙනවා.

කූප දෝෂය.
ප්‍රධාන දොරටුවට කෙළින් ළිඳක්, පොකුණක්, බෑවුමක් හෝ වලක් තියෙනවා නම් මේ දෝෂය යෙදෙනවා. ප්‍රධාන දොරටුවේ පටන් අඩි 15 කට වඩා දුරින් එවැනි දෙයක් තිබුණට දෝෂයක් ඇතිවෙන්නෙ නෑ. කූප දෝෂය යෙදිල තියෙනවා නම් නිවැසියන්ට මානසික හා ශාරීරික වශයෙන් පීඩා එල්ල වෙනවා. දියුණුව හීන වෙනවා. ධනය හානි වෙනවා.

ස්ථම්භ දෝෂය.
නිවසේ ප්‍රධාන දොරට ඉදිරියෙන් කණුවක් හෝ කුළුණක්  තියෙනවා නම් ස්ථම්භ දෝෂය යෙදෙනවා. ඇතැම් නිවාසවල ප්‍රධාන දොරට පිටතින් කරන ඉදිකිරීම් වලදි ප්‍රධාන දොරට ඉලක්ක වන විදියට කණු යොදල තියෙනවා. මේ දෝෂය හේතුවෙන් වාසනා බලය හීන වෙනවා. දියුණුව අඩාල වෙනවා. කරන කටයුතුවලට බාධක එල්ල වෙනවා.

භ්‍රම දෝෂය.
ප්‍රධාන දොරට ඉදිරියෙන් රෝදයක්, සුළං පෙත්තක්, සකපෝරුවක් හෝ වෙනත් කැරකෙන දෙයක් තියෙනවා නම් භ්‍රම දෝෂය යෙදෙනවා. මේ දෝෂය හේතුවෙන් නිවැසියන්ගේ මානසික නිරවුල්තාවය බිඳ වැටෙනවා. ධනය හානි වෙනවා. සමගිය බිඳ වැටෙනවා.

වර්චස් කුටි දෝෂය.
ප්‍රධාන දොර ඉදිරියෙන් වැසිකිළියක් තියෙනවා නම් මේ දෝෂය යෙදෙනවා. මේ හේතුවෙන් නිවසේ ශ්‍රියාව නැති වෙනවා. ආර්ථික පීඩා, රෝග පීඩා ඇතිවෙනවා. නින්දා අපහාස එල්ල වෙන්නත් ඉඩ තියෙනවා. ගෞරවය විනාශ වෙනවා.

තිරස්චීන දෝෂය.
ප්‍රධාන දොරටුවට ඉදිරියෙන් ගව ගාලක්, එළු ගාලක්, කුකුළු කොටුවක්, ඌරු කොටුවක් හෝ  බලු කූඩුවක් තියෙනවා නම් මේ දෝෂය යෙදෙනවා. මේ දෝෂය හේතුවෙන් නිවැසියන්ට නොයෙක් රෝග පීඩා ඇතිවෙනවා. මානසික සහනය තදබල විදියට බිඳ වැටෙනවා. පවුලේ සමගිය අඩු වෙනවා.

පංක දෝෂය.
ප්‍රධාන දොරටුවට ඉදිරියෙන් මඩ ගොහොරුවක්, අපිරිසිදු ජලය එකතු වෙන තැනක් තියෙනවා නම් පංක දෝෂය යෙදෙනවා. මේ දෝෂය හේතුවෙන් නිවැසියන්ගේ ශරීර සෞක්‍යය දුර්වල වෙනවා. වාසනා බලය අඩු වෙනවා. දියුණුවට බාධක එල්ල වෙනවා.

ම්ලේච්ජ දෝෂය.
ප්‍රධාන දොරටුවට ඉදිරියෙන් නීති විරෝධී ක්‍රියා,අපරාධ, පාපකාරී කටයුතු ආදිය සිදුවෙනවා නම්, එවැනි කටයුතුවල යෙදෙන පිරිස් නිතර රැස්වෙන, ගැවසෙන ස්ථානයක් තියෙනවා නම් ම්ලේච්ජ දෝෂය යෙදෙනවා.මෙයින් නිවසට බලවත් අසුබ බලපෑම් එල්ල වෙනවා. නිවැසියන්ගේ මානසික සහනය නිතර බිඳ වැටෙනවා. නිතර බිය දැනෙනවා. වැඩකටයුතු නිරවුල්ව, පිළිවෙලකට කරගෙන යන්න අපහසු වෙනවා. බාධක අවහිර එල්ල වෙනවා.

අභිමුඛද්වාර දෝෂය.
නිවසේ ප්‍රධාන දොරටුව ඉදිරියෙන් තවත් නිවසක ප්‍රධාන දොරටුව පිහිටලා තියෙනවා නම් මේ දෝෂය යෙදෙනවා. නිවසේ ගෘහ මූලිකයාට මෙයින් තදබල අසුබ බලපෑම් එල්ල වෙනවා.ඇස්වහ, කටවහ දෝෂ, සතුරු කරදර ඇතිවෙනවා.නිවැසියන්ගේ මානසික නිරවුල්තාවය බිඳ වැටෙනවා.

සුසාන දෝෂය.
ප්‍රධාන දොරටුවට ඉදිරියෙන් සොහොන් පිටියක්, සොහොන් කොතක් හෝ මියගිය අයෙක් වෙනුවෙන් ඉදි කළ සිහිවටනයක් තියෙනවා නම් සුසාන දෝෂය යෙදෙනවා. මේ දෝෂය ඉතාමත් අසුබයි. පවුලේ සාමාජිකයින් අතර සමගිය අඩු වෙනවා. නිතර කනස්සලු ගති ඇතිවෙනවා. දියුණුවට බාධක එල්ල වෙනවා. ගෘහ මූලිකයා නිවසින් පිට වීමට කරුණු යෙදෙන්නත් ඉඩ තියෙනවා.

රජක දෝෂය. 
ප්‍රධාන දොරටුවට ඉදිරියෙන් රෙදි සෝදන ස්ථානයක් තියෙනවා නම් රාජකා දෝෂය යෙදෙනවා. මේ දෝෂය හේතුවෙන් නිවැසියන්ට නින්දා අපහාස එල්ල වෙනවා. සතුරු කරදර ඇතිවෙනවා. ගෞරවය විනාශ වෙනවා. දියුණුව අඩු වෙනවා. නිවසේ ශ්‍රියාව නැති වෙනවා.

රාජ දෝෂය.
ප්‍රධාන දොරටුවට ඉදිරියෙන් රාජ්‍ය නායකයින්ගේ, අමාත්‍යවරුන්ගේ නිවසක් තිබෙනවා නම් රාජ දෝෂය යෙදෙනවා.වේධ දෝෂය හේතුවෙන් නිවැසියන් තුළ වෛරය, ක්‍රෝධය, ඊර්ෂ්‍යාව ඇතිවෙනවා. වැඩ කටයුතුවලට බාධක අවහිර එල්ල වෙනවා. නිවසේ සතුට, සමගිය අඩු වෙනවා. (මේ දෝෂයේ බලපෑම එදාට වඩා භයානක විදියට අද කාලයේ එල්ල වෙන්න පුළුවන්)

කුම්භකාර දෝෂය.
නිවසේ ප්‍රධාන දොරටුවට ඉදිරියෙන් උළු පෝරණුවක්, ගඩොල් පෝරණුවක් හෝ වළං පුළුස්සන ස්ථානයක් තියෙනවා නම් කුම්භකාර වේධ දෝෂය යෙදෙනවා. මේ හේතුවෙන් දේපළ ප්‍රශ්න, සතුරු කරදර, නීති ප්‍රශ්න ඇතිවෙනවා. දියුණුව අඩු වෙනවා.

දේවතා දෝෂය.
ප්‍රධාන දොරටුවට ඉදිරියෙන් දේවාලයක් හෝ දේව ප්‍රතිමාවක් තියෙනවා නම් දේවතා වේධ දෝෂය යෙදෙනවා. මේ හේතුවෙන් නිවැසියන් අනපේක්ෂිත කරදරවලට ලක්වෙනවා. ධනය විනාශ වෙනවා. නිවැසියන් තුළ උද්යෝගය උනන්දුව අඩු වෙනවා.

ගණිකා දෝෂය.
ප්‍රධාන දොරටුවට ඉදිරියෙන් ගණිකා නිවාසයක් හෝ ගණිකාවන් ගැවසෙන ස්ථානයක් තියෙනවා නම් ගණිකා දෝෂය යෙදෙනවා.මේ හේතුවෙන් පවුලේ සමගිය බිඳවැවෙනවා. ධනය හානිවීම, දරුවන් නොමඟ යාම වගේම මාරක විපත් එල්ල වෙන්නත් ඉඩ තියෙනවා.

බ්‍රහ්ම දෝෂය.
නිවසේ ඉදිරිපස බිත්තියේ හරි මැදින් ප්‍රධාන දොරටුව තැබීමෙන් බ්‍රහ්ම දෝෂය යෙදෙනවා. මෙය ඉතාමත් අසුබ දෝෂයක් ලෙස පිළිගැනෙනවා. ගෘහ මූලිකයාට බලවත් විපත් එල්ල වෙනවා. නිවසේ දියුණුව අඩු වෙනවා. පිළිගැනීම නැති වෙනවා. නොසිතූ කරදර විපත් ඇතිවෙනවා.

   ජ්‍යොතිෂවේදී, ගුප්ත වෛද්‍ය 
     සංජීව කුළුපන බණ්ඩාර.

රවි ධනුවට.

ග්‍රහ මණ්ඩලයේ ප්‍රධාන ග්‍රහයා වන රවි 2018 දෙසැම්බර් මස 16 වැනි ඉරිදා පෙ.ව 09.10 ට ගුරුට අයත් ධනු රාශියට ගමන් කරනවා. රවි 2019 ජනවාරි 14 වැනිදා තෙක් සෙනසුරු සමග ධනු රාශියේ රැඳී සිටිනවා. ධනු රාශිය තේජෝ හෙවත් උෂ්ණ රාශියක් වන අතර එහි අධිපති ගුරු ජල රාශියක් වූ වෘශ්චික රාශියේ ගමන් කරනවා. වෘශ්චික රාශියට අධිපති කුජ පොදු ජනකාරක සෙනසුරුට අයත් කුම්භ රාශියේ ගමන් කරනවා. කුම්භ රාශිය රටේ කේන්දරයේ ලග්නස්ථානය යි.
මේ අනුව දැනට රටට එල්ල වෙමින් පවතින ග්‍රහ බලපෑම් සුබදායක නොවන බව පෙනෙන්නට තිබෙනවා. දේශපාලන ක්ෂේත්‍රය තුළ පවතින අර්බුධ වඩාත් උග්‍ර තත්වයට පත් වෙනවා. දේශපාලනය හා නීතිය අතරද ගැටුම් ඇතිවිය හැකි තත්වයක් පවතිනවා. රජයට මෙන්ම විපක්ෂයටද දැඩි අභියෝග එල්ල වෙනවා. පාර්ලිමේන්තුව තුළ තව දුරටත් අර්බුධ, පෙරළි ඇතිවෙනවා.
පවතින ග්‍රහ තත්වය අනුව ලේ වැගිරීම්වලට ඉඩ තිබෙන බැවින් වගකිවයුතු සියලු දෙනා ඉවසිලිමත්ව කටයුතු කිරීම ඉතාමත් වැදගත් වෙනවා.
2019 ජනවාරි මස 14 වැනිදා රවි මකර රාශියට ගමන් කිරීමද සුබදායක නෑ. අර්බුධ හා ගැටළු තව දුරටත් ඇදී යන ග්‍රහ තත්වයක් පවතිනවා. 
ඉදිරි කාලයේදී තාවකාලික සංහිඳියාවක් ඇතිවීමට ඉඩ කඩ පැවතුණද, සෙනසුරු ධනු රාශියේ කල් ගෙවන කාලය තුළ, එනම් 2020 ජනවාරි 25 තෙක් කාලය 
තුළ රට තුළ නිරවුල්,යහපත් වාතාවරණයක් අපේක්ෂා කිරීමට අපහසු වෙනවා. මෙම කාලය තුළ දැඩි අර්බුධ මතුවන අතර ජන ජීවිතයටද වරින් වර බලපෑම් එල්ල වෙනවා. ජන නායකයින්ට මාරක අපල එල්ල වෙනවා.

     ජ්‍යොතිෂවේදී, ගුප්ත වෛද්‍ය 

        සංජීව කුළුපන බණ්ඩාර.

ගුරු මාරුව.

(2018.09.23 වැනිදා 'දැන් ' පුවත්පතෙහි පල වූ ප්‍රවීන ජ්‍යොතිෂවේදී සංජීව කුළුපන බණ්ඩාර මහතාගේ විග්‍රහය)

ගුරු හෙවත් බ්‍රහස්පති 2018 ඔක්තෝබර් මස 11 වැනි බදාදා ලංකාවේ වේලාවෙන් ප:ව 07. 21 ට කුජට අයත් වෘශ්චික රාශියට ගමන් කරනවා. 2020 මාර්තු මස 31 වැනි දින තෙක් ගුරු වෘශ්චික රාශියේ කල් ගෙවනවා. 2019 අප්‍රේල් මස 10 වැනිදා පටන් අගෝස්තු මස 11 වැනිදා තෙක් කාලය තුළ ගුරු වක්‍ර වීමටද නියමිතයි.
ගුරු හෙවත් බ්‍රහස්පති ග්‍රහ ලොව පුරෝහිත ලෙස හැඳින්වෙනවා. දෙවියන්ටද ගුරු වන බැවින් සුරගුරු යනුවෙන්ද හඳුන්වනවා. ගුරු ප්‍රමාණයෙන් දෙවැනි වන්නේ සූර්යයාට පමණයි. රශ්මිය පැතිරවීම අතින්ද සූර්යයාට පමණක් දෙවැනි වෙනවා. සෞම්‍ය ග්‍රහයෙක් ලෙස  සැලකෙන ගුරුට ජ්‍යොතිෂයේදී විශේෂ තැනක් හිමි වෙනවා. ගඳ සුවඳ දැනීමෙන් ඇතිවෙන හැඟීම ( The Sense of smell ) ගුරු විසින් ලබාදෙනවා. යුක්තියට සාධාරණයට විනයට ආගමට දහමට අධිපති ග්‍රහයා ගුරුයි.
ගුරු වෘශ්චික රාශියට ගමන් කරන්නේ තම තේජෝ රාශියක් වූ ධනු රාශිය තුළ දුකට අධිපති සෙනසුරු කල් ගෙවන අවස්ථාවකයි. ගුරු ගමන් කරන්නේ ගුප්ත රාශියක් මෙන්ම ජල රාශියක්ද වූ වෘශ්චිකයටයි. ලංකා කේන්දරයේ දස වැනි භාවයටයි. වෘශ්චික රාශියට අදිපති කුජ මේ වන විට ශනිට අයත් මකර රාශියේ උච්ච බලයෙන් කල් ගෙවනවා. ඒ අනුව ගුරු මාරුවත් සමග කුජ, ශනි, ගුරු ග්‍රහයින් අතර ඇති වන සම්බන්ධය විශේෂයෙන් කැපී පෙනෙනවා. එසේ හෙයින් මෙවර ගුරු මාරුව රටට ලෝකයට අතිශයින් වැදගත් වෙනවා.
රටක භාණ්ඩාගාරය නියෝජනය කරන ගුරු කුජට අයත් ජල රාශියකට ගමන් කිරීම රටේ ආර්ථිකයට සුබදායක නෑ. ආර්ථිකය හෝදගෙන යන තත්වයක් ඇතිවෙනවා. ඉදිරි කාලය තුළ රටේ ආර්ථිකයේ දැඩි පසුබෑමක් ඇතිවෙනවා.
යුක්තිය සාධාරණය යටපත්වී යුක්තිය ඉස්මතු වන තත්වයක් ඇතිවෙනවා. විනය හා සදාචාරය බරපතල ලෙස නාය යෑමට ලක්වෙනවා. ආගමික පූජක උතුමන්ලා මෙන්ම ගුරු භවතුන්ද නොයෙක් චෝදනාවන්ට ලක්වෙනවා. ගෞරවනීය චරිත වෙත චෝදනා අපහාස එල්ල වෙනවා. ඇතැම් ගෞරවනීය චරිත තමන්ට නොගැළපෙන පහත කටයුතුවලට පෙළඹීම හේතුවෙන් බරපතල ලෙස දෝෂ දර්ශණයට ලක්වෙනවා. ගුරු ගෞරවය බිඳ වැටෙනවා.
නීති ක්‍ෂේත්‍රය පිළිබඳ ජනතා විශ්වාසය අඩු වෙනවා. නීති ක්‍ෂේත්‍රයේ නියැලෙන ඇතැමුන්ට චෝදනා එල්ල වෙනවා.
සමාජ සදාචාරය බිඳ වැටෙන ආකාරයේ සිදුවීම් වර්ධනය වෙනවා. සමාජ විරෝධී ක්‍රියා ඉහළ යනවා.ඇතැම් බෞද්ධ සිද්ධස්ථාන හා බෞද්ධ උරුමයන් සොර සතුරන් අතින් විනාශ වෙනවා. බෞද්ධ ඉතිහාසය විකෘති කිරීමටද ඇතැමුන් පෙළඹෙනවා.
භික්ෂූන් වහන්සේලාගේ මැදිහත් වීමෙන් බලවත් සංවිධානයක් ගොඩනැගෙන අතර ඒ වටා දේශමාමක පිරිස් ඒකරාශී වන ආකාරයද පෙනෙන්නට තිබෙනවා. ඉදිරි දේශපාලන කටයුතුවලදී භික්ෂූන් වහන්සේලාගේ මැදිහත්වීම තීරණාත්මක වෙනවා.
නොයෙක් විට සිදුවන බදු මිල වැඩිවීම් හා බදු පැනවීම් හේතුවෙන් ජනතව අසීරුතාවයට පත්වෙනවා. වර්ජන උද්ඝෝෂණ බහුල වන අතර ජන ජීවිතයටද බලපෑම් එල්ල වෙනවා.
කාලගුණ විපර්යාශ හා කෘමි රෝග හේතුවෙන් කෘෂි කර්මාන්තයට බලපෑම් එල්ල වෙනවා. ගොවි ජනතාව අසීරුතාවයට පත්වෙනවා.
බොහොමයක් දෙනා හුදු ලෞකික ආශාවන් කෙරෙහි වැඩි වශයෙන් නැඹුරු වෙනවා. යොවුන් පරපුර අතර නොයෙක් විෂමාචාර බහුල වෙනවා.
ගුරු වෘශ්චික රාශියේ කල් ගෙවන 2018. 10. 11 - 2020. 03. 31 අතර කාලය තුළ අධ්‍යාත්මික කටයුතු කෙරෙහි නැඹුරුව මෛත්‍රී සහගතව කටයුතු කිරීම වැදගත් වෙනවා.
ගුරු මාරුව හේතුවෙන් ඒ ඒ ලග්නවලට එල්ල වන බලපෑම් කෙබඳු දැයි විමසා බලමු.

මේෂ ලග්නය.
මේෂ ලග්න හිමි ඔබේ කේන්දරයේ අට වැනි භාවයට ගුරු ගමන් කිරීම එතරම් සුබදායක නෑ.
ධනය: ගුරු අට වැනි භාවයට ගමන් කිරීමත් සමග ආර්ථිකයේ සුළු පසුබෑමක් ඇතිවෙනවා. වියදම් අධික වෙනවා. ලැබෙන දේ නිරායාශයෙන් වියදම් වෙන්න පුළුවන්. මෙම තත්වය 2019.08.11 දින පටන් තරමක් වෙනස් වෙනවා.
රැකි රක්ෂා: රැකියා කටයුතු සම්බන්ධයෙන් උද්යෝගය හා උනන්දුව අඩුවෙනවා. විදේශ රැකියා බලාපොරොත්තුවෙන් සිටින අයගේ බලාපොරොත්තු ඉටුවීම ප්‍රමාද වෙනවා. කරගෙන යන ව්‍යාපාරවල තරමක පසුබෑමක් ඇතිවෙනවා.
ගෘහ ජීවිතය: විවේකය අඩුවෙනවා. පවුලේ අය වෙනුවෙන් වෙහෙසීමට සිදුවෙනවා. මානසික සහනය තරමක් අඩු වෙනවා. සතුරු බලපෑම් එල්ල වීමට ඉඩ තිබෙනවා. උරුම හිමිකම් සම්බන්දයෙන් ගැටළු මතුවෙන්න පුළුවන්. 2019.08.11 පටන් අසුබ බලපෑම් තරමක් අඩු වෙනවා. එතැන් පටන් 2020.03.31 තෙක් කාලය තුළ ක්‍රමයෙන් සතුටුදායක වාතාවරණයක් ඇතිවෙනවා.
සෞක්‍යය: අර්ශස්, මුත්‍රා අබාධවලට මෙන්ම පිත දුෂ්‍ය වීමෙන් ඇතිවන අසනීපවලටද ඉඩ තිබෙනවා.

වෘෂභ ලග්නය.
වෘෂභ ලග්නය හිමි ඔබේ කේන්දරයේ හත් වැනි භාවයට ගුරු ගමන් කරනවා. ගුරු මාරුව ඔබට සුබදායකයි.
ධනය: ආර්ථිකයේ කැපී පෙනෙන ප්‍රගතියක් ඇතිවෙනවා. සෙනසුරුගේ ඒරාෂ්ටක අපල හේතුවෙන් වරින් වර පසුබෑමට ලක්වුණු ආර්ථිකය ගුරු මාරුව හේතුවෙන් සතුටුදායක තත්වයට පත්වෙනවා. ලැබීම් වර්ධනය වෙනවා.
රැකි රක්ෂා: රැකියා කටයුතුවල විශේෂ දියුණුවක් ඇතිවෙනවා. නිසි තැන හිමි වෙනවා. කරගෙන යන ව්‍යාපාර දියුණු වෙනවා. විදේශ රැකියා බලාපොරොත්තුවෙන් සිටින අයගේ බලාපොරොත්තු ඉටුවෙනවා. විශේෂ වරප්‍රසාද හිමි වෙනවා.
ගෘහ ජීවිතය: සිතට ප්‍රීතිය ඇතිවෙනවා. යුග දිවියේ අඩදබර පැවතුණා නම් ඒවා දුරුවී සමගිය ඇතිවෙනවා. තම වැඩකටයුතුවලට අන්‍යයන්ගේ සහයෝගය හිමි වෙනවා. දරු පල අපේක්ෂාවෙන් සිටින අයට පින්වත් දරු පල හිමි වෙනවා. විවාහ කටයුතු ඉටු කරගැනීමේ බලාපොරොත්තුවෙන් සිටින අයගේ පැතුම් ඉටුවෙනවා. නිතර සතුටුවීමට කරුණු යෙදෙනවා.
සෞක්‍යය: ඒරාෂ්ටක අපල පවතින බැවින් ශරීර සෞක්‍යය සම්බන්ධයෙන් සැලකිළිමත් විය යුතුයි. අනතුරුවලට ඉඩ තිබෙනවා.

මිථුන ලග්නය.
මිථුන ලග්නය හිමි ඔබේ කේන්දරයේ හය වැනි භාවයට ගුරු ගමන් කරනවා. ගුරු හය වැනි භාවයට ගමන් කිරීමෙන් ඔබට මිශ්‍ර පල උදාවෙනවා.
ධනය: අධික වියදම් හේතුවෙන් ආර්ථිකයේ තරමක පසුබෑමක් ඇතිවෙන්න පුළුවන්. ආර්ථිකය ප්‍රවේශමෙන් මෙහෙයවීම වැදගත් වෙනවා. දරුවෙක් වෙනුවෙන් හෝ පවුලේ වෙනත් සාමාජිකයෙක් වෙනුවෙන් වැඩි වියදමක් දැරීමට සිදුවෙනවා.
රැකි රක්ෂා: රැකියා කටයුතු සම්බන්ධයෙන් උද්යෝගය හා උනන්දුව තරමක් අඩු වෙනවා. රැකියා කටයුතුවලට තරමක බාධක එල්ල වෙනවා. භාහිර කටයුතු කෙරෙහි වැඩි අවදානයක් යොමු කිරීමට සිදුවීම හේතුවෙන් රැකියා හා ව්‍යාපාර කටයුතු අඩාල වීමට ඉඩ තිබෙනවා.
ගෘහ ජීවිතය: වැඩ කටයුතු අධික වීම හේතුවෙන් විවේකය අඩු වෙනවා. අත්‍යවශ්‍ය කටයුතු තිබියදී වෙනත් කටයුතු වෙනුවෙන් වෙහෙසීමට සිදුවෙනවා. මෙම කාලය තුළ කරන කැපවීම්වල ප්‍රතිපල තමන්ට ලබාගැනීමට හැකි වන්නේ ලබන වසරේ අග භාගය වන විටයි. විවාහ කටයුතුවලට බාධක එල්ල වෙනවා. ගෘහ ජීවිතයේ සතුට සැනසුම වරින් වර අඩු වෙනවා.
සෞක්‍යය: උදරාශ්‍රිත අසනීප, පිත දූශ්‍යවීම හේතුවෙන් ඇතිවන අසනීප, ශරීරය කෙට්ටුවීම ආදී පීඩාවන්ට ඉඩ තිබෙනවා.

කටක ලග්නය.
කටක ලග්නය හිමි ඔබේ කේන්දරයේ පස් වැනි භාවයට ගුරු ගමන් කරනවා. ගුරු මාරුව ඔබට සුබ පල උදා කරනවා.
ධනය: ආර්ථිකයේ දියුණුවක් ඇතිවෙනවා. ලැබීම් වර්ධනය වෙනවා. තැන්පත් ධනය වර්ධනය කරගැනීමට හැකි වෙනවා. 2019.03.07 පටන් වියදම් තරමක් ඉහළ ගියද ආර්ථිකයේ අඩාල වීමක් සිදුවන්නේ නෑ.
රැකි රක්ෂා: රැකියා කටයුතුවල කැපී පෙනෙන ප්‍රගතියක් ඇතිවෙනවා. නිසි තැන හිමි වෙනවා. ව්‍යාපාර ඇරඹීමට යහපත් වටපිටාවක් සැකසෙනවා. කරගෙන යන ව්‍යාපාර දියුණුවට පත් වෙනවා. 2019.03.07 පටන් සුබ පල වර්ධනය වෙනවා. 
ගෘහ ජීවිතය: ගෙදරදොරේ සතුට සමගිය ඇතිවෙනවා. ගේදොර දේපළ ආදියේ දියුණුවක් ඇතිවෙනවා. බලාපොරොත්තු බොහොමයක් ඉටු කරගැනීමට හැකිවෙනවා. විවාහ කටයුතු ඉටු කරගැනීමේ බලාපොරොත්තුවෙන් සිටින අයට ඒ සඳහා යහපත් වටපිටාවක් සැකසෙනවා. ඥාති සම්බන්ධතා දැඩි වෙනවා. විශේෂ ගමන්වල යෙදීමට හැකිවෙනවා. බොහෝ දේවල් තමන්ට වාසිදායක අයුරින් සිදුවෙනවා.
සෞක්‍යය: ශරීර සෞක්‍යය බොහෝ දුරට යහපත් වෙනවා. 2019.03.07 පටන් වඩාත් සුබදායකයි.

සිංහ ලග්නය.
සිංහ ලග්නය හිමි ඔබේ කේන්දරයේ සිව් වැනි භාවයට ගුරු ගමන් කරනවා. ගුරු මාරුව හේතුවෙන් ඔබට මිශ්‍ර පල උදාවෙනවා.
ධනය: ආර්ථිකයට විශේෂ බලපෑමක් එල්ල වන්නේ නෑ. යහපත් ආර්ථිකයක් පවත්වාගන්න හැකිවෙනවා. 2019.03.07 පටන් ආර්ථිකය වඩාත් සතුටුදායක තත්වයකට පත් වෙනවා.
රැකි රක්ෂා: රැකියා කටයුතු කෙරෙහි උද්යෝගය උනන්දුව තරමක් අඩු වෙනවා. කෙසේ වෙතත් රැකියා කටයුතු කෙරෙහි බරපතළ බාධක අවහිර එල්ල වීමට ඉඩක් නෑ.නව ව්‍යාපාරවලට අතගැසීමට බලාපොරොත්තුවෙන් සිටිනවා නම් 2019.03.07 පටන් ඉදිරි කාලය වඩාත් සුබදායකයි.
ගෘහ ජීවිතය: ගෘහ ජීවිතයේ සතුට සැනසීම වරින් වර අඩු වෙනවා. යුග ජීවිත ගතකරන සිංහ ලග්න හිමියන් ඉවසිලිමත්ව හා බුද්ධිමත්ව කටයුතු කළ යුතුයි. නිවසේ කාලය ගතකිරීම සිතට සැනසිලිදායක නොවීමට ඉඩ තිබෙනවා. නීති ප්‍රශ්නයක් මතුවීමට ඉඩ තිබෙන බැවින් සැළකිලිමත් විය යුතුයි.
සෞක්‍යය: සෙම් පීඩා, විඩාව, පපුව ආශ්‍රිත අසනීප අඩියට ඉඩ තිබෙනවා.

කන්‍යා ලග්නය.
කන්‍යා ලග්නය හිමි ඔබේ කේන්දරයේ තෙවැනි භාවයට ගුරු ගමන් කරනවා. ගුරු තෙවැනි භාවයට ගමන් කිරීම හේතුවෙන් ඔබට මිශ්‍ර පල උදා වෙනවා.
ධනය: අදායම් මාර්ගවලට වරින්වර සුළු බාධක එල්ල වන නමුත් බරපතළ බලපෑමකට ඉඩ කඩ නෑ. බොහෝ දුරට යහපත් ආර්ථිකයක් පවත්වාගැනීමට හැකි වෙනවා. පවුලේ කෙනෙක් වෙනුවෙන් සැළකිය යුතු මුදලක් වැය වෙන්න පුළුවන්.
රැකි රක්ෂා: රැකියා කටයුතුවල සුළු පසුබෑමක් ඇතිවීමට ඉඩ තිබෙනවා. රැකියා ස්ථාන වෙනස් වීමකටද ඉඩ තිබෙනවා. කෙසේ වෙතත් බරපතළ ගැටළු කරදරවලට ඉඩ කඩ නෑ. විදේශ රැකියා බලාපොරොත්තුවෙන් සිටින අයගේ බලාපොරොත්තු ඉටුවෙනවා.
ගෘහ ජීවිතය: පදිංචියේ වෙනසක් සිදුවීමට ඉඩ තිබෙනවා. නිවසේ කාලය ගතකිරීම සිතට තෘප්තිමත් නොවීමටද ඉඩ තිබෙනවා. චෝදනා අපහාස එල්ල වීමට ඉඩ තිබෙන බැවින් සැළකිලිමත් විය යුතුයි. ගමන් බහුල වෙනවා. නිෂ්පල ගමන් වෙනුවෙන් කාලය කැප කිරීමට සිදුවෙනවා. සහෝදරාදීන් සමග මත භේද ඇතිවෙන්න පුළුවන්.
සෞක්‍යය: ශරීර සෞක්‍යය සම්බන්ධයෙන් සැළකිය යුතු තරමේ ගැටළුවක් මතුවන්නේ නෑ.

තුලා ලග්නය.
තුලා ලග්නය හිමි ඔබේ කේන්දරයේ දෙවැනි භාවයට ගුරු ගමන් කරනවා. ගුරු මාරුව ඔබට සුබදායකයි.
ධනය: ආර්ථිකයේ ප්‍රගතියක් ඇතිවෙනවා. තැන්පත් ධනය වර්ධනය වෙනවා. ණය තුරුස් වී තිබුණා නම් ඒවායින් නිදහස් වීමට හැකි වෙනවා. ලැබීම් වර්ධනය වෙනවා.
රැකි රක්ෂා: රැකියා කටයුතු සම්බන්ධයෙන් සුබදායක වාතාවරණයක් ඇතිවෙනවා. අවහිර බාධා පවතුනනම් ඒවා දුරු වෙනවා. උසස්වීම් බලාපොරොත්තුවෙන් සිටින අයගේ බලාපොරොත්තු ඉටු කරගැනීමට හැකි වෙනවා. 2019.03.07 පටන් සුබ පල වර්ධනය වෙනවා.
ගෘහ ජීවිතය: මානසික පීඩා, අසමගිකම් පැවතුණා නම් ඒවා දුරුවෙනවා. මානසික ප්‍රබෝධය ඇතිවෙනවා. බලාපොරොත්තු බොහොමයක් ඉටු කරගැනීමට හැකි වෙනවා. ඥාති, හිත මිතුරු සම්බන්ධතා දැඩි වෙනවා. ගේදොර දේපළ ආදියේ දියුණුවක් ඇතිවෙනවා. වාසනා බලය වර්ධනය වෙනවා. විවාහ කටයුතුවලට එල්ල වූ බාධාවන් දුරු වෙනවා.
සෞක්‍යය: අසනීප පීඩා පැවතුණා නම් සුව අතට හැරෙනවා. ශරීර සෞක්‍යය යහපත් වෙනවා.

වෘශ්චික ලග්නය.
වෘශ්චික ලග්නය හිමි ඔබේ කේන්දරයේ පළමු භාවය වෙත ගුරු ගමන් කරනවා.ගුරු පළමු භාවය වෙත ගමන් කිරීම එතරම් සුබදායක නෑ.
ධනය: අනවශ්‍ය වියදම් ඉහළ යනවා. නොදැනුවත්කමින් හෝ දුරදිග නොබලා කරන කටයුතු හේතුවෙන් ධන හානි සිදුවෙනවා. ආර්ථිකයේ අඩාල වීමක් සිදුවෙනවා.
රැකි රක්ෂා: රැකියා කටයුතු සම්බන්ධයෙන් සතුට තෘප්තිය අඩු වෙනවා. බාධක අවහිර එල්ල වෙනවා. තත්වය පහත වැටීමටද ඉඩ තිබෙනවා. රැකියා වෙනසකටද ඉඩ තිබෙනවා.
ගෘහ ජීවිතය: මානසික සහනය වරින්වර බිඳ වැටෙනවා. කරදරයක් සිදුවේයැයි සිතට නිතර බියක් ඇතිවෙනවා.  මානසික විවේකය අඩු වෙනවා. ගෙදරදොරේ සමගිය බිඳ වැටීමට ඉඩ තිබෙනවා. නීති ප්‍රශ්නයක් මතුවීමට ඉඩ තිබෙන බැවින් සැළකිලිමත් විය යුතුයි. ගමන් බහුල වෙනවා. සිතට කළකිරීම් කනස්සලු ගති ඇතිවෙනවා. ගෞරවයට හානි සිදුවීමට ඉඩ තිබෙන බැවින් බුද්ධිමත්ව කටයුතු කළ යුතුයි.
සෞක්‍යය: ශරීර සෞක්‍යය සම්බන්ධයෙන් සැළකිලිමත් විය යුතුයි. වැටීම්, අනතුරුවලට ඉඩ තිබෙනවා. පවතින අසනීප පීඩා වර්ධනය වීමටද ඉඩ තිබෙනවා.

ධනු ලග්නය.
ධනු ලග්නය හිමි ඔබේ කේන්දරයේ දොළොස්වැනි භාවයට ගුරු ගමන් කරනවා. ගුරු මාරුව හේතුවෙන් ඔබට මිශ්‍ර පල උදාවෙනවා.
ධනය: අධික වියදම්, ධන හානි නිෂ්පල වියදම්වලට ඉඩ තිබෙනවා. පවුලේ කෙනෙක් වෙනුවෙන් මෙන්ම පොදු කටයුතු හෝ ආගමික කටයුතු වෙනුවෙන්ද මුදල් වැය වෙන්න පුළුවන්.
රැකි රක්ෂා: රැකියා කටයුතුවල තරමක පසුබෑමක් ඇතිවීමට ඉඩ තිබෙනවා. පදිංචි ප්‍රදේශයෙන් හෝ උපන් රටින් බැහැර වී රැකියා කටයුතුවල යෙදෙන අයට අසුබ බලපෑම් අඩු වෙනවා. විදේශ රැකියා සඳහා යොමු වීමට මෙම කාලය සුබදායකයි. අනුමානයට කරන ව්‍යාපාරවලින් වැළකී සිටීම වැදගත් වෙනවා.
ගෘහ ජීවිතය: අන්‍යයන් වෙනුවෙන් වැඩිපුර වෙහෙසීමට සිදුවෙනවා. ස්ථාන වෙනසකටද ඉඩ තිබෙනවා. දුර බැහැර ගමන් බහුල වෙනවා. පුණ්‍ය කටයුතුවලට සම්බන්ධවීමට සිදුවෙනවා. ඥාති හිත මිත්‍රාදීන් තරමක් දුරස් වෙනවා. අනියම් සම්බන්ධතා හේතුවෙන් ගැටළු කරදර මතුවීමට ඉඩ තිබෙනවා. මෙම කාලය තුළ කරන වැඩ කටයුතුවල ප්‍රතිපල නිවැරදිව ලැබෙන්නේ 2020.03.21 දිනෙන් පසුවයි.

සෞක්‍යය: නින්ද නොයාම, දෙපා ආශ්‍රිත වේදනා පීඩා, කන් ආශ්‍රිත අසනීප ආදියට ඉඩ තිබෙනවා.

මකර ලග්නය.
මකර ලග්නය හිමි ඔබේ කේන්දරයේ එකොළොස් වැනි භාවයට ගුරු ගමන් කරනවා. ගුරු එකොළොස් වැනි භාවයට ගමන් කිරීම සුබදායකයි.
ධනය: සෙනසුරුගේ ඒරාෂ්ටක අපල හේතුවෙන් පසුබෑමට ලක්වෙමින් තිබෙන ආර්ථිකය ගුරු මාරුවත් සමග තරමක් යහපත් අතට හැරෙනවා. ලැබීම් වර්ධනය වෙනවා. 2019.03.07 පටන් ආර්ථිකයේ සතුටුදායක තත්වයක් ඇතිවෙනවා.
රැකි රක්ෂා: රැකියා කටයුතුවල ප්‍රගතියක් ඇතිවෙනවා. උද්යෝගය උනන්දුව වර්ධනය වෙනවා. රැකියාව සම්බන්ධයෙන් අවහිර බාධක පැවතුණා නම් ඒවා දුරුවෙනවා. ව්‍යාපාර ඇරඹීමට යහපත් වටපිටාවක් සැකසෙනවා. කරගෙන යන ව්‍යාපාරවල දියුණුවක් ඇතිවෙනවා.
ගෘහ ජීවිතය: සිතට සතුට සැනසීම ඇතිවෙනවා. සෙනසුරුගේ ඒරාෂ්ටක අපල හේතුවෙන් එල්ල වෙමින් පැවති බාධක අවහිර ගුරු මාරුව හේතුවෙන් යම් තරමකට යටපත් වෙනවා. අන්‍යයන්ගෙන් උදව් උපකාර හිමිවෙනවා. උසස් බලවත් අය හඳුනාගැනීමට හැකි වෙනවා. බලාපොරොත්තු බොහොමයක් ඉටු කරගැනීමට හැකි වෙනවා.
සෞක්‍යය: ශරීර සෞක්‍යය සම්බන්ධයෙන් සැළකිලිමත් විය යුතුයි. වැටීම්, අනතුරුවලට ඉඩ තිබෙනවා.

කුම්භ ලග්නය.
කුම්භ ලග්නය හිමි ඔබේ කේන්දරයේ දස වැනි භාවයට ගුරු ගමන් කරනවා. ගුරු මාරුව හේතුවෙන් ඔබට මිශ්‍ර පල උදාවෙනවා.
ධනය: ආර්ථිකයට සැළකිය යුතු තරමේ බලපෑමක් එල්ල වන්නේ නෑ. ආර්ථිකය සාමාන්‍ය පරිදි පවත්වාගැනීමට හැකි වෙනවා. විශේෂ ධන ලාභ බලාපොරොත්තු වීමට අපහසුයි.
රැකි රක්ෂා: රැකියා කටයුතු කෙරෙහි තරමක බාධක අවහිර එල්ල වන නමුත් බරපතළ කරදරවලට ඉඩ කඩ නෑ. රැකියා කටයුතු සම්බන්ධයෙන් උද්යෝගය උනන්දුව තරමක් අඩු වෙනවා. කරගෙන යන ව්‍යාපාරවල සුළු පසුබෑමක් ඇතිවෙන්න පුළුවන්.
ගෘහ ජීවිතය: ගෙදරදොර කටයුතු වෙනුවෙන් වැඩිපුර වෙහෙසීමට සිදුවෙනවා. විවේකය අඩු වෙනවා. දේපළ ගේදොර ආදියේ යම් දියුණුවක් ඇතිවෙනවා. නිවාස සෑදීමට මෙම කාලය සුබදායකයි. කෙසේ වෙතත් මානසික සතුට සහනය වරින්වර බිඳ වැටෙනවා. ඥාතියෙක් සමග විරසකතාවයක් ඇතිවීමට ඉඩ තිබෙනවා. සතුරු බලපෑම් ඇතිවීමට ඉඩ තිබෙන බැවින් කල්පනාකාරී විය යුතුයි.
සෞක්‍යය: දණිස්, දෙපා, සන්ධි, තුනටිය ආශ්‍රිත වේදනා පීඩා මතුවීමට ඉඩ තිබෙනවා.

මීන ලග්නය.
මීන ලග්නය හිමි ඔබේ කේන්දරයේ නම වැනි භාවයට ගුරු ගමන් කරනවා. ගුරු නම වැනි භාවයට ගමන් කිරීම ඔබට සුබදායකයි.
ධනය: ආර්ථිකයේ විශේෂ දියුණුවක් ඇතිවෙනවා. තැන්පත් ධනය වර්ධනය වෙනවා. ලැබීම් ඉහළ යනවා. ණය තුරුස් වී සිටියා නම් ඒවායින් නිදහස් වීමට හැකි වෙනවා.
රැකි රක්ෂා: රැකියා කටයුතුවල විශේෂ ප්‍රගතියක් ඇතිවෙනවා. උද්යෝගය උනන්දුව ඇතිවෙනවා. උසස්වීම් වරප්‍රසාද බලාපොරොත්තුවෙන් සිටින අයගේ පැතුම් ඉටු වෙනවා. කරගෙන යන ව්‍යාපාර දියුණු වෙනවා. ව්‍යාපාර ඇරඹීමේ බලාපොරොත්තුවෙන් සිටින අයට ඒ සඳහා අවස්ථා උදාවෙනවා.
ගෘහ ජීවිතය: ගෙදරදොරේ සතුට සැනසුම ඇතිවෙනවා. ගේදොර, දේපළ ආදියේ දියුණුවක් ඇතිවෙනවා. අඩාල වී තිබුණු කටයුතු ක්‍රියාත්මක කරගැනීමට හැකිවෙනවා. අසමගිකම්,අමනාපකම් පැවතුණා නම් ඒවා දුරු වෙනවා. අන්‍යයන් අතර කැපී පෙනෙන තත්වයක් ඇතිවෙනවා. අන්‍යයන්ගෙන් සැළකිලි, උපකාර හිමි වෙනවා.
සෞක්‍යය: යහපත් සෞක්‍ය තත්වයක් පවත්වාගැනීමට හැකි වෙනවා. පැවති අසනීප සුව අතට හැරෙනවා.

ජ්‍යොතිෂවේදී සංජීව කුළුපන බණ්ඩාර

සිකුරු මාරුව

ග්‍රහ ලොව දීප්තිමත්ම ග්‍රහයා වන සිකුරු 2018 සැප්තැම්බර් මස පළමු වෙනි සෙනසුරාදා ශ්‍රී ලංකාවේ වේලාවෙන් රාත්‍රී 11.32 ට තුලා රාශියට ගමන් කිරීමට නියමිතය. ස්ත්‍රී කාරක ග්‍රහයෙක් ලෙස සැළකෙන සිකුරු සකල කලාවන්ට මෙන්ම ලෞකික සැප සම්පත්වලට අධිපති ග්‍රහයාය. තුලා රාශිය සිකුරුට අයත් රාශියකි. ඒ අනුව තුලා රාශියේදී සිකුරු ස්වක්‍ෂේත්‍ර බලයට පත්වේ. පංච මහා පුරුෂ යෝග අතරින් එකක් වූ "මාලවි" නම් යෝගය උදා කරන්නේ සිකුරු ග්‍රහයාය. 2018 සැප්තැම්බර් මස පළමු වෙනිදා රාත්‍රී 11.32 පටන් 2019 ජනවාරි මස පළමු වෙනිදා රාත්‍රී 08.43 තෙක් සිකුරු තුලා රාශියේ කල් ගෙවීමට නියමිතය. මෙවර සිකුරු ග්‍රහයා මෙතරම් දීර්ඝ කාලයක් තුලා රාශියේ කල් ගෙවීමට හේතුව ඔක්තෝබර් 07 වෙනිදා පටන් නොවැම්බර් 17 වෙනිදා තෙක් වක්‍ර ගමනේ යෙදීමයි. ලෞකික සැප සම්පත් කෙරෙහි බලපවත්වන ඉතාමත් සුබදායක ග්‍රහයෙක් වූ සිකුරු තුලා රාශියට ගමන් කිරීම ජ්‍යොතිෂයට අනුව ඉතාමත් වැදගත් සිදුවීමකි. සිකුරු තුලා රාශියේ කල් ගෙවන කාල සීමාව තුළ මේෂ,කටක,තුලා,මකර යන ලග්න හිමිව උපත ලබන දරුවන්ට මාලවි නම් වූ ඉතාමත් සුබදායක යෝගය හිමි වනු ඇත. මෙය අලංකාර ගේදොර, යානවාහන, ධනය හා බොහෝ සැප සම්පත් ප්‍රදානය කරන බලවත් ග්‍රහ යෝගයක් ලෙස සැළකේ.
විවාහ කටයුතු, ව්‍යාපාර කටයුතු, නිවාස සෑදීම, කලා කටයුතු, ආහාර පාන සමබන්ධ කටයුතු ආදී බොහොමයක් සම්බන්ධයෙන් ඉතාමත් බලගතු නැකත් උදා වන කාලයකි.
සිකුරු තුලා රාශිගතවී බලවත් වීම හේතුවෙන් ලග්න රැසකට සුබ පල හිමි වේ. සිකුරු තුලා රාශියට ගමන් කිරීම ඒ ඒ ලග්නයට බලපාන ආකාරය විමසා බලමු.

මේෂ ලග්නය.

සිකුරු ගමන් කරන්නේ මේෂ ලග්නය හිමි ඔබේ කේන්දරයේ හත්වැනි භාවයටයි. සිකුරු මාරුව හේතුවෙන් ඔබට සුබ පල අත් වෙනවා. ආර්ථිකයේ ප්‍රගතියක් අත් වෙනවා. අතේ මිටේ මුදලක් ඉතිරි කරගැනීමට හැකි වෙනවා. හිත මිතුරු බැඳීම් වර්ධනය වෙනවා. අන්‍යයන්ගෙන් සැළකිලි උපකාර හිමි වෙනවා. අන්‍යයන් අතර කැපී පෙනෙන තත්වයක් ඇති වෙනවා. විවාහ කටයුතු සම්බන්ධයෙන් තීන්දු තීරණ ගැනීමට මේ කාලය ඉතාමත් සුබදායකයි. 

හවුලේ කරන කටයුතු වලින් ලාභ ලැබෙනවා. තම වැඩ කටයුතුවලට අන්‍යයන්ගේ සහයෝගය හිමි වෙනවා. සිතට සතුට සැනසීම ඇති වෙනවා. කරන කියන කටයුතු බොහොමයක් සාර්ථක කරගැනීමට හැකි වෙනවා. 

පොදු කටයුතු, දේශපාලන කටයුතු, සමිති සමාගම් ආශ්‍රිත කටයුතුවල යෙදෙන අයට තනතුරු වරප්‍රසාද හිමි වෙන්නත් ඉඩ තියෙනවා.

වෘෂභ ලග්නය.

සිකුරු ගමන් කරන්නේ වෘෂභ ලග්නය හිමි ඔබේ කේන්දරයේ හයවැනි භාවයටයි. සිකුරු මාරුව හේතුවෙන් ඔබට සැළකිය යුතු තරම් සුබ පල හිමි වන්නේ නෑ.

කරන කියන කටයුතුවලට බාධක එල්ල වෙනවා. වැඩ කටයුතු සාර්ථක කරගැනීමට කීප වාරයක් උත්සාහ කිරීමට සිදුවෙනවා. උත්සාහයේ හා මහන්සියේ තරමට සිතට ගැළපෙන තරමේ ප්‍රතිපල ලබාගැනීමට අපහසු වෙනවා. මානසික සතුට ප්‍රබෝධය වරින් වර අඩු වෙනවා. 

අන්‍යයන් සමග කටයුතු කිරීමේදී සැළකිලිමත් විය යුතුයි. අසත්‍ය චෝදනා එල්ල වීමට ඉඩ තිබෙනවා. 

ශරීර සෞක්‍යය සම්බන්ධයෙන් ද සැළකිලිමත් විය යුතුයි. ලෙඩ රෝගවලට ඔරොත්තු දීමේ ශක්තිය අඩු වෙනවා. සුළු අසනීපයක් වැළඳුනද ලබාගන්නා ප්‍රතිකාරවලින් ඉක්මන් සුවයක් නොලැබීමට ඉඩ තිබෙනවා.

මිථුන ලග්නය.

මිථුන ලග්නය හිමි ඔබේ කේන්දරයේ පස්වැනි භාවයට සිකුරු ගමන් කිරීම සුබදායකයි. 

ආදායම් වර්ධනය වෙනවා. ආර්ථිකයේ විශේෂ ප්‍රගතියක් ඇති වෙනවා. හිත මිතුරු සම්බන්ධතා වර්ධනය වෙනවා. හිත මිත්‍රාදීන්ගෙන් උදව් උපකාර හිමි වෙනවා. පොදු කටයුතු, දේශපාලන කටයුතු, සමිති සමාගම් ආශ්‍රිත කටයුතුවල අයට ඉතාමත් සුබදායකයි. තනතුරු වරප්‍රසාද හිමි වෙනවා.

විවාහය සම්බන්ධයෙන් තීන්දු තීරණ ගැනීමට මෙන්ම අලුත් ව්‍යාපාර ඇරඹීමට, අලුත් වැඩ කටයුතුවලට අත ගැසීමට මේ කාල සීමාව ඉතාමත් සුබදායකයි. බලාපොරොත්තු බොහොමයක් ඉටු කරගැනීමට හැකි වෙනවා. විනෝදය, සැප පහසුව හා අලංකාරය කෙරෙහි ඇල්ම උනන්දුව ඇති වෙනවා. අන්‍යයන් අතර කැපී පෙනෙන තත්වයක් ඇති වෙනවා. 

ව්‍යාපාර කටයුතුවල යෙදෙන මිථුන ලග්න හිමියන්ට මෙම කාල සීමාව ඉතාමත් සුබදායකයි.

කටක ලග්නය.

කටක ලග්නය හිමි ඔබේ කේන්දරයේ සිව්වැනි භාවයට සිකුරු ගමන් කිරීම සුබදායකයි. සිව්වැනි භාවය සිකුරු ග්‍රහයාට දිග්බල ස්ථානය ලෙස සැළකෙනවා. ලැබීම් වර්ධනය වන අතර රැකියා කටයුතුවල විශේෂ ප්‍රගතියක් ඇති වෙනවා. කරගෙන යන ව්‍යාපාර සාර්ථක වෙනවා. අලුත් ව්‍යාපාරවලට අත ගැසීමටද   ගේදොර සෑදීමටද මෙම කාලය සුබදායකයි. ගෙදර දොරේ සතුට සමගිය ඇති වෙනවා. දුරස්ව පැවති ඥාති සම්බන්ධතා නැවත දැඩි වෙනවා. සමාජයේ අවදානයට ලක් වෙනවා. කලක් තිස්සේ මිලදී ගැනීමට බලාපොරොත්තුවෙන් සිටි විශේෂ යමක් ලබාගැනීමට හැකි වෙනවා. අසනීප පීඩාවන් පැවතුනා නම් ඒවායින් තරමක හෝ සහනයක් ලැබෙනවා.

සිංහ ලග්නය.

සිකුරු ගමන් කරන්නේ සිංහ ලග්නය හිමි ඔබේ කේන්දරයේ වික්‍රමස්ථානය වූ තෙවැනි භාවයටයි. සිකුරු මාරුව හේතුවෙන් ඔබට තරමක සුබ පල අත් වෙනවා. කරන කියන කටයුතු උනන්දුවෙන් හා උද්‍යෝගයෙන් යුතුව කරගෙන යාමට හැකි වෙනවා. රැකියා කටයුතු හා ලැබීම් සම්බන්ධයෙන්ද බොහෝ දුරට සුබදායකයි. 

කලක පටන් පැවති සතුරු බලපෑමක් යටපත් වී යන බව පෙනෙනවා. 

සහෝදරාදීන් සමග සම්බන්ධය දැඩි වෙනවා. තම වැඩ කටයුතුවලට සහෝදරාදීන්ගේ සහයෝගය හිමි වෙනවා. විනෝදය කෙරෙහි ඇල්ම උනන්දුව වැඩි වෙනවා. විරුද්ධ ලිංගිකයන් හේතුවෙන් ගැටළු කරදර මතුවීමට ඉඩ තිබෙන බැවින් සැළකිලිමත් විය යුතුයි.

කන්‍යා ලග්නය.

සිකුරු ගමන් කරන්නේ කන්‍යා ලග්නය හිමි ඔබේ කේන්දරයේ ධනස්ථානය වූ දෙවැනි භාවයටයි. සිකුරු මාරුව ඔබට සුබදායකයි. ආර්ථිකයේ විශේෂ ප්‍රගතියක් ඇති වෙනවා. අනපේක්ෂිත ධන ලාභවලට ඉඩ තිබෙනවා. රැකියා කටයුතු සාර්ථකව කරගෙන යාමට හැකි වෙනවා. කතාවෙන් විශේෂ ලාභ ප්‍රයෝජන හිමි වෙනවා. විවාහ කටයුතු සම්බන්ධයෙන් තීන්දු තීරණ ගැනීමට, ව්‍යාපාර ඇරඹීමට, ගෙවල් සෑදීමට, කලා කටයුතුවලට අත ගැසීමට මේ කාල සීමාව ඉතාමත් සුබදායකයි. කරගෙන යන ව්‍යාපාර දියුණුවට පත් වෙනවා. සෙම් අසනීප මතුවීමට ඉඩ තිබෙන බැවින් සැළකිලිමත් විය යුතුයි.

තුලා ලග්නය.

සිකුරු ගමන් කරන්නේ තුලා ලග්නය හිමි ඔබේ කේන්දරයේ පළමු භාවයටයි. සිකුරු පළමු භාවයට ගමන් කර ස්වක්‍ෂේත්‍ර වීම ඉතාමත් සුබදායකයි. සිකුරු මාරුවෙන් ඉහළම සුබ පල ලැබෙන්නේ තුලා ලග්නය හිමි ඔබටයි. සිතට මෙන්ම කයටද සැපවත් කාලයක් වෙනවා. ප්‍රීතියෙන් යුතුව කල් ගෙවීමට හැකි වෙනවා. විනෝද වීමට අවස්ථා උදා වෙනවා. ලැබීම් යහපත් වෙනවා. රැකියා කටයුතු අවහිරයකින් තොරව කරගෙන යාමට හැකි වෙනවා. කරගෙන යන ව්‍යාපාර සාර්ථක වෙනවා. අලුත් ව්‍යාපාරවලට අත ගැසීමටද මෙම කාල සීමාව සුබදායකයි. කලා කටයුතු, රූපලාවන්‍ය කටයුතු, ඔසු සල්, හෝටල්, නිවාඩු නිකේතන ආදී කටයුතුවලට අතගැසීමට විශේෂයෙන් සුබදායකයි. විවාහ කටයුතු සම්බන්ධයෙන් තීරණ ගැනීමට මෙන්ම ගෙවල් සෑදීමට ද මෙම කාලය සුබදායකයි. විනෝද ගමන්, ප්‍රිය සම්භාෂණ ආදියට සම්බන්ධ වීමට අවස්ථා උදා වෙනවා. අඹු සැමියන් අතර සතුට සමගිය ඇති වෙනවා.

වෘශ්චික ලග්නය.

සිකුරු ගමන් කරන්නේ වෘශ්චික ලග්නය හිමි ඔබේ කේන්දරයේ වැයස්ථානය වූ දොළොස්වැනි භාවයටයි. සිකුරු දොළොස්වැනි භාවයට ගමන් කිරීම එතරම් සුබදායක නෑ. ධන හානි, නිෂ්පල වියදම්, අධික වියදම්වලට ඉඩ තිබෙන බැවින් ආර්ථිකය ප්‍රවේශමෙන් මෙහෙයවීම වැදගත් වෙනවා. රැකියා කටයුතු සම්බන්ධයෙන් සැළකිය යුතු තරමේ ගැටළුවක් ඇති වන්නේ නෑ. 

ඇසුරු කරන හිත මිත්‍රාදීන් තරමක් දුරස් වීමට ඉඩ තිබෙනවා. සුළු ගමන් බිමන් බහුල වෙනවා. විවාහ යෝජනාද දුරස් වීමට ඉඩ තිබෙනවා. විවාහ කටයුතු සම්බන්ධයෙන් ස්ථිර තීරණයකට එළඹීමට අපහසු වෙනවා.

ධනු ලග්නය.

සිකුරු ගමන් කරන්නේ ධනු ලග්නය හිමි ඔබේ කේන්දරයේ අයස්ථානය වූ එකොළොස් වැනි භාවයටයි. සිකුරු තුලා රාශියට ගමන් කිරීම හේතුවෙන් ඔබට සුබ පල අත් වෙනවා. ලැබීම් වර්ධනය වෙනවා. අනපේක්ෂිත ධන ලාභවලටද ඉඩ තිබෙනවා. රැකියා කටයුතු අවහිරයකින් තොරව කරගෙන යාමට හැකි වෙනවා.

අලුත් ව්‍යාපාරවලට අතගැසීමට මෙම කාලය ඉතාමත් සුබදායකයි. කරගෙන යන ව්‍යාපාර සාර්ථක වෙනවා.කලා කටයුතුවලට අතගැසීමට මෙම කාල සීමාව විශේෂයෙන් සුබදායකයි. 

පොදු කටයුතු, සමිති සමාගම් ආශ්‍රිත කටයුතු, දේශපාලන කටයුතු ආදියේ නියැලෙන ධනු ලග්න හිමියන්ට මෙම කාල සීමාව ඉතාමත් සුබදායකයි.

මකර ලග්නය.
සිකුරු ගමන් කරන්නේ මකර ලග්නය හිමි ඔබේ කේන්දරයේ කර්මස්ථානය වූ දසවැනි භාවයටයි. සිකුරු මාරුව හේතුවෙන් ඔබට සුබ පල උදා වෙනවා. ඒරාෂ්ටක අපල මධ්‍යයේ කල් ගෙවන ඔබට සිකුරු මාරුව එක්තරා ආකාරයක අස්වැසිල්ලක් වෙනවා.
රැකියා කටයුතුවල ප්‍රගතියක් ඇති වෙනවා. අලුත් ව්‍යාපාරවලට අතගැසීමට මෙම කාලය සුබදායකයි. සෙනසුරු දොළොස්වැනි භාවයේ ඒරාෂ්ටකව ගමන් කරන බැවින් වියදම් පාලනය කරගැනීමට අසීරු වෙනවා.
ගෙවල් සෑදීමට, නව නිවෙස්වලට ගෙවදීමට, විවාහ කටයුතුවලට මෙම කාලය සුබදායකයි.
විනෝද වීමට අවස්ථා උදා වෙනවා. විරුද්ධ ලිංගිකයින් ඇසුරු කිරීමේදී සැළකිලිමත් විය යුතුයි.

කුම්භ ලග්නය.
සිකුරු ගමන් කරන්නේ කුම්භ ලග්නය හිමි ඔබේ කේන්දරයේ භාග්‍යස්ථානය වූ නව වැනි භාවයටයි. සිකුරු මාරුව ඔබට සුබදායකයි.
ලැබීම වර්ධනය වෙනවා. යහපත් ආර්ථිකයක් පවත්වාගැනීමට හැකි වෙනවා. රැකියා කටයුතු අවහිරයකින් තොරව කරගෙන යාමට හැකි වෙනවා. කරගෙන යන ව්‍යාපාර සාර්ථක වෙනවා. අලුත් ව්‍යාපාරවලට අතගැසීමට මෙම කාල සීමාව සුබදායකයි.
ප්‍රීතිදායක උත්සව අවස්ථාවන්ට සහභාගී වීමට අවස්ථා උදා වෙනවා. විනෝද ගමන්වල යෙදීමට හැකි වෙනවා.
මව් පිය උරුමයන් සම්බන්ධයෙන් ගැටළු පැවතුණා නම් ඒවා නිරවුල් කරගැනීමට හැකි වෙනවා.

මීන ලග්නය.
සිකුරු ගමන් කරන්නේ මීන ලග්නය හිමි ඔබේ කේන්දරයේ අට වැනි භාවයටයි. සිකුරු මාරුව හේතුවෙන් ඔබට තරමක සුබ පල හිමි වෙනවා. ආර්ථිකය යහපත් වෙනවා. අතේ මිටේ මුදලක් ඉතිරි කරගැනීමට හැකි වෙනවා. රැකියා කටයුතු බාධාවකින් තොරව කරගෙන යාමට හැකි වෙනවා. කරගෙන යන ව්‍යාපාරද බොහෝ දුරට සාර්ථක වෙනවා. විනෝදය කෙරෙහි වැඩි පුර සිත පෙළඹෙනවා. ඉක්මනින් සතුටු වීමට කාරණා යෙදුණද ඒ සමගම කනස්සලු ගතිද ඇති වෙනවා.
ප්‍රේම සම්බන්ධතා ඇතිවීමට ඉඩ තිබෙන නමුත් ඇතිවන සම්බන්ධතා කල් පවත්වාගැනීමට අපහසු වෙනවා. අසනීප පීඩා පැවතුණා නම් තරමක හෝ සහනයක් මෙම කාලය තුළ ලැබෙනවා.
වරින් වර සෙම් පීඩා ඇතිවෙනවා.

චන්ද්‍රග්‍රහණයෙන් දින කීපයකට පසු සූර්යග්‍රහණයක්.

2018 අගෝස්තු මස 11 වෙනි සෙනසුරාදා ශ්‍රී ලංකාවේ වේලාවෙන් ප.ව 03. 17 ට අර්ධ සූර්යග්‍රහණයක් සිදුවීමට නියමිතය. සූර්යග්‍රහණය සිදුවන්නේ සඳුට අයත් කටක රාශියේ ය. ඒ වන විට ගුරු හිමි ධනු ලග්නයත් අස්ලිස නැකතේ තෙවැනි පාදයත් උදා වී පවතියි.
මීට පෙර ජූලි මාසයේ 13 වෙනිදා අර්ධ සූර්යග්‍රහණයක් සිදුවුණු අතර එම මාසයේම 28 වෙනිදා පූර්ණ චන්ද්‍රග්‍රහණයක් සිදුවිය. ඉන් දින කීපයකට පසු සිදුවන මෙම අර්ධ සූර්යග්‍රහණය ජ්‍යොතිෂයට අනුව ඉතාමත් වැදගත් සිදුවීමකි. 
සූර්යග්‍රහණයක් යනු හිරු චන්ද්‍රයාගෙන් ආවරණය වීමයි. හිරු චන්ද්‍රයාගෙන් පූර්ණ වශයෙන් ආවරණය වීම පූර්ණ සූර්යග්‍රහණයක් ලෙසත්, අර්ධ වශයෙන් ආවරණය වීම අර්ධ සූර්යග්‍රහණයක් ලෙසත් හැඳින්වේ. සූර්යග්‍රහණ සිදුවන්නේ අමාවක දිනවලදී ය. අගෝස්තු 11වෙනිදාද අමාවක දිනයකි.
වසරේ අවසන් ග්‍රහණය වන මෙම අර්ධ සූර්යග්‍රණය හේතුවෙන් නොවැම්බර් මස මැද භාගය තෙක් කාලය තුළ භූමි කම්පා, මුහුදු අනතුරු, සුළි සුළං ආදී විපත් පිලිබඳව ලෝකයේ නොයෙක් දෙසින් වාර්තා වනු ඇත.
කුම්භ ලග්නය හිමි ලංකා කේන්දරයට අනුව මෙම සූර්යග්‍රහණය සිදුවන්නේ හය වෙනි භාවයේ ය. බොහෝ දෙනා රටේ ආරක්ෂාව පිළිබඳව වැඩි වශයෙන් කතා බහ කරනු ඇත.
වසංගත රෝග පීඩා පැතිරී යාම හේතුවෙන් බොහෝ ප්‍රදේශවල ජනතව පීඩාවට පත්වේ. ඒ අතර සෞක්‍ය ක්‍ෂේත්‍රයේ කටයුතුද වරින්වර අඩාල වේ.
වැසි රහිත කාලගුණය හේතුවෙන් ඇතැම් ප්‍රදේශවල කෘෂිකාර්මික කටයුතු අඩාල වන අතර ජලය නොමැතිකම හේතුවෙන් ජනතාවද පීඩාවට පත්වනු ඇත.
මුහුදු අනතුරු සිදුවීමේ ඉඩකඩ පවතින බැවින් ධීවර ප්‍රජාව හා නාවික කටයුතුවල නියැලෙන පිරිස් සැළකිලිමත් විය යුතුය.
ආගමික නායකයින්ට අපල බලපෑම් එල්ල වන අතර ආගමික ගැටුම් ඇතිවීමේ ඉඩකඩ ද පවතියි.
කාන්තාවන්ට කරදර බහුල වේ. ප්‍රබල කාන්තාවකට මාරක අපලයක් එල්ල වේ.
මෙවර සූර්යග්‍රහණය සිදුවන කටක රාශියට සප්තමව නොවැම්බර් මස 6 වෙනිදා තෙක් කුජ ග්‍රහයා මකර රාශියේ ගමන් කරන බැවින් ග්‍රහණයේ අසුබ බලපෑම් වඩාත් වර්ධනය වේ.

ජ්‍යොතිෂවේදී, ගුප්ත වෛද්‍ය
සංජීව කුළුපන බණ්ඩාර

සතට සෙත සලසන මතු බුදු වන නාථ දෙවියෝ.

නාථ දෙවියන් තුසිත නම් දෙව්ලොව වැඩ වසන බවත් මතු භවයක කේතුමතී නම් නුවර උපත ලබා, එම රාජධානියේ චක්‍රවර්ති රජුගේ අග්‍ර පුරෝහිත ලෙස බ්‍රාහ්මණයෙකුට දාව ඉපදී ලෞකික සැප සම්පත් හැර දමා බුද්ධත්වයට පත් වන බවත්, දස දහසක් සක්වල දෙව් බඹුන්ගේ සාධු නාදය මැද තුන් ලොව වෙව්ළවා ධර්මය දේශනා කර නිවන් දොරටු විවර කරන බවත් නාථ දේව කන්නලව්වේ සඳහන් වේ.
බෞද්ධයන්ගේ ඉමහත් ගෞරවාදරයට පාත්‍ර වූ උපශාන්ත දෙවිකෙනෙක් වන නාථ දෙවියන් උදෙසා කැප වූ දේවාල බොහොමයක් ලංකාවේ නොයෙක් ප්‍රදේශවල තිබුණු බව ඉතිහාසයේ සඳහන් වෙයි. තිසර, ගිරා, කොවුල් ආදී සංදේශ කාව්‍යයන්හි ද නාථ දෙවියන් පිළිබඳව සඳහන් වෙයි. ලංකා සම්බුද්ධ ශාසනයට හා රජුට නාථ දෙවියන්ගේ රැකවරණය හා ආශීර්වාදය ලබාදීම සඳහා තොටගමුවේ සිරි රාහුල හිමියන් වෙත ජයවර්ධනපුර කෝට්ටේ සිට යැවෙන හසුනක් ලෙස ගිරා සංදේශය සැළකේ.
පුරාණ රජවරුන් තම රාජ්‍යයන් සුරක්ෂිත කරගැනීම සඳහා නාථ දෙවියන්ගේ පිහිට අපේක්ෂා කළ බව කියැවේ. මහනුවර ප්‍රදේශයේ නාථ දේවාල කීපයක්ම පවතී. තොටගමුව, වේගිරිය, පස්ගම, උරුලෑවත්ත, මහනුවර, බෙල්ලන්විල ආදී සිද්ධස්ථානයන්හි ද නාථ දේවල ඇත. මහනුවර ශ්‍රී දළදා පෙරහැරට අනතුරුව ගමන් කරන්නේ නාථ දේවාල පෙරහැරයි.

ශ්‍රී නාථ දේව කන්නලව්ව

සාධු සාධු සාධු
දොහොත් මුදුන් තබා වඳිමින් දෙපා නමැද වඳිමින් හුරු අත් නුහුරු කර වඳිමින් නුහුරු අත් හුරු කර වඳිමින් සැලකර සිටින්නේ සුභ්‍ර වර්ණ කීර්ති ධාරාවෙන් බැබලි බැබලී මෙත්තා කරුණා මුදිතා උපේක්ෂා යන සතර බ්‍රහ්ම විහරණයෙන් තුසිතපුර ශීල සමාධීව වැඩ සිටීම අනාථනාථ වූ නාථ දිව්‍ය රාජෝත්තමයාණන් වහන්ස ! ඔබ වහන්සේට මෛත්‍රියෙන් කරුණාවෙන් ආරාධනා කර කියා සිටින කන්නලව්ව කරුණාවට ගෙන බලා වදාරා මොවුන්ගේ සකලාරිෂ්ට නිවාරණය පිණිස සෙත් ශාන්ති කර ශුභ මංගල්‍යයකට වරන් දී වැඩවදාරණ සේක්වා.
තවද මතු මෛත්‍රී බුදු බවට පෙරුම් පුරාගෙන දස බෝධි සම්භාරයකින් පළමුවැනි වන්නා වූ දස පාරමී ධර්මයන් පුරන්නා වූ උතුම් වූ බුද්ධාංකුර නාථ දිව්‍යරාජෝත්තමයාණන් වහන්ස ! ශාන්ත ශ්‍රීයෙන් දස දිගත ඒකාලෝක කරමින් තුන් තල සත්වයින්ගේ දුක්ඛාන්ධකාර උත්තුංග දිව නෙතින් බලා මෛත්‍රී කරුණා ලෝකයෙන් විධ්වංශනය කරවා අනේක දිව්‍ය විලාස ශ්‍රීයෙන් තුසිතපුර එකලු කර වැඩ වසන ඔබ දෙවි හමුදුරුවාණන් වහන්සේට නමස්කාරයෙන් කියා සිටින කන්නලව්ව කරුණාවට ගෙන මෙවැනි මේ පංචස්කන්ධයන්ට වැද පැමිණියා වූ දෝෂාන්ධාකර දුරින්ම දුර හැර අභිමතාර්ථ සාධනයෙන් සන්තුෂ්ටියට පත්කර දෙන සේක්වා.
තවද එන මෙත්තේ මතු නාග ශ්‍රී බෝධියට පිටදී අසූඅට රියන් බුදු බඳකින් ලීලෝපේතව හිරු දහසකින් සඳු දහසකින් ඝනාන්ධාකර මැඩලන්නා සේ ත්‍රිවිධ ලෝකය ආලෝකමත් කර අවිද්‍යා ඝනාන්ධාකර මැඩ හරිමින් දස දහසක් සක්වළ දිව්‍ය බ්‍රහ්මයින්ගේ ස්තුති පූජා සාධුකාර මධ්‍යයේ තුන්ලොව වෙව්ළවා ධර්ම දේශනා කර නිවන් පුර අගුලු හැර ලන්නාවූ ශ්‍රීමත් අනාථනාථ නාථ දිව්‍ය රාජෝත්තමයාණන් වහන්ස ! මෙසේ සැලකර සිටින කන්නලව්ව ඔබවහන්සේගේ දිව කනට ඇසී දිව නෙතට පෙනී මොවුන් වෙතින් සිතා සැලකර සිටින සකල කාර්යයන් සත්තයෙන්ම සඵල කර දී වදාරණ සේක්වා.
තවද අනාගතයේදී කේතුමතී නම් රාජධානියේ ප්‍රාදුර්භූතව අනේක බල වික්‍රමයෙන් බලයට පත් වන සංඛ නම් චක්‍රවර්ති රජ්ජුරුවන්ගේ අග්‍ර පුරෝහිත බ්‍රාහ්මණයාණන්ට ජාතකව අජීන කුමාර යන නමකින් ප්‍රසිද්ධව වැඩිවියට පැමිණ ලෞකික සම්පත් අලුයම කෙලපිඬක් සේ සලකා සසර අභිනව ලොව්තුරා බුද්ධත්වයට පැමිණ තුන්ලොවට මහා මංගල්‍යයක් කරන අසරණ සරණ උතුම් වූ නාථ දිව්‍ය රාජෝත්තමයාණන් වහන්ස ! මොවුන් වෙනුවෙන් සැලකර සිටින කන්නලව්ව දිව්‍ය කරුණාවට ගෙන මෙකී පංචස්කන්ධයන්ට වැදී වැළඳී
එන්නා වූ රවි චන්ද්‍ර කුජ බුධ ගුරු ශුක්‍ර ශනි රාහු කේතු යැයි යන නවග්‍රහයින්ගෙන් පැමිණියා වූ ග්‍රහ දෝෂාන්ධාකරද හැන්දෑ මධ්‍යම අලුයම් කියන්නා වූ තුන් සමයන් අධිපතිව සිටින සර්ව යකුන් යක්ෂණියන්ගෙන් වැද පැමිණියා වූ දෝෂාන්ධකාරද මල ගෙවල භූත ප්‍රේත පිශාචාදීන්ගෙන් වැද පැමිණියා වූ දෝෂාන්ධකාරද ඇස්වහකින් කටවහකින් හිත්වහකින් වැද පැමිණියා වූ දෝෂාන්ධකාරද වාතෙන් පිතෙන් ශ්ලේෂ්මාවෙන් කියන්නා වූ තුන් දෝෂයන්ගෙන් පැමිණියා වූ දෝෂාන්ධකාරද මෙකී නොකී සකල දෝෂාන්ධකාරම ඔබ දෙවියන් වහන්සේගේ දිව්‍ය තේජානුභාවයෙන් අද මෙවේලේ පටන්ම දුරු කර දී බෝවා කාලයක් ආයුරක්ෂාකර දී වදාරණ සේක්වායි පිනට පිහිට වෙනවයි පින් ගන්නවයි ඔබ කීර්ති පස්වාන් දහසක් ආයු බොහෝ වේවා !

කුජ මකර රැසේ වක්‍ර වීම සුබ නෑ.

2018. 11. 06 තෙක් කාලය තුළ ප්‍රවේශම් වන්න.
අගෝස්තු 28 වෙනිදා තෙක් කාලය තුළ විශේෂයෙන් ප්‍රවේශම් වන්න.
කුජ හෙවත් අඟහරු 2018. 05. 02 වෙනිදා තම උච්ච භවන වූ මකර රාශියට ගමන් කළා. 2018. 11. 06 වෙනිදා තෙක් කුජ මකර රාශියේ කල් ගෙවනවා. පසුගිය ජූනි මස 28 වෙනිදා පටන් කුජ වක්‍ර ගමන ආරම්භ කළා. අගෝස්තු 28 වෙනිදා තෙක් කුජ වක්‍ර ගමනේ යෙදෙනවා. 
2018. 11. 06 තෙක් කාලය තුළ අනතුරු, ප්‍රචණ්ඩ ක්‍රියා බහුල වෙනවා. නොයෙක් ආකාරයේ ඛේදනීය පුවත් අසන්නට ලැබෙනවා. අගෝස්තු 28 වෙනිදා තෙක් කාලය තුළ අවදානම වඩාත් තදින් බලපැවැත්වෙනවා. මෙම කාලය තුළ ගමන් බිමන්වල යෙදෙන, රිය පදවන සියලු දෙනා ඉතාමත් කල්පනාකාරීව කටයුතු කිරීම වැදගත් වෙනවා. ආවේගශීලී බව හේතුවෙන් ගැටුම්, කෝලාහල සිදු විය හැකි බැවින් ඉවසිලිමත්ව හා බුද්ධිමත්ව කටයුතු කළ යුතුයි. දෙමාපියන් තම දියණියන් ගැන විශේෂ අවධානයක් යොමු කළ යුතුයි.
මෙම කාලය තුළ මනුෂ්‍ය ඝාතන, මාර්ග අනතුරු, කපා කොටාගැනීම්, සිය දිවි නසාගැනීම්, ස්ත්‍රී දුෂණ බහුල බහුල වෙනවා.

මනුෂ්‍යයා වියරුවෙන් ක්‍රියා කරන, අනතුරු  බහුල මෙවන් කාලයක ආරක්ෂාව සඳහා ගත යුතු හොඳම ක්‍රියා මාර්ගය ධජග්ග පිරිත සංගායනා කිරීම හා සිහි කිරීමයි. අනතුරු විපත් ආදියෙන් ආරක්ෂාව උදා කරමින්, බිය තැතිගැන්ම පලවා හරින මහඟු බලයක් ධජග්ග පිරිතෙහි ගැබ්ව තිබේ. ඊට උදාහරණ ඕනෑ තරම් ඉදිරිපත් කරන්න පුළුවන්.
යුද්ධය දරුණු විධියට පැවතුණු කාලෙ නැගෙනහිර පළාතේ වැඩ විසූ ස්වාමීන් වහන්සේ නමක් ත්‍රස්තවාදීන් දෙදෙනෙක්ගෙ ග්‍රහණයට හසු වුණා. ත්‍රස්තවාදීන් දෙන්නා හාමුදුරුවන්ව පෙරටු කරගෙන මහා වනාන්තරය මැද්දෙන් යනවා. එක පාරටම මහා ගෙරවිලි සද්දයක් ඇහිලා හාමුදුරුවො පිටිපස්ස හැරිලා බැලුවා. විශාල වලසෙක් ත්‍රස්තවාදීන් දෙන්නා දිහාවට කඩා පැනලා. ඒ දෙන්නා මරු විකල්ලෙන් වලසා සමග පොරකන අතරෙ හාමුදුරුවො වනාන්තරය අතරින් ගම්මානෙකට වැඩියා. ඒ කාලෙ මේ ප්‍රවෘත්තිය පුවත්පත්වල පල වුණා. කිසිම බේරුමක් නැති බව තේරුම් ගත්තු හාමුදුරුවො ඒ මොහොතෙ කළේ ධජග්ග පිරිත සිහි කිරීම විතරයි කියල උන් වහන්සේ සඳහන් කරලා තිබුණා.
දීඝවාපී සෑයේ පිළිසකර කටයුතු කරන අවස්ථාවක ස්වාමීන් වහන්සේ නමක් සෑයෙ උඩ ඉඳලා පහළට වැටිල තියෙනවා. උන්වහන්සේ ඒ මොහොතේ දජග්ග පිරිත සිහි කරලා තියෙනවා. කිසිම අනතුරක් වෙලා නෑ. මේ විස්තරය අටුවා ග්‍රන්ථවල සඳහන් වෙලා තියෙන බව ස්වාමීන් වහන්සේ නමක් ධර්ම දේශනයකදි සඳහන් කළා.
ගැටළු කරදර වලින් පීඩාවට පත් වුණු බොහෝ පිරිසක් මා හමුවෙන්න එනවා. ධජග්ග පිරිත සංගායනා කරන්න කියලා මම ඒ අයටත් කියනවා. එයින් සෙතක් ශාන්තියක් අත් වුණු බව ඒ අයත් දැනුම් දෙනවා. ඒවා එකින් එක සඳහන් කරන්න ගියොත් ලිපිය දීර්ඝ කාලයක් පුරා කොටස් වශයෙන් ඉදිරිපත් කරන්න වෙනවා.
එක්තරා කාන්තාවක් සතුරු බලපෑමක් හින්දා ලොකු මානසික පීඩනයකට ලක් වෙලා හිටියා.අසල්වැසි සතුරෙක් දිනපතාම වගේ ගේ ඉස්සරහට ඇවිත් අසභ්‍ය වචනයෙන් බැනවදිනවා. මා හමුවෙලා ඇයගෙ කරදර ගැන කිව්වට පස්සෙ මම කිව්වා පොල් තෙල් බෝතලයකට අබ තෙල් ටිකක් දාලා ඒ තෙල් බෝතලය මේසයක් උඩ තියාගෙන ධජග්ග පිරිත 108 වාරයක් කියන්න කියලා. ඊට පස්සෙ ඒ තෙල් වලින් බුදු පහන දල්වන්න කිව්වා. මේ කාන්තාව මම කියපු විදියටම කළා. පහන දල්වන්න පටන් අරගෙන සති දෙකයි ගත වුණේ අර බැන බැන හිටපු මනුස්සයා ආගිය අතක් හොයාගන්න බැරි වුණා.
අද කාලයේ ගොඩක් දෙනෙකුට පිරිත්  කියන්න වෙලාවක් නෑ. ගොඩක් දෙනෙක් කරන්නෙ ගුවන්විදුලියෙන් ප්‍රචාරය කරන පිරිත දාගෙන නිදාගන්න එක. දිනපතා හවස් වරුවේ පිරිතක් සංගායනා කිරීමෙන් ලැබෙන ප්‍රතිපල ගුවන්විදුලි යන්ත්‍රයෙන් විකාශය කරන පිරිතෙන් ලබන්න බෑ. ඒක තාක්ෂණය හරහා කෙරෙන වැඩක්. ඒ සම්බන්ධයෙන් දීර්ඝ විස්තරයක් ඉදිරියේදී ඉදිරිපත් කරනවා.
සෑම පිරිත් පොතකම ධජග්ග පිරිත සඳහන් වෙනවා. දිනපතා අපහසු නම් සතියකට දින දෙක තුනක් හෝ වෙන් කරගෙන හවස් වරුවේ හඳුන්කූරු කීපයක් දල්වලා වටපිටාව සුවඳවත් කරගෙන ධජග්ග පිරිත වරක්, තුන් වරක් හෝ ඊට වැඩි වාර ගණනක් සංගායනා කරන්න.  එළි වෙනව, රෑ වෙනව නොදැනෙන තරමට මිළ මුදල් පස්සේ දුවන අතරෙ පුංචි වෙලාවක් ඒ දේට කැප කරන්න. ප්‍රතිපල ඒකාන්ත වශයෙන්ම ලැබෙනවා.

වෘශ්චික ලග්න හිමියෝ.

ආදරය හින්දා විඳවන, ආදරයම ජීවිතය කරගත්තු, ආදරය වෙනුවෙන් දැඩි තීන්දු තීරණ ගන්නා වෘශ්චික ලග්න හිමියන් අනන්ත ඉන්නවා. ආදරය හින්දා වැඩි පුරම කඳුළු සලන්නේ වෘශ්චික ලග්න හිමියන් යැයි කීවොත් එහි වැරැද්දක් නැහැ. වසර විසි ගණනක ජ්‍යොතිෂ සේවාව තුළදී හමුවූ, විරහ වේදනාව උරුම කරගත් හා ආදරය හේතුවෙන් නොයෙක් ගැටළුවලට මුහුණ පෑ අය අතරින් වැඩිම පිරිස වෘශ්චික ලග්න හිමියන් බව පැවසිය යුතුයි.

වෘශ්චික ලග්න හිමියන් වඩාත් හැඟුම්බර වන්නේ ඇයි ?
වෘශ්චික රාශියට හිමිව තිබෙන්නේ විශ්ව කේන්දරයේ අට වෙනි භාවයයි. ජල හෙවත් ආපෝ ත්‍රිත්වයේ ස්ථිර රාශිය වන්නේ වෘශ්චික රාශිය යි.කුජ හෙවත් අඟහරුගේ රාත්‍රී රාශියයි. වෘශ්චික රාශිය සත්ව ශරීරයේ රහස් ප්‍රදේශය නියෝජනය කරනවා. රාශියේ සංකේතය ගෝනුස්සා යි. සිතුවිළි හා සම්බන්ධ රාශි තුනෙන් දෙවෙනි රාශිය වූ වෘශ්චිකය වැව්, පොකුණු වැනි වෙන් වූ ජලාශයන්ට සමාන කොට දක්වනවා. ඊට හේතුව වෘශ්චික රාශියේ උපදින සිතුවිළි හැම විටම කිසියම් එක් කාරණයක් අරභයා ක්‍රියාත්මක වීමයි. ආදරය කිරීමේදී අන් හැම දේටම වඩා ආදරය ගැන සිතමින් ආදරය ජීවිතය කරගැනීම වෘශ්චික ලග්න හිමියන්ගේ සිරිත වෙනවා. රෑ දහවල්, අව්ව වැස්ස, කෑම බීම ගැන නොබලා ආදරය කරනවා. මේ හින්දාම ආදරය වෙනුවෙන් කඳුළු සැලීමට සිදුවන අවස්ථාත් උදා වෙනවා.
තම සුපෙම්බර ආදරවන්තයා තවත් කාන්තාවකට පෙම් කරන බව දැනගත් ඇය තම අතේ මැණික් කටුව අසළ කපා ගත්තාය. ඒ වේල්සයේ රෝස කුසුම යි.  1961 ජූලි මස පළමු වෙනිදා වෘශ්චික රාශියෙන් එංගලන්තයේ උපන් ඩයනා කුමරිය යි. ආදරය වෙනුවෙන් ඉතාමත් දැඩි තීරණ ගන්නා කාන්තාවන් මෙන්ම පුරුෂයින් ද අපේ රටෙත් ඕනැ තරම් ඉන්නවා. එයින් බහුතරය වෘශ්චික ලග්න හිමියන් බව ජ්‍යොතිෂවේදීන් අත්දැකීමෙන් දන්නවා.
ආදරය වෙනුවෙන් පමණක් නොවෙයි තම සිතුවිළි ක්‍රියාත්මක වන්නේ කුමන කාර්යයක් අරභයාද එය තම ජීවිතය කරගැනීම වෘශ්චික ලග්න හිමියන්ගේ ස්වභාවය වෙනවා. ඊට කදිම උදාහරණ දෙකක් අපේ රටේ මෑත ඉතිහාසයෙන් ලබාගන්න පුළුවන්. ඒ, 1943 ජූලි මස 14 වෙනිදා මාතරදී  උපන් රෝහණ විජේවීර හා 1954 නොවැම්බර් මස 26 වෙනිදා වැල්වැටිතුරේදී උපන් වේලුපිල්ලේ ප්‍රභාකරන් යන දෙදෙනායි. වෘශ්චික ලග්නයෙන් උපන් මොවුන් විප්ලවය ජීවිතය කරගත්තා පමණක් නොවෙයි ඒ හේතුවෙන්ම ජීවිත ද අහිමි කරගත්තා. ලෝක ඉතිහාසය තුළ අපට හමුවන ව්ලැඩිමියර් ලෙනින්, බෙනිටෝ මුසොලිනි, තියඩෝර් රුස්‌වෙල්ට්‌ යන්නවුන් වෘශ්චික ලග්නයෙන් උපන් සුවිශේෂී චරිත ලෙස දක්වන්න පුළුවන්. මොවුන් එක් සුවිශේෂ අරමුණකට බැස ඒ ඔස්සේම ගමන් කළවුන් වෙනවා. මීට හේතුව වෘශ්චිකය සිතුවිළි හා සම්බන්ධ රාශියක් මෙන්ම ස්ථිර ගුණයෙන් යුතු රාශියක්ද වීමයි. තම සිතුවිළි එක් කාරණයක් උදෙසාම වෙන් කරගෙන ඒ ඔස්සේම නොවෙනස්ව ගමන් කිරීම එහි ස්වභාවය යි.

බලවත් ග්‍රහ යෝග.

ධනය, රූපසම්පත්තිය හා ප්‍රසිද්ධිය හිමි කරදෙන " වාසුමතී " යෝගය.

වාසුමතී යෝගය යනු කේන්දර තුළ පිහිටන බලවත් ග්‍රහ යෝගයකි. සෑම කේන්දරයකම වාසුමතී යෝගය සටහන් නොවුණද පෙර පින් බලය හේතුවෙන් මෙම යෝග්‍ය හිමිව උපදින අයද නැත්තේ නොවේ. 

ලග්නයෙන් හෝ චන්ද්‍රයා කෙරෙන් උපචය ස්ථානයන්හි සුබ ග්‍රහයෝ වෙත් නම් වාසුමතී යෝගය යි. උපචය ස්ථාන යනු කේන්දරයේ තෙවෙනි, හය වෙනි, දස වෙනි හා එකොළොස් වෙනි ස්ථානයයි. ලග්නය හෙවත් පළමු භාවයෙන් හෝ චන්ද්‍රයා තැන්පත්ව සිටින භාවයෙන් මෙකී තැනක සඳු, බුධ, ගුරු, සිකුරු යන සුබ ග්‍රහයින් එක්ව හෝ වෙන් වශයෙන් පිහිටිය යුතුය. ඉතාමත් වාසනාවන්ත යහපත් යෝගයකි. ධනය, පෙනුම, ප්‍රසිද්ධිය හිමි කරදෙන, අනුන්ට් අත නොපා ජීවත් වීමේ ශක්තිය උදා කරදෙන පින් බර යෝගයකි.
   හෙළ නිළි රැජින යන විරුදාවලියෙන් හඳුන්වන අග්‍රගණ්‍ය රංගන ශිල්පිනියකගේ ජන්ම පත්‍රය මෙම
යෝගයට කදිම නිදසුනකි. මිථුන ලග්නය හිමි ඇයගේ කේන්දරයේ ලග්නයෙන් තෙවෙනි භාවයේ චන්ද්‍රයා ය. හය වෙනි භාවයේ ගුරු ය. දස වෙනි භාවයේ බුධ හා සිකුරු ය. වාසුමතී යෝගය ඉතාමත් පැහැදිලිව යෙදී තිබේ.

   භාරත ගීත කෝකිලාවියකගේ  මධුර හඬ සතු කරගත් මෙරට ජනප්‍රිය ගායන ශිල්පිනියකගේ කේන්දරයද මෙයට කදිම උදාහරණයකි. මිථුන ලග්නය හිමි ඇයගේ කේන්දරයේ චන්ද්‍රයා කෙරෙන් දස වෙනි භාවයේ සිකුරු ග්‍රහයා ද, චන්ද්‍රයාගෙන් එකොළොස් වෙනි භාවයේ බුධ හා ගුරු ද තැන්පත්ව වාසුමතී යෝගය සටහන්ව තිබේ. 

ජ්‍යොතිෂවේදී, ගුප්ත වෛද්‍ය 
   සංජීව කුළුපන බණ්ඩාර 

රවි බුධ මිථුන රාශියට.

 2018 ජූනි මස 10 වෙනි ඉරු දින පෙ. ව 07. 33 ට  බුධ ග්‍රහයා තම ස්වක්‍ෂේත්‍ර රාශිය වූ මිථුන රාශිය වෙත ගමන් කරනවා. මෙලෙස මිථුන රාශිය වෙත ගමන් කරන බුධ ග්‍රහයා ජූනි මස 25 වෙනිදා ප. ව 06.18  තෙක් මිථුන රාශියේ කල් ගෙවනවා.
   බුධ ග්‍රහයා ඥාන කාරක ග්‍රහයා ලෙස හැඳින්වෙන අතර දැකීමෙන් දැනීමේ ශක්තිය (The Sense of Seeing) හිමි ග්‍රහයා ලෙසද සැළකෙනවා. තීක්ෂණ ඥානය, උපායශීලීභාවය, නව සංකල්ප බිහි කිරීමේ හැකියාව, මතක ශක්තිය, කතාවේ නිපුණත්වය,ස්ථානෝචිත ප්‍රඥාව, කරුණු වටහාදීමේ හැකියාව ආදී කුසලතාවන් බුධ ග්‍රහයා විසින් ප්‍රධානය කරනවා.
   බුධ ග්‍රහයා මිථුන රාශියේ කල් ගෙවන කාල සීමාව තුළ මිථුන, කන්‍යා, ධනු, මීන ලග්න හිමිව උපදින දරුවන්ගේ කේන්දරය තුළ බුධ ග්‍රහයා බලවත්ව "භද්‍ර යෝගය" නම් වූ බලවත් යෝගය සටහන් වනවා.  " භද්‍ර යෝගය"තියුණු නැණ ප්‍රභාව, චතුර කථිකත්වය, ලේඛන කුසලතාව, පතළ කීර්තිය හිමි කර දෙන යෝගයක් ලෙස සැළකෙනවා. කේන්දරයේ පළමු, සිව් වෙනි, හත් වෙනි, දස වෙනි යන භාවයක බුධ ග්‍රහයා ස්වක්‍ෂේත්‍රව හෝ උච්චව යෙදීමෙන් මෙම බලවත් යෝගය උදා වෙනවා. ඒ අනුව බුධ මිථුන රාශියේ කල් ගෙවන කාල සීමාව තුළ මිථුන ලග්නයෙන් උපදින දරුවන්ගේ කේන්දරයේ පළමු භාවයේ බුධ ස්වක්‍ෂේත්‍ර වීමෙන්ද, කන්‍යා ලග්නයෙන් උපදින දරුවන්ගේ කේන්දරයේ බුධ දස වෙනි භාවයේ ස්වක්‍ෂේත්‍ර වීමෙන්ද, ධනු ලග්නයෙන් උපදින දරුවන්ගේ කේන්දරයේ බුධ හත් වෙනි භාවයේ ස්වක්‍ෂේත්‍ර වීමෙන්ද, මීන ලග්නයෙන් උපදින දරුවන්ගේ කේන්දරයේ බුධ සිව් වෙනි භාවයේ ස්වක්‍ෂේත්‍ර වීමෙන්ද භද්‍ර යෝගය හිමි වෙනවා.
   ජූනි 15 වෙනි කිවි දින පෙ. ව.11. 37 ට රවි ග්‍රහයාද බුධ ට අයත් මිථුන රාශියට ගමන් කර බුධ ග්‍රහයා සමග සංයෝග වන අතර මේ හේතුවෙන් ජූනි 15 වෙනි දින පෙ. ව 11. 37 පටන් ජූනි 25 වෙනි දින ප. ව 06. 12 තෙක් කාලය තුළ උපදින දරුවන්ට "බුධ ආදිත්‍ය යෝගය" හිමි වෙනවා. බුධ ආදිත්‍ය යෝගයද යහපත් යෝගයක් ලෙස සැළකෙනවා. මෙම යෝගය මෙම කාල සීමාව තුළ මිථුන,සිංහ, මීන, කන්‍යා, තුලා ලග්න හිමිව උපදින දරුවන්ගේ කේන්දරය තුළ වඩාත් ප්‍රතිපලදායක අයුරින් සටහන්වනු ඇත.

සිකුරු උච්ච වෙයි.

              සකල කලාවන්ට මෙන්ම ආදරයට හා රාගයට අධිපති සිකුරු ග්‍රහයා 2018 මාර්තු 02 වෙනි සිකුරාදා පෙ. ව. 11. 43 ට තම උච්ච භවන වූ මීන රාශියට ගමන් කරනවා. එතැන් පටන් මාර්තු 26 වෙනි දින තෙක් සිකුරු මීන රාශියේ කල් ගෙවනවා.
             මෙම කාල සීමාව තුළ මිථුන, කන්‍යා, ධනු, මීන යන ලග්නයක් හිමිව උපදින දරුවන්ට " මාලවි" නම් යෝගය හිමිවෙනවා. පංච මහා පුරුෂ යෝග වලින් එකක් වන මෙම යෝගය ඉතාමත් සුබදායක යෝගයක් ලෙස සැළකෙනවා. කලා කුසලතාවන් හිමි වීමට මෙන්ම සැප සම්පත් ලැබීමට ද මෙම යෝගය හේතු වෙනවා.
              සිකුරු උච්ච බලයෙන් යුතුව කල්ගෙවන මෙම කාලසීමාව තුළ වෘෂභ, මිථුන, කන්‍යා, වෘශ්චික, ධනු, කුම්භ, මීන යන ලග්න හිමියන්ට සුබ ඵල උදාවෙනවා.
              මෙම කාලසීමාව ඉතාමත් සුබදායක නැකත් උදාවන කාලයක් ලෙසද සඳහන් කළ හැකියි. විශේෂයෙන් කලා කටයුතු, ඇඳුම් පැලඳුම්, ආභරණ, ආහාර පාන, රූපලාවන්‍ය ආදී කටයුතු ඇරඹීමට මෙම කාලසීමාව ඉතාමත් සුබදායකයි. රවි මීන රාශියට ගමන් කිරීමට පෙර එනම්, මාර්තු 13 වෙනිදා තෙක් කාලය ව්‍යාපාර ඇරඹීමට වඩාත් යෝග්‍ය වෙනවා.
           කෙසේ වෙතත් කුජ ග්‍රහයා වෘශ්චික රාශියේ ගමන් කිරීමත්, මීන රාශියේ අධිපති ගුරු ග්‍රහයා සිකුරු හිමි තුලා රාශියේ ගමන් කිරීමත් හේතුවෙන් මෙම කාලය 
තුළ බොහෝ යෞවන යෞවනියන් මෙන්ම වැඩිහිටි ස්ත්‍රී පුරුෂයින් පවා රාගයට වැඩි වශයෙන් නැඹුරු විය හැකියි. මේ හේතුවෙන් කාම අපරාධ පවා බහුල වීමට ඉඩ තිබෙනවා.