ජ්‍යොතිෂය බිහි වූයේ වසර හත් දහසකට පමණ පෙරය.එකල පෙරදිග ලෝකය අධ්‍යාත්මික ලෝකයකි. බටහිර ජනයා බාහිර ලෝකය ගවේෂණය කළ අතර පෙරදිග ජනයා ඇතුලාන්තය ගවේෂණය කළහ. මුනිවරු වැඩි වශයෙන් පෙරදිග පහල වන්නටත් විද්‍යාඥයින් වැඩි වශයෙන් අපරදිග බිහි වන්නටත් හේතුව එයයි.

ජ්‍යොතිෂය බිහි වූයේ පෙරදිගය. පෙරදිග ජනයාට දිවි නසාගන්නට අවශ්‍යත්වයක් නොවීය. ඔහුහු අධ්‍යාත්මික ප්‍රීතියෙන් කල් ගෙවූහ. එනිසා ඉපැරණි ජ්‍යොතිෂ ලේඛනවල සියදිවි නසාගැනීම සම්බන්ධයෙන් තොරතුරු සොයාගන්නට නැත. අද තත්වය මුළුමනින්ම වෙනස්ය. පෙරදිග  අපරදිග යැයි කියා වෙනසක් නැත. සෑම රටකින්ම පාහේ සියදිවි නසාගැනීම් සම්බන්ධයෙන් තොරතුරු වාර්තා වේ. අපේ රටේ ඉගෙනගන්නා දරුවන් පවා සියදිවි නසාගැනීමට පෙළඹීම කණගාටුදායකය. එනිසා සියදිවි නසාගැනීමට පොළඹවනු ලබන ග්‍රහ තත්වයන් පිළිබඳව තරමකින් හෝ දැනුවත් වීම වැදගත්ය.

ග්‍රහයින් අතරින් බලවත්ම ග්‍රහයා කවුරුන්දැයි ඇසුව හොත් ජ්‍යොතිෂය ගැන තරමක් හෝ දන්නා අයෙක් නම් ඒ රවි හෙවත් සූර්යයා යැයි කියනු ඇත. ග්‍රහ මණ්ඩලයේ ප්‍රධානියා සූර්යයා ය.ඒ විෂය සම්මත ජ්‍යොතිෂය තුල පිළිගනු ලබන කාරණයකි. රාහු ග්‍රහ ලෝකයක් නොවේ. නමුත් ජ්‍යොතිෂය තුල රාහු ග්‍රහයෙකි. වේගවත්ම ග්‍රහයා රාහුය. බාධා අවහිර බිඳගෙන වේගයෙන් ඉදිරියට යාමේ ශක්තිය ලබාදෙන්නේ රාහුය. රාහු යනු චුම්භක ශක්තියකි. චුම්භකයක ආකර්ෂණ ශක්තිය හා විකර්ශණ ශක්තිය යන දෙකම ඇත.ආකර්ෂණ ශක්තිය රාහුගෙනි. විකර්ෂණ ශක්තිය කේතුගෙනි. රාහු පතුරුවන ග්‍රහයා ලෙසද පිළිගැනේ.

රාහු කේතු සම්බන්ධයෙන් කටයුතු කිරීම සීරු මාරුවට කළ යුතුය. හොඳ වුණොත් හොඳටම හොඳ, නරක වුණොත් හොඳටම නරක අද්භූත ග්‍රහයින් දෙදෙනෙකි. රාහු දශාව තුල විභාග ඉහලින්ම සමත්ව විශ්වවිද්‍යාලවලට ඇතුළු වන දරුවන් මෙන්ම අධ්‍යාපනය කඩාකප්පල් කරගනිමින් දුරාචාරවලට යොමු වන දරුවන් ද වෙති. 

රාහු ඉක්මන් තීන්දු තීරණවලට යොමු කරවන ග්‍රහයා බැවින් රාහු දශා ගත කරන දරුවන් ගැන නිරන්තර අවදානයෙන් පසුවීම වැදගත්ය. රාහු ඇතැම් අවස්ථාවල දැඩි මානසික පීඩා ඇති කරන ග්‍රහයෙකි. අන්‍යයන්ගේ අවවාද අදහස් නොසළකා තම තනි මතයට හිතුවක්කාර තීන්දු තීරණ ගැනීමට පොළඹවන අවස්ථා ද ඇත. මත්ද්‍රව්‍ය කෙරෙහි යොමු කිරීමද රාහුගේ කාරියකි.

රාහු කුජ සමග සම්බන්ධ වීම ජන්මියාගේ වේගය වඩාත් වැඩි වීමට හේතු විය හැකිය. එවිට ජන්මියා ප්‍රචණ්ඩකාරී වීමටද ඉඩ තිබේ.මෙවන් ග්‍රහ තත්වයක් අටවැනි භාවය හා ලග්න භාවය සමග සම්බන්ධව යෙදුණු විට සියදිවි නසාගැනීමට පෙළඹීමට ඉඩ තිබේ. රාහු සඳු සමග නොමනා භාවයක සංයෝග වීම සිතුවිලි අදහස් වේගයෙන් වෙනස් වීමට හේතු වේ. රාහු සිකුරු සමග නොමනා තැනක අසුබ ආකාරයට සංයෝග වීම නොගැළපෙන බැඳීම් ඇති වීමට මෙන්ම ඒ හේතුවෙන් ඉක්මන් හා නොසුදුසු තීරණවලට යොමු වීමට ද හේතු වේ. මෙවන් ග්‍රහ තත්වයක් ජීවිත හානි කරගන්නා තරමට අවදානම් සහගත දැයි යන්න ජන්ම පත්‍රය පරීක්ෂා කර ගැනීමෙන් දැන ගත යුතුය.

සියදිවි නසාගැනීම ලග්න භාවයේ හෝ ලග්නාධිපතිගේ සම්බන්ධයකින් තොරව සිදු නොවේ. ලග්න භාවය යනු තමන්ය. තමන්ගේ මානසිකත්වය ක්‍රියාත්මක වන ආකාරය නිවේදනය වන්නේ ලග්න භාවයෙන් හා ලග්නාධිපති ගෙනි. 

කේතු යනු ග්‍රහයින් අතර ගුප්තම ග්‍රහයාය.කේතු දශා කාලයේදී යමෙක් බොහෝ දේ හෙළි නොකර සඟවාගෙන සිටීමට ඉඩ තිබේ. හුදකලාව ප්‍රිය වේ. කතාබහ අඩු වේ. ගුප්ත ගති ලක්ෂණ ඇති වේ.මෙවන් කාලයක් ගත කරන දරුවෙක් තම ප්‍රේම සම්බන්ධතාව කිසිවෙකුටත් නොදැනෙන පරිදි රහසේ පවත්වාගෙන යාමට ඉඩ තිබේ. සම්බන්ධතාව හේතුවෙන් ඇති වන මානසික පීඩනයකදී ගන්නා ක්‍රියාමාර්ග ද කිසිවෙකුටත් නොදැනෙන පරිදි ක්‍රියාවට නැංවීමට ඉඩ තිබේ. කේතු සිකුරු සමග එක්වීම රහස් ප්‍රේම සම්බන්ධතාවලට ඉඩ ඇති කරවන පිහිටීමකි. තම දරුවන් කිසිම ස්ථානයකට තනිව නොයවන දෙමාපියෝ සිටිති.එසේ තනි නොකරන ඇතැම් දරුවන්ද රහස් ප්‍රේම සම්බන්ධතාවල පැටලී අතුරුදන් වන අවස්ථා ඇත. සම්බන්ධතා කෙසේ පවත්වාගෙන ගියා දැයි දෙමාපියෝ පුදුමයට පත් වෙති. මෙවන් අවස්ථාවල එම දරුවන්ගේ කේන්දරවල කේතුගේ බලපෑම මූලිකවම පෙනෙන්නට තිබේ. මෙවැනි ග්‍රහ සංයෝගයක් සමග අශිෂ්ට ආකාරයට සම්බන්ධ වන කුජ ජන්මියා සියදිවි හානි කරගැනීමට යොමු කරලීමට ඉඩ තිබේ.

කේතුගේ දශා සෑම විටම අයහපත් නොවේ. ජන්ම පත්‍රය තුල යහපත් ලෙස සටහන් වූ කේතුගේ දශා කාලය යහපත්ය. කේතු ඥානකාරක ග්‍රහයෙකි. එබැවින් ග්‍රහයින්ගේ බලපෑම් පරික්ෂා කිරීම සූක්ෂමව කළ යුතු කටයුත්තකි. ඒ සඳහා මනා අත්දැකීම් අවශ්‍ය වේ. 

සියදිවි නසාගැනීම සිදුවන්නේ ජලයේ ගිලීමෙන් නම් ඊට සඳුගේ සම්බන්ධයෙක් පැවතිය යුතුය. වස විෂ ශරීරගත වීමෙන් සිදු වන මරණයකදී රාහුගේ සම්බන්ධය ප්‍රමුඛව පෙනෙන්නට තිබේ. දුම්රියට හෝ වෙනත් වාහනයකට පැනීමෙන් වන දිවි නසාගැනීම්වලදී කුජගේ මූලික සම්බන්ධය දකින්නට තිබේ. ගෙල වැලලා ගැනීම්වලදී රාහු හෝ කේතු සමග වන කුජගේ සම්බන්ධය දකින්නට ලැබේ. ගින්න හෝ විදුලිය හේතුවෙන් වන මරණවලදී රවි ප්‍රමුඛව සම්බන්ධ වේ.  උස් ස්ථානවලින් පැනීමෙන් සිදු වන මරණවලදී කුජ රාහු එක්ව එල්ල කරන ලද බලපෑම දකින්නට ලැබේ.

සියදිවි නසාගැනීම සම්බන්ධ තොරතුරු මෙලෙස පොදුවේ විග්‍රහ කෙරුවද ජන්ම පත්‍රය තුල ඒ ඒ ග්‍රහයින්ගේ බලපෑම අවදානම් සහගතද නැද්ද යන්න මෙන්ම එම ග්‍රහයින්ගේ දශා කාල සීමාවන් අවදානම් සහගතද නැද්ද යන්න ජන්ම පත්‍රය පරීක්ෂා කිරීමෙන් තොරව නිවැරදිව ප්‍රකාශ කිරීම අපහසුය. ඒ සඳහා අත්දැකීම් බහුල ජ්‍යොතිෂවේදියෙකුගේ සහය ලබා ගත යුතුය.

අධ්‍යාත්මවේදී,

සංජීව කුළුපන බණ්ඩාර 

 

දැරියකගේ මල්වර වීම සුවිශේෂී අවස්ථාවකි. ඒ අපට පමණක් නොවේ. පෙරදිග බොහොමයක් රටවල මෙන්ම බටහිර ඇතැම් රටවලද දැරියකගේ මල්වර වීම විශේෂ කොට සැමරේ. අපට එය සැමරුමක් පමණක් නොවේ.එය මංගල්‍යයකි. එය ඇයගේ ජීවිතයේ තවත් උප්පත්තියකි. එය අපට එතරම්ම වැදගත්ය. දැරිය මල්වර වූ බව දැනගත් විට අයගේ වැඩිහිටියන් මුලින්ම කරන්නේ ජ්‍යොතිෂවේදියෙක් වෙත යාමය. මල්වර වීම ඇයගේ ජීවිතයට කුමන ආකාරයෙන් බලපානු ඇත්ද ? දෙමාපියන්ට,සහෝදරාදීන්ට එයින් කුමන විදියේ බලපෑමක් එල්ල වෙයිද ? මේ ආදී කප්පරක් ප්‍රශ්නවලට පිළිතුරු ජ්‍යොතිෂවේදියාගෙන් බලාපොරොත්තු වෙන දෙමාපියෝ සිටිති.

මල්වර වූ දැරිය ඔසු පැනින් නහවන්නේ සුබ නැකතටය. නැහැවූ දැරිය නිවස තුළට කැඳවාගෙන එන්නේ සුබ නැකතටය. ඇය එදින මුල්ම ආහාරය අනුභව කරන්නේ ද සුබ නැකතටය. එදිනට නියමිත සුබ වර්ණයකින් සැරසී සිටීමට ද ඇයට සිදු වෙයි. මේ සියල්ල තීරණය කරන්නේ ජ්‍යොතිෂවේදියාය.

ජ්‍යොතිෂවේදියා වෙත යන වැඩිහිටියන් ඔහුට ඉදිරිපත් කරන්නේ දැරිය වැඩිවියට පත්ව ඇති බව දැනගත් දිනය හා වේලාවයි.මල්වර වීම සිදුව ඇත්තේ කුමන වේලාවේදී ද යන්න සොයා ගත යුත්තේ ජ්‍යොතිෂවේදියාය. මල්වරය සිදු වූ වේලාව අනුව සකස් කරනු ලබන කේන්දරය මල්වර කේන්දරයයි. දැරියක් මල්වර වූ සැබෑ මොහොත සෙවීම ලෙහෙසි පහසු කටයුත්තක් නොවේ. ඒ ඒ ගුරුකුලය අනුව නොයෙක් ජ්‍යොතිෂවේදීන් විවිධ ක්‍රමවේද ඔස්සේ මල්වර වූ වේලාව මෙය යැයි පැවසුවද එය මල්වර වූ වෙලාව බව ඔප්පු කර පෙන්විය හැකි ක්‍රමයක්ද නැත.

තරුණියකගේ ජීවිතය තුළ ජ්‍යොතිෂ සහාය ලබා ගත යුතු විශේෂ අවස්ථාවලදී ඇයගේ මල්වර කේන්දරය වැදගත් නොවන්නේ දැයි ඇතැමුන් ප්‍රශ්න නගන අවස්ථා ඇත. විවාහය සඳහා කේන්දර පරීක්ෂා කිරීමද එවන් අවස්ථාවකි. විවාහය සඳහා කේන්දර පරීක්ෂා කිරීමේදී සිදු වන්නේ ස්ත්‍රී පුරුෂ දෙදෙනාගේ ජන්ම කේන්දර පරීක්ෂා කිරීමය.තරුණියගේ මල්වර කේන්දරය පරීක්ෂා කිරීමක් එහිදී සිදු නොවේ. 

උපත ලබන මොහොතේ සටහන් වූ ජීවන දත්ත සියල්ල උඩු යටිකුරු කිරීමේ බලයක් මල්වර වීම සමග ඇති නොවේ. සාංසාරික කුසල් අකුසල්, පින් පව්වලට අනුකූලව සටහන් වූ දෛව සිතියම ජන්ම කේන්දරය පමණි. ජීවිතය ඉදිරියට ගලා යන ආකාරය, මුහුණ දීමට සිදුවන සියලු යහපත් අයහපත් සිදුවීම් සටහන්ව ඇත්තේ ජන්ම කේන්දරය තුළය. ජීවිතයේ සුවිශේෂ තෝරාගැනීම්වලදී අනුගමනය කළ යුතු ක්‍රියාමාර්ග සම්බන්ධයෙන් ජ්‍යොතිෂ සහාය ලබා ගැනීමේදී වැදගත් වන්නේ ජන්ම කේන්දරයයි. විවාහය දරුපල මෙන්ම ජීවිතයේ සෑම සියලු දෙයක් සම්බන්ධයෙන්ම ජන්ම කේන්දරය තුළ සටහන්ව පවතින කිසිදු දෙයක් මල්වර කේන්දරයේ බලපෑමෙන් වෙනස් නොවේ. 

කාන්තාවකගේ මල්වර කේන්දරය භාවිතා කළ යුතු කිසිදු අවස්ථාවක් පිළිබඳව කිසිදු සෘෂි ප්‍රකාශනයක හෝ සඳහන්ව නැත.

අධ්‍යාත්මවේදී 

සංජීව කුළුපන බණ්ඩාර 

අවුරුදු නැකත.

අවුරුදු නැකත් සම්බන්ධයෙන් වාද විවාද ඇති වූයේ අද ඊයේ නොවේ. අවුරුදු නැකත් සම්බන්ධයෙන් මත ගැටුම් වඩාත් උත්සන්න වන්නට වූයේ වසර තුන හතරකට පෙර සිටය. තත්වය බෙහෙවින් උත්සන්න වන්නේ අවුරුදු ලං වන විටය. මෙවර ද එසේමය.

ජ්‍යොතිෂය අධ්‍යාත්මික මානයේ විද්‍යාවකි. අද වන විට ජ්‍යොතිෂයේ අධ්‍යාත්මික සාරය නැත. සියල්ලෝ ජ්‍යොතිෂය උගතුන්ය. ජ්‍යොතිෂයේ ඉගෙනීමට තිබෙන ප්‍රමාණයට වඩා අවබෝධ කරගැනීමට තිබෙන ප්‍රමාණය ඉතා විශාලය. අධ්‍යාත්මික මානයේදී දැනුම, වියත්බව වැදගත් නොවේ. එසේ වූවද, අද තිබෙන්නේ වියතුන්ගේ ජ්‍යොතිෂයකි. 

ජ්‍යොතිෂය බිහි කළ ඍෂිවරු අවබෝධයට පත්වූවන්ය. එනම් මනස ඉක්මවා ගියවුන්ය. ජ්‍යොතිෂවේදීන්ගේම වචනයෙන් කිව හොත් ඔවුන් තුන්කල් දුටු ඍෂිවරයින් වහන්සේලාය. අවබෝධ කර ගැනීම යනු මනස පුරවා ගැනීම නොව මනස හිස් කිරීමය. මනසට නොවැටහෙන දේ අවබෝධ වන්නේ එවිටය. 

හමුදා නිලධාරියෙක් ආධුනික සෙබළෙකුගෙන් මෙසේ විමසුවේය.

"නීරෝ...ඔබ දන්නා විදියට කොඩිය කියන්නෙ මොකක්ද?"

සෙබළා පිළිතුරු දුන්නේය.

"කොඩිය කියන්නේ විවිධ වර්ණයෙන් යුතු රෙදි කැබැල්ලක්"

'මොකක්...ඔබ වැරදියි. කොඩිය කියන්නෙ සියලු දේ...කොඩිය කියන්නෙ මව. මතක තියාගන්න...ඔබේ මව..."

හමුදා නිලධාරියා ඊළඟ සෙබලාට ඒ ප්‍රශ්නයම යොමු කළේය.

'කොඩිය යනු කුමක්ද?"

'නීරෝගෙ අම්මා..."  

වියතුන් ගේ ආකාරය එලෙසය. වියතුන් සමඟ ඇසුර ප්‍රවේශමෙන් කළ යුතුය. ඔවුන් ගුරුන් ගෙන්, පොතපතින් ගෙන මනස පුරවාගෙන සිටින කප්පරක් දැනුම තේරුම් ගෙන සිටින්නේ විවිධ ආකාරයටය. එමන්ම,දැනුමට ඔබ්බෙන් වූ කිසිදු සත්‍යයක් ගැන ද ඔවුහු නොදනිති. 

අවුරුදු නැකත් හඳුන්වන්නේ නැකත් චාරිත්‍ර යනුවෙනි.මන්ද, රටක සියලු දෙනාට වාසනාව කැන්දන නැකතක් පිළියෙළ කිරීම සක්කරයාටවත් කළ නොහැක්කකි. කළ හැකිව ඇත්තේ අසුබතා හැකි තාක් මඟහැර යහපත් වේලාවක් පිළියෙළ කිරීම පමණි. එම නැකත් චාරිත්‍ර ඉටු කළ පමණින් සියලු දුක්ඛ දෝමනස්සයන් පහව ගොස් හතරවටින් වාසනාව උදා වන්නේ නැත. අවුරුදු නැකත්වල එකම වැදගත්කම වන්නේ සියලු දෙනා එකම මොහොතක චාරිත්‍ර ඉටු කිරීමය. එයිනුත් වඩාත් වැදගත් වන්නේ  කිරි ඉතිරවීම ය. එය ප්‍රතිඵලදායක වන්නේ  සියලු දෙනා තම ඇතුලාන්ත පාරිශුද්ධතාවයෙන් යුතුව යහපත් චේතනාවෙන් කිරි උතුරවන්නේ නම් පමණි. ඒ සම්බන්ධයෙන් වියතුන් දන්නා ඉටිගෙඩියක් නැත.වියතුන් සිටින්නේ පරිධියේ විනා ඇතුලාන්තයේ නොවේ.

සම්මත කරන ලද අවුරුදු නැකත් විවේචනය කරන පාර්ශවයන් නිතර සමාජ ගත කරන අදහසක් නම් වැරදි නැකත් චාරිත්‍ර හේතුවෙන් බරපතළ විපත් සිදු වන බවය. එය බරපතළ මිත්‍යාවකි. අවුරුදු නැකතෙහි බලපෑමකින් තමන්ට, තම පවුලට හෝ රටට කිසිදු විපතක් සිදු නොවේ. බොහොමයක් දෙනා නිවෙසකට ගෙවදින්නේ නැකතටය. එහිදී, නිවෙසට ඇතුල්වීම, ලිප ගිනි මෙලවීම හා ආහාර අනුභවය සඳහා නැකත් ලබාදීම සිදු වේ.  මෙම නැකත් අනුගමනය කර නිවෙසට ගෙවැදීමෙන් පසුව කවදා හෝ වැරදි අවුරුදු නැකත් අනුගමනය කළ හොත් නිවෙසට ගෙවැදීමේදී අනුගමනය කළ නැකත්වල බලය මුළුමනින්ම භංග වී යන බවක් කිසිදු ජ්‍යොතිෂවේදියෙක් මෙතෙක් පවසා ඇති බවක් ඔබ අසා තිබේද ? ව්‍යාපාර සම්බන්ධයෙන්ද එසේමය. රටක් හෝ ලෝකය සම්බන්ධයෙන් වූ විශ්ව සැලසුම ද අවුරුදු නැකත් හේතුවෙන් වෙනස් නොවේ.  වර්තමානයේ ඇතැම් ජ්‍යොතිෂවේදීන් ජනවාරි පළමුවැනිදාට ද කිරි ඉතිරවීම සඳහා නැකතක් ලබා දෙන බව පෙනෙන්නට තිබේ. ඉදිරියේදී සෑම මාසයකම පළමුවැනිදාට කිරි ඉතිරවීම සඳහා නැකත් ලබා දීමට ද බැරි නැත. 

සියලු දෙනා එකම මොහොතක නැකත් චාරිත්‍ර ඉටු කිරීමෙහි වැදගත්කම මෙන්ම යහපත් චේතනාවන් පෙරදැරිව නැකත් චාරිත්‍ර ඉටු කළ යුතු බව ද මම ඉහතින් සඳහන් කලෙමි. ඊට තවත් යමක් එක් කළ යුතුය. නැකත් පිළියෙළ කිරීම හා එම නැකත් ජන ගත කිරීම ද මෛත්‍රී සහගතව, ඇතුලාන්ත පාරිශුද්ධතාවයෙන් යුතුව කළ යුත්තකි. පටන්ගැන්මේ පටන් එකිනෙකා අභිභවා තම මමත්වය පෝෂණය කරගැනීමේ චේතනාවෙන් සකසන නැකතකින් කිසිවෙකුට සිදු වන සෙතක් නැත. සිංහල අවුරුදු රාජ්‍ය නැකත් කමිටුව නියෝජනය කළ ජ්‍යොතිෂවේදියෙක් ලෙස එහිදී දුටු  වියත් ජ්‍යොතිෂවේදීන්ගේ හැසිරීම් සම්බන්ධයෙන් බොහෝ අත්දැකීම් තිබේ.

රටේ සම්මත නැකත් සියලු දෙනා එක්ව අනුගමනය කිරීම නිරවුල්ය. මතක තබා ගත යුතු වැදගත්ම කාරණය නම් ඔබ කුමන නැකතක් අනුගමනය කළ ද, ඒ මොහොත තුළ ඔබේ ඇතුලාන්ත පාරිශුද්ධත්වය ඉහළින්ම පවත්වාගත යුතු බවය. මන්ද, විශ්වය හා සම්බන්ධ වන්නේ ඔබේ ඇතුලාන්තය යි.

අධ්‍යාත්මවේදී සංජීව කුළුපන බණ්ඩාර.

පැරණි ඔබ සහ අලුත් ඔබ

 

ඔබ භාවනා කරන අයෙක් නම් දැනටමත් මෙම අත්දැකීම ලබා ඇති බවට කිසිදු සැකයක් නැත.

ඔබ අධ්‍යාත්මිකව ඉහළට එසැවෙන විට ඔබ වටා සිටින ඇතැමුන් ඔබෙන් දුරස් වන බවක් දැනී තිබිය යුතුය.පහල සංඛ්‍යාතයක ඔබ සමග සිටි අය ඔබ ඉහළ සංඛ්‍යාතයකට ගමන් කරන විට ඔබෙන් දුරස් වී යාම ස්වභාවික සංසිද්ධියකි. එය තනි වීමක් නොවේ. "පැරණි ඔබ" සමග සිටි අයගේ බර උසුලමින් ඔබට ඊළඟ මට්ටමට ළඟා විය නොහැක. ඔබ "සැබෑ ඔබ" බවට පත් වන තරමට ඔබේ කවය කුඩා වන අතර එය ඉතාමත් අර්ථාන්විත ද වෙයි. 

ඔබ ඔබේම සත්‍යයේ ආලෝකයට පිවිසෙන විට ඔබ වටා ඇති අවකාශය වෙනස් වීමට පටන් ගන්නා බව ඔබට පෙනී යයි. ඔබ සැබෑ වන තරමට අනෙක් අය ඔබ වෙනුවෙන් ගොඩනග ඇති කුඩා අවකාශවලට ඔබේ ගැළපීම අඩු වෙයි. එබැවින් ඔබේ සමීපයේ සිටින හිත මිත්‍රාදීන්ගෙන් සමන්විත සමූහ කවය ස්වාභාවිකවම කුඩා වෙයි. මෙම සමූහයා කුඩා වීම කිසිසේත්ම පාඩුවක් නොවේ. එය පූජනීය පිරිපහදු කිරීමකි. සංගීතයට ඉඩ සැලසීම සඳහා අවට ඝෝෂාව ඉවත් කිරීම වැනි ය.ඉන් පසුව ඇති වන නිහඬතාවය තුල ඔබ දකින ඉහල සංඛ්‍යාතයේ සීමිත පිරිස ඔබේ සෙවනැල්ල ගැන පමණක් දන්නා දහසකට වඩා වටිනා බව ඔබට අවබෝධ වනු ඇත.

වෙස් මුහුණක් පැළඳීමේ අවශ්‍යතාවය තව දුරටත් ඔබට නොදැනෙන විට, ඔබ එයට යටින් ඇති "සැබෑ ඔබට" ආදරය කරන අය ආකර්ෂණය කර ගනියි.

මෙම පටු මාර්ගය මනරම් අභයභූමියක් බවට පත් වන අතර එහිදී කතා කරන සෑම වචනයකටම විශ්වීය වටිනාකමක් ඇති වෙයි.ජීවිතය සැබවින්ම අර්ථවත් වන්නේ මෙම සීමිත අවකාශය තුලය. මන්ද, ඔබ අවසානයේ පහසුව සඳහා නොව ඔබේ සාරය අගය කරන අයගෙන් වට වී ඇත.

අධ්‍යාත්මවේදී සංජීව කුළුපන බණ්ඩාර 

ඔහු නැවත උපදිනු ඇතැයි කිසිවෙකු විශ්වාස නොකළහ.

 

ඔහු නැවත උපදිනු ඇතැයි කිසිවෙකු විශ්වාස නොකළහ.

හදිසි අනතුරකට ලක්ව දැඩි සත්කාර ඒකකයට ඇතුලත් කොට සිටි අයෙකි. අනතුර සිදුව තිබුණේ පසු ගිය ඔක්තෝබර් මස අවසන් දිනයේය. නිවැසියන් මා වෙත පැමිණ පැවසුවේ රෝගියා බරපතළ තත්වයේ පසු වන බවත් ජීවිතය රැක ගැනීම කෙරෙහි විශ්වාසය තැබිය නොහැකි යැයි වෛද්‍යවරු පවසන බවත් ය. ඔවුන් ඉල්ලා සිටියේ කෙසේ හෝ ඔහුගේ ජීවිතය රක දෙන ලෙසය.

දින කීපයකින් ඔහු දැඩි සත්කාර ඒකකයෙන් සාමාන්‍ය වාට්ටුවකට යොමු කළ හැකි විය. කෙසේ වෙතත් ඔහුගේ කතා කිරීමේ හැකියාව ඒ වන විට අහිමි වී තිබුණි. කතා කිරීමේ හැකියව නැවත නොලැබෙනු ඇතැයි වෛද්‍යවරු පවසා තිබුණි. නිවැසියන් තීරණය කළේ රෝගියා නිවසට ගෙනැවිත් වැඩි දුර ප්‍රතිකාර කිරීමටය. නිවසට රැගෙන ආ රෝගියා දින කීපයකින් කතා කරන්නට විය. නිවැසියන් පවසන පරිදි ඒ අවස්ථාවද විශේෂය. එය සෙනසුරාදා දිනයකි. රෝගියා කතා කරන්නට පටන් ගෙන ඇත්තේ නිවැසියන් කපුටන්ට එළඟිතෙල් මුසු කිරිබත් දමන්නට සැරසෙන විට ය.

රෝගියා වෙනුවෙන් නිවසට පැමිණ ආශීර්වාද කරන්නැයි මා හට දන්වන විට වර්ෂාව ඇද වැටී එම ප්‍රදේශය ගංවතුරින් යට වී තිබුණි. 2025 නොවැම්බර් 30 දින උදෑසන එම නිවසට යාමට සිදු වූයේ ඔරුවකිනි. එදිනම සවස් වන විට ඇඳෙහි වාඩි වීමට හැකි වූ බව දැනගන්නට ලැබුණි. මේ වට විට යමක් අල්ලාගෙන නැගිට ඇවිදීමට ද හැකියාව ලැබී ඇත.

ඔබේ රෝගී ඥාතියා හිතවතා මා වෙත රැගෙන එන්නැයි දැනුම් දීමට ලියූවක් නොවන බව සළකන්න. මම සුව කිරීමේ මෙහෙයන් සිදු නොකරමි.  රෝහල්වල සිටින සියලු රෝගීන් සුව කරන්නැයි අසිහියෙන් සිටින යමෙක් පැවසීමට ඉඩ තිබේ. අවබෝධයෙන් කියවන සීමිත පිරිසකගේ අවදානය සඳහා පල කරන සටහනකි.

සංජීව කුළුපන බණ්ඩාර 

තිදෙනෙකුට බලපෑම් කළ භූතයෙක්.

 

පළමුව මෙහි ඇති හඬ පටයට සවන් දෙන්න. කතා කරන්නේ පාසල් වියේ පසුවන දැරියකි.

සිද්ධිය ඒ ආකාරයෙන්ම භාෂාවට නැඟීම දුෂ්කර නමුත් මවකට දියණියකට සහ ඥාති දියණියකට එල්ල වු ඉතා සංකීර්ණ භූත බලපෑමක් ගැන සත්‍ය විස්තරයක් මෙලෙස ඔබ හමුවේ තබමි. සිදුවීමට සම්බන්ධ වන්නේ මහනුවර ප්‍රදේශයේ මවක් දියණියක් සහ තවත් ඥාති දියණියකි.

දියණිය අසාමාන්‍ය කෝපයකින් මව සමග ගැටුම් ඇති කරගන්නා බවත් පිහියක්  ගෙන මව ඝාතනය කිරීමට උත්සාහ කරමින් සිටින බවත් දින කීපයකට පෙර මා වෙත දැනුම් දුන්නේ ඇයගේ පියාය. හැකි ඉක්මණින් ඇයගේ ඡායාරූපයක් එවන්නැයි ඔහුට පැවසුවෙමි.  එවන ලද ඡායාරූප දුටු සැණින් මා හට කාරණය අවබෝධ විය. දැරියගේ ස්වභාවික පෙනුම ඡායාරූපවල නොතිබුණි. කුමන හෝ බලවේගයක පාලනයට ඇය හසු වී ඇති බව පෙනෙන්නට තිබුණි. ඒ බව පියාට ද පැහැදිලි කළෙමි. එදින රෑ දැරිය විසින් දෙමාපියන්ට බොහෝ දේ විස්තර කර තිබුණි. හඬ පටයෙහි ඇත්තේ ඉන් කොටසකි. නම් ගම් සඳහන් කරන බැවින් ඇයගේ ප්‍රකාශය සම්පූර්ණ වශයෙන් ඉදිරිපත් කිරීමට අපහසුය. උද්ගතව ඇති තත්වය සමනය කිරීම සඳහා පසු ගිය 27 වෙනිදා මා මහනුවර පිහිටි එම නිවසට යන විට අමනුෂ්‍ය දෝෂය දැරියගෙන් ඉවත්ව මවගේ ශරීරයට ඇතුල් වී තිබුණි.  එය  එක් අවස්ථාවක ඔවුන්ගේ ඥාති දියණියකගේ ශරීරයට ද ඇතුල් වී තිබුණි. 

අමනුෂ්‍ය බලපෑම මොවුන් වෙත එවා තිබුණේ මෙම තරුණ මවගේ ඥාති පිරිසකි. ඒ මොවුන් භුක්ති විඳින දේපළ අත් කරගැනීම සඳහාය. මවගේ ශරීරයට ඇතුල් වුණු අමනුෂ්‍යයා ඒ සියලු තොරතුරු පවසා සිටියේ සියලු දෙනා මවිතයට පත් කරමිනි. වරෙක අමනුෂ්‍යයා මව තුලින් කතා කර පැවසුවේ අත බැඳ තිබෙන පිරිත් නූල තිබියදී තමන්ට අපහසුතාවයක් දැනෙන බැවින්  එය කඩා ඉවත් කරන ලෙසය. එම අමනුෂ්‍යයා ද වසර ගණනකට පෙර මිය ගිය ඥාතියෙකි. 

තමන්ට භාර කර ඇත්තේ මෙම මව මරා දැමීම බව පැවසූ විට මා ඇසුවේ නොමැරෙන කවුරුන් හෝ සිටීද..?.මැරෙන මිනිසුන් මරා දමන්නේ කුමකටද ..? යන්න ය. කට්ටඬින්ගේ ගොටු පිදේනි ආදියට රැවටී පාපකාරී කොන්ත්‍රාත් ඉටු නොකර කල්ප කාලාන්තරයක් ප්‍රේත භවයේ දුක් නොවිඳ කුසලයට නැඹුරු වන්නැයි පැවසුවෙමි. අමනුෂ්‍යයා ඉවත් විය. 

මේ සරලව ඉදිරිපත් කළේ දින ගණනාවක් පුරා සිදු වුණු නොයෙක් අද්භූත සිදුවීම් කන්දරාවක් සහිත සිද්ධියකි.

සංජීව කුළුපන බණ්ඩාර 

කේන්දරයේ අටවැන්න

 

සැඟව පවතින බොහෝ දේ වටින්නේය. වටිනා බොහෝ දේ ඇත්තේ සැඟවීගෙනය. වටිනා දේ සැඟව පවතින තැන් භයානක තැන් බවට ද විශ්වාසයක් පවතී. නිධාන් ගැන ඇත්තේ ද එවැනි විශ්වාසයකි. එවැනි තැන් මාරක ස්ථාන ලෙස සැළකේ. කේන්දරයේ අටවැන්න ද එවැනි තැනකි. අටවැන්න මරණයේ නිවස ලෙස සැළකේ. ඒ අටවැන්නෙන් මරණය ගැන කියැවෙන බැවිනි. මරණය ගැන කියැවෙන්නේ අටවැන්නෙන්ම නොවන බව සත්‍යයකි. උපත යනු ආරම්භය නොවන්නා සේම මරණය යනු අවසානය ද නොවන්නේ ය. ජීවිතය ඉපදෙන්නේ හෝ මියයන්නේ නැත. අටවැන්න දොරටුවකි. එය පරිවර්තනයේ දොරටුවයි. පරිවර්තනයක් සිදුවන සෑම විටම මරණයක් ද සිදුවේ. තමන් සිටින සංඛ්‍යාතයෙන් මිදී ඉහළට එසවෙන හෝ පහළට බැස යන සෑම අවස්ථාවකදීම පෙර සිටි තමන්ගේ මරණය සිදුවේ. අහිංසක මරණයට පත්ව අංගුලිමාල වන්නේද, අංගුලිමාල මරණයට පත්ව උතුම් අරහත් තත්වයට පත්වන්නේද ඒ ආකාරයට ය. මුනිවරු පවසන්නේ ඔබ ඔබව මරා දැමිය යුතු බවය. එනම් මමත්වය දුරු කළ යුතු බවය. තමන් යැයි යමෙක් නැති තත්වයට පත් විය යුතු බවය. එය පරිවර්තනයකි. ද්විත්වය අතුරුදන්ව ඒකීයතත්වයට පත් වන්නේ එවිටය. මේ සියලු පරිවර්තනයන් හෙවත් මරණයන් ගැන වඩාත් වැදගත් කරුණු කියැවෙන්නේ කේන්දරයේ අටවැන්නෙනි. අටවැන්න දොරටුවක් යැයි සැළකෙන්නේ එබැවිනි.

අටවැන්න හා මනස අතර ඇත්තේ ගසයි පොත්තයි තරමේ සබැඳීයාවකි. එය එසේ විය යුතුය. ඇතැම් පරිවර්තයක් මනස තුළමය ඇතැම් පරිවර්තයන් මනසින් ඔබ්බටය. ඔබ්බට යන්නේද මනස තුලින්ය. දෙකටම මනස සම්බන්ධය. අටවැන්න නිකම් දොරටුවක් නොව විශ්ව දොරටුවකි. තවත් අතකින් එය විශ්ව සුරක්ෂිතාගාරයකි. ඒ, මිල කළ නොහැකි තරමේ වටිනා රහස් එහි සැඟව පවතින බැවිනි.

 හතරවටින් එල්ල වන දුක් ගැහැට කරදර පීඩා හමුවේ බිමට සමතලා වී නැවත උපදින මිනිසුන් ඇත. දැඩි සත්කාර ඒකකවල  දින සති ගණන් ජීවිතයත් මරණයත් අතර සටන් වැද නැවත උපදින්නෝ ද වෙති. කිසිදු බැබලීමකින් තොර දැලි වැදුණු ජීවිත අනපේක්ෂිත ලැබීමකින් දළුලා උපදින අවස්ථා ඕනැ තරම් ඇත. ඒ,අටවැන්නේ බලයයි. ඇමෙරිකානු රූපවාහිනී වැඩසටහන් නිෂ්පාදකවරියක් මෙන්ම කතුවරියක් හා මාධ්‍ය හිමිකාරිනියක් ද වන ඔප්රා ගේල් වින්ෆ්‍රේ ගේ ජීවිත කතාව කියවා බලන්න. අන්ත දිළිඳු තත්වයක සිටි ඇය බිලියනපතිනියක් බවට පත්වීමට හේතු වූයේ කේන්දරයේ අටවැන්නේ බලයයි. 

සඳු අටවැන්නේ සිටින්නවුන් ස්වභාවයෙන්ම සංවේදීය. හැඟුම්බරය.සිතුවිලි බහුලය. ඔවුන් සියල්ලෝම පාහේ එම සංවේදී බව සුරැකිව තබාගෙන දිවි ගෙවති. අධිසංවේදී බව ඉහළ අධ්‍යාත්මික තත්වයක් කරා පරිවර්තනය කිරීමට තරම් අවබෝධයක් නොමැති බැවිනි. මාර්ගය පෙන්වා දිය යුත්තේ කේන්දරය පරීක්ෂා කරන ජ්‍යොතිර්වේදියා ය. මාර්ගය පෙන්වා දීමට නම් මාර්ගය දැන සිටිය යුතුය.

චන්ද්‍ර මෝහන් රාජ්නීශ් හෙවත් මුනිවර ඕෂෝ ගේ වෘෂභ ලග්න කේන්දරයේ අටවැන්නේ ග්‍රහයින් පස් දෙනෙකි. ඒ සඳු,කුජ,බුධ,සිකුරු හා ශනි ය. එතුමන් අවබෝධයට පත් වූවා යැයි පවසන 1953.03.21 දින පුරසඳු ලග්න භාවයේය. ගත කරමින් සිටියේ සඳු මහ දශාවේ සිකුරු අන්තර් දශාවයි. බුධ හිමි භද්‍රිකා යෝගිනි දශාවේ ශනි හිමි උල්කා අන්තර් දශාවයි. උපතේදී අටවැන්නේ සිටි මමත්වය මරා දමන ශනි ලග්නාධිපති සිකුරු සමග සම සප්තමව සිටි අවස්ථාවයි. වැදගත් කරුණු සියල්ල ගොණුවී ඇත්තේ ලග්නයයි අටයි ඇසුරේ ය.

අප මෙතෙක් කොපමණ ජීවිත සංඛ්‍යාවක් ගත කළේ දැයි කිව හැකි කිසිවෙක් නැත. එම ජීවිත තුළ සිදු වූ පරිවර්තනයන් මෙපමණයි කියා කිව හැකි අයෙක්ද නැත. පෙර භවයන් තුළ ගොඩනගාගත් සුවිශේෂ හැකියාවන්, තත්වයන් මෙන්ම ලැබූ දැනුම් පද්ධති සමග සම්බන්ධ වීමේ හැකියාව පෙන්වන්නේ අටවැන්නෙනි. ගුප්ත ශාස්ත්‍ර පිළිබඳ නිපුණත්වයට අටවැන්න වැදගත් වන බවට හේතුව ද එයයි. ගුප්ත ශාස්ත්‍ර පමණක් නොව ඕනෑම දෙයක ඉහළම නිපුණත්වය පෙර භවයන් තුළින් වර්තමාන භවයට සම්බන්ධ කරන දොරටුව අටවැන්නයි. ගුරුදේව් රබීන්ද්‍රනාත් තාගෝර් ගේ මීන ලග්නය හිමි කේන්දරයේ අටවැන්නාධිපති සිකුරු රවි හා බුධ සමග දෙවැන්නේය.එමෙන්ම අටවැන්නාධිපති තමන්ගේම නැකතකය. තුලා නවාංශකයේය.ක්ෂේත්‍ර ගණනාවක නිපුණත්වය සමග සාංසාරික හපන්කම් කොතෙකුත් මුසුව ඇති බව පැහැදිලිය.

ඇතැමුන්ට සිදුවීමට නියමිත විශේෂ සිදුවීම් හෝ අනතුරු විපත් ආදිය කල් තියා දැනෙන ශක්තියක් පවතී. එය විශ්වයෙන් කරන දැනුම්දීමක් ලෙසද විශ්වාස කෙරේ. එය සැබෑවැකි. එය මනසට ඔබ්බෙන්  සිදුවන්නක් බැවින් විශ්වයෙන් ලැබෙන යමක් ලෙස සැළකීම සාධාරණය. කෙසේ වෙතත්, මෙවන් අයගේ අටවැන්න සුවිශේෂී බලයකින් යුතුය.

දොරටුවෙන් බැහැරව ගිය හෙවත්  ජීවිතයෙන් සමුගත්  අයෙකුගේ ධනය,දේපළ හෝ වෙනයම් වස්තුවක් උරුම වීමටද අටවැන්න ශක්තිමත් විය යුතුය. ඇතැමුන් ඒවා උරුම කර ගැනීමට නොයෙක් උපාය මාර්ග යොදන නමුත් නොලැබී යන්නේ උරුම ශක්තිය අටවැන්නේ නොමැති බැවිනි.

අවධියට පත් මුනිවර ඇසුර ලැබීමේ වාසනාව ද අටවැන්න හරහා හිමි වේ.  ඇසුර හිමි වීමම ප්‍රමාණවත් නොවේ. එතුළින් ජීවන පරිවර්තනයක් සිදු වීම හෝ නොවීම තීරණය වන්නේ අටවැන්නේ බලය ශක්තිය මතය.

ඥාති වරම්, අභ්‍යන්තර වරම්, බාහිර වරම්, සිහි වරම්, නේත්‍රා වරම් ආදී වශයෙන් වරම් විවිධාකාරය. වරම කුමක් වූවත් ඊට සම්බන්ධ වන්නේ අමනුස්සයෙකි. අමනුස්සයාද විශ්වව්‍යාපී ශක්තියකි. එවන් ශක්තීන් සමග ගණුදෙනු කිරීමට, එවන් ශක්තීන් හරහා ධනය හෝ වෙන යම් උපකාරයක් ලැබීමට ඊට අනුරූප ග්‍රහ බලයක් අටවැන්න සමග සම්බන්ධව තිබිය යුතුය. 

බොහොමයක් දෙනා තුළ අටවැනි භාවය පිළිබඳව ඇත්තේ එතරම් සතුටුදායක අදහසක් නොවේ. අටවැන්න, අටවැන්නාධිපති,අටවැන්නේ ග්‍රහයින් වින කටින, අවාසනාව කැන්දන ග්‍රහයින් බව විශ්වාස කරන්නෝ බොහෝය. විසිදෙවෙනි දෙර්කාණාධිපති ගැන කිව යුත්තේ ද එයමය. ඇතැම් විට අටට සම්බන්ධ ග්‍රහයින් අමිහිරි කටුක බලපෑම් එල්ල කළ හැක. තිඹිරිගෙයින් ඇසෙන්නේ වේදනාබර විලාප හඬය. ඉවසා සිටිය යුතුය. මොහොතකට පසුව නව ලොව එළිය දකින බිළිඳෙකුගේ මොළකැටි හඬ ඇසෙනු ඇත. 

ආධ්‍යාත්මික ජ්‍යොතිෂවේදී 

සංජීව කුළුපන බණ්ඩාර