(2009.03.29 දින ඉරිදා වාසනා පුවත්පතෙහි පළකරන ලද ලිපියකි)

කෙසෙල්වත්තේ ඉපදී ජනාධිපති ධුරයට පත් වු දුප්පතාගේ හිතවතා 

හිටපු ජනාධිපති ආර්. ප්‍රේමදාස
මැතිතුමාගේ කේන්දරය බලමු.

1924. ජුනි 23 වැනිදා කොළඹ කෙසෙල්වත්තේ, ඩයස් පෙදෙසේ අංක 12 දරන නිවසේදී අලුයම 03.27 ට දරුවෙක් ඉපදුනා. දරුවට නම තිබ්බෙ ප්‍රේමදාස කියලයි. පුංචි ප්‍රේමදාස රටේ නායකයා වෙයි කියල නම් කවුරුවත් හිතන්න නැතුව ඇති. මේ පින්වත් දරුවගේ පියා, ඒ කියන්නේ රිචඩ් මුදලාලි මහත්තයා ප්‍රේමදාස දරුවාගේ උපන් වෙලාව අරගෙන දෛවඥ මහත්තයෙක් හමුවෙන්න ගියේ ජන්ම පත්‍රය සාදවා ගන්නයි. ඒ කාලයේ මැලිබන් වීදියේ  ජ්‍යොතිෂ කාර්යාලයක් පවත්වාගෙන ගිය දෛවඥ ආර්. කේ. පියදාස මහත්තයා දරුවගේ අනාගතය ගැන පලාපලත් පැවසුවා. පලාපල විස්තරය අහපු රිචඩ් මුදලාලිට නම් මොනවත්ම හිතාගන්න බැරිවුණා.  

        ප්‍රේමදාස මැතිතුමාගේ ජන්ම පත්‍රය සටහන්වෙලා තියෙන්නෙ මෙන්න මේ විදියටයි. ලග්නය මේෂ.  දෙවැන්නේ බුධ, තුනවන්නේ රවි, සිකුරු,  පස් වැනි භාවයේ රාහු, හත්වන්නේ සෙනසුරු, අටවන්නේ ගුරු, එකොළොස්වැන්නෙ සඳු, කුජ, කේතු.  ධනු නවාංශකය.  පුවපුටුප නැකතේ 2 වැනි පාදය.

                රජවෙන්නට වාසනාව උදාවන තරමට මේ කේන්දරයේ තියෙන රාජ යෝග බලය මොකක්ද කියලා දැනගන්න ගොඩක් දෙනෙක් කැමතියි. ප්‍රේමදාස මැතිතුමා ජනතාවට සමීප කිරීමේ ප්‍රධානම කාර්යභාරය ඉෂ්ට කළේ සෙනසුරු යි. සෙනසුරු ග්‍රහයා හත් වැන්නේ ඉන්නෙ ඉතාම බලවත්වයි. පොදුජන කාරක සෙනසුරු බලවත් වීම දේශපාලන කටයුතු කරන අයට ඉතාමත් සුබදායකයි. ප්‍රේමදාස මැතිතුමා ඇලුම් කළේ දුක් විඳින සාමාන්‍ය ජනතාවටයි. ඒ තත්වය ඇතිකළෙත් සෙනසුරු මයි. රවි, සිකුරු, බුධ, අඟහරු යන ග්‍රහයෝත් ප්‍රේමදාස මැතිතුමාගේ සාර්ථකත්වයට දායක වුණා. 

              දෙවැන්නේ ඉන්න බුධ, වික්‍රමස්ථානයේ ඉන්න සිකුරු බලවත් පරිවර්ථන යෝගයක් නිර්මාණය කළා. නිර්මාණශීලී හැකියාව, අලුත් අදහස් බිහි  කිරීමේ ශක්තිය එතුමාට ලබාදුන්නේ බුධ සහ සිකුරුයි. මොන තරම් උපාධි ලබා ගත්තත් කෙනෙක් නිර්මාණශීලී නැත්නම් සාර්ථකත්වයට පත්වෙන්න අමාරුයි. පක්ෂයක, සංවිධානයක නායකත්වයට පත්වෙන්න නම් නව සංකල්ප බිහි කරමින් ඒ වටා ජනතාව ඒකරාශී කර ගැනීමේ හැකියාව තියෙන්න ඕනෑ. සියලු දෙනා අභිබවා ඉදිරියට යන්න එතුමාට හැකි වුණේ නිර්මාණශීලී හැකියාව හින්දයි. උදාගම් සංකල්පය, ඇඟලුම් කම්හල් ව්‍යාපෘතිය, ජන සවිය, සුචරිත ව්‍යාපාරය, මාවතේ අපි, සෙවන සරණ, ආදර්ශ ගම්මාන, පූට්ටු පාලම්, ජංගම සේවා වැනි  වැඩසටහන් තුළින් එතුමාගේ නව සංකල්ප බිහි කිරීමේ හැකියාව කැපී පෙනුණා. නව කතා, කෙටි කතා, තිර රචනා, ගී සිංදු ලිවීමේ හැකියාවත් එතුමා සතුව තිබුණා.       

             ප්‍රේමදාස මැතිතුමා පැය ගණනක් එක දිගට කතා කළත් ජනතාව අහගෙන හිටියා. එතුමාගේ කතා අහන්න ගොඩක් දෙනෙක් ප්‍රිය කළා. එතුමා එක්ක කතා කරළා දිනන්න කාටවත් පුළුවන් වුණේ නෑ. මේ තරම් බලවත් කතා විලාශයක් එතුමාට ලැබුණේ දෙවැනි භාවයේ බුධ ග්‍රහයා තැන්පත්වෙලා හිටපු හින්දයි. බුධ වචනයට, කතාවට, බුද්ධියට අධිපති ග්‍රහයායි. එතුමාගේ කථිකත්වය පුදුමාකාරයි. 

          නව වැන්නෙන් නවය අධිපති ග්‍රහයාත් දහ වැන්නෙන් දහය අධිපති ග්‍රහයාත් එකතුවී සිටීම ඉතාමත් ප්‍රබල රාජ යෝගයක්. ප්‍රේමදාස මැතිතුමාගේ කේන්දරයේ නවයෙන් නවය අධිපති රවිත්, දහයෙන් දහය අධිපති සිකුරුත් වික්‍රමස්ථානය වූ තුන්වැනි භාවයේ සංයෝග වී සිටිනවා. මෙම රාජ  යෝගය බොහෝ රාජ්‍ය නායකයින්ගේ කේන්දර තුළ දකින්නට ලැබෙනවා. හිටපු ජනාධිපති ඩී.බී. විජේතුංග, හිටපු අගමැති ඩී.එස්.සේනානායක, හිටපු අගමැති එස්. ඩබ්ලිව්.ආර්.ඩී.බණ්ඩාරනායක යන නායකයින්ගේ කේන්දර තුළ මෙම රජ යෝගය සටහන්වී තිබෙනවා.

          ප්‍රේමදාස මැතිතුමාට සෙනසුරු මහ දශාව ලැබුවේ වයස අවුරුදු එකොළහේදියි. වයස 31 තෙක් සෙනසුරු දශාව ගත කළා. පොදු ජන කටයුතු, සමිති සමාගම් ආදී කටයුතු වලට දායක වෙමින් දේශපාලනයට පැමිණියේ මෙම කාලය තුලයි. ශ්‍රී සුචරිත ව්‍යාපාරය බිහි කළේද සෙනසුරු මහ දශා කාලය තුළයි. කොළඹ මහ නගර සභාවේ නාගරික මන්ත්‍රී වරයෙක් ලෙස තේරීපත්වන්නටත් සෙනසුරු දශා කාලය තුළ පුළුවන් වුණා. 

          බුධ මහ දශාව ලබනවාත් සමගම එක්සත් ජාතික පක්ෂයේ සාමාජිකත්වය ලබාගෙන ජේ.ආර්. ජයවර්ධන මැතිතුමා සමග සමීපව කටයුතු කිරීමේ අවස්ථාවද උදාකරගත්තා. පක්ෂයේ ප්‍රති සංවිධාන කටයුතු වලටද උරදී කටයුතු කිරීමට හැකි වුණා.

          ප්‍රේමදාස මැතිතුමාගේ විවාහයද ජුනි මාසයක 23 වැනි දිනක සිදුවීම ඉතාමත් විශේෂයි. ඒ 1964 ජුනි 23 වැනිදායි. විවාහස්ථානයේ ඉතාමත් බලවත්ව සිටි සෙනසුරු උඩරට පළාතේ වැදගත් පවුලක දියණියක් සහකාරිය හැටියට හිමිකරලා දුන්නා.

          කේතු මහ දශාවත් ප්‍රේමදාස මැතිතුමාට සුබදායක වුණා. උපතේදී කුජ හිමි දෙනට නැකතේ සිටි කේතු  ජන්ම කේන්දරයේ එකොළොස්වැන්නේ කුජ සහ සඳු සමග යෝගව සිටි බැවින්, තම  මහ දශාව තුළ මහත් ජයග්‍රහණ අත්කරදුන්නා. 1977 මහ මැතිවරණයෙන් මැද කොළඹ පළමු වැනි මන්ත්‍රීවරයා ලෙස පත්වුණා. එමෙන්ම පළාත්පාලන නිවාස හා ඉදිකිරීම් ඇමති පදවිද හිමිවුණා. 1978 පෙබරවාරි 06 වැනිදා පෙ.ව. 11.36 ට යෙදුණු සුබ මොහොතින් රටේ අගමැතිවරයා ලෙස දිව්රුම්දුන්නා.

        1979 වසරේ ලබපු විසි අවුරුදු  සිකුරු මහ දශාව එතුමාව වඩාත් බබළවන්නට පටන්ගත්තා .එතුමා මහත් ජනතා ප්‍රසාදයක් ලබමින්  ශ්‍රී ලංකාවේ දෙවැනි විධායක ජනාධිපතිවරයා බවට පත් වුයේ සිකුරු මහ දශාව තුලදී යි. මෙම කාලය තුළ ඇඟලුම් කම්හල් දෙසීයේ වැඩසටහන ක්‍රියාත්මක කරමින් අඩු ආදායම් ලාභී තරුණ තරුණියන් විශාල පිරිසකට රැකියා අවස්ථා උදාකර දුන්නා. ප්‍රථම වරට ජනාධිපති ජංගම සේවය හඳුන්වා දෙමින් ජනතා ප්‍රශ්න විසඳීමට ගම් දනව් කරා ගමන් කළා. 

       ප්‍රේමදාස මැතිතුමා දැයෙන් සමුගත්තේ කිසිවෙක් නොසිතු අවස්ථාවකයි. නොසිතූ ආකාරයකටයි. 1993 මැයි පළමු වැනිදා වෙන කොට එතුමා සෙනසුරුගේ ජන්ම ඒරාෂ්ටකය ගත කරමින් හිටියා. 1993 වර්ෂයේ ලෝක කම්කරු දිනය යෙදුණු මැයි පළමු වැනිදා දවල් 12.45 ට පමණ එම මාරක මොහොත උදා වුණා. ප්‍රේමදාස මැතිතුමාගේ කේන්දරයේ වගේම සිද්ධිය සිදුවන අවස්ථාවේත් ඒරාෂ්ටක තත්වයක් පැවතුණා. තත්කාල මොහොතේ කටක ලග්නය උදාවී පැවති අතර සෙනසුරු අටවන්නේ තැන්පත්වී සිටියා. සඳු දෙවැන්නේත්, කුජ ලග්නයේත් තැන්පත්ව මාරක තත්වය තව දුරටත් වර්ධනය කළා. දුක් විඳින, සාමාන්‍ය ජනතාවට ලෙන්ගතු වූ එතුමන් කම්කරු දිනය දා සාමාන්‍ය ජනතාව අතරදී ම දැයෙන් සමුගත්තා. 

     ජ්‍යොතිෂවේදී, ගුප්ත වෛද්‍ය, සාම විනිසුරු 
    දේශමාන්‍ය ආචාර්ය සංජීව කුළුපන බණ්ඩාර 
            ( Jyothish Bhasker - India )