කුජ ශනි පරිවර්ථන යෝගයක්.

කුජ ශනි පරිවර්ථන යෝගයක්.
2016.12.11 තෙක් කාලය පතල් වැඩට පංකාදුයි.
වටිනා මැණික් මතුවෙන කාලයක්.
මේෂ,කටක,තුලා,මකර ලග්න හිමිව උපදින දරුවන්ට "රුචක"යෝගය.

     2016.11.01 වෙනි කුජදා පෙ:ව 08.29 ට කුජ හෙවත් අඟහරු ග්‍රහයා තම උච්ච රාශිය වූ මකර රාශියට ගමන් කළා. 2016.12.11 තෙක් කුජ මකර රාශියේ රැඳී සිටිනවා. මකර රාශිය සෙනසුරුට අයත් රාශියක් වන අතර, සෙනසුරු මේ වන විට රැඳී සිටින්නේ කුජට අයත් වෘශ්චික රාශියේ යි.මේ අනුව කුජ සහ සෙනසුරු අතර පරිවර්ථන යෝගයක් දී තිබෙනවා.
   2016.12.11 තෙක් කාලය පතල් වැඩට සුබදායකයි. මෙම කාලය තුළ වටිනා මැණික් වර්ග මතුවෙනවා.පතල් වැඩට අමතරව භූමිය හා සම්බන්ධ සියලු ආකාරයේ කටයුතුවලට මෙම කාලය සුබදායක වෙනවා.

   2016.12.11 තෙක් කාලය තුළ මේෂ,කටක,තුලා,මකර ලග්න හිමිව උපදින දරුවන්ට "රුචක"නම් මහා පුරුෂ යෝගය හිමිවෙනවා. රුචක යෝගය ඉතාමත් බලසම්පන්න යෝගයක් ලෙස පිළිගැනෙනවා.
    කුජ ග්‍රහයා මකර රාශියේ කල්ගෙවන 2016.12.11 තෙක් කාලය තුළ හදිසි අනතුරුවල වැඩි වීමක් සිදුවෙනවා.මෙම කාලය තුළ බොහෝ දෙනෙක් ආවේගශීලීව කටයුතු කිරීමට පෙළඹෙන අතර ඒ හේතුවෙන් ගැටුම්, කෝලාහල ද බහුල වෙනවා.ළමා අපචාර,ස්ත්‍රී දුෂණ ආදී සිදුවීම් ගැනද මෙම කාලය තුළ අසන්නට ලැබෙනවා ඇත.

  

ස්වාමිපුරුෂයින්ගේ ග්‍රහ යෝග.

බිරින්දෑවරුන් ගේ ජීවිත ආලෝකමත් කරන ග්‍රහ යෝග 
ස්වාමිපුරුෂයින්ගේ කේන්දර තුළ 
පිහිටන්නේ මෙහෙමයි.

    විවාහයෙන් පස්සේ බැබළෙන ජීවිත වගේම විවාහයෙන් පස්සේ විනාශ වන ජීවිතත් තියෙනවා. ජීවිතයට සතුට සැනසුම උදාකරන සැමියන් වගේම ජීවිත අපායවල් බවට පත් කරන ස්වාමිපුරුෂයොත් ඉන්නවා.ජීවිතය ආලෝකමත් කරන, ජීවිතයට වාසනාව කැන්දන, සතුට සැනසුම උදාකරන සැමියෙක් ලබන්න බිරිඳක් පින් කරලා තියෙන්න ඕනෑ. සාංසාරික පුරුද්දට මා සොයා පැමිණි උතුම් පුරුෂ රත්නයක්මයි සිතා සමීප කරගන්නා සැමියන් තමන්ට පමණක් නොවෙයි මුළු පවුලටම මහා විනාශයන් බවට පත්වන අවස්ථා අද කාලයේ සුලබයි.වැරදි තෝරාගැනීම් හේතුවෙන් විඳවන බිරින්දෑවරු කොපමණ නම් සිටිනවාද...කෙසෙල් ගසට තබන මුක්කුව දුර්වල වූවොත් කෙසෙල් ගස විනාශ වන්නා සේ ජීවිතයට එක් කරගන්නා පුද්ගලයා දුර්වල වූවොත් ජීවිතයද විනාශ වෙනවා.ජීවිතයට වාසනාව කැන්දන, ජීවිතය සුවපත් කරන කරුණාබර සහකරුවෙක් තෝරා ගන්න සෑම කාන්තාවක්ම උත්සාහ ගන්න ඕනැ. ඒ සඳහා ජ්‍යොතිෂය ඇසුරින්  කෙරෙන මඟ පෙන්වීමක් තමයි මේ. 
  හැමදාම කියනවා වගේ මුළින්ම කියන්න තියෙන්නේ පොරොන්දම් ගැළපීම ගැන පමණක් අවධානය යොමු කිරීම අවදානම් සහිත බවයි. 
   පුද්ගලයෙකුගේ සාමාන්‍ය ගති ස්වභාවය, හැසිරීම, අදහස්, සිතුම් පැතුම් ආදිය ගැන ලග්න භාවයෙන් කියැවෙනවා. පුද්ගලයා ආවේගශීලී කෙනෙක්ද, කරුණාවන්ත කෙනෙක්ද, අන්‍යයන්ගේ අවවාද අදහස් වලට ගරු කරනවාද, තමන්ගේ මතයටම කටයුතු කරන කෙනෙක්ද ආදී කරුණු ලග්න භාවයෙන් ප්‍රකාශවත් වෙනවා.ඇතැම් ජ්‍යොතිෂවේදීන්ට අනුව නම් පුද්ගලයා මොන වගේ කෙනෙක් වූවත් ගැටළුවක් නෑ පොරොන්දම් විස්ස ගැළපෙනවා නම් ඒ ඇති. එවන් ජ්‍යොතිෂවේදීන්ගේ උපදෙස් මත වැරදි තෝරාගැනීම් කරගන්නා ඇතැමුන් ජ්‍යොතිෂයට බැන වදින අවස්ථාත් තිබෙනවා. ජ්‍යොතිෂවේදියෙක් තෝරාගැනීමේදී සැළකිළිමත් විය යුත්තේ ඒ නිසායි. 
  කරුණාවන්ත හදවතක් හිමි සැමියෙක් බිරිඳකට කිසි විටෙක තාඩන පීඩන එල්ල කරන්නේ නෑ. බිරිඳගේ අදහස්, රුචි අරුචිකම් ගැන සැළකිලිමත් වෙනවා.ඒ වගේ සැමියෙක් සමග ගත කරන ජීවිතය බිරිඳකට ඉතාමත් සුවදායක වෙනවා. සන්සුන් මානසිකත්වයකින් යුතුව කොයි දේ වුණත් සාර්ථක වෙනවා.අවුල් සහගත මානසිකත්වයකින් යුතුව කරන දේවල් සාර්ථක වෙන්නේ ඉතාමත් කලාතුරකින්. 
  මිථුන ලග්නයෙන් ඉපදිලා බුධ ලග්නයේම ඉන්නවානම්, කටක ලග්නයෙන් ඉපදිලා සඳු ලග්නයේම ඉන්නවානම්, කන්‍යා ලග්නයෙන් ඉපදිලා බුධ ලග්නයේම ඉන්නවානම්, තුලා ලග්නයෙන් ඉපදිලා සිකුරු ලග්නයේම ඉන්නවානම්, ධනු ලග්නයෙන් ඉපදිලා ගුරු ලග්නයේම ඉන්නවානම්, මීන ලග්නයෙන් ඉපදිලා ගුරු ලග්නයේම ඉන්නවානම් ඒ අය කාරුණිකයි, යුක්තිසහගතයි. කුජගෙන් හෝ රාහුගෙන් යෙදුණු බලවත් ප්‍රචණ්ඩ යෝගයක් හේතුවෙන් මිස මේ අය ප්‍රචන්ඩ, අකාරුණික තත්වයට පත්වන්නේ නෑ.
  පුරසඳු, බුධ, ගුරු, සිකුරු සුබ ග්‍රහයින් බව කවුරුත් දන්නවා. මෙම ග්‍රහයින් සතුරු හෝ නීච නොවී, වෙනත් අසුබ ග්‍රහයින් සමග සංයෝගවීමකින් තොරව ලග්න භාවයේ තැන්පත්ව සිටීම සුබදායක වෙනවා. එවැන්නන් අන්‍යයන් සමග සහයෝගයෙන්, සමගියෙන් කටයුතු කරනවා මෙන්ම අන්‍යයන්ගේ අදහස් වලටද ගරු කරනවා.මෙවැනි සැමියෙකුගේ  ඇසුර බිරිඳක් තුළ සතුට ඇතිකරනවා.
       

 ඉහත කේන්දර සටහන දෙස බලන්න. සඳු ග්‍රහයා ස්වක්ෂේත්‍ර බලයෙන් යුතුව ලග්න භාවයේ තැන්පත්ව සිටිනවා. කේන්දරයේ හිමිකරුවා කාරුණිකයි. සිව් වැන්නේ සිකුරු ග්‍රහයා බලවත්ව බුධ ග්‍රහයා සමග සංයෝග වී සිටිනවා. ඒ හේතුවෙන් මොහු විනෝදයෙන්, සැහැල්ලුවෙන්  නමුත් ගෙදරට ඉතාමත් හිතවත්ව කල් ගෙවනවා.බිරිඳට සහ දරුවන්ට ඉතාමත් ලෙන්ගතුයි.

  අද කාලයේ බොහෝ දෙනෙක් කාමයට ඉතාමත් තදින් පෙළඹෙනවා. සීමාව ඉක්මවා ක්‍රියාත්මක වන කාමාශාව හේතුවෙන් බිඳ වැටෙන පවුල් ජීවිත ප්‍රමාණය සුළුපටු නෑ. අනියම් සම්බන්ධතා වෙත යොමු වන සැමියෙක් ලබන බිරිඳක් සැම විටම සිටින්නේ දුකින් කණස්සල්ලෙන්. රණ්ඩු සරුවල් වල කෙළවරක් නෑ. පවුල් ජීවිතය අපායක් බවට පත් වෙනවා. අසීමාන්තික කාමාශාවක් ඇතිකරවන ග්‍රහ යෝග " අති ධාවන කාම යෝග" ලෙස හඳුන්වනවා.විවාහය සඳහා අයෙක් තෝරා ගැනීමේදී ඔහු ගේ කේන්දරය තුළ "අති ධාවන කාම යෝග" සටහන්ව තිබේදැයි විමසිලිමත්වීම වැදගත් වෙනවා.මොනතරම් යහපත්, ආකර්ශනීය පෙනුමක් තිබුනද ඔහු තුළ පාලනය කරගැනීමට අපහසු තරමේ කාමාශාවක් තිබෙන්නේ නම් යුග දිවිය ගැටළුකාරී වීම නොවැළැක්විය හැකියි. කේන්දරය තුළ ලග්නාධිපති ග්‍රහයාත්, ගුරු ග්‍රහයාත් දුර්වල නොවී යහපත් තත්වයක සිටින්නේ නම් තම ගෞරවය බිඳ වැටීමට ඉඩ නොදී ආරක්ෂා කරගැනීමේ හැකියාව ඔහු සතුව පවතිනවා.

    කෙනෙකුගේ කතාව, භාවිතා කරන වචන මොන වගේදැයි හෙළි කරන්නේ කේන්දරයේ දෙවැනි භාවයයි. ඇතැමුන්ගේ වදන් ඉතාමත් කටුකයි. අතකින්, මුගුරකින් එල්ල කරන පහරකට වඩා දරුණු, ම්ලේජ්ජ ප්‍රහාරයන් ඇතැමුන් වචන මගින් එල්ල කරනවා. දෙවැනි භාවයේ තැන්පත්ව සිටින සිකුරු ග්‍රහයා  අන්‍යයන්ගේ සිත් ආකර්ෂණය වන ආකාරයේ කතා විලාශයක් උරුම කරදෙනවා. විඩාබර සිතක් එක වචනයකින් සුවපත් කළ හැකියි. එක වචනයකින් ජීවිතයක්   කළකිරීමට පත් කළ හැකියි. සඳු, සිකුරු, බුධ ග්‍රහයින් දෙවැන්නේ තැන්පත්ව සිටින කේන්දර හිමි සැමියන් බිරින්දෑවරුන්ගේ සිත් ආදරබර වචන වලින් අමන්දානන්දයට පත්කරනවා.පුරුෂ කේන්දරයේ  දෙවැනි භාවය විවාහයේ පැවැත්මට බලපාන ප්‍රධාන ස්ථානයක් වෙනවා. දෙවැනි භාවය සුබ ග්‍රහයින් අනුසාරයෙන් බලවත් වීම ප්‍රීතිදායක යුග දිවියක් උරුමවීමට හේතුවෙනවා.

      විවාහය සම්බන්ධයෙන් ප්‍රධාන වශයෙන් වැදගත්වන ස්ථානය හත් වෙනි භාවය යි. සුබ ග්‍රහයින් පාප සංයෝග වලින් තොරව හත් වෙනි  භාවයේ තැන්පත්  වීමෙන්  බිරිඳට සුබ ඵල උදා වෙනවා. මේෂ ලග්නයෙන් ඉපදිලා සිකුරු හත් වෙනි භාවයේ තැන්පත්වීම, සිංහ ලග්නයෙන් ඉපදිලා සිකුරු හෝ බුධ හත් වෙනි භාවයේ තැන්පත්වීම, වෘශ්චික ලග්නයෙන් ඉපදිලා සිකුරු හත් වෙනි භාවයේ තැන්පත්වීම, ධනු ලග්නයෙන් ඉපදිලා බුධ සිකුරු හත් වෙනි භාවයේ තැන්පත්වීම, මකර ලග්නයෙන් ඉපදිලා පුරසඳු හත් වෙනි භාවයේ තැන්පත්වීම, කුම්භ ලග්නයෙන් ඉපදිලා සිකුරු හත් වෙනි භාවයේ තැන්පත්වීම, මීන ලග්නයෙන් ඉපදිලා බුධ හත් වෙනි භාවයේ තැන්පත්වීම ඉතාමත් සුබදායකයි. මෙවන් සැමියෙක් ලබන බිරිඳක් පෙර පින් හිමි වාසනාවන්ත තැනැත්තියක්මයි.

    

ඉහත කේන්දරයේ විවාහස්ථානය ග්‍රහයින් දෙදෙනෙකුගෙන් පෝෂණය වන ආකාරය බලන්න. විවාහස්ථානයේ තැන්පත්ව සිටින සිකුරු ග්‍රහයා පළමු වැන්නේ සිටින සඳුගේ සප්ථම දෘෂ්ටියට ලක්වෙනවා. මනා වාසනා බලයක් කේන්දරය තුළ සටහන්ව ඇති අතර මෙම ග්‍රහ බලය බිරිඳගේ වාසනා බලයද  වර්ධනය කරනවා.

   සෙනසුරු යන නම ඇසූ පමණින් ඇතැමුන් බියට පත්වෙනවා. නමුත් විවාහස්ථානයේ යහපත් අයුරින් තැන්පත් වන සෙනසුරු ඉතාමත් යහපත් යුග ජිවිතයක් උරුම කර දෙනවා. එමෙන්ම යමෙකුගේ හත් වැන්නේ සුබදායක අයුරින් තැන්පත්ව සිටින සෙනසුරු තම බිරිඳට මනා වාසනා බලයක් මතුකොට දෙනවා. විශේෂයෙන්ම මේෂ ලග්නයෙන් ඉපිද හත් වැන්නේ සෙනසුරු තැන්පත් වීම ඉතාමත් සුබදායකයි.සෙනසුරු හත් වැන්නේදී  දිග්බලයෙන් යුක්ත වන බව ඉසිවර මතයයි. 
පහත කේන්දර සටහන එයට හොඳම උදාහරණයකි. කේන්දරයේ හිමිකරුවා රටේ ඉහළම තනතුරකට පත් වූ අයෙකි.

 විවාහස්ථානාධිපති ග්‍රහයා සුබ ස්ථානයක, සුබ ග්‍රහයින්ට මැදිව, පාප සංයෝගයෙන් තොරව පිහිටීමද බිරිඳට සුබදායක වෙනවා. එසේ සුබ ස්ථානයක, සුබ ග්‍රහයින්ට මැදිව සිටින හත් වැන්නාධිපති ග්‍රහයා සුබ ග්‍රහයින්ගේ දෘෂ්ටියට ලක්වීමද ඉතාමත් සුබදායකයි. මෙවන් ග්‍රහ තත්වයක් සටහන්ව ඇති ජන්ම පත්‍රයක් හිමි සැමියෙක් ලබන බිරිඳක් ඉතාමත් වාසනාවන්තයි.
     අනිත් කේන්දරයේ ග්‍රහ පිහිටීම් තුලින් තමන්ට කුමනාකාරයේ බලපෑම් එල්ල වන්නේදැයි   විවාහය සඳහා කේන්දර පරීක්ෂා කරගැනීමේදී අසා දැනගැනීමට අමතක කරන්න එපා.

සෙන්පති මාරු වෙයි.
කුජ  ග්‍රහයා ධනු රාශියට ගමන් කිරීම
ඔබට බලපාන්නේ මෙහෙමයි.

     ග්‍රහ ලොව සෙන්පති කුජ හෙවත් අඟහරු ග්‍රහයා 2016 සැප්තැම්බර් මස 18 වෙනි ඉරු දින ශ්‍රී ලංකාවේ වේලාවෙන් පෙ: ව: 07. 43 ගුරුට අයත් ධනු රාශියට ගමන් කරනවා. මෙසේ ධනු රාශිය වෙත ගමන් කරන කුජ ග්‍රහයා 2016 නොවැම්බර් මස පළමු වෙනිදා තෙක් ධනු රාශියේ කල් ගෙවනවා.
   2016 පෙබරවාරි මස 20 වෙනි දින කුජ ග්‍රහයා වෘශ්චික රාශියට ගමන් කර සෙනසුරු සමග එක්වූ අතර කුජ ශනි එක්වීමත් සමග ගිනි ගැනීම්, ඝාතන, අනතුරු විශාල ප්‍රමාණයක් නන් දෙසින් වාර්ථා වුණා.
   කුජ ග්‍රහයා ධනු රාශියේ කල් ගෙවන 2016. 09. 18 - 2016. 10. 01 අතර කාලය තුළ ඔබට එල්ල වන බලපෑම් කෙබඳු දැයි විමසා බලමු.
( මෙය ඔබගේ ජන්ම කේන්ද්‍රය පරික්ෂා කර බලා ඉදිරිපත් කරන පලාපල විස්තරයක් නොවන බැවින් දක්වා ඇති පලාපල, ඔබ ගත කරන මහ දශා, අන්තර් දශා අනුව මෙන්ම උප්පත්ති කේන්දරයේ ග්‍රහ පිහිටීම් අනුව වෙනස් විය හැකි බව සළකන්න)

   මේෂ ලග්නය.
        කුජ හෙවත් අඟහරු මේෂ ලග්න හිමියන් ගේ ලග්නාධිපති ග්‍රහයා යි. ලග්නාධිපති වූ කුජ ගමන් කරන්නේ මේෂ ලග්න හිමියන් ගේ නම වෙනි භාවයටයි. නම වැන්න වූ කලී පුණ්‍ය ස්ථානය යි. එමෙන්ම භාග්‍යස්ථානය යි. එතැනට ගමන් කරන කුජ ග්‍රහයා ඔබ තුළ මනා උද්යෝගයක්, ක්‍රියාශීලී බවක් ඇති කරනවා. අවහිර  මැඩගෙන ඉදිරියට යාමේ ශක්තිය ලබා දෙනවා. කුජ ධනු රාශියේ ගත කරන කෙටි කල සීමාව අලුත් වැඩ කටයුතු වලට අත ගැසීමට සුබයි.
කොහොම වුණත් ආගමික භක්තිය තරමක් අඩුවෙනවා.පින් පව් ගැන, යුක්තිය සාධාරණය ගැන හිතලා කටයුතු කරන ගතිය තරමක් අඩුවෙනවා. තමන්ගේ දියුණුව සාර්ථකත්වය අතින් කුජ මාරුව හොඳ වුණත් ඉක්මන් තීන්දු තීරණ, ආවේගශීලී ගති ලක්ෂණ අදියෙන් වැළකිලා කටයුතු නොකළොත් හොඳ නමට හානි සිද්ද වෙන්න පුළුවන්.

වෘෂභ ලග්නය.
   වෘෂභ ලග්න හිමියන්ගේ කේන්දරයේ අට වෙනි භාවයට කුජ ගමන් කරනවා. අට වෙනි භාවය එතරම් සුබදායක භාවයක් නොවෙයි. අට වෙනි භාවය අඟහරුටත් එතරම් සුබදායක නෑ. කුජ අට වෙනි භාවයේ රැඳී සිටින කාලය තුළ හදිසි අනතුරු, අස්ථි බිඳීම්, වැටීම් ආදියට ඉඩ තිබෙනවා. අවදානම් සහිත කටයුතු වලදී ඉතාමත් කල්පනාකාරී විය යුතුයි. මානසික ඒකාග්‍රතාවය අඩු වෙනවා. ඉක්මන් තීන්දු තීරණ හේතුවෙන් නොයෙක් ගැටළු කරදර මතුවෙන්න පුළුවන්. ගෘහ ජිවිතයේ සාමය සමගිය බිඳ වැටීමට ඉඩ තිබෙනවා. ඉතාමත් ඉවසිලිමත්ව කටයුතු කළ යුතුයි. අධික වියදම්, නිෂ්පල වියදම්, ධන හානි වලට ඉඩ තිබෙන බැවින් මෙම කාලය තුළ ආර්ථිකය ප්‍රවේශමෙන් හැසිරවිය යුතුයි.

මිථුන ලග්නය.
 මිථුන ලග්න හිමියන්ගේ කේන්දරයේ විවාහස්ථානය වූ හත් වෙනි භාවයට කුජ ගමන් කරනවා. හත් වෙනි භාවය කුජ ට එතරම් සුබදායක තැනක් නෙමෙයි. කුජ හත් වෙනි භාවයේ ගමන් කරන කාලය තුළ යුග දිවියේ සාමය සමගිය බිඳ වැටෙන්නට  ඉඩ තිබෙනවා. හිත මිත්‍රාදීන්, හවුල් කරුවන් ආදීන් සමග ගැටුම්, හිත් අමනාපකම්  සිද්ද වෙන්න පුළුවන්. ඉවසිලිමත්ව හා බුද්ධිමත්ව කටයුතු කළ යුතුයි. කාමාශාවන් වැඩි වෙන කාලයක් බැවින් නොමනා සම්බන්ධකම් වල පැටලීමේ ඉඩ කඩ තිබෙනවා.මුත්‍රා අබාධ, උෂ්ණ අසනීප ආදිය මතුවෙන්න පුළුවන්. මානසික නිශ්කලංකතාවය අඩු වෙනවා. කතාව හේතුවෙන් පාඩු සිද්ද වෙන්න පුළුවන්. විවාහ කටයුතු සම්බන්ධයෙන් තීන්දු තීරණ ගැනීමට මෙම කාලය සුබදායක නෑ.

කටක ලග්නය.
  කටක ලග්න හිමියන්ගේ කේන්දරයේ හය වෙනි භාවයට කුජ ගමන් කරනවා. කුජ හය වැන්නට සුබදායක බව සෘෂි මතයයි. මෙම කාලය තුළ අනපේක්ෂිත ලැබීම වලට ඉඩ තිබෙනවා. හිතට සතුට ඇතිවෙනවා. සතුරු බලපෑම් තිබුණේ නම් ඒවා දුරු වෙනවා.ලාභ ප්‍රයෝජන ලැබෙන කාලයක් බව පැවසිය හැකියි. වැඩ කටයුතු සාර්ථක වෙනවා. ක්‍රියාශීලි උද්යෝගිමත් ගති ඇතිවෙනවා. ප්‍රීතිදායක උත්සව අවස්ථාවන්ට සහභාගීවීමට ලැබෙනවා.අලුත් හිත මිත්‍රාදීන් හඳුනා ගැනීමට හැකිවෙනවා. වරින් වර උදරාශ්‍රිත දැවිලි ගති මතුවෙන්න පුළුවන්.කරන රැකියා කටයුතු, ව්‍යාපාර ආදියේ දියුණුවක් ඇතිවෙනවා.

සිංහ ලග්නය.
  කුජ ගමන් කරන්නේ සිංහ ලග්න හිමියන්ගේ කේන්දරයේ පස් වෙනි භාවයටයි. පස් වෙනි භාවයේ කුජ ගමන් කිරීම එතරම් සුබදායක නෑ. ශරීර සනීපයට බාධා එල්ල වෙනවා. උදරගත අසනීප, ලේ විෂවීම හේතුවෙන් ඇතිවන අසනීප, උෂ්ණ රෝග ආදියට අද තිබෙනවා. මෙම කාලය තුළ ආර්ථිකය සම්බන්ධයෙන් සැළකිලිමත් විය යුතුයි. ධන හානි වලට ඉඩ තිබෙනවා. නිෂ්පල දේට මුදල් වැය වෙන්න පුළුවන්. අභූත චෝදනා එල්ල වීමට ඉඩ තිබෙන කාලයක් බැවින් කල්පනාකාරී විය යුතුයි. ඉක්මන් තීන්දු තීරණ වලින් වැළකිය යුතුයි. මෙම කාලය තුළ නොසුදුසු, නොගැළපෙන බැඳීම් ඇතිවීමටත් ඒ හේතුවෙන් ගැටළු මතුවීමටත් ඉඩ තිබෙනවා.

කන්‍යා ලග්නය.
   කන්‍යා ලග්නය හිමි ඔබේ කේන්දරයේ සිව් වෙනි භාවයට කුජ ගමන් කරනවා. සිව් වෙනි භාවය කුජ ග්‍රහයාට එතරම් සුබදායක නෑ. ශරීර සනීපයට බාධා ඇති කරනවා. ගෘහ ජිවිතයේ සාමය සමගිය බිඳ වැටෙනවා. ඉතාමත් ඉවසිලිමත්ව කටයුතු කළ යුතුයි. ඥාතීන් සමග විරසකතා ඇති විය හැකියි. ගේදොර දේපළ සම්බන්ධයෙන් ගැටළු පැටළිලි මතුවීමට ඉඩ තිබෙනවා. දේපළ සම්බන්ධ ගණුදෙනු කටයුතු වලට මෙම කාලය ඉතාමත් අසුබයි. මෙම කාලය තුළ සතුරු බිය ඇතිවෙනවා. තම හොඳ නමට හානි සිදුවීමටද ඉඩ තිබෙනවා. උෂ්ණ අසනීප, දැවිලි ගති, පපුව ආශ්‍රිත පීඩාවන් අඩියට ඉඩ තිබෙනවා.

තුලා ලග්නය.
  තුලා ලග්න හිමියන්ගේ කේන්දරයේ තුන් වෙනි භාවයට කුජ ගමන් කරනවා. තුන් වෙනි භාවය නම් වික්‍රමස්ථානය යි. වික්‍රමාන්විත ග්‍රහයෙක් වික්‍රමස්ථානයට හොඳින්ම ගැළපෙනවා. කුජ මාරුව තුලා ලග්නය හිමි ඔබට ඉතාමත් සුබදායකයි. රැකියා කටයුතු, ව්‍යාපාර කටයුතු ආදියේ දියුණුවක් ඇතිවෙනවා. උද්යෝගිමත් ක්‍රියාශීලී ගති ඇතිවෙනවා. අනපේක්ෂිත ලැබීම් හිමිවෙන්නත් පුළුවන්. අලුත් වැඩ කටයුතු, ව්‍යාපාර ආදියට අත ගැසීමට මෙම කාලය ඉතා සුබදායකයි. ඇසුරු කරන හිත මිත්‍රාදීන්ගෙන් උදව් උපකාර හිමි වෙනවා. කරන කියන කටයුතු හිතට හරියන විදියට සාර්ථක වෙනවා.

වෘශ්චික ලග්නය.
  වෘශ්චික ලග්නය හිමි ඔබේ කේන්දරයේ දෙවෙනි භාවය ට කුජ ගමන් කරනවා. දෙවෙනි භාවය නම් ධනස්ථානයයි. කුජ ධනස්ථානයේ ගත කරන කාලය තුළ ආර්ථිකය සම්බන්ධයෙන් සැළකිලිමත් විය යුතුයි. ධන හානි, නිෂ්පල වියදම්, අධික වියදම් වලට ඉඩ තිබෙනවා. අවදානම් සහිත ආයෝජන වලින් වැළකිය යුතු කාලයක් බව මතක තබාගත යුතුයි. ප්‍රේම සම්බන්ධතා වලට බාධක එල්ල වෙනවා.දුර දිග නොබලා කරන කතා හේතුවෙන් නොයෙක් ගැටළු මතුවෙන්න පුළුවන්. වටිනා කියන දේවල් සොර සතුරන් අතට පත් වීමට ඉඩ තිබෙනවා. මානසික සහනය අඩු වෙනවා. ඉවසිලිමත්ව කටයුතු කිරීම වැදගත් වෙනවා.

ධනු ලග්නය.
    කුජ ගමන් කරන්නේ ධනු ලග්න හිමියන් ගේ ලග්න භාවය හෙවත් පළමු භාවයටයි. කුජ පළමු භාවයට ගමන් කිරීමත් සමග ධනු ලග්න හිමියන් තුළ තරමක ආවේගශීලී ගති ලක්ෂණ ඇතිවෙනවා. ඉක්මන් තීන්දු තීරණ ගැනීමට පෙළඹෙනවා. ඉක්මන් තීරණ හේතුවෙන් ගැටළු මතුවීමටද ඉඩ තිබෙනවා. ඉක්මන් කෝපය හේතුවෙන් ගෘහ ජිවිතයේ සාමය සමගිය අඩුවෙන්න පුළුවන්. මෙම කාලය අලුත් වැඩ කටයුතු, ව්‍යාපාර ආදියට අත ගැසීමට මෙන්ම විශේෂ හා වැදගත් තීන්දු තීරණ වලට එළඹීමට සුබදායක නෑ. අනතුරු වලට ලක්වීමට ඉඩ තිබෙන බැවින් සැළකිලිමත් විය යුතුයි. මෙම කාලය තුළ නොමනා සම්බන්ධකම් ඇතිවීමටද ඉඩ තිබෙනවා.

මකර ලග්නය.
  මකර ලග්න හිමියන් ගේ කේන්දරයේ දොළොස් වෙනි භාවය වෙත කුජ ගමන් කරනවා. දොළොස් වෙනි භාවය වූ කලී වැයස්ථානය යි. කුජ වැයස්ථානයේ ගත කරන කාලය තුළ විශේෂයෙන්ම සැළකිලිමත් විය යුත්තේ ආර්ථිකය සම්බන්ධව යි. ධන හානි වලට ඉඩ තිබෙනවා. ණයට දුන්නොත් ආපසු නොලැබී යා හැකියි. අන්‍යයන් වෙනුවෙන් ඇප වීම්, අන්‍යයන්ගේ ණය ගණුදෙනු වලට මැදිහත් වීම් ආදියෙන්ද වැළකිය යුතුයි. මෙම කාලය තුළ රහස් සතුරන් ඇතිවීමටද ඉඩ තිබෙනවා. ගමන් බිමන් වලදී බාධක අවහිර එල්ල විය හැකියි. දුර ගමන් වල යෙදීමට මෙම කාලය සුබදයක් නෑ.  නිකරුණේ දෝෂාරෝපන එල්ල වීමටද ඉඩ තිබෙනවා.

කුම්භ ලග්නය.
   කුජ ගමන් කරන්නේ කුම්භ ලග්න හිමියන් ගේ අයස්ථානය හා මිත්‍රස්ථානය වූ එකොළොස් වෙනි භාවයට යි. එකොළොස් වෙනි භාවය කුජට සුබ දායක බව පිළිගැනෙනවා. මෙම කාලය කුම්භ ලග්න හිමියන්ට සුබ දායකයි. අනපේක්ෂිත ධන ලාභ හිමිවෙන්න පුළුවන්. කරන කියන කටයුතු සාර්ථක වෙනවා. වාසනා බලය මතු වෙනවා. අන්‍යයන්ගෙන් උදව් උපකාර හිමි වෙනවා. ගෙදර දොර දියුණුව ඇති වෙනවා. අලුත් වැඩ කටයුතු වලට අත ගැසීමට , ව්‍යාපාර ඇරඹීමට මෙම කාලය සුබ දායකයි. කායික ආශාවන් සපුරා ගැනීමට ඉඩ කඩ සැලසෙනවා. ප්‍රේම සම්බන්ධතා සාර්ථක වෙනවා. වාසනාවන්ත කාලයක්.

මීන ලග්නය.
  මීන ලග්න හිමියන්ගේ කේන්දරයේ දහ වැන්නට කුජ ගමන් කරනවා. දහ වැන්නට කුජ ගමන් කිරීමත් සමග මීන ලග්න හිමියන් තුළ උද්යෝගය, ක්‍රියාශීලී ගතිය වර්ධනය වෙනවා. උත්සාහය තුලින් වැඩ කටයුතු බොහොමයක් සාර්ථක කර ගැනීමට හැකි වෙනවා. රැකියා කටයුතු සාර්ථක වෙනවා. නොඉවසිලිමත් ගතිය හේතුවෙන් ගෘහ ජීවිතය තුළ තරමක ගැටළු මතුවීමට ඉඩ තිබෙනවා. කාර්මික, යන්ත්‍ර සුත්‍ර, ඉංජිනේරු, කෘෂිකාර්මික ක්ෂේත්‍ර තුළ නියැලෙන කුම්භ ලග්න හිමියන්ට වඩාත් සුබ දායකයි. මෙම කාලය තුළ වැඩිහිටි ඥාතියෙකුට විපතක් හෝ කරදරයක් සිදු විය හැකියි.
 

   

සැප්තැම්බර් 09 වෙනිදා තෙක් හා ඔක්තෝබර් 03 - 21 අතර 
මිථුන, කන්‍යා ලග්න හිමිව උපදින දරුවන්ට 
"භද්‍ර යෝගය"
2016 සැප්තැම්බර්  09 වෙනි දින ප. ව 05. 50 තෙක් කාලය තුළ හා ඔක්තෝබර් 03 .වෙනි දින ප. ව 05. 52 පටන් ඔක්තෝබර් 21 වෙනිදා ප. ව 02. 20 තෙක් කාලය තුළ මිථුන, කන්‍යා ලග්න හිමිව උපදින දරුවන්ට " භද්‍ර යෝගය" හිමිවෙනවා.
 මිථුන ලග්නයෙන් උපත ලබන දරුවන්ගේ ජන්ම පත්‍රයේ සිව් වැන්නේ බුධ ග්‍රහයා උච්ච වීමෙන් භද්‍ර යෝගය හිමි වන අතර කන්‍යා ලග්නයෙන් උපත ලබන දරුවන්ගේ ජන්ම පත්‍රයේ පළමු භාවයේ බුධ උච්ච වීමෙන් භද්‍ර යෝගය හිමි වෙනවා.
   පංච මහා පුරුෂ යෝග අතරින් එකක් වූ භද්‍ර යෝගය ඉතා යහපත්, බලසම්පන්න යෝගයක් ලෙසට පිළිගැනෙනවා. දැඩි ආත්ම ශක්තියක් මෙන්ම උසස් බුද්ධි ප්‍රභාවයක් ද භද්‍ර යෝගය තුළින් හිමි වෙනවා. භද්‍ර යෝගය ධන යෝගයක් ලෙසටත් පිළිගැනෙනවා. චතුර කථිකත්වය, ලේඛන කුසලතාව, ස්ථානෝචිත ප්‍රඥාව ඇතුව උපන් තත්වයට වඩා කීප ගුණයකින් උසස් තත්වයකට පත්වීමට අවශ්‍ය වාසනා බලය භද්‍ර යෝගය තුළින් හිමි වෙනවා.

හිතවත් පාඨකයිනි.
  වැඩ කටයුතු අධික වීම හේතුවෙන් ගුරු මාරුව පිළිබඳ විග්‍රහය මෙන්ම වෙනත් ජ්‍යොතිෂ විශේෂාංගයක් ඉදිරිපත් කිරීමට නොහැකි විය.පැවති උසස් පෙළ විභාගයට හා ශිෂ්‍යත්ව විභාගයට පෙනී සිටි සිසු සිසුවියන් විශාල පිරිසකගේ හඳහන් පරීක්ෂා කිරීමටත්, ඔවුන් වෙනුවෙන් සෙත් කවි ලිවීම ආදී නොයෙක් ශාන්ති කර්ම කිරීමටත් සිදු වූ බැවින් මාසයක පමණ කාලයක් පුරා අන්තර්ජාලය තුළ කටයුතු කිරීමට අපහසු විය.
  ඒ අතරතුර, රාත්‍රිය පුරා සිදු කරන විශාල ශාන්ති කර්ම සඳහාද නොයෙක් ප්‍රදේශ වල යාමට සිදු විය.
  විශාල පිරිසක් ගුරු මාරුව පිළිබඳ ජ්‍යොතිෂ විග්‍රහය බලාපොරොත්තුවෙන් සිටිය ද එය ඉදිරිපත් කිරීමට නොහැකි වීම පිළිබඳව කණගාටුව පල කරමි.

දරුවන්ගේ කේන්දරය.

අවුරුදු 18 න් පහළ දරුවන්ට 
කේන්දරය විශාල ලෙස බලපෑම් කරනවාද?
දූගේ පුතාගේ කේන්දරය වැදගත්ද ?

  දරුවන්ටයි වැඩිහිටියන්ටයි කේන්දරය බලපාන්නෙ දෙවිදියකටද...දරුවන්ට කේන්දරය බලපාන්නෙ නැද්ද...ඔය විදියේ ප්‍රශ්නත් සමහරුන්ට තියෙන්න පුළුවන්. 
  අඩුපාඩුවක්, අගහිඟයක් නැති පවුලක උපදින්නත් හොඳ කුසල් ශක්තියක් පින් බලයක් තියෙන්න ඕනෑ. දෙමාපියන්ගේ ජිවිත බබළවන, ආලෝකවත් කරන දරුවො උපදිනවා. දෙමාපියන් අතර තිබෙන අසමගිකම්, ආරවුල් දුරුකළ හැකි තරමේ ග්‍රහ බලයක් ඇතුව උපදින දරුවො ඉන්නවා.වෙන්වුණු දෙමාපියන් එක් කරන තරමේ බලවත් ග්‍රහ බලයක් රැගෙන එන දරුවො ඉන්නවා. ඒ වගේම සමගියෙන් සාමයෙන් කල්ගෙවන දෙමාපියන් වෙන් කරන දරුවොත් ඉන්නවා.පවුලේ ආර්ථිකය, දියුණුව බිමට සමතලා වන ආකාරයේ ග්‍රහ බලපෑම් රැගෙන උපදින දරුවොත් ඉන්නවා. " දෙවැනි දුව ඉපදුණු දවසේ ඉඳලා තමයි අපිට කිරි ඉතිරෙන්න ගත්තේ...ඒ පටන් ගත්තු දියුණුව තමයි අදටත් මේ තියෙන්නේ..." ඔහොම කියන දෙමාපියන් ඉන්නවා. සමහර දරුවො කතා කරන්න කල් යනවා. සමහර දරුවො ඇවිදින්න කල් යනවා.සමහර දරුවන්ගෙ වැඩීම ප්‍රමාද වෙනවා. සමහර දරුවො උපන් ගමන්ම මියයනවා. අම්මලා තාත්තලා අතින් මරණයට පත්වන, හිංසා පිඩාවන්ට ලක්වන දරුවො ඉන්නවා. දෙමාපියන් අතහැර දමන දරුවො කාරුණික අය විසින් හදා වඩා ගන්නා අවස්ථා මොන තරම් තියෙනවද... එහෙම ලොකු මහත් වෙලා උපන් තත්වයට වඩා කීප ගුණයකින් උසස් තත්වයට පත් වන දරුවො ඉන්නවා.
    මේ  හැම දෙයක්ම සිදුවෙන්නේ පෙර කුසල් අකුසල් ශක්තිය, පින් පව් බලය අනුවයි. කෙනෙක් මෙළොව බිහි වන්නේ තමන් පෙර භවයන් තුළ කරන ලද කුසල් අකුසල්, පින් පව් පල දෙන ආකාරයේ ග්‍රහ තාරකා රටාවක් නිර්මාණය වී පවතින අවස්ථාවකදී යි. දරුවෙක් උපදින මොහොත කිසිවෙකුට තීරණය කරන්න බෑ.මේ අනුව කේන්දරයේ බලපෑම එහෙමත් නැත්නම් ග්‍රහ බලපෑම උපදින මොහොතේ පටන්ම එල්ල වන බව පැහැදිලියි.
   දරුවෙකු ගේ අධ්‍යාපනය සම්බන්ධයෙන් දරුවාගේ කේන්දරයේ ග්‍රහයින් එල්ල කරන බලපෑම සුළු පටු නෑ. දරුවා පෙර භවයන් තුළ පුරුදු පුහුණු කළ දේවල් පවා කේන්දරය තුළ සටන්ව පවතිනවා.සමහර දරුවන් කිසිදාක නොදුටු දේවල් පවා පුරුදුකාරයෙක් මෙන් දක්ෂ ලෙස කරන අවස්ථා තිබෙනවා.දරුවෙකුගේ දක්ෂතා හැකියාවන් වඩාත් සාර්ථක තත්වයකට පත්වනු ඇත්තේ කුමන ක්ෂේත්‍ර තුළ දැයි දැනගැනීමට ජන්ම පත්‍රය මහෝපකාරී වෙනවා.ඇතැම් දරුවන් තමන්ට නොගැළපෙන, පල නොදෙන විෂය ධාරාවන් තෝරාගෙන අසාර්තක වී කළකිරීමට පත්වෙනවා.ඇතැම් දරුවන් විභාග අසමත් වී සිය දිවි නසාගන්නවා.සමහර දරුවන් මානසික රෝගීන් බවට පත් වෙනවා.ඇතැම් දෙමාපියන් තම දරුවන්ට සුදුසු, ගැළපෙන ක්ෂේත්‍ර පිළිබඳව සොයා නොබලා බලපෑම් කිරීම හේතුවෙන් දරුවන් අසාර්ථකත්වයට පත් වෙනවා.දරුවාගේ අධ්‍යාපනය කුමන ක්ෂේත්‍රයක් ඉලක්ක කරගෙන ලබාදිය යුතු දැයි තීරණය කිරීමේදී කේන්දරය අතිශයින් වැදගත් වෙනවා.
  අද පවතින්නේ දරුවන්ට නොයෙක් අතවර, කරදර එල්ල වන කාලයක් බව පෙනෙන්නට තිබෙනවා.නොසුදුසු, නොගැළපෙන අයගේ ඇසුරට ලක්වන දරුවන් නොයෙක් වැරදි මාර්ග වෙත යොමු වෙනවා. එවැනි අවදානම් සහිත තත්වයන්  කේන්දරය තුළින් පහසුවෙන් හඳුනාගැනීමට හැකිවෙනවා.ඇතැම් දරුවන් බොහෝ දේ සඟවාගෙන කටයුතු කරනවා.එල්ල වන බලපෑම් පවා දෙමාපියන් සමග නොපවසා සඟවා තබා ගන්නා දරුවන් සිටිනවා.එවැනි අවස්ථාවලදී දරුවාගේ කේන්දරය පරික්ෂා කරවා ගැනීමෙන් දරුවා හෙළි නොකරන්නා වූ සියලු දේ හෙළි කරගැනීමට හැකි වෙනවා. 
   ඇතැම් විට දරුවෙකුට වැළඳුනු අසනීපයක් සම්බන්ධයෙන් නිවැරදි විනිශ්චයකට එළඹීමට වෛද්‍යවරුන්ට අපහසු වීමට ඉඩ තිබෙනවා.සෙනසුරු, රාහු, කේතු වැනි ග්‍රහයින් ගේ දශා කාලවලදී මෙන්ම ඒරාෂ්ඨක කාලවලදී ද එවැනි ගුප්ත තත්වයන් මතුවීමට ඉඩ තිබෙනවා.දරුවාගේ කේන්දරය පරීක්ෂා කර ගැනීමෙන් රෝග තත්වයන් ගැන නිවැරදි විස්තර දැනගැනීමට හැකිවෙනවා වගේම අසනීප තත්වයන්ට හේතු වන ග්‍රහ බලපෑම් දුරු කරගැනීමට ද හැකිවෙනවා.
  මේ අනුව බලන විට මෙළොව බිහිවන සෑම දෙනෙකුටම උපන් මොහොතේ පටන්ම ජිවිත කාලය පුරාවටම කේන්දරය වැදගත් වන බව පැහැදිලි වෙනවා.
   

යුරේනස් මාරුව

යුරේනස් මාරුවෙන් මොනවා වෙයිද ?
  යුරේනස් නමැති ග්‍රහ ලෝකය සොයාගත්තා යැයි පැවසෙන්නේ 1781 මාර්තු 13 වෙනිදා විලියම් හර්ෂෙල් නමැති අයෙකු විසිනි. පෙරදිග ජ්‍යොතිෂයේ යුරේනස් සම්බන්ධයෙන් සඳහන් නොවේ. යුරේනස් ග්‍රහයාට දශාවක් හෝ අන්තර් දශාවක් නැත. යුරේනස් ගේ අපලයකට ප්‍රතිකර්මයක් ද සඳහන්ව නැත.
වර්තමාන ඊනියා ඉසිවරු අමුතු සොයාගැනීම් කරමින් ජනතාව ගොනාට අන්දමින් සිටිති. කලකට පෙර ඇතැමුන් ප්ලූටෝ නම් ග්‍රහයෙක්ද කේන්දර තුළට රිංගවමින් ප්ලූටෝ ග්‍රහයා ගෙන් ද අනාවැකි පැවසූ නමුත් හිටි ගමන් ප්ලූටෝ අතුරුදන් විය. එසේ ප්ලූටෝ කේන්දර කොටු තුළ සටහන් කළ පණ්ඩිතයින්ට අවසානයේ කටඋත්තර නැති විය. 
 යුරේනස් මාරුවෙන් ඔබට සිදුවන විපතක් නැත. කේන්දරයේ සිටින ග්‍රහයින් නව දෙනා හැර වෙනත් ග්‍රහයෙක් අපට වැදගත් නොවේ. 

නැවත යුද්ධයක් ඇතිවෙයි ද ?

 
  නැවත යුද්ධයක් ඇතිවෙයි ද ?
  මේ සම්බන්ධයෙන් මා 2009. මැයි 19 වෙනිදා රාත්‍රියේ විශේෂ පුද්ගලයෙකුට අනාවැකියක් පැවසුවෙමි. ඒ වනවිට කොටි නායකයාගේ මරණය ද සිදුවී හමාරය. එකී විශේෂ පුද්ගලයා දුරකතනයෙන් අමතා නැවත යුද්ධයක් ඇතිවෙයිදැයි මාගෙන් විමසුවේය. නැවත යුද්ධයක් ඇතිවන බව මම පැවසුවෙමි. දුරතනයෙන් ඇමතූ පුද්ගලයා විශ්මයට පත් වූ නමුත් මාගේ අනාවැකිය සුළු කොට තැකුවේ හෝ වැඩි දුර තර්ක කළේ නැත. නැවත යුද්ධයක් ඇතිවෙනවාද යන ප්‍රශ්නයට මාගේ පිළිතුර වන්නේ නැවත යුද්ධයක් ඇතිවෙනවා යන්නයි.

පසුගිය යුධ සමයේ දී ඇමතිවරුන් දැනුවත් කිරීම.

  2007 වසරේ අග භාගය වන විට සිව් දිගින් බෝම්බ පිපිරීම් ගැන

අසන්නට ලැබුණි. සෙනසුරු රාජ්‍ය කාරක සිංහ රාශියේ ගත කළ කාලයයි. පවතින ග්‍රහ තත්වය අනුව බලවත් පුද්ගලයින් කෙසෙල් කඳන් මෙන් ඇද වැටෙන බවත් පවතින බිහිසුණු තත්වය හමුවේ සියලු දෙනා ප්‍රවේශමෙන් කටයුතු කළ යුතු බවත් සඟරාවක ලිපියක් පල කරමින් මා පැවසුවෙමි. එමෙන්ම ලිපියක් යොමු කරමින් ප්‍රධාන පෙළේ අමාත්‍යවරුන්ව පෞද්ගලිකව දැනුවත් කළෙමි.වත්මන් ජනාධිපති මෛත්‍රීපාල සිරිසේන මැතිතුමා කෘෂිකර්ම සංවර්ධන හා ගොවිජන සේවා අමාත්‍යවරයාව සිටි අවදියයි. එතුමන්ව ද ලිපියක් මගින් දැනුවත් කළෙමි. කෙසේ වෙතත් එම බිහිසුණු කාල පරිච්ඡේදය තුළ දේශපාලඥයින් ගණනාවක් දැයට අහිමි විය.

2005 ජනාධිපතිවරණයෙන් මහින්ද රාජපක්ෂ මහතා ගේ ජයග්‍රහණය වෙනුවෙන් රචනා කළ සෙත් කවිය.
  2005 ජනාධිපතිවරණය පවත්වන ලද්දේ නොවැම්බර් 17 වෙනිදා ය. ඒ වන විට රජයේ ආරක්ෂක හමුදාවන්ට සිදුව තිබුණේ කොටි

සාමාජිකයින්ගේ ක්‍රියාකලාපයන් දැක්කා නොදැක්කා සේ ඉවසාගෙන බලා සිටීමට ය.සතුරු බලමුළු සුනු විසුනු කර ජාතිය සුරක්ෂිත කළ හැකි නායකයෙක් රටට අවශ්‍ය මොහොතක් වූයෙන් මහින්ද රාජපක්ෂ මහතා ගේ ජයග්‍රහණය පතා සෙත් කවියක් රචනා කළෙමි. කවිය පල කරනු ලැබුවේ ප්‍රධාන ජාතික පුවත්පතක ය. ඒ ඡන්දය ට පෙර දිනයේය. කවිය ලක්ෂ සංඛ්‍යාත පිරිසක ගේ නෙත ගැටුණාට සැකයක් නැත. කවියෙන් ඉල්ලා සිටි ඉල්ලීම් දෙකම ඉටුවුණි. එම කවිය මෙසේය.
සතර අත තෙද බලය පතුරන සසුන සුරකින දෙනෙත     විලසට 
ගොවිඳ දිව නෙත යොමනු මැන සිරිලකෙහි සටනකි රාජ අසුනට 
සතුරු බලමුළු විසුනු කරමිනි විලස හිරු දැක මියෙන    පිනි කැට 
රුහුණෙ එඩිතර කුමරු ජනපති කරනු මැන දැය සමය    රැකුමට

  රනිල් වික්‍රමසිංහ මහතා ජනපති වෙයිද?
  රනිල් වික්‍රමසිංහ මහතා කිසිදා රටේ ජනපති ධූරයට පත් නොවන බව මා පැවසුවේ 1999 වසරේදී ය.1999 වසරේ අග භාගයේදී ජනාධිපතිවරණයක් පැවති අතර ඊට ආසන්න දිනයකදී එවකට පලවූ "ඉරිදා වාසනා" පුත්පත තුළින් අනාවැකිය පැවසුවෙමි. රනිල් වික්‍රමසිංහ මහතාගේ ග්‍රහ පිහිටීම් අනුව ඔහුට රටේ මුල් පුරවැසියා වීමේ භාග්‍යය උදා නොවන බව මා පැවසුවෙමි. අනාවැකිය අදටත් හෙටටත් වලංගුය. අනාවැකිය පැවසූ දා පටන් සෑම ජනපතිවරණයකටම පසුව බොහෝ දෙනා දුරකතනයෙන් අමතා අනාවැකියේ සත්‍යතාවය අගය කිරීම පුරුද්දක්ව පැවතුණි.   

    

බිරින්දෑවරුන් ගේ ග්‍රහ යෝග.

සැමියන්ට සුර සැප හිමි කරන ප්‍රබල ග්‍රහ යෝග
බිරින්දෑවරුන් ගේ කේන්දර තුළ පිහිටන්නේ මෙහෙමයි.

   වාසනාවන්ත බිරිඳක් ලබන්නත් හොඳ පින් බලයක් තියෙන්න ඕනෑ. බිරින්දෑවරුන්ගේ වාසනා බලයෙන් සුර සැප විඳින සැමියන් වගේම බිරින්දෑවරු හින්දා නැත්තටම නැතිවෙන ස්වාමිපුරුෂයොත් ඉන්නවා. " කොහොමද....ගෑනි ගෙනාවට පස්සේ මිනිහා දියුණු වෙච්චි අපූරුව...කොහොම හිටිය මිනිහෙක්ද...ගෑනිගේ වාසනාව.." සමහර අම්මන්ඩිලාගේ මුවන් ඔය විදියේ කියමන් ඇහෙන්නේ නිකම් නෙමෙයි. විවාහයෙන් පස්සේ බොහොම පිළිවෙලින් ඉහල දියුණුවකට පත්වුණු ඉලන්දාරියෙක් ඉන්නවානම් අහල පහල අය ඔය විදියට කතා කරන එක අරුමයක් නෙමෙයි. " අනේ අප්පේ....යස අපූරුවට දියුණු වීගෙන ආපු මිනිහා...ගෑනි ගෙනාවත් හරි..මොනවා වුණාද මන්දා..." විවාහයෙන් පස්සේ නැත්තටම නැතිවුණු අය ගැන ඔය විදියේ කතාත් ඇහෙන්න ලැබෙනවා.
    තමන් තෝරා ගන්නා සැමියා හෝ බිරිඳ තමන්ගේ ජීවිතය බබළවන, ආලෝකමත් කරන, ජීවිතය ට වාසනාව කැන්දන කෙනෙක් වෙනවා නම් මොන තරම් වාසනාවක්ද..ඉන්න තත්වයෙන් පහළට වැටෙන්න කවුරුවත් කැමති නෑ. විවාහය කියන්නේ ජිවිතයේ තීරණාත්මක සන්ධිස්ථානයක්. මේ තීරණාත්මක සන්ධිස්ථානය ප්‍රධානම මර්මස්ථානය බවට පත් කරගන්නා අයත් ඉන්නවා. හතරවටින් වාසනාව කැන්දන ශ්‍රියා කාන්තාවක් බඳු වාසනාවන්ත බිරිඳක් ජිවිතයට සමීප කරගන්න හැම පිරිමියෙක්ම උත්සාහ කරන්න ඕනෑ. ජ්‍යොතිෂය උපයෝගී කරගත යුත්තේ ජීවිතය උපරිම ආකාරයෙන් සාර්ථක කරගැනීමටයි. වාසනාවන්ත බිරිඳක් හෝ සැමියෙක් තෝරා ගැනීමට ජ්‍යොතිෂ ශාස්ත්‍රය තරම් සහයෝගය දක්වන වෙනත් ශාස්ත්‍රයක් නෑ.

     
  එහෙමනම්, සැමියාට වාසනාව උදාකරන ග්‍රහ බලපෑම් බිරිදක ගේ ජන්ම පත්‍රය තුළ පිහිටන ආකාරය පැහැදිලි කරගනිමු.
  අපි කවුරුත් දන්නා පරිදි කේන්දරයක විවාහස්ථානය නම් හත් වැනි භාවයයි. මෙම හත් වැනි භාවයෙන් කිව හැකි සියලු කරුණු කාරණා සඳහන් කළහොත් ඔබ මවිතයට පත්වනු නිසැකයි. එම කාරණා ගැන කතා කිරීමට මත්තෙන් විවාහය හා සම්බන්ධ වන මූලික සුබ ග්‍රහ බලපෑම් ස්ත්‍රී කේන්දරය තුළ පිහිටන ආකාරය ගැන දැනගනිමු.
  සිකුරු යනු ඉතාමත් සුබදායක ග්‍රහයෙක් බව කවුරුත් පාහේ දන්නා කාරණයක්.  මේ සිකුරු ග්‍රහයා සුබදායක ලෙසින් හත් වැනි භාවයේ තැන්පත්වීම යුවතියකට ඉතාමත් සුබදායකයි.සුබදායක ලෙසින් තැන්පත්වීම සුබයි යනුවෙන් සඳහන් කළේ අසුබ ආකාරයට තැන්පත් විය හැකි අවස්ථාද තිබෙන බැවිනි. මේෂ, මිථුන, කටක, සිංහ, වෘශ්චික, ධනු යන ලග්න හිමි යුවතියන් ගේ ජන්මපත්‍ර තුළ සිකුරු හත් වැනි භාවයේ තැන්පත් වීම ස්වාමිපුරුෂයාට වාසනාව උදාකරන පිහිටීමක් බව මතක තබාගත යුතුයි. මෙවැනි යුවතියක් හිමි කරගන්නා සැමියෙකුට කිසිදා දුකින් කනස්සල්ලෙන් සිටීමට සිදුවන්නේ නෑ. මෙවැනි යුවතියන්ගේ අඟ පසඟද දුටුවන්ගේ නෙත් සිත් වසඟ කරවන සුළුයි. පියයුරු හා අනෙකුත් අවයවද සැමියාගේ සතුට වඩවන ආකාරයට පිහිටා තිබෙනවාමයි.මෙවැනි කතුන්ගේ හැසිරීමද ස්වාමි පුරුෂයාගේ සිත තුළ සතුට ඇතිකරවනවා. පහත කේන්දරය දෙස බලන්න. මෙම කේන්දරයේ හත් වැනි භාවයේ සිකුරු ග්‍රහයා තැන්පත්ව සිටිනවා. සඳු පළමු භාවයේ සිට හත් වැන්නේ සිටින සිකුරු දකිනවා. ( කේතු හැර සියලු ග්‍රහයින් තමන් සිටින තැන සිට හත් වැනි භාවය දකින බව සළකන්න). මෙම කේන්දරයේ හිමිකාරිය සමග විවාහ වුණු පුද්ගලයා  විවාහ වන කාලය වන විට සුළු රැකියාවක නියැලෙමින් සාමාන්‍ය තත්වයක පසුවුණා.විවාහයෙන් පසු ප්‍රධාන පෙළේ සමාගමක ඉහළ තනතුරකට පත්වුණා. මේ වන විට ඉහළ දියුණුවකට පත්වී සුඛෝපභෝගී ජිවිතයක් ගත කරනවා.

  පුර පස චන්ද්‍රයාද සැපත සතුට ප්‍රදානය කිරීමෙහිලා ඉතා සුබදායක ග්‍රහයෙක්.පුර චන්ද්‍රයා සුබයෙක් ලෙසත් අව චන්ද්‍රයා පපයෙක් ලෙසත් සැළකෙනවා. කේන්දරයේ සිටින්නේ පුර චන්ද්‍රයාද අව චන්ද්‍රයාදැයි සොයාගන්නේ කෙසේදැයි යන ප්‍රශ්නයට ඔබ මේ මොහොතේ මුහුණ දී සිටිනවා විය හැකියි. අමාවක ගෙවුණු තැන් පටන් පසළොස්වක තෙක් කාලය තුළ උපදින අයගේ කේන්දර තුළ සිටින්නේ පුර චන්ද්‍රයායි. පසළොස්වක පොහොය ගෙවුණු තැන් පටන් අමාවක ලබන මොහොත තෙක් කාලය තුළ උපදින්නාවූ අයගේ කේන්දර තුළ අව චන්ද්‍රයා තැන්පත්ව සිටිනවා. මේෂ, මිථුන, කන්‍යා,තුලා, වෘශ්චික, මකර,මීන යන ලග්න වලින් උපත ලබා සඳු හත් වැන්නේ සිටිනා බිරින්දෑවරු ස්වාමි පුරුෂයාට සතුට සැපත ප්‍රදානය කරනවා.
  මේෂ ලග්නයෙන් උපත ලබා ශනි හෙවත් සෙනසුරු හත්වැන්නේ තැන්පත්ව සිටීමද ස්වාමි පුරුෂයාට වාසනාව උදාකරන පිහිටීමක් බව මතක තබා ගත යුතුයි.
    කාන්තාවක් සතුව ස්ත්‍රී ලාලිත්‍ය, කාන්තා ගති ලක්ෂණ, කාන්තා අඟ පසඟ තියෙන්න ඕනෑ.එහෙමනම් ස්ත්‍රී කේන්දරයක ස්ත්‍රී ග්‍රහයින් බලවත් වෙන්න ඕනෑ. ස්ත්‍රී ග්‍රහයින් බලවත් වන තරමට කාන්තාවක් සැබෑ ලලනා ගති ලක්ෂණ වලින් යුක්ත වෙනවා. එවැනි කාන්තාවකගෙන් සැමියෙක් නිවැරදි මානසික හා කායික සතුටක් ලබනවා. කාන්ත කේන්දරයක පුරුෂ ග්‍රහයින් බලවත් වූ විට එම කාන්තාව පුරුෂ ගති ලක්ෂණ වලින් යුක්ත වෙනවා. පුරුෂාකර කාන්තාවකගෙන් නිවැරදි මානසික, කායික සතුටක් සැමියෙකුට ලැබෙන්නේ නෑ. කාන්තා කේන්දරයක සිකුරු සහ සඳු ඉතාමත් යහපත් ලෙස පිහිටිය යුතුයි. මෙම ග්‍රහයින් දෙදෙනා සුබදායක ලෙස පිහිටීමෙන් කාන්තාවක තුළ නියම ලලනා ගති ලක්ෂණ ඇතිවෙනවා වගේම ඇයගේ ලිංගික අවයවද මනාව පිහිටනවා.
   හත් වැන්නේ සිටිය යුතු ග්‍රහයො ගැන කියන කොට හත් වැන්නේ ග්‍රහයො නැති අය ට ප්‍රශ්නයක් මතුවෙනවා. කේන්දරයේ කොටු දොළහක් තිබුණට ග්‍රහයො ඉන්නේ නම දෙනයි. ඒ හින්දා සමහරුන්ගේ කේන්දර වල හත් වැන්නේ ග්‍රහයෙක් නැති වෙන්න පුළුවන්. හතේ ග්‍රහයෙක් නැති වුණත් හත් වැන්නට අධිපති ග්‍රහයෙක් ඉන්නවා. හත අධිපති ග්‍රහයා බලවත් තැනක සුබදායක ආකාරයට ඉන්නවා නම් ඒකත් ස්වාමිපුරුෂයාට වාසනාව උදාකරන පිහිටීමක්. කේන්දරයේ හත අධිපති ග්‍රහයා පහසුවෙන් හොයාගන්න පුළුවන් පහත වගුවෙන්.

පහත කේන්දරයේ හත් වැන්නාධිපති සිකුරු දෙවැන්න වූ වෘෂභ රාශියේ ස්වක්‍ෂේත්‍රව සිටින අයුරු බලන්න. ග්‍රහයෙක් තමන්ට අයත් රාශියක සිටිනවා නම් එම ග්‍රහයා ස්වක්‍ෂේත්‍ර බලයෙන් යුක්ත වෙනවා. මෙම කේන්දරයේ හිමිකාරිය තම සහකාරිය බවට පත් කරගත් ස්වාමිපුරුෂයා ඉහළ දියුණුවක් අත් කර ගත්තා. 

හත් වැනි භාවයට වැටෙන ග්‍රහ දෘෂ්ඨි ද ඉතාමත් වැදගත් වෙනවා. පළමු භාවයේ සිටින ග්‍රහයින්ගෙන් එල්ල වන දෘෂ්ඨි මෙහිදී වඩාත් වැදගත් වෙනවා. කේතු හැර පළමු භාවයේ සිටින ඕනෑම ග්‍රහයෙක් හත් වැන්න දකින බව මතක තබාගන්න. සඳු,සිකුරු,බුධ, ගුරු යන ග්‍රහයින් පළමු භාවයේ බලවත්ව සිටීම ස්වාමි පුරුෂයාට ඉතාමත් සුබදායකයි. වෘෂභ,මිථුන, තුලා, ධනු, මකර, කුම්භ ලග්න වලින් උපන් කාන්තාවන්ගේ කේන්දර තුළ සිකුරු පළමු භාවයේ තැන්පත්වීම ඉතාමත් සුබදායකයි. මිථුන, කන්‍යා ලග්න දෙකෙන් උපන් කාන්තාවන්ගේ කේන්දර තුළ බුධ පළමු භාවයේ තැන්පත්වීම ද ඒ ආකාරයෙන්ම සුබදායක වෙනවා. ධනු, මීන  ලග්න දෙකෙන් උපන් කාන්තාවන් ගේ කේන්දර තුළ ගුරු ලග්න භාවයේ හෙවත් පළමු භාවයේ තැන්පත්වීමද වාසනාවන්ත පිහිටීමක් බව මතක තබා ගත යුතුයි. වෘෂභ හෝ කටක ලග්නයෙන් ඉපැදී සඳු පළමු භාවයේ තැන්පත්ව සිටින කාන්තාවද සවාමියාට සැපදායක ජීවිතයක් උරුමකර දෙනවා.

  චන්ද්‍ර, කුජ, බුධ, ගුරු ග්‍රහයින් යහපත් තැනක සංයෝග වී සිටීමද ස්වාමි පුරුෂයා ට වාසනාව උදාකරන පිහිටීමක් වෙනවා. යහපත් ලෙස සිටින දෙවන්නාධිපති ග්‍රහයා හත්වැන්නාධිපති ගේ හා සිකුරු ග්‍රහයා ගේ දෘෂ්ඨියට ලක්වීමද ස්වාමිපුරුෂයා ට ඉහළ දියුණුවක් සලසා දෙන පිහිටීමක් බව මතක තබා ගත යුතුයි.

  පහසුවෙන් වටහාගත හැකි ග්‍රහ පිහිටීම් ඔය ආකාරයට යෙදෙන නමුත් තවත් ප්‍රබල ග්‍රහ යෝග කොතෙකුත් තිබෙනවා. එමන්ම ස්වාමි භක්තිය නාශක යෝග, අති ධාවන කාම යෝග, විෂ කන්‍යා යෝග, කනවැන්දුම් යෝග, දිළිඳු යෝග ආදී වශයෙන් අසුබ යෝගද බොහොමයක් තිබෙනවා. ඒ සම්බන්ධයෙන් ඉදිරියේදී කතා කරමු.

    

වසර දහසයකට පෙර
කොළඹ නගරසභා පිටියේ  දී
බිහිසුණු අවස්ථාවක් නිර්මාණය වුණු හැටි.

  1999.12.18 දින කොළඹ නගරසභා පිටිය දෙදරවමින් බෝම්බයක් පිපුරුවේය. එදින නගරසභා පිටියේ මැතිවරණ රැළියක් පැවති අතර එයට සහභාගී වූ ජනපතිනි චන්ද්‍රිකා කුමාරතුංග මැතිනිය  තුවාල ලැබුවාය. ඇයගේ ජීවිතය බේරුනේ අනූනවයෙනි. බෝම්බය පුපුරා යාමෙන් ඇයගේ ඇසකට හානි විය. ඒ වන විට එතුමිය ගත කරමින් සිටියේ සෙනසුරු මහ දශාවේ රාහු අන්තර් දශාව යි.
අනතුර සිදුවීමට මාසයකට පෙර, එම කාලයේ පලවූ දෛවය පුවත්පත තුළින් මා අනතුරු අඟවා සිටියේ " ජනපතිනියට මාරක අපලයි ප්‍රචාරක රැළි ප්‍රවේශමෙන් " යන ශීර්ෂය ඔස්සේ ලියූ අනාවැකියකිනි. කෙසේ වෙතත් ජනපතිනියට ඇසක් අහිමි වුණු අතර ජීවිතය යන්තමින් බේරුනි.
   මෙම බිහිසුණු අවස්ථාව නිර්මාණය වූ ආකාරය ජ්‍යෝතිෂය ඇසුරින් පැහැදිලි කිරීම මෙම ලිපියේ අරමුණ යි. මෙහිදී, අනතුර සිදුවන කාලය වන විට චන්ද්‍රිකා මැතිනිය ගත කළ ග්‍රහ තත්වය විමසුමට ලක් කිරීම වැදගත් වේ.

  අනතුර සිදුවන අවස්ථාව වන විට මැතිනිය ගත කරමින් සිටියේ සෙනසුරු මහ දශාවේ රාහු අන්තර් දශාවේ කේතු විදශාව යි. සෙනසුරු ඒ වන විට ගමන් කරමින් සිටියේ මේෂ රාශියේ යි. මැතිනිය ගේ කටක ලග්නය හිමි කේන්දරයේ දස වැනි භාවයේ යි. උප්පත්ති කේන්දරයේ දස වැනි භාවයේ කුජ තැන්පත්ව සිටියේය.කුජ සිටින රාශිය මතින් සෙනසුරු ගමන් කරන කාලය අවදානම් සහිත කාලයකි. ඉසිවරු පවසා ඇති පරිදි මෙම කාලය ලේ සෙලවෙන කාලයකි. උප්පත්ති කේන්දරයේ ලග්නාධිපති සඳු තැන්පත්ව සිටියේ සෙනසුරුට හිමි මකර රාශියේ ය. ඒ හත්වැනි භාවයේ යි.  අනතුර සිදුවන දිනය වන විට කුජ තැන්පත්ව සිටියේ එම හත් වැනි භාවයේ ය. කුජ යනු රුධිරය, අනතුරු, ගැටුම් නියෝජනය කරන ග්‍රහයා ය. කුජ හත් වැනි භාවයේ තැන්පත්ව සිටියේ කේතු සමග ය. කුජ, කේතු දෙදෙනා ලග්නාධිපති සඳු පීඩනයට ලක් කරමින් හත් වැනි භාවයේ ගමන් කිරීම අවධානම් තත්වයකි.
   අනතුර සිදු වුණු අවස්ථාවේ, එනම්  පස්වරු දහය වන විට උදා වී තිබුණේ ද කටක ලග්නය යි. කටක ලග්නය හිමි තත්කාල කේන්දරයේ දස වැනි භාවයේ ඒරාෂ්ඨකයක් යෙදී තිබුණි. ඒ සෙනසුරු සඳු සමග සංයෝග වෙමිනි.  අනතුර සිදුවන අවස්ථාව වන විට සෙනසුරු ගමන් කරමින් සිටියේ සිකුරු හිමි බෙරණ නැකතේ ය. සිකුරු උප්පත්ති කේන්දරයට අනුව 22 වැනි දෙර්කනාධිපතියා ය. සිද්ධිය සිදුවන අවස්ථාවේ සිකුරු තම රාශියක් වූ තුලා රාශියේ තැන්පත්ව ඒරාෂ්ඨකය යෙදී තිබුණු දස වැනි භාවයට සප්ථම දෘශ්ටිය හෙළමින් සිටියේය. අනතුරුදායක අවස්ථාව නිර්මාණය වී තිබුණේ ඔය ආකාරයට ය.
   කේන්ද්‍රය තුළින් පෙන්වන අවදානම් කාල සීමාවන් තුළ ආරක්ෂාකාරී විය යුතුය. වර්තමානයේ පවතින ග්‍රහ තත්වය කෙබඳු ද ? අවදානම් සහිත ද ? ඉදිරි කාලය සුබද අසුබද ? අවදානම් සහිත කාලසීමාවක් පැමිණෙන්නේ ද? මේ ආකාරයට තම ජ්‍යෝතිෂ උපදේශකවරයා ගෙන් සියලු කාරණා  අසා දැන ගත යුතුය.  ජ්‍යෝතිෂය බිහිකොට තිබෙන්නේ ඒ සඳහාය.
 

   

පුංචි පුංචි ග්‍රහ මාරු 
ජිවිත තුළ
ලොකු ලොකු වෙනස්කම් ඇති කරනවද ?
  සිකුරා එක් රාශියක රැඳී සිටින්නේ දින විසි හතරකි. මෙම කාලය මාස හතරක් දක්වා වැඩි විය හැකියි. බුධ එක් රාශියක කල් ගෙවන්නේ දින දාහතරකි. මෙම කාලය මාස දෙක හමාරක් දක්වා වැඩි වීමට ඉඩ තිබේ. කුජ එක් රාශියක දින තිස්පහක පමණ කාලයක් ගත කරන අතර මෙම කාලයද මාස හතක් දක්වා වැඩි වන අවස්ථාද තිබේ.රාශියක ගතකරන කාලය දීර්ඝ වන්නේ වක්‍ර වන අවස්ථාවලදී යි. රවි රාශියක කල් ගෙවන්නේ හරියටම මාසයකි. රවි ගේ වක්‍ර වීමක් නැත.
      බුධ, සිකුරු වැනි ග්‍රහයින්ගේ මාරු වීම් ඉතාමත් තීරණාත්මක සිදුවීම් ලෙස හුවා දක්වමින් පලාපල විස්තර ඉදිරිපත් කිරීමට ඇතැම් ජ්‍යෝතිර්වේදීන් පෙළඹී සිටියි. ජ්‍යෝතිෂය නොදන්නා ජනතාව සිතන්නේ මේවා ඉතාමත් බරපතළ, තීරණාත්මක ග්‍රහ මාරු කියා ය. ඇතැමුන් දුරකථනයෙන් අමතා ග්‍රහ මාරු පිළිබඳව විස්තර විමසන අවස්ථාද ඇත. 
   සුළු ග්‍රහ මාරු තීරණාත්මක සිදුවීම් ලෙස ජනතාව වෙත ඉදිරිපත් කිරීම බොහෝ විට සිදුවන්නේ රුපවාහිනී නාලිකා හරහා ය. ඇතැම් ජ්‍යෝතිර්වේදීන් රුපවාහිනී වැඩසටහන් වෙනුවෙන් විශාල ලෙස මුදල් වැය කරන බැවින් ඔවුන් වෙත විශාල පිරිසක් ගෙන්වා ගැනීමේ උවමනාවක් පවතී. ඒ සඳහා පෙළඹවීමක් ඇතිකිරීම පිණිස  බොහෝ කරුණු අතිශයෝක්තියෙන් ඉදිරිපත් කිරීමට ඇතැමුන් පෙළඹී සිටියි.
  පලාපල කථනයේදී ගෝචර ගමන් ගැන සැළකිලිමත් විය යුතු වූවත් පොදුවේ පලාපල ඉදිරිපත් කිරීමේදී බුධ, සිකුරු මාරු ගැන විස්තර ඉදිරිපත් කිරීම පලදායක නොවේ. එවන් ග්‍රහ මාරු පුද්ගල ජීවිතයක සුවිශේෂ වෙනස්කම් ඇතිකිරීමට සමත් නොවේ. කුජ මාරුව වූවද පලාපල කථනයේදී අදාල කර ගත යුත්තේ මාස ගණනක් එක් රාශියක රැඳී සිටින්නේ නම් පමණි.
   සෙනසුරු වසර දෙක හමාරක පමණ කාලයක් එක් රාශියක කල් ගෙවන බැවින් සෙනසුරු ගේ ගමන පලාපල කථනයේදී විශේෂයෙන්ම අදාල කර ගත යුතුය. මීට අමතරව රාහු, කේතු, ගුරු ආදීන්ගේ ගමනද වැදගත් වේ. ඒරාෂ්ඨක අපල එල්ල වන්නේ සෙනසුරු ගේ ගමන අනුවම බැවින් සෙනසුරු ගේ ගමන් පලාපල කථනයේදී වඩාත් වැදගත් වේ. කෙනෙකුගේ ජන්ම කේන්දරය පරීක්ෂා කිරීමේදී වූවද බුධ, සිකුරු ගමන් ගැන සැළකිලිමත් වීම එතරම් පලදායක නොවේ.
   ඇතැමුන් ජ්‍යෝතිෂ පර්යේෂණවල නියැලෙන බව පවසමින්, පොත පතේ සඳහන් කරුණු නොව අත්දැකීම් ඇසුරින් හෙළිකරගත් දේ අනුව පලාපල විස්තර ඉදිරිපත් කරන බවක් ද පවසයි. ජ්‍යෝතිෂයේදී අත්දැකීම් භාවිතා කිරීම වැදගත් වූවද ජ්‍යෝතිෂ පර්යේෂණ සිදුකිරීම යනු මුසාවකි. ජ්‍යෝතිෂය බිහිකළ ඉසිවරු තම උසස් චිත්ත බලය උපයෝගී කරගෙන ආකාශ වස්තූන් ගේ රුව ගුණත්, ඒවායින් එල්ල වන බලපෑමත් නිවැරදිව සොයා දැනගෙන ඉදිරිපත් කොට තිබේ. අපගේ වගකීම වන්නේ එම ඉදිරිපත් කළ දේ භාවිතයට ගැනීමයි. කේන්දරයේ කොටු දොළහට තවත් එක් කොටුවක් හෝ එකතු කිරීමට කිසිම පර්යේෂකයෙකුට නොහැක. වෙන දෙයක් තබා අද ඇතැමුන් ආකාශ වස්තූන් වෙත පය තැබුවද, එදා ඉසිවරු මහ පොළවේ සිට සොයා දැනගත් දේට අමතරව මෙතෙක්  සොයාගත් දෙයක් නැත.
  සෙනසුරු මාරුව, රාහු මාරුව, කේතු මාරුව, ගුරු මාරුව පොදුවේ රටට ලෝකයට මෙන්ම ජිවිත වලටද බලපෑම් එල්ල කරන බව සැබෑවකි. එමෙන්ම මාස කීපයක් එකම රැසක රැඳී සිටින හෝ ශනි, රාහු, කේතු, ගුරු ආදී ග්‍රහයෙක් සමග සංයෝග වන කුජද බලපෑම් එල්ල කරයි. බුධ මාරු සිකුරු මාරු ඇසුරින් පවසන  කරුණු කාරණා ඔළුවට ගත යුතු නැත.

රවි ගෙන් යෙදෙන බලගතු යෝග.

තාරකා මණ්ඩලයේ රජුගෙන් යෙදෙන බලගතු යෝග තුන,
වෙශි, වොශි, උභයචාරී යෝග.
ඔබේ කේන්දරයේත් තිබෙනවාදැයි බලන්න.

    රවි හෙවත් සූර්යයා තාරකා මණ්ඩලයේ රජතුමා යි. තාරකා ශාස්ත්‍රය හා සම්බන්ධ සෑම සියලු කටයුත්තකදී ම හිරු ට මූලික තැන හිමිවෙනවා. හිරු ගෙන් තොරව ලොවක් පවතින්නේ නෑ. පුරාණයේ පටන්ම ජනයා හිරු ට විශේෂ සැළකිල්ලක් දක්වලා තියෙනවා. හිරු ගෙන් ලොවට එල්ල වන බලපෑම සුළු පටු නෑ. හිරු රාහු ගේ ග්‍රහණයෙන් මුදවාලීම සඳහා බුදුන් වහන්සේ සූර්ය පිරිත දේශනා කළ බව බෞද්ධ සාහිතයේ සඳහන් වෙනවා. 
   කේන්දරයේ හිරු බලවත්වීම යහපත් පෞරෂයක් ලැබීමට හේතුවෙනවා.  එඩිතරකම, ගෞරවය, ස්ථිර ගතිය, ඉදිරියට යන ගතිය, යහපත් ශරීර සුවතාවය වැනි සුබ ඵල හිරු ගෙන් උරුම වෙනවා.හිරු දුර්වල වීමෙන් මෙම යහපත් ඵල නොලැබී යනවා. රෝග නාශක බලය මූලිකවම ලැබෙන්නේ හිරු ගෙන් බැවින් හිරු යහපත් ලෙස පිහිටා තිබීම වැදගත් වෙනවා.කොහොම වුණත් සෙසු තාරකාවන් මෙන්ම රවි ද කේන්දරයක සටහන් වන්නේ පෙර පින් පව්, කුසල් අකුසල් බලය ට අනුකූලව යි. අපට ඇවැසි තැනෙක කිසිදු තාරකාවක් සටහන් කරගන්න බෑ. රවි ගෙන් යෙදෙන යෝග ගණනාවක් තිබෙනවා. වෙශි, වොශි, උභයචාරී යන යෝග තුන පිළිබඳවයි මේ කතා කරන්න හදන්නේ. මෙම යෝග එකක්, දෙකක් හෝ තුනම වූවත් කේන්දරයක පිහිටන්න පුළුවන්.
    වෙශි යෝගය.
  රවි ගෙන් දෙවැනි භාවයේ සඳු, රාහු, කේතු හැර වෙනත් ග්‍රහයෙක් සිටිනවා නම් වෙශි යෝගය යෙදෙනවා. යෝගයෙන් ලැබෙන සුබ ඵල කොපමණ දැයි තීරණය වන්නේ රවි ගෙන් දෙවැනි භාවයේ සිටින ග්‍රහයා අනුව හා රවිගේත් එම ග්‍රහයාගේත් බල දුබලතා අනුව යි. රවි සිටින්නේත් යහපත් තත්වයක නම්,රවි ගෙන් දෙවැනි භාවයේ සිටින ග්‍රහයා සුබ ග්‍රහයෙක් නම්, එම සුබ ග්‍රහයා යහපත් අන්දමින් සිටින්නේ නම් යෝගයෙන් ලැබිය යුතු සුබ ඵල නොඅඩුව ලැබෙනවා.
  මෙම යෝගය හේතුවෙන් මහත් වාසනා බලයක් හිමිවෙනවා. නිතර සතුටින් කල් ගෙවීමට හැකි වෙනවා. යහපත් ආර්ථිකයක් ගොඩනගාගැනීමට හැකි වෙනවා.
  පහත කේන්දරයේ වෙශි යෝගය සටහන්ව තිබෙන ආකාරය බලන්න. රවි ගෙන් දෙවැනි භාවයේ ගුරු තැන්පත්ව වෙශි යෝගය උදාවී තිබෙනවා. මෙය ජනකාන්ත ඉන්දීය නිළි මධුරි ඩික්සිත් ගේ කේන්දරය යි.

 වොශි  යෝගය.

  රවි ගෙන් දොළොස්වැන්නේ රාහු, කේතු, සඳු හැර වෙනත් ග්‍රහයෙක් සිටීමෙන් වොශි යෝගය උදා වෙනවා. වොශි යෝගය හේතුවෙන් සතුටින් නිදහසේ කල් ගෙවීමට හැකි වන අතර සසිරිමත් ජිවිතයක් ගත කිරීමට හැකිවෙනවා. දෙවැන්නේ සිටින්නේ පාපී ග්‍රහයෙක් නම් ලැබිය යුතු සුබ ඵල ඒ අයුරින්ම බලාපොරොත්තු විය නොහැකියි. දෙවැන්නේ සිටින්නේ සිකුරු හෝ බුධ හෝ ගුරු නම් යෝගයේ ඵල නිවැරදිව හිමි වෙනවා.

  පහත දැක්වෙන කේන්දරය දෙස බලන්න. රවි ට දොළොස්වැන්නේ බුධ තැන්පත්ව වොශි යෝගය උදා වී තිබෙනවා. මේ ඉන්දීය ක්‍රිකට් ක්‍රීඩක සචින් තෙන්ඩුල්කාර් ගේ කේන්දරය යි.

 උභයචාරී යෝගය 

   උභයචාරී යෝගය නම් සඳු, රාහු, කේතු හැර වෙනත් ග්‍රහයින් දෙදෙනෙක් රවි ට දෙපසින් සිටීම යි. මෙමගින් මනා කථන ශක්තියක් ඇතිවෙනවා.සෑම කාර්යයකින්ම, සෑම කටයුත්තකින්ම සොම්නසක් ලබන මොවුන් ධනය හා ප්‍රසිද්ධියද ලබනවා. බොහෝ දෙනෙකු ගේ ගෞරවයට ආදරයට ලක් වෙනවා. යහපත් ශරීරයකින් යුක්ත වෙනවා.  රවි ට දෙපසින් අසුබ ග්‍රහයින් තැන්පත් වීමෙන් නියම ඵල නොලැබී යන බවද මතක තබා ගත යුතුයි.

 පහත දැක්වෙන කේන්දරයේ උභයචාරී යෝගය උදා වී තිබෙන අයුරු බලන්න. අට වැන්නේ සිටින රවි ගෙන් දෙවැනි භාවයේ සිකුරු තැන්පත්ව සිටින අතර රවි ගෙන් දොළොස්වැනි භාවයේ ගුරු සහ බුධ තැන්පත්ව සිටිනවා. මෙම කේන්දරයේ හිමිකරුවා ලංකාවේ ජන නායකයෙකුගේ පුතෙකු වන අතර දැනට පාර්ලිමේන්තු මන්ත්‍රී වරයෙකු ලෙස කටයුතු කරනවා. මෙම කේන්දරයේ රවි අට වැන්නේ තැන්පත් නොවී සුබ ස්ථානයක තැන්පත්ව සිටියදී උභයචාරී යෝගය යෙදුණා නම් වඩාත් විශිෂ්ඨ සුබ ඵල අත් වෙනවා.

යෝගයට සම්බන්ධ ග්‍රහයින් බලවත්ව සිටින තරමට යෝගයෙන් ලැබිය යුතු සුබ ඵල මනාව හිමිවෙනවා. ග්‍රහයින් දුර්වලව පිහිටා ඇති කල්හි යෝගයෙන් ලැබිය යුතු සුබ ඵල අවම වෙනවා.

  

ග්‍රහ ලොවේ සටන්කාමියා රතු ග්‍රහයා යි. රතු ග්‍රහයා නම් කුජ හෙවත් අඟහරු ය. යුද්ධයට අධිපතියාත් අඟහරු ය. රුධිරයට හා ප්‍රචණ්ඩත්වයට අධිපතියාද අඟහරු ම ය. මෙහෙව් අඟහරු 2016. 02. 20 වැනි සෙනසුරාදා වෘශ්චික රාශියට ගමන් කිරීමට නියමිත ය. කුජ වෘශ්චිකය  ට ගමන් කරන්නේ සෙනසුරාගේ සෙනසුරාදා දිනයේ සෙනසුරාගේම නැකතකත් වූ පුෂ නැකතින් ය. මේ විදියට වෘශ්චික රාශියට යන කුජ එහිදී සෙනසුරා සමග සංයෝග වීමට නියමිතය. මේ දෙන්නා වෘශ්චික රාශියේ එක්වන්නේ අවුරුදු 89 කට පසුව ය.  එහෙම නම් මෙය එසේ මෙසේ ග්‍රහ සංයෝගයක් නොවේය. සෙනසුරා දුකට අධිපතියා ය. අඟහරු යුද්ධයට අධිපතියා ය. එහෙව් ග්‍රහයො දෙන්නෙක් එක්වන්නේ ද මහා ගුප්ත රාශියක ය. ගුප්ත රාශියක් වූ වෘශ්චික රාශියද අඟහරුගේ ය. මේ දෙන්නා 2016. 09. 18 තෙක් වෘශ්චික රාශියේ රැඳී සිටීමට නියමිත ය.

      දැනට සෙනසුරුගේ ඒරාෂ්ඨක අපල ගතකරන අය ප්‍රවේශම් විය යුතුය. ඒරාෂ්ඨකය ට අඟහරු ද හවුල් වී අපල වැඩි කරන බැවිනි. ඒරාෂ්ඨක අපල ඇති අය අනතුරුවලට ලක්වීමට ඉඩ තිබෙන බැවින් කල්පනාකාරී විය යුතුය. සුළු අසනීපයක් වැළඳුනද නිශ්චය කරගැනීමට අපහසු විය හැකිය. වැළඳෙන අසනීප සම්බන්ධයෙන් වෛද්‍යවරු වැරදි නිගමනවලට එළඹීමට ද ඉඩ තිබෙන කාලයකි.

    දැනට ඒරාෂ්ඨක ගතකරන්නෝ නම් තුලා, වෘශ්චික, ධනු, මේෂ ලග්න හිමියන් ය. මෙයින් මේෂ ලග්න හිමියන් සෙනසුරුගේ අෂ්ටම ඒරාෂ්ඨකය ගත කරන අතර තුලා, වෘශ්චික, ධනු ලග්න හිමියන් ලග්න ඒරාෂ්ඨකය ගත කරයි. මින් වෘශ්චික ලග්න හිමියන්ගේ ඒරාෂ්ඨක අපලය තදබල ය. මීට අමතරව තවත් ඒරාෂ්ඨක ඇත. තමන් දැනට ඒරාෂ්ඨක අපලයක් ගතකරනවාදැයි දැන ගැනීමට ජන්මපත්‍රය හෝ උපන් වේලාව සමග තම ජ්‍යොතිෂවේදියා හමුවිය යුතුය. 
 යහපත් චේතනාවෙන් යුතුව යහපත් ලෙස ජීවිකාව ගෙන යන අය කුමන ආකාරයේ කාල වකවානුවක දී වුවද බිය විය යුතු නැත.
    

මේෂ ලග්නය.
හැකි තරම් ඉවසන්න.
     කුජ ගමන් කරන්නේ අට වැන්නට යි. අට වැන්න නම් මාරකස්ථානය යි. කුජ අටවැන්නට ගමන් කිරීමත් සමග දැඩි අවේගශීලී ගති ලක්ෂණ ඇතිවෙනවා. ඉක්මන් තීන්දු තීරණ ගැනීමට පෙළඹෙනවා. අන්‍යයන් නොරුස්සන ගති ඇතිවෙනවා. සටනට බර වෙනවා. දුර දිග බලා කටයුතු කරන ගතිය නැති වෙනවා. හිතේ නොසන්සුන් ගති ඇතිවෙනවා. සතුට, තෘප්තිය, මානසික ප්‍රබෝධය අඩුවෙනවා. ඉක්මන්කාරීකම හේතුවෙන් ගැටලු කරදර ඇතිවෙන්න පුළුවන්. විවාහ සම්බන්ධතා වලට බාධක එල්ලවෙනවා. යුග ජිවිත ගතකරන මේෂ ලග්න හිමියන් ඉතාමත් ඉවසිලිමත්ව කටයුතු කළ යුතුයි.ආර්ථිකය සම්බන්ධයෙන් ද සැළකිලිමත් විය යුතුයි. ධන හානි, නිෂ්පල වියදම්, අධික වියදම් වලට ඉඩ තිබෙනවා. කතාවෙන් අන්‍යයන්ගේ සිත රිදෙන කාලයක් බැවින් කතා කිරීමේදී කල්පනාකාරී විය යුතුයි. රැකියා කටයුතුවල ගැටලු මතුවිය හැකියි. රැකියා කටයුතු වලදී ඉවසිලිමත්ව හා බුද්ධිමත්ව කටයුතු කිරීම වැදගත් වෙනවා.
    ශරීර සෞක්‍යය සම්බන්ධයෙන් විශේෂ අවදානයක් යොමු කළ යුතුයි. අනතුරු, අස්ථි බිඳීම්, ශල්‍යකර්ම ආදියට ඉඩ තිබෙනවා. ඒරාෂ්ඨක අපලයක් ද පවතින බැවින් නිශ්චය කර ගැනීමට අපහසු හෝ ලබාගන්නා ප්‍රතිකාර වලින් ඉක්මන් සුවයක් නොලැබෙන ආකාරයේ අසනීප මතුවිය හැකියි. අසනීප වලදී වෛද්‍යවරු වැරදි නිගමනවලට එළඹීමට ද ඉඩ තිබෙනවා.
       අට වැන්නේ කුජ ශනි සංයෝගය පවතින 2016. 02. 20 - 2016. 09. 18 අතර කාලය තුළ පින් දහම්, දාන මාන කටයුතු කෙරෙහි වැඩිපුර නැඹුරුවීම වැදගත් වෙනවා. දිනපතා සියලු සත්වයින් වෙත මෙත් වැඩීමද ඉතාමත් සුබදායකයි.

වෘෂභ ලග්නය.
ගෘහ ජීවිතයේ කරදර.
  කුජ ගමන් කරන්නේ හත් වැන්නටයි. හත් වැන්න විවාහස්ථානයයි.  විවාහස්ථානයේ කුජ ශනි එක්වීම සුබදායක නෑ. විවාහ කටයුතු සම්බන්ධයෙන් අවිනිශ්චිත වාතාවරණයක් ඇතිවෙනවා. ප්‍රේම සම්බන්ධතා, විවාහ කටයුතු ආදියට බාධක අවහිර එල්ල වෙනවා. යුග ජිවිත ගතකරන වෘෂභ ලග්න හිමියන් යුග දිවියේ සමගිය ආරක්ෂා කරගෙන ඉවසිලිමත්ව කටයුතු කළ යුතුයි.මෙම කාලය තුළ සහකාරියට, සහකරුට අපල එල්ලවෙනවා.
   සසර තුළ සහයෝගීතාවය නිසි පරිදි ආරක්ෂා කර නොගැනීමේ අකුසළ කර්මයන් මෙම කාල සීමාව තුළ මතුවී විපාක දීමට ඉඩ තිබෙනවා. සමීප සහයෝගීතාවයන් දුරස් විය හැකියි. හවුල් කටයුතුවල යෙදෙන වෘෂභ ලග්න හිමියන් ඉවසිලිමත්ව කටයුතු කළ යුතුයි. මානසික නිරවුල්තාවය සැම විටම යහපත් තත්වයක පවත්වා ගත යුතුයි.
     නොසුදුසු, නොගැළපෙන බැඳීම් ඇතිවීමටත්, ඒ හේතුවෙන් නොයෙක් ගැටලු මතුවීමටත් ඉඩ තිබෙනවා. 2016. 02. 20 - 2016. 09. 18 අතර කාලය තුළ විරුද්ධ ලිංගිකයින් සමග සම්බන්ධතා ගොඩනගා ගැනීමේදී කල්පනාකාරී විය යුතුයි.
     මුත්‍රා අබාධ, අර්ශස්, දැවිලි අසනීප, ලිංගික රෝග ආදියට ඉඩ තිබෙනවා. උෂ්ණ ආහාර පාන වලින් ඈත් විය යුතුයි. රහස් අසනීප වැළඳීමට ඉඩ තිබෙන බැවින් නොමනා හැසිරීම් වලින් වැළකිය යුතුයි.

 මිථුන ලග්නය.
සතුරන් ට පරාජය.
  කුජ ගමන් කරන්නේ හය වැන්නට යි.හය වැන්න ලෙඩ රෝග හා සතුරන් ගැන කියැවෙන ස්ථානය යි. සටන්කාමී කුජ ග්‍රහයා සතුරන් ගැන කියැවෙන ස්ථානයට ගමන් කිරීම සතුරු බලපෑම් මර්දනය වීමට හේතුවෙනවා.කුජ ශනි දෙදෙනාම හය වැන්නේ ගමන් කිරීම සුබදායක බව සෘෂි මතයයි. 2016. 02. 20 - 2016. 09. 18 අතර කාලය මිථුන ලග්න හිමියන්ට සුබදායක කාලයක් වෙනවා. දැඩි ආත්ම ශක්තියක් ඇතුව කටයුතු කිරීමට හැකිවෙනවා.උත්සාහය උනන්දුව වර්ධනය වෙනවා. සිතේ සතුට ඇතිවෙනවා. කරන කියන කටයුතු සිතට ගැළපෙන ආකාරයට සාර්ථක වෙනවා. ඇසුරු කරන අය අතර කැපී පෙනෙන තත්වයක් ඇතිවෙනවා. ව්‍යාපාර කටයුතු දියුණු වෙනවා. බාධක අවහිර දුරු වෙනවා. ලාභ ලැබෙනවා. අන්‍යයන්ගෙන් ඇප උපකාර හිමිවෙනවා. ඉදිරියට යන ගැම්ම ඇතිවෙනවා. නව හිත මිත්‍රාදීන් හඳුනා ගැනීමට හැකි වෙනවා. ශරීර සෞක්‍යය යහපත් වෙනවා. අසනීප තත්වයන් තිබුණා නම් සුවය ලැබෙනවා. ගේදොර දේපළ ආදියේ දියුණුවක් ඇතිවෙනවා. දියුණුව සාර්ථකත්වය වෙනුවෙන් උපරිම ආකාරයෙන් භාවිතයට ගත යුතු කාලයක් බව මතක තබා ගත යුතුයි.
    වරින් වර උදරාශ්‍රිත වේදනා පීඩා මතුවුණද නිතර ප්‍රබෝධමත් ගතියෙන් යුතුව කටයුතු කිරීමට හැකිවෙනවා.

කටක ලග්නය.
අස්ථාන චෝදනා.   
කුජ ගමන් කරන්නේ පස් වැනි භාවයටයි. පස් වැන්න නම් විද්‍යා ස්ථානයයි. එමෙන්ම දරුවන් ගැන කියැවෙන ස්ථානයයි. පෙර ආත්ම භාවයන් තුළ පුරුදු පුහුණු කළා වූ දේවල් ගැන මෙන්ම සිත දමනය කර ගැනීමේ හැකියාව සම්බන්ධයෙන්ද වැදගත් කරුණු හෙළිදරව් කරන ස්ථානයයි. දැනටමත් පස් වැන්නේ සිටින සෙනසුරු සමග කුජ එකතුවීම කටක ලග්න හිමියන්ට සුබදායක නෑ. තමන්ගේම වරදින් ගැටළු කරදර ඇතිකරගන්නා කාලයක්. නොකළ යුතු දේවල් කරන්නට යාමෙන් හා කළ යුතුම දේවල් මඟහැරී යාමෙන් ගැටලු පැටලිලි ඇතිවෙනවා. අස්ථාන චෝදනා, අපහාස එල්ලවීමට ඉඩ තිබෙනවා. ආත්ම ගෞරවයට හානි සිදුවියහැකි කාලයක් බැවින් සැළකිලිමත් විය යුතුයි, ඉක්මන් තීන්දු තීරණ වලින් වැළකිය යුතුයි. පළපුරුද්දෙන් යුතුව කරන කටයුතු පවා වැරදී යා හැකියි. නිෂ්පල ගමන් බිමන් වල යෙදීමට සිදුවෙනවා. රහස් සතුරු බලපෑම් ඇතිවිය හැකි කාලයක් බැවින් අන්‍යයන් සමග කටයුතු කිරීමේදී හා අන්‍යයන් විශ්වාස කිරීමේදී කල්පනාකාරී විය යුතුයි. නොගැළපෙන නොසුදුසු බැඳීම් ඇතිවීමටත් ඒ හේතුවෙන් නොයෙක් නොයෙක් ගැටලු මතුවීමටත් ඉඩ තිබෙනවා.
  යුග ජීවිත ගතකරන කටක ලග්න හිමියන් ඉවසිලිමත්ව කටයුතු කළ යුතුයි. සිත පාලනය කරගෙන පවුලේ සමගිය රැකගෙන බුද්ධිමත්ව කටයුතු කළ යුතුයි. 2016. 02. 20 - 2016. 09. 18 අතර කාලය තුළ උදරාශ්‍රිත අසනීප මතුවෙනවා.උදරාශ්‍රිත ශල්‍ය කර්මයකටද ඉඩකඩ තිබෙනවා.

සිංහ ලග්නය.
ගෘහ ජීවිතයේ ගැටලු.  
කුජ ගමන් කරන්නේ ඔබ ගේ සිව් වැනි භාවයටයි. සිව් වැනි භාවය නම් බන්ධුස්ථානය යි. ප්‍රධාන වශයෙන් ගෘහය ගැන කියැවෙන ස්ථානයයි. ශරීර ස්ථාන වශයෙන් ගත්කළ පපුව හා හෘදය ගැන කියැවෙන ස්ථානයයි. කේන්ද්‍රස්ථානයක් වූ සිව් වැන්නේ කුජ ශනි එක්වීම සුබදායක නෑ. ගෘහ ජීවිතයේ සතුට සැනසුම බිඳ වැටෙනවා. සිතේ සතුට ප්‍රබෝධය අඩුවෙනවා. නිතර ශරීරයට විඩාබර ගතියක් ඇතිවෙනවා. උද්යෝගය උනන්දුව අඩුවෙනවා. ඥාතීන් සමග කටයුතු කිරීමේදී කල්පනාකාරී විය යුතුයි. ඥාතීන් සමග විරසකතා ඇතිවීමට ඉඩ තිබෙනවා. ගේදොර දේපළ සම්බන්ධයෙන් ගැටලු ආරවුල් ඇතිවිය හැකියි. නීති ප්‍රශ්න පවතින්නේ නම් තමන්ට අවාසිදායක තත්වයක් උද්ගත විය හැකියි. ගැටුම් ආරවුල් දුරදිග යා නොදී බේරුම් කරගත යුතු කාලයක් බව මතක තබා ගත යුතුයි. 2016. 02. 20 - 2016. 09. 18 අතර කාලය ගේදොර දේපළ සම්බන්ධ ගනු දෙණු වලට නොයා යුතු කාලයක් බව ද මතක තබා ගත යුතුයි.
  සමාජයේ පැවති හොඳ නාමය නරක්වීමටත් ආත්ම ගරුත්වයට හානි සිදුවීමටත් ඉඩ තිබෙන බැවින් දුරදිග බලා කටයුතු කළ යුතුයි. සැකයට භාජනය වන කාලයකි. අවස්ථාවාදී පුද්ගලයින් සමීප විය හැකි කාලයක් බැවින් අන්‍යයන් ඇසුරු කිරීමේදී සැළකිලිමත් විය යුතුයි. සිතට සතුටක් නොදැනෙන වෙහෙසකර ගමන් බිමන් යෙදෙනවා.
  පපුව ආශ්‍රිත අසනීප, හෘද රෝග ආදියට ඉඩ තිබෙනවා.

කන්‍යා ලග්නය.
ජයග්‍රාහී කාලයක්.
  කුජ ගමන් කරන්නේ තුන් වැනි භාවයටයි. තු වැනි භාවය නම් වික්‍රමස්ථානය යි. වික්‍රමස්ථානයට කුජ මෙන්ම ශනි ද යහපත් බව සෘෂි මතයයි. ලද අත්දැකීම් අනුව ද එය සනාථ වූ කාරණයක් බැවින් කුජ ශනි සංයෝගය කන්‍යා ලග්න හිමියන්ට සුබදායක වන බව පැවසිය යුතුයි. උද්යෝගය උනන්දුව වර්ධනය වෙනවා. කරන කියන කටයුතු සිතට ගැළපෙන පරිදි සාර්ථක වෙනවා.රැකියා කටයුතුවල විශේෂ දියුණුවක් ඇතිවෙනවා. ව්‍යාපාර සාර්ථක වෙනවා. විශේෂ ධන ලාභ හිමිවෙනවා. මානසික නිරවුල්තාවය ඇතිවෙනවා. බාධක අවහිර දුරු වෙනවා. සමාජයේ කැපී පෙනෙන තත්වයක් ඇතිවෙනවා. සතුරු බලපෑම් දුරු වෙනවා. තම වාසියට කටයුතු සැළසෙනවා. අන්‍යයන්ගෙන් උදව් උපකාර හිමි වෙනවා. අලුත් හිත මිත්‍රාදීන් හඳුනා ගැනීමට හැකිවෙනවා.ප්‍රයෝජනවත් ගමන් බිමන් යෙදෙනවා.
  ගේදොර සැදීමේ කටයුතුවලට මෙම කාලය ඉතා සුබදායකයි. අඩාල වී පැවති වැඩ කටයුතුද සාර්ථකව ක්‍රියාත්මක කර ගැනීමට හැකිවෙනවා.
  විශේෂ වරප්‍රසාද, උසස්වීම්, නව තනතුරු ලැබෙන්නට ද ඉඩ තිබෙනවා. තම බලය වර්ධනය වෙනවා. ශරීර සෞක්‍යය යහපත් වෙනවා.හොඳ නම ප්‍රසිද්ධ වෙනවා. උසස් අය සමග ඇසුර ඇතිවෙනවා. සහෝදරාදීන්ට තරමක අපල එල්ලවෙනවා.


තුලා ලග්නය.
ධන හානි, අධික වියදම්. 
කුජ ගමන් කරන්නේ දෙවැනි භාවයටයි. දෙවැනි භාවය නම් ධනස්ථානයි. ධනස්ථානය ශනි කුජ දෙදෙනාට සුබදායක නෑ. දැනට තුලා ලග්න හිමියන්ට ලග්න ඒරාෂ්ඨක අපලය පවතිනවා. මේ අනුව කුජ ශනි සංයෝගය තුළින් තුලා ලග්න හිමියන්ට අසුබ බලපෑම් එල්ල වෙනවා. ධන හානි, අධික වියදම්, නිෂ්පල වියදම් වලට ඉඩ තිබෙනවා. 2016. 02. 20 - 2016. 09. 18 අතර කාලය තුළ ආර්ථිකය ඉතාමත් ප්‍රවේශමෙන් කළමනාකරණය කළ යුතුයි. ණය ගනු දෙනු වලින් වැළකිය යුතුයි. රැවටිලි වංචා වලට අසු වීමට ඉඩ තිබෙනවා. අන්‍යයන් සමග කරන ගනු දෙනු වලදී ප්‍රවේශම් විය යුතුයි.
   මෙම කාලය ශරීර සෞක්‍යයට ද සුබදායක නෑ. හදිසි අනතුරු වලට ඉඩ තිබෙනවා. සුළු අසනීපයක් වැළඳුනද නිශ්චය කරගැනීමට අපහසු වීමට හෝ ලබාගන්නා ප්‍රතිකාර වලින් ඉමන් සුවයක් නොලැබීමට ඉඩ තිබෙනවා.
   හිතවතුන් සමග අමනාපකම් ඇතිවීමටත්, හිත මිත්‍රාදීන් දුරස් වීමටත් ඉඩ තිබෙනවා.කතාවෙන් අන්‍යයන්ගේ සිත් රිදෙන කාලයක් බැවින් කතා කිරීමේදී කල්පනාකාරී විය යුතුයි.ගෙදර දොරේ සාමය සමගිය බිඳවැටීමටද ඉඩ තිබෙනවා. ඉතාමත් ඉවසිලිමත්ව කටයුතු කළ යුතුයි.

වෘශ්චික ලග්නය.
සිතට ගතට පීඩා. 
 කුජ ගමන් කරන්නේ පළමු වැනි භාවයටයි. පළමු භාවය නම් ලග්න භාවයයි. වෘශ්චික ලග්න හිමියන් මේ වන විට සෙනසුරු ගේ සෙනසුරු ගේ ලග්න ඒරාෂ්ඨකය ගත කරනවා. කුජ ග්‍රහයා මෙන්ම ශනි ග්‍රහයා ද ලග්න භාවයේ ගමන් කිරීම සුබදායක නෑ. ඒරාෂ්ඨකය අතරතුර කුජ ශනි සංයෝග වීම හේතුවෙන් න්මනසික පීඩා ඇතිවෙනවා. සතුට ප්‍රබෝධය අඩුවෙනවා. කරන කියන කටයුතු වලින් බලාපොරොත්තු වන තරමේ තෘප්තියක් සතුටක් ලබා ගැනීමට අපහසු වෙනවා. නිතර සිතට කණස්සලු කළකිරීම් ඇතිවෙනවා. බලාපොරොත්තු ඉටුවීම ප්‍රමාද වෙනවා. උත්සාහයේ හා මහන්සියේ තරමට ප්‍රථිපල නොලැබී යනවා. කරන කියන කටයුතු වලට බාධක අවහිර එල්ල වෙනවා.
   2016. 02. 20 - 2016. 09. 18 අතර කාලය තුළ දැඩි ආවේගශීලී ගති ලක්ෂණ ඇතිවෙනවා. ගෘහ ජීවිතයේ සතුට සමගිය බිඳ වැටීමට ඉඩ තිබෙනවා. යුග ජීවිත ගතකරන වෘශ්චික ලග්න හිමියන් ඉතාමත් ඉවසිලිමත්ව කටයුතු කළ යුතුයි. ප්‍රේම සම්බන්ධතා, විවාහ කටයුතු ආදියට තද බල බාධක එල්ල වෙනවා.
    ශරීර සෞක්‍යය සම්බන්ධයෙන් විශේෂයෙන් සැළකිලිමත් විය යුතුයි. වැටීම්, අනතුරු, අස්ථි බිඳීම් වලට ඉඩ තිබෙනවා. රුධිරය දූෂ්‍ය වීම හේතුවෙන් ඇතිවන අසනීප වලට මෙන්ම රුධිර ගමන අඩු වැඩි වීමේ පීඩාවන්ට ද ඉඩ තිබෙනවා.

ධනු ලග්නය.
සිත් තැවුල්, ධන හානි.  
කුජ ගමන් කරන්නේ දොළොස්වැනි භාවයට යි. දොළොස් වැනි භාවය නම් වැයස්ථානය යි. දැනට දොළොස් වැනි භාවයේ සෙනසුරු ගමන් ගන්නා බැවින් ධනු ලග්න හිමියන්ට ඒරාෂ්ඨක අපලයක් පවතිනවා. ඒරාෂ්ඨක අපල එල්ලකරන සෙනසුරු සමග කුජ එක්වීම සුබදායක නෑ. මානසික සහනය තද බල ලෙස බිඳ වැටෙනවා. සිත් තැවුල්, කළකිරීම් ඇතිවෙනවා. බලාපොරොත්තු සහිතව කරන කටයුතු වලින් බලාපොරොත්තු වන ප්‍රථිපල නොලැබී යනවා. චෝදනා, අපහාස එල්ලවීමට ඉඩ තිබෙනවා. නීති ප්‍රශ්නයක් මතුවීමට ඉඩ තිබෙන බැවින් කල්පනාකාරී විය යුතුයි. අන්‍යයන් වෙනුවෙන් ඇපවීම්, අන්‍යයන්ගේ ණය ගනු දෙනු වලට මැදිහත්වීම් ආදියෙන් වැළකිය යුතුයි.රැවටිලි වංචා වලට ලක් වීමට ඉඩ තිබෙන බැවින් අන්‍යයන් විශ්වාස කිරීමේදී කල්පනාකාරී විය යුතුයි.උද්යෝගය උනන්දුව අඩුවෙනවා. නිතර උදාසීන ගති ඇතිවෙනවා. මෙම කාලය තුළ සිත තරමක් දූෂ්‍ය වෙනවා. ආත්ම ගරුත්වයට හානි සිදුවිය හැකි බැවින් දුර දිග බලා කටයුතු කළ යුතුයි. ප්‍රේම සම්බන්ධතා, විවාහ කටයුතු ආදියට බාධක එල්ලවෙනවා.
   ශරීර සෞක්‍යය සම්බන්ධයෙන් සැළකිලිමත් විය යුතුයි. වැටීම්, අනතුරු, අස්ථි බිඳීම් වලට ඉඩ තිබෙනවා. අවදානම් සහිත කටයුතුවලදී කල්පනාකාරී විය යුතුයි. නිශ්චය කර ගැනීමට අපහසු හෝ ලබාගන්නා ප්‍රතිකාරවලින් ඉක්මන් සුවයක් නොලැබෙන ආකාරයේ අසනීප මතුවිය හැකියි.

මකර ලග්නය.
යහපත් කාලයක්.
කුජ ගමන් කරන්නේ එකොළොස් වැනි භාවයටයි. එකොළොස් වැනි භාවය නම් අයස්ථානය යි. මෙම ස්ථානය කුජට මෙන්ම ශනිට ද සුබදායකයි. කුජ ශනි එකොළොස් වැනි භාවයේ සංයෝගවීම හේතුවෙන් මකර ලග්න හිමියන්ට සුබ පල අත්වෙනවා. කරන කියන කටයුතු සාර්ථක වෙනවා.උත්සාහය, උනන්දුව, ධෛර්යය වර්ධනය වෙනවා. සතුටින් කල් ගෙවීමට ඉඩ කඩ සැලසෙනවා.හිත මිතුරු සම්බන්ධතා වර්ධනය වෙනවා. ජයග්‍රහණ හිමි වෙනවා. අන්‍යයන් ගෙන් සැළකිලි ලැබෙනවා.ගේදොර දේපළ ආදියේ දියුණුවක් කලඑළියක් ඇතිවෙනවා. උත්සාහයේ හා මහන්සියේ තරමට ප්‍රථිපල ලැබෙනවා. බලාපොරොත්තු බොහොමයක් ඉටුකර ගැනීමට හැකිවෙනවා. උරුම හිමිකම් නිරවුල් කර ගැනීමට හැකිවෙනවා. 
 රැකියා කටයුතු, ව්‍යාපාර කටයුතු ආදියේ දියුණුව ඇතිවෙනවා. උසස්වීම්, තනතුරු, වරප්‍රසාද හිමිවීමටත් ඉඩ තිබෙනවා. අදායම් වර්ධනය වෙනවා. විශේෂ ධන ලාභ ලැබෙන්නට ද ඉඩ තිබෙනවා. සතුරු බලපෑම් මර්දනය වෙනවා.
  අලුත් වැඩ කටයුතු වලට අත ගැසීමට, නව ව්‍යාපාර ඇරඹීමට සුබදායකයි. ප්‍රේම සම්බන්ධතා සාර්ථක වෙනවා.විවාහ කටයුතු සම්බන්ධයෙන් ද මෙම කාලසීමාව සුබදායකයි.

කුම්භ ලග්නය.
බාධක අවහිර.  
කුජ ගමන් කරන්නේ දස වැනි භාවයට යි. දස වැනි භාවය නම් කර්මස්ථානය යි. කුජ ශනි දස වැන්නේ සංයෝගවීම එතරම් සුබදායක නෑ. මෙම ග්‍රහ සංයෝගය හේතුවෙන් කුම්භ ලග්න හිමියන්ට අසුබ බලපෑම් එල්ලවෙනවා. රැකියා කටයුතු සම්බන්ධයෙන් ගැටලු කරදර මතුවීමට ඉඩ තිබෙනවා.රැකියා කටයුතු සම්බන්ධයෙන් සතුට තෘප්තිය අඩු වෙනවා. කරන කියන කටයුතුවලට බාධක අවහිර එල්ලවෙනවා. උත්සාහයේ හා මහන්සියේ තරමට ප්‍රථිපල නොලැබී යනවා.වෙහෙසකර කටයුතුවල යෙදෙන්නට සිදුවෙනවා.විවේකය අඩුවෙනවා. තම අගය වටිනාකම අන්‍යයන්ට නොපෙනෙන නොදැනෙන කාලයක්. අන්‍යයන් වෙනුවෙන් වෙහෙස වී උපකාර කළ ද ප්‍රති උපකාර නොලැබී ය හැකියි.
  තම හොඳ නම කැළැල් වීමටත්, ගෞරවයට හානි සිදුවීමටත් ඉඩ තිබෙන බැවින් ඉක්මන් තීන්දු තීරණවලින් වැළකිය යුතුයි.ඉවසිලිමත්ව හා බුද්ධිමත්ව කටයුතු කළ යුතුයි.
  2016. 02. 20 - 2016. 09. 18 අතර කාලය තුළ පියාට අපල එල්ල වෙනවා.
  දණිස්, සන්ධි, දෙපා, තුනටිය ආශ්‍රිත වේදනා පීඩා ඇතිවෙනවා.

මීන ලග්නය.
විවේකය අඩුයි.
කුජ ගමන් කරන්නේ නම වැනි භාවයට යි. නම වැනි භාවය නම් භාග්‍යස්ථානය යි. එමෙන්ම ආගමික භක්තිය, උරුම හිමිකම්, පෙර පින් බලය ගැන කියැවෙන ස්ථානය යි. මෙතැන සිදුවන කුජ ශනි සංයෝගය එතරම් සුබදායක නෑ. ආගමික භක්තිය අඩුවෙනවා. ආත්මාර්ථකාමී හැඟීම් ඇතිවෙනවා. පෙරපින් බලය යටපත් වෙනවා.උරුම හිමිකම් සම්බන්ධයෙන් ගැටලු පැටලිලි මතුවෙන්නත් ඉඩ තිබෙනවා. ස්ථාන වෙනස් වීමකටද ඉඩ තිබෙනවා.හිත මිත්‍රාදීන් සමග ගැටුම් ආරවුල් ඇතිවීමට ද ඉඩ තිබෙනවා.පාපකාරී අදහස් ඇතිවිය හැකි කාලයක් බැවින් දුර දිග බලා කටයුතු කිරීමට වග බලා ගත යුතුයි. විවේකය තද බල ලෙස අඩුවෙනවා.වෙහෙසකර කටයුතු බහුල වෙනවා.මානසික සහනය යහපත් තත්වයක පවත්වා ගැනීමට අපහසු වෙනවා.සතුරු බලපෑම් ඇතිවීමට ඉඩ තිබෙන බැවින් අන්‍යයන් විශ්වාස කිරීමේදී හා අන්‍යයන් සමග කටයුතු කිරීමේදී සැළකිලිමත් විය යුතුයි.
   වැඩිහිටියන් සමග මතභේද ඇතිවිය හැකියි. වැඩිහිටි ඥාතියෙකුට තද බල අපල එල්ලවෙනවා. 

    දීර්ඝ ගමන් බිමන් වල යෙදෙන්නට සිදුවෙනවා. නිෂ්ප්‍රයෝජන වැඩ කටයුතු වෙනුවෙන් වෙහෙසට පත්වීමට සිදුවෙනවා. නඩුහබ ආදියෙන් අවාසි අත්වන කාලයක් බැවින් නීති ප්‍රශ්න වලින් වැළකී කටයුතු කිරීමට උත්සාහ කළ යුතුයි.

   

කේන්දරයේ හිස් කොටු සමහරුන්ට ප්‍රශ්නයක්.
සැක සංකා දුරුවෙන්න මේ ලිපිය කියවන්න.

     "මගේ කේන්දරයේ හත් වැනි කොටුවෙ කිසිම ග්‍රහයෙක් නෑ. ඒ කියන්නෙ මට විවාහයක් හිමි නෑ කියන එකද...?"  
" කේන්දරයේ හිස් කොටු තියෙන්නෙ ඇයි...? ග්‍රහයො නැති කොටු වලින් මොනවද කියවෙන්නේ...? " 
" මගේ කේන්දරයෙ හිස් කොටු වැඩියි. ඒ ඇයි...."
        ඔන්න ඔය වගේ ප්‍රශ්නත් සමහරුන්ට තියෙනවා. ජ්‍යොතිෂය ගැන දැනුම අවබෝධය නැති අයට කේන්දරයේ හිස් කොටු ප්‍රශ්නයක්. කේන්දරයේ හිස් කොටු තියෙන්නේ ඇයි ? හිස් කොටු වලට ග්‍රහ බලපෑම් නැද්ද ? කේන්දරයේ කොටුවක් හිස් වෙලා තියෙන කොට ඒ කොටුවෙන් කියවෙන දේවල් අහිමි වෙනවද ? 
         කේන්දරයක භාව දොළහක් තියෙනවා. මේවා ස්ථාන විදියටත් හඳුන්වනවා. සමහරු මේවට කොටු කියලත් කියනවා. කේන්දරයක භාව හෙවත් කොටු දොළහක් තිබුණට ග්‍රහයො ඉන්නෙ නව දෙනයි. එක කොටුවක එක ග්‍රහයා බැගින් හිටියත් කොටු තුනක් හිස් වෙනවා. එක කොටුවක එක ග්‍රහයා බැගින් සිටින කෙන්දරක් හොයාගන්න එකත් ලේසි පහසු නෑ. ඒ වගේ කේන්දරත් ඉතාමත් දුර්ලභයි.
             එහෙමනම් කේන්දරයේ හිස් කොටු හෙවත් ග්‍රහයින්ගෙන් තොර වූ භාව ස්ථාන වල ශක්තිය, බලය මැන ගන්නේ කොහොමද ? හත් වැනි භාවය හිස් නම් විවාහය ගැන, විවාහයට ලැබෙන කෙනා ගැන, විවාහය සිදුවන කාලය ගැන විස්තර තොරතුරු දැනගන්නේ කොහොමද ? 
          සෑම කොටුවකටම හෙවත් භාවයකටම අධිපති ග්‍රහයෙක් හෙවත් අයිතිකාරයෙක් ඉන්නවා. මේෂ ලග්නයෙන් ඉපැදුනු අයගේ ලග්නාධිපති ග්‍රහයා හෙවත් පළමු කොටුවේ අයිතිකාරයා තමයි අඟහරු හෙවත් කුජ.  මේෂ ලග්නයෙන් දෙවැනි රාශිය වෘෂභ යි. එහෙනම් දෙවැනි භාවයේ අධිපති සිකුරු යි. මේෂ රාශියෙන් තුන් වැනි රාශිය මිථුන රාශිය යි. එහෙම නම් මේෂ ලග්න හිමියන් ගේ  තුන් වැනි භාවයේ අධිපති මිථුන රාශියට අධිපතිත්වය දරන බුධ යි.ඔය විදියට මේෂ රාශියේ පටන් දොළොස් වැනි රාශිය තෙක් පවතින රාශි වලට අධිපතිත්වය දරන ග්‍රහයින් ඒ ඒ භාව වල භාව වල අධිපතිත්වය හිමි කර ගන්නවා. තමන් ඉපදුනු ලග්නය අනුව ඉදිරි ලග්න ගැනලා බැලුවම ඒ ඒ කොටුවට අධිපති ග්‍රහයින් හොයාගන්න පුළුවන්. මෙහි දැක්වෙන වගුවෙන් තමන්ගේ කේන්දරයේ ඕනෑම භාවයක අධිපතියා පහසුවෙන් හොයාගන්න පුළුවන්.
   

  එහෙමනම් දැන් හැමෝම දන්නවා කොටුවක් හිස් වුණත් ඒ කොටුවට අධිපති ග්‍රහයෙක් ඉන්නවා කියන එක. ඒ අධිපති ග්‍රහයා ඉන්න තැන අනුව අදාල භාවයෙන් හෙවත් කොටුවෙන් කියැවෙන දේ ගැන විස්තර දැනගන්න පුළුවන්. අපි හිතමු ලග්නය මේෂ කියලා. පළමු කොටුවේ ග්‍රහයො නෑ. නමුත් මේෂ ලග්නයට අධිපති කුජ දෙවැනි කොටුවේ ඉන්නවා. එහෙමනම් පළමු කොටුවේ ග්‍රහයෙක් නැති වුණා කියල ප්‍රශ්නයක් වෙන්නේ නෑ. මොකද ලග්නාධිපති ග්‍රහයා දෙවැනි භාවයේ ඉන්නවා.

        ග්‍රහයින් ගේ දෘෂ්ටි 

   යම් භාවයක ග්‍රහයින් නැති වුණද එම භාවයට යම් කිසි ග්‍රහයෙකුගේ දෘෂ්ටියක් එල්ල වන්නටද පුළුවන්. පලාපල කථනයේදී ග්‍රහ දෘෂ්ටි ගැනත් සැළකිලිමත් විය යුතුයි. කේතු ග්‍රහයා හැර සෙසු සියලු ග්‍රහයෝ තැන සිටින තැන සිට හත් වැනි කොටුව දකිනවා. කෙනෙකුගේ කේන්දරයේ පළමු භාවයේ කුජ හෙවත් අඟහරු ඉන්නවා නම් ඒ අඟහරු, හත් වැනි භාවය වූ විවාහස්ථානය දකිනවා.  

      අඟහරු හෙවත් කුජ තමන් සිටි තැනින් හත් වැන්න ට අමතරව හතර වැන්නට හා අට වැන්නට ද දෘෂ්ටිය හෙළනවා. සෙනසුරු තමන් සිටි තැනින් හත් වැන්නට අමතරව තුන් වැන්නට හා දහ වැන්නටත් දෘෂ්ටිය හෙළනවා. ගුරු තමන් ගෙන් හත් වැන්න වගේම පස් වැන්න හා නව වැන්නද දකිනවා.රාහු තමන් ගෙන් හත් වැනි භාවය වගේම පහ, හත, නවය , දොළහ යන ස්ථානත් දකිනවා.

  කේන්දරයේ කොටු හිස්ව තිබීම ගැටලුවක් නොවන බව දැන් ඔබට වැටහෙනවා.

      පහත සඳහන් කේන්දරය දෙස අවදානය යොමු කරන්න. කේන්දරයේ කොටු තුනක් හැර ඉතිරි කොටු නවයම පාලුයි. මේ කේන්දරයේ හිමිකරුවා ඉතාමත් ජනප්‍රිය කලා ශිල්පියෙක්. රංගනය, ගායනය, නිවේදන කලාව යන ක්‍ෂේත්‍ර තුළ ඉහළින්ම වැජඹෙනවා. වරෙක ඉතාමත් ආන්දෝලනාත්මක සිද්ධි වලටත් සම්බන්ධ වෙනවා. කලා කටයුතු වලට අමතරව ව්‍යාපාර කටයුතු වලද නියැලෙන මොහු වෙත රසික රසිකාවියන් ගේ ආදරය අදටත් නොඅඩුව හිමි වෙනවා.

       

   කේන්දරයක සටහන්ව පවතින ග්‍රහ සංයෝග, ප්‍රබල ග්‍රහ යෝග, ග්‍රහ දෘෂ්ටි, ග්‍රහයින්ගේ නැකත් බලය ආදී කාරනා මත පුද්ගලයෙකුගේ පැවැත්ම, සාර්ථකත්වය, දියුණුව, බැබළීම ආදිය තීරණය වෙනවා. කේන්දරයක කොටු හිස්ව පැවතීම සාමාන්‍ය දෙයක්. කොටුවකින් ප්‍රකාශවත් වන දෙයක් කොටුව හිස් වුණා කියා අහිමි වන්නේ නෑ.

         ජ්‍යොතිෂවේදී, ගුප්ත වෛද්‍ය

   දේශමාන්‍ය ආචාර්ය සංජීව කුළුපන බණ්ඩාර.