ටමිතා ස්කොව්ගේ ප්‍රකාශයෙන් දින කීපයකට පසුව 2023.02.06 දින තුර්කි සිරියා දේශ සීමා ආසන්නයේ රික්ටර් මාපකයේ 6.4 ක භූමි කම්පාවක් සිදුවුණා. හතලිස් දහසකට අධික ජීවිත විනාශ වුණා. මේ වන විට ලෝකයේ බොහෝ තැන්වලින් භූමිකම්පන පිළිබඳ පුවත් වාර්තා වෙනවා. බලපෑම භූමිකම්පාවලින් නිමා වීමේ හැකියාවක් නෑ. වෙනත් ආකාරයේ විපත් බොහොමයක් ඇති වීමේ පැහැදිලි අවදානමක් පවතිනවා.
විශ්වයේ සෑම ක්‍රියාවලියක්ම අනාවරණය කරගැනීමේ හැකියාව විද්‍යාඥයින්ට නැති බව වගේම ඔවුන් අනාවරණය කරගන්නා සෑම දෙයක්ම ප්‍රකාශයට පත් නොකරන බවද දැන සිටීම වැදගත් වෙනවා.
සූර්යයා මත ඇතිවෙමින් පවතින සිදුවීම් හේතුවෙන් පෘථිවිය තුළ භූමිකම්පා මෙන්ම වසංගත, දුර්භික්ෂ, අනපේක්ෂිත දැඩි වර්ෂා මෙන්ම මහා පරිමාණයේ ජලගැලීම් වැනි විපත් ඇති වීමේ අවදානමක් පවතිනවා. සූර්යයා මේෂ රාශියට සංක්‍රමණය වීමත් සමඟ තත්වය වඩාත් අයහපත් අතට හැරෙනවා.
සූර්ය චක්‍රය, සූර්ය චුම්බක ක්‍රියාකාරකම් චක්‍රය, සූර්ය ලප චක්‍රය ආදී ලෙස හඳුන්වන සූර්යයාගේ පරිවර්තනයක් සෑම වසර එකොළහකට වරක් සිදුවෙනවා. විද්‍යාඥයින් සූර්යයා මතුපිට ඇතිවන ලප, ගිනිදැල්, යෝධ පිපිරීම්, සූර්ය කුණාටු ආදිය නිරීක්ෂණය කිරීමෙන් එම චක්‍රීය කාලසීමාවන් ගැන නිගමනයට එළඹෙනවා. දැනට වසර තුනක පමණ කාලයක් තුළ එවැනි සිදුවීම් ගණනාවක් විද්‍යාඥයින් නිරීක්ෂණය කළා. එමෙන්ම වසර 90 ක් වූ සූර්ය චක්‍රයක්ද පුරාතනයේ විසු ගවේශකයින් සොයාගෙන තිබෙනවා. වසර 45 ක් පුරා සූර්යයා සක්‍රීය, තරුණ අවධියක පසුවන බවත් එතැන් සිට වසර 45 ක් පුරා ඉන් වෙනස්ව යම් මන්දගාමී තත්වයක පවතින බවත් ඔවුන් සොයාගත්තා. මන්දගාමී තත්වයේ අවසන් කාලය එනම් 90 වෙනි වසර වන විට සූර්යයා මත සිදුවන නොයෙක් කැළඹිලි හේතුවෙන් පෘථිවියට අහිතකර බලපෑම් එල්ල වන බවත් දැනගත්තා. ඊජිප්තුවේ පාරාවෝ රජවරු නයිල් නදියේ ජලමට්ටම වෙනස් වන ආකාරය නිරීක්ෂණය කර මේ සමබන්ධයෙන් වැදගත් තොරතුරු රැසක් සොයාගත්තා.
පසුගිය වසර කීපයක් තුළ පෘථිවිය මත සිදුවුණු බොහෝ සිදුවීම් සියුම්ව නිරීක්ෂණය කරන විට සූර්ය චක්‍රයේ යම් විශේෂ සන්ධිස්ථානයක් එළඹ ඇති බව පැහැදිලි වෙනවා. ඉන් ඇතිවන විවිධාකාරයේ බලපෑම් හේතුවෙන් ලෝවැසියන් විශාල පිරිසකට දැඩි පීඩා විඳින්නටද සිදුවෙනවා.
සංජීව කුළුපන බණ්ඩාර
