මිථුන, කන්‍යා, ධනු, මීන ලග්න හිමියන් වසර එක හමාරක් පුරා පැවති රාහු කේතු බන්ධනයෙන් මිදෙයි.

ලග්න රැසකට සුබ ඵල.

මැති සබයේ අර්බුධ 

දේශපාලන පිටියේ මහා පැටළිලි 

රජයට විශාල අභියෝග 

         

(මෙම විග්‍රහය 2009.11.08 ඉරිදා වාසනා පුවත්පතේ පලවිය.)

ඇමරිකානු රාජ්‍ය ලේකම් හිලරි ක්ලින්ටන් නෝනා ගේ

කේන්දරය  බලමු.

    ඇමරිකාව කියන මහා බලසම්පන්න රටේ රාජ්‍ය ලේකම් තනතුරට පත්වෙන්න නම් මොන තරම් පින් බලයක් තියෙන්න ඕනැද? රාජ්‍ය ලේකම් වෙන්න විතරක් නෙමෙයි ජනපති බිරිඳක් වෙන්නත් පින් කරපු කෙනෙක් තමයි හිලරි ක්ලින්ටන් කියන්නේ. ක්‍රි.ව.1947 ඔක්තෝබර් 26 වැනි ඉරිදා ප.ව.08.00 ට ඇමරිකාවේ චිකාගෝ නගරයේදී උපන් හිලරි ක්ලින්ටන් ගේ කේන්දරය සටහන් වෙන්නෙ මෙන්න මෙහෙමයි.

   මෙතුමිය ගේ ලග්නය මිථුන ලග්නය යි. මිථුන ලග්න හිමියො වයසට ගියත් තරුණ පාටයි. නියම වයස හොයන්න බෑ. හිලරි නෝනා ගේ වයස දැන් අවුරුදු 62 යි. ඒත් ආකර්ශනීය පෙනුම, උද්යෝගය, පිබිදුනු ගතිය නොනැසී තියෙනවා. ලග්නාධිපති බුධ ඉන්නෙත් ඉතාමත් යහපත් තැනක යි. පස් වැන්න කියන්නේ කේන්දරයක ඉතාමත් ප්‍රබල ස්ථානයක්. බුධ පහේ ඉන්නෙත් තනියම නෙමෙයි ස්වෂේත්‍ර බලයෙන් යුතු සිකුරු සහ නීච රවි සමග යි. සිකුරු ගේ බලයෙන් රවි ගේ නීචය භංග වෙලා ප්‍රබල රාජ යෝගයක් නිර්මාණය වෙලා තියෙනවා.
  දීප්තිමත් ශිෂ්‍යාවක් විදියට ගුරුවරුන්ගේ ආදරය දිනා ගනිමින් සාර්ථක අධ්‍යාපනයක් උරුම කරගන්න බුධ ගේ බලපෑම නොමදව උපකාරී වුණා. වයස අවුරුදු දොළහේ පටන් වයස තිහ වෙනකල්ම ගත කළේ බුධ ගේ මහ දශාව යි. පොත පත, අධ්‍යාපනය ගැන කියැවෙන විද්‍යාස්ථානයේ සිටින බුධ තමන් ගේ දශා කාලය තුළ දිය යුතු සහයෝගය උපරිමයෙන්ම ලබා දුන්නා.තරඟ විභාග වලින් ජය ගත්තේ වාර්ථා පිහිටුවමිනුයි. පාසල් අධ්‍යාපනය සාර්ථකව නිමා කර නීති විද්‍යාලයට ඇතුල් වෙලා නීතිඥවරියක් වෙලත් වාර්ථා පිහිටෙව්වා. ඇමරිකාවේ බලවත්ම නීතිඥයින් කීප දෙනා අතරට දෙවතාවක්ම පත් වුණා. Rose Law Firm නීති සමාගමේ පළමු නීතිඥවරිය වුණෙත් මෙතුමිය යි. මේ සෑම දේකටම හේතුවුණේ ලග්නාධිපති බුධ ගේ බලය යි.
     කෙනෙකුගේ පිටුපසින් සිට ඔහුගේ හෝ ඇයගේ ප්‍රතිරූපය ගොඩනංවමින්, ධෛර්‍යය ශක්තිය ලබා දෙමින් ඉදිරියට ගෙනයාමේ මනා හැකියාවක් මිථුන ලග්න හිමියන් ට තියෙනවා. බුධ ග්‍රහයා ගේ පිහිටීම අනුව එම තත්වය අඩු වැඩි වෙනවා. සාර්ථක මිනිසෙක් පිටුපස සාර්ථක ගැහැණියක් සිටියි යන කියමන සැබෑ කරමින් එදා බිල් ක්ලින්ටන් ජනාධිපතිවරයා පිටුපස සිටි යෝධ ශක්තිය හිලරි මැතිනිය මිසක් වෙන කිසිවෙක් නෙමෙයි. වර්ථමාන ජනාධිපති බැරක් ඔබාමා මහතාගේ මැතිවරණ ව්‍යාපාරයේ සිටි යෝධ ශක්තියත් හිලරි මැතිනියම තමයි.
        මෙතුමිය ගේ කේන්දරයේ දෙවැනි භාවයේ සිටින අඟහරු නීචයි. හැබැයි ඒ නීචයත් ක්‍රම කීපයකටම භංග වෙලා තියෙනවා.එක ක්‍රමයක් තමයි රවි ගෙන් කේන්ද්‍රගතවීම. අනිත් ක්‍රමය තමයි බ්‍රහස්පති හය වැන්න වූ වෘශ්චික රාශියේ තැන්පත්වීම. නීච ග්‍රහයා සිටින රාශියට උච්ච වන ග්‍රහයා අදාල නීච ග්‍රහයා ගේ රාශියක තැන්පත් වීමෙන් නීචය භංග වෙනවා. ඒ වගේම නවාංශකයේ කුජ උච්චව සිටින බැවින් ක්‍රම තුනකට කුජ ගේ නීචය භංග වෙලා තියෙනවා. කතාව බලවත් වීමට මෙම ග්‍රහ තත්වය හේතු වෙලා තියෙනවා.
  මේ කේන්දරයේ තිබෙන හොඳම ග්‍රහ සංයෝගය තමයි රවි, බුධ, සිකුරු සංයෝගය. මෙම ග්‍රහයින් ගේ දශා කාල තුළ දි සුවිශේෂ සුබ පල හිමි වෙනවා. මෙම යෝගය නිර්මාණශීලී නව අදහස් උපද්දවීමේ හැකියාව ලැබෙන යෝගයක්.
     බුධ ගේ සහ සිකුරු ගේ දශා කාලසීමාවන් තුළ ලැබිය යුතු සුබ පල උපරිම ලෙස ලැබුණා. 1971 වසරේ දී නීති විද්‍යාලයේ දී බිල් ක්ලින්ටන් මහත්තයා හමුවෙන විට වගේම 1975 වසරේ දී විවාහය සිදුවන විටත් ගතවෙමින් තිබුණේ බුධ මහ දශාව යි.
   2000 වසරේ දී නිව්යෝක් සෙනෙට් සභාවට පත් වන විටත්, 1993 වසරේ දී ඇමරිකාවේ පළමු වැනි කාන්තාව බවට පත් වන විටත් ගත වුණේ සිකුරු මහ දශාව යි. සිකුරු මහ දශා කාලය තුළ ඇය තුන් වරක්ම සෙනෙට් සභාවට පත් වුණා.
   හිලරි ක්ලින්ටන් දැනට ගත කරන රවි මහ දශාව 2010.08.21 වෙනකල් පවතිනවා.දැනට ගත කරන්නේ රවි ගේ කේතු අන්තර් දශාව යි. කේතු අන්තර් දශාව පටන්ගත්තු ගමන් ම ධවලමන්ධිරයේ දී සුළු අනතුරකටත් ලක්වුණා. 
     කොහොම වුණත් දැනට ගත කරන රවි මහ දශාව වගේම ඊළඟට ලබන සඳු මහ දශාවත් මෙතුමියට සුබදායකයි. බලවත් තනතුරු පදවි දරමින් බැබලෙන ජිවිතයක් ගතකරන්න අවශ්‍ය පින් බලය තවත් කාලයක් පුරා මෙතුමියට තියෙනවා.

      ජ්‍යොතිෂවේදී, ගුප්ත වෛද්‍ය 

      දේශමාන්‍ය ආචාර්ය සංජීව කුළුපන බණ්ඩාර 
   

( 2009 මාර්තු 08 වැනිදා ඉරිදා වාසනා පුවත්පතේ පළවූ මාගේ ලිපියකි )

ඓෂ්වර්යා අභිෂේක් යුවළට තිරුපති කෝවිලේ පැය පහක පූජාවක්.
ලෝකයේ ලස්සනම යුවතියටත් විවාහ දෝෂ.
දෙදෙනාටම කඩහන්දි දෝෂයක්.

     ඓෂ්වර්යා  රායි කියන්නේ ලෝකය පුරා ප්‍රසිද්ධ කාන්තාවක්. හිරිමල් යොවුන් වියේදිම ලොව පුරා ප්‍රචලිත වුණු මේ වාසනාවන්ත යෞවනියගේ ජිවන සහකරු වුණෙත් එසේ මෙසේ කෙනෙක් නෙමෙයි. ඒ, සුප්‍රසිද්ධ සිනමාවේදී අමිතාබ් භච්චන් ගේ පුතණුවන් වූ අභිෂේක් භච්චන්.  නොයෙක් ආන්දෝලනාත්මක පුවත් ඒ මේ අත පැතිර යද්දී 2007 වසරේ අප්‍රේල් 20 වැනි සිකුරාදා මේ දෙන්නා විවාහ වුණා.
     විවාහයට කලින් ඉඳන්ම ඓෂ්වර්යා නොයෙක් කෝවිල් ගානේ ගිහින් පූජා පවත්වන්න ගත්තා. තිරුපති කෝවිල, රාම්ජානකි කෝවිල වගේ ප්‍රසිද්ධ කෝවිල් කරා ගොස් විශේෂ පුද පූජාවන්ට සහභාගී වුණා.ඒ තමන්ගේ පවුලේ සාමාජිකයිනුත් සමගයි. මේ අය මේ තරම් පුද පූජා පවත්වන්නේ මොකද කියලා බොහෝ දෙනා විපරම් කරන්න වුණා. ඓෂ්වර්යාගේ කේන්දරයේ  තදබල විවාහ දෝෂයක් යෙදී තිබෙන බව ඉන්දියානු ජ්‍යොතිෂවේදීන් දැනගත්තා. කොහොම වුණත් භච්චන් පවුලේ ජ්‍යොතිෂ උපදේශක චන්ද්‍රමෞලි උපාධ්‍යාය තුමා හැරෙන්නට කේන්දර ගැන නිවැරදි තොරතුරු සෙසු ජ්‍යොතිර්වේදීන්ට හරියට දැනගන්න ලැබුණේ නෑ. ඓෂ්වර්යාගේ උපන් දිනයට අදාල කරුණු මත අනුමානයට සකස් කළ කේන්දර මගින් ඇතැම් ජ්‍යොතිෂවේදීන් නොයෙක් මත ප්‍රකාශ කළා. ඓෂ්වර්යා අභිෂේක් යුවළ සහභාගී වුණු සෑම පූජාවක්ම විවාහ දෝෂ දුරුකර ගැනීමේ පූජාවන් වීම බොහෝ දෙනෙකුට ගැටලුවක් වුණා. දෙදෙනාට කඩහන්දි මාරක දෝෂයක් යෙදී තිබෙන බව වගේම නක්ෂත්‍ර දෝෂයක් ද යෙදී තිබෙන බවත් ජ්‍යොතිර්වේදීන් අතර පැතිරිලා තිබුණා. 
      කොහොම හරි අන්තිමේදි දෙන්න ගේ උපන් වේලාවන් හරියටම නූලට තිතට ජයෝතිර්වේදීන් අතට පත්වුණා. දෙදෙනාගේ ම කේන්දර තුළ බලවත් භෞම දෝෂයක් හෙවත් කුජ දෝෂයක් තිබෙන බව එයින් පැහැදිලි වුණා. 

      අභිෂේක් භච්චන් ගේ කේන්දරයේ අට වැන්නේ කුජ හෙවත් අඟහරු පිහිටලා තියෙනවා. අඟහරු අට වැන්නේ පිහිටීම භෞම දෝෂයක් විදියට සැලකෙනවා. ඓෂ්වර්යා රායි ගේ කේන්දරයේ කුජ හතරවැන්නේ පිහිටලා තියෙනවා.කුජ හතරවැන්නේ පිහිටීමත් භෞම දෝෂයක් විදියට සැලකෙනවා. භෞම දෝෂය  ප්‍රධාන ගැටලුව විදියට ප්‍රකාශ වූවත් ඊටත් වඩා දරුණු ග්‍රහ බලපෑම් මේ කේන්දර දෙක තුළ තියෙනවා. අභිෂේක් ගේ කේන්දරයේ කේතු හතේ පිහිටීමත්, ඓෂ්වර්යා ගේ කේන්දරයේ ගුරු ලග්නයේ නීච වීමත් විවාහය සම්බන්ධයෙන් අසුබයි. දෙදෙනාගේම කේන්දර තුළ තිබෙන අසුබ ග්‍රහ පිහිටීම් සියල්ලම පාහේ බලපාන්නේ විවාහය සම්බන්ධයෙන් වීම විශේෂයි. 
       නිතර දෙවේලේ තිරුපති කෝවිලට ගිය මේ දෙන්නා විවාහය ඔන්න මෙන්න කියා තියෙද්දී රාම්ජානකි කෝවිලේ විශේෂ හනුමාන් පූජාවක් පැවැත්වුවෙත් අපලයේ බරපතලකම දන්නා හින්දයි.
      අභිෂේක් ඓෂ්වර්යාට වඩා වසර කීපයකින් බාලයි. මනාලයා මනාලියට වඩා වැඩිමල් විය යුතුයැයි සාම්ප්‍රදායික පිළිගැනීමක් ඉන්දියාව තුළ තිබුණත් මේ දෙන්නගේ ආදරයට වයස බලපෑවේ නෑ.  
         විවාහ දෝෂ දුරු කරගැනීමට විවාහයට පෙර ඓෂ්වර්යා ගසක් සමග විවාහ වුණෙත් අභිෂේක් ව නැතිකරගන්න අපහසු හින්දමයි. තිරුපති, මාභගවතී, රාම්ජානකි, බ්‍රහ්මා, බර්නසායි, සිද්ධි විනයාගර් වැනි ප්‍රසිද්ධ කෝවිල් තුළ පැය ගණන් පූජාවන් පැවැත්වුවෙත් තම ආදරවන්තයා සමග සැනසිලිදායක යුග දිවියක් ගතකරන්නයි. 
         ඓෂ්වර්යාට  දැනට පවතින්නේ රාහු මහ දශාවයි. අභිෂේක් ගත කරන්නේ රවි මහ දශාවයි. මේ දශා දෙකම ප්‍රසිද්ධියට යහපත් වූවත් තද බල නීති ප්‍රශ්ණයක් මතුවීමට විශාල ඉඩක් තිබෙනවා. ඓෂ්වර්යා ඔළුව නැති වැඩ කරන්නත් ඉඩ තිබෙනවා. කොහොම වුණත් අපල උපද්‍රව දුරු වීමට දෙදෙනාම නිවැරදි පිළිවෙත් අනුගමනය කරන හින්දා කරදරයක් සිදුවන එකක් නෑ. කේන්දර දෙකේම පවතින ප්‍රබල රාජ යෝග බලය හේතුවෙන් දෙදෙනාම තව තවත් ප්‍රබල තත්වයට පත්වෙන එකනම් නවත්වන්න බෑ.

        ජ්‍යොතිෂවේදී, සාම විනිසුරු 
     දේශමාන්‍ය ආචාර්ය සංජීව කුළුපන බණ්ඩාර 

(2008 ඔක්තෝබර් මස 12 ඉරිදා ලංකාදීප පුවත් පතේ පලවූ මාගේ ලිපියකි.)

              සෙත් කවිය ශාන්ති කර්මයකි. මානසික හා කායික වශයෙන් එල්ල වන්නාවූ අනේක විධ පීඩාවලින් සහනය සලසා ගැනීමට උපයෝගී කරගත හැකි උසස් ශාන්ති කර්මයකි. බොහෝ දෙනා ඈත අතීතයේ පටන්ම නොයෙක් කටයුතු සඳහා සෙත් කවි හා වස් කවි භාවිත කර තිබේ.
            උලකුඩයේ දේවියට පුත් රුවනක් ලබා ගැනීමට විභීෂණ දෙවියන්ගේ පිහිට ඉල්ලා සිරි රහල් හිමියන් විසින් රචනා කරන ලද සැළලිහිණි සංදේශය මෙරට සාහිත්‍යයට එක්වූ ශ්‍රේෂ්ඨතම සෙත් කවිය ලෙස හැඳින්විය හැකියි.කවියෙන් ඉල්ලූ පරිදිම උලකුඩයේ  දේවියට පුත් රුවනක් ලැබුණු බව පැවසේ.
            තවත් අතීතයට සිත යොමු කිරීමේදී බුදු රජාණන් වහන්සේ විසින් දේශනා කරන ලද පිරිත් සුත්‍ර ද ඉතාමත් බලසම්පන්න සෙත් කවි බව තේරුම් ගත හැකිය. නිවැරදි ගණ සංකලනයකට අනුව ශාස්ත්‍රීය ලෙස සකසා ඇති බැවින් පිරිත් වලින්ද මහත් වූ සෙතක් ශාන්තියක් සැලසේ.
              සෙත් කවි අයත් වන්නේ ශබ්ද ශාස්ත්‍රයට ය. ලොව පවත්නා සියලු දේ මෙන්ම ශබ්දය ද, අක්ෂර ද පංච භුතාත්මක ය. සත්ව ශරීරය ද පංච භුතාත්මක වන අතර බුදු දහමින්ද එය සනාථ කර තිබේ. මන්ත්‍ර නිර්මාණය කර තිබෙන්නේද පංච භුතාත්මක වූ අක්ෂර ශාස්ත්‍රීය ලෙස සංයෝග කරමිනි. සෙත් කවි ද මන්ත්‍ර විශේෂයකි. 
              සෙත් කවි කලාව ගැඹුරු ය සංකීර්ණ ය. ආවට ගියාට සෙත් කවි නිර්මාණය කළ නොහැක. කවිකම උපතින් ගෙනා අයෙකුට වුවත් සෙත් කවි තැනීමේ හැකියාව නොලැබේ. හෝරා ශාස්ත්‍රය,ඉන්ද්‍රගුරුළුව, යමකාලය, ජ්‍යොතිෂය, දඬුමරණය, පංච පක්ෂි, ස්වර ශාස්ත්‍රය, පූජා විධි ආදී විෂයයන් පිළිඹදව දැනුමින් තොර පුද්ගලයෙකු විසින් සාදනු ලබන කවියක් ශාස්ත්‍රීය නොවේ.
   වීදාගම මහා මෛත්‍රී හිමියන්, තොටගමුවේ සිරි රහල් හිමියන්, කුංකුනාවේ හිමියන්, භරණ ගණිතඥ වැනි ගිහි පැවිදි පඬිවරුන් සෙත් කවියෙන් හා වස් කවියෙන් දස්කම් දැක්වූවෝ ලෙස ඉතිහාසගතව සිටිති.කාව්‍ය ශාස්ත්‍රයේ සියුම් තැන් මගහැරී යාමෙන් විපතට පත්වූ දක්ෂයින් පිළිඹදවද ඉතිහාසය තොරතුරු සපයයි. ගුත්තිල කාව්‍යය රචනා කළ වෑත්තෑවේ හිමියන්ද එබඳු වියතෙකි.
   නිවැරදි ගණ සංකලනය සෙත් කවියක ප්‍රධාන අංගයකි. ගණ වැරදුණු කළ සෙත් කවිය වස් කවියක් විය හැකිය. එයින් සෙත් කවි රචකයාටද තද බල විපත් එල්ල වේ. වෑත්තෑවේ හිමියන් ගුත්තිල කාව්‍යය ආරම්භ කරන්නේ 'සිය පින් සිරින්  සරු' යනුවෙන් වායු ගණයෙන් පසුව සූර්ය ගණය යෙදීමෙනි. මෙයින් එල්ලවූ අසුබ විපාක උන්වහන්සේට විඳින්නට සිදුවිය.
      ශබ්ද විද්‍යාවෙහි ගණ අටක් භාවිතා වේ. භූමි, දේව,චන්ද්‍ර,ජල, සූර්ය, අග්නි, වායු හා ආකාශ යනුවෙනි. මෙහි මුල් ගණ හතර සුබ ගණ ලෙසත් සෙසු ගණ හතර අසුබ ගණ ලෙසත් පිළිගැනේ. මුල් ගණ හතර සෙත් කවි සඳහාත් සෙසු ගණ හතර වස් කවි සඳහාත් භාවිතා වෙයි. භූමි ගණය ගුරු අක්ෂර තුනකින්ද, දේව ගණය ලඝු අක්ෂර තුනකින්ද, චන්ද්‍ර ගණය මුල ගුරු අක්ෂරයකින් හා ලඝු අක්ෂර දෙකකින්ද, ජල ගණය මුල ලඝු අක්ෂරයකින් හා ගුරු අක්ෂර දෙකකින්ද වශයෙන් සමන්විත ය. මේ අනුව ගණයක් යනු අක්ෂර තුනක් බව පැහැදිලි ය.
        ආනන්ද සමරකෝන් මහතා පළමුවෙන් රචනා කළ ජාතික ගීයෙහි මුල් වචන කීපය සටහන් කර තිබුණේ 'නමෝ නමෝ මාතා අප ශ්‍රී ලංකා' යනුවෙනි. මෙය ගණ වශයෙන් වෙන් කළ විට මෙසේය. 'නමෝන/ මෝමාතා/ අපශ්‍රී' මෙහි මුල් ගණය සූර්ය ගණයයි. දෙවැන්න භූමි ගණය වේ. පසුව වායු ගණය යි. වායු ගණයේ විපාකය මරණය යි. කවියේ තුන් වෙනුව යොදන ගණය ප්‍රධාන වශයෙන්ම කාව්‍ය රචකයාට බලපාන බව ශාස්ත්‍රීය පිළිගනිම යි. වායු ගණයේ බරපතල විපාක අත්විඳින්නට කාව්‍ය රචකයාට සිදුවිය.
    හිටපු ජනාධිපති ජේ. ආර්. ජයවර්ධන මහතා කැළණිය ආසනය වෙනුවෙන් තරඟ කරන සමයෙහි එතුමාගේ ජයග්‍රහණය පතා මලවැන්නේ ශ්‍රී කවිද්වජ හිමියන් විසින් රචනා කරන ලද සෙත් කවිය මෙසේය.
පිරුණියේ ඔබ බලය විභිසණ හිමිඳ හතුරෙක් කසා වතකට
දැකිණියේ තතු නොදැන නින්දා සලස්වයි ඌ දමා   පහතට
කැළණියේ ආසනය දිනවා දෙවා ජේ ආර් ජයවඩන      හට
පැමිණියේ නම් ඉතා යහපති යස කිරණ පීනමිනි      නානට
      නිවැරදි ගණ සංකලනයෙන් යුතුව අක්ෂර, යෝනි ශාස්ත්‍රීය ලෙස යොදා රචනා කළ බලවත් කවියකි. කාව්‍ය ශාස්ත්‍රය නොදන්නා අයෙක් මෙවැනි අවශ්‍යතාවයක් වෙනුවෙන් කවියක් රචනා කළහොත් ජයග්‍රහණය කෙසේ වෙතත් බලවත් විපත් බාධක නම් එල්ල විය හැකියි.

   සෙත් කවියක් ලිවීම ආරම්භ කළ යුත්තේ අදාළ පුද්ගලයාට සීහෙන නැකතක් පවතින සුබ දිනෙක, සුබ හෝරාවක, යහපත් ග්‍රහ පිහිටීම් පවතින අවස්ථාවක ය. කවිය කියැවීම ඇරඹිය යුත්තේද එවන් බලවත් අවස්ථාවක ය. කවිය කියවන සුබ මොහොත එළඹෙන තෙක් එය ශබ්ද නගා නොකියවිය යුතුය.
    මෙහිදී මතක තබා ගත යුතු වැදගත් කාරණය නම් සෙත් කවියක් කියැවීමේදී කවියේ වචන නොකඩා ගායනා කිරීමට වග බලා ගැනීමය. වචන අතරමග කැඩීමෙන් ගණ ඡේදනය වේ. එවිට නියමිත ප්‍රතිපල නොලැබේ. සෑම පදයක්ම අවසානය තෙක් වචන නොකඩා ගායනා කළ යුතුය.
    සෙත් කවියක් දෙවියන් ඉදිරියේ කියැවීමට පළමුවෙන් නියමිත වත් පිළිවෙත් ඉටු කිරීම වැදගත් වේ. බුදුන් වැඳ ත්‍රිවිධ රත්නයේ ආශීර්වාදය ලබාගෙන අදාල දෙවියන්ට ද නියමිත පුද පූජා පැවැත්විය යුතුය. අනතුරුව සිත සමාධිගත කොට සෙත් කවිය ගායනා කළ යුතුය. සෙත් කවි කියැවිය යුත්තේ එළිමහන් නිස්කලංක ස්ථානයකදී ය. වෙනත් ශබ්ද ඝෝෂා සමග නොගැටී නිදහසේ විශ්වය වෙත ශබ්දය මුදා හැරීමට හැකි තැනක් විය යුතුය.
    මන්ත්‍රයක් ජප කළ යුතු වාර ගණනක් ඇත්තා සේම සෙත් කවියකින් නිවැරදි පිහිට ලැබෙන්නේද නිසි වාර ගණන සම්පුර්ණ වීමෙන් පසුව ය. තමන් විසින් රචනා කරන ලද සෙත් කවිය කොපමණ වාර ගණනක් කියැවිය යුතුද යන්න රචකයා දැනගෙන සිටිය යුතුය. අක්ෂර සීහුම් චක්‍රය, හිමි අහිමි චක්‍රය, සිද්ධි චක්‍රය හා මුල් අකුරු ගැළපීමේ චක්‍රය පිළිඹඳව නිවැරදි දැනුමක් ඇතුව රචනා කරන සෙත් කවියකින් ඉක්මන් ප්‍රතිපල ලැබේ. අසාධ්‍ය රෝගියෙකු වෙනුවෙන් රචනා කරන සෙත් කවිය ඉක්මන් ප්‍රතිපල ලැබෙන  කවියක් විය යුතුමය.
පහත සඳහන් වන්නේ ගෙල වැලලා ගත්  තරුණයෙකුගේ ජීවිතය ගලවා ගැනීම සඳහා මවිසින් රචනා කරන ලද සෙත් කවියකි.තරුණයාගේ පවුලේ උදවිය මා හමුවීමට පැමිණ ඉල්ලා සිටියේ කුමක් හෝ කර ජීවිතය බේරා දෙන ලෙසයි. ගෙල වැලලාගෙන තිබුණේ පෙර දින සවස ය. වෛද්‍යවරු පවසා තිබුණේ ජීවිතය බේරාගැනීමට හැකිවේද යන්න ස්ථිරව පැවසිය නොහැකි බවයි.ක්ෂණිකව කළ හැකි දෙයකට තිබුණේ සෙත් කවියක් රචනා කර දීමයි.ඒ අනුව සෙත් කවිය රචනා කර දී එය කියවීමට එදිනම සුබ වේලාවක්ද සාදා දුන්නෙමි.පසු දාම තරුණයා ට සිහිය ලැබුණි. මරණය අභියස සිටි තරුණයා මේ වන විට සුවසේ වෙසෙයි.
  සොඳිනි සම්බුදු සසුන සුරකින සතට සෙත පිළිසරණ    සලසන 
  පතල සිරි වෙණු සුරිඳ සිරි පද වඳිමි යොමු කළ මැනවි  දෙසවන 
   දිවැස ......  ......  ......    ගෙ  දෙසට   යොමු  කරලමිනි               විගසින
  අපල අවහිර බිඳල රැකගනු මැනවි ඔද තෙද කිරණ     හෙළමින  
    ග්‍රහ අපල දුරු කර ගැනීම, රෝගාබාධ සුව කර ගැනීම, රැකියා, තනතුරු ලබා ගැනීම, දියුණුව උදා කර ගැනීම, ව්‍යාපාර දියුණු කර ගැනීම, නඩුවලින් හා තරඟ විභාගවලින් ජයග්‍රහණය අත් කර ගැනීම, විවාහ කටයුතු ඉක්මන් කර ගැනීම හා දරු ඵල ලබා ගැනීම යනාදී කටයුතු සඳහා සෙත් කවියේ පිහිට ලබාගත හැකිය.
    වසර දහස් ගණනක් පුරා නොනැසී පවත්නා මෙම උතුම් ශාස්ත්‍රය ආරක්ෂාවීමට නම් සෙත් කවි රචකයින් නිවැරදි දැනුමින් යුතුව සෙත් කවි රචනා කළ යුතුය. සෙත් කවි ලියවා ගන්නා ජනතාව නිවැරදි දැනුමින් යුතු සෙත් කවි රචකයෙකු තෝරාගත යුතුය. 

    ජ්‍යොතිෂවේදී, මන්ත්‍රාචාර්ය,දිවයිනටම සාම විනිසුරු 
       දේශමාන්‍ය ආචාර්ය සංජීව කුළුපන බණ්ඩාර. 

     

සෙනසුරු වෘශ්චික රාශියේ පෙරළි කරයි ද?

          සෙනසුරු කියන්නේ පෙරළිකාර ග්‍රහයෙක්. ජ්‍යොතිෂය දන්නා නොදන්නා හැමෝම සෙනසුරු ගැන දන්නවා. ලෝකයට සෙනසුරුගෙන් එල්ලවෙන්නේ සුළුපටු බලපෑමක් නෙමෙයි. රටක සිද්දවෙන සුවිශේෂී සිදුවීම් බොහොමයකට ප්‍රධාන වශයෙන් බලපාන්නේ සෙනසුරු යි. ලෝකායත ජ්‍යොතිෂයේදී ( Mundane Astrology ) සෙනසුරු ප්‍රධාන කොට සලන්නේ ඒ හින්දයි. රටක සිදුවන මහජන නැගිටීම්, ආණ්ඩු පෙරළි, ස්වභාවික විපත්, සිවිල් යුද්ධ ආදිය ට සෙනසුරු විශේෂයෙන් බලපානවා.
          සෙනසුරා වෘශ්චික රාශියට ගමන් කළේ 2014. 11. 02 වැනිදා යි. සෙනසුරු වෘශ්චික රාශියෙන් සමුගන්නේ 2017.01.27 වැනිදායි. සෙනසුරු මාරුව රටට බලපාන්නේ මොන විදියටදැයි සොයා බැලීම ඉතාමත් වැදගත් වෙනවා. මේ කාලය තුල රට තුල සිදුවන්නේ මොනවගේ සිදුවීම්ද ? මීට පෙර සෙනසුරු වෘශ්චික රාශියේ ගතකරන විට සිදුවුයේ මොනවගේ සිදුවීම්ද ?  මේ කාරණා ගැන එතරම් දුරට සොයා බලා සිදුකල විග්‍රහයක් දකින්නට ලැබුණේ නෑ.
          ශ්‍රී ලංකාව සමග සෙනසුරු ගේ සම්බන්ධය වැඩියි.  ඒකට විශේෂ හේතුවක් තියෙනවා. ලංකාවෙ ලග්නය විදියට සැලකෙන්නේ කුම්භ ලග්නය යි. කුම්භ කියන්නේ සෙනසුරුගේ ලග්නයක්.   ලංකාවට ලග්නයක් ලැබුණේ කොහොමද කියල කෙනෙක් හිතන්න  පුළුවන්.  ලංකාවට නිදහස ලැබුණු මොහොත අනුව සකස් කරපු කේන්දරයේ ලග්නය තමයි කුම්භ. සෙනසුරු 2014. 11 .02 පටන් 2017 .01.27 තෙක් කාලය ගත කරන්නේ ශ්‍රී ලංකා කේන්දරයේ දහ වැනි  භාවයේ යි. දහ  වැනි භාවය කේන්දරයක ඉතාමත් වැදගත් සුවිශේෂ ස්ථානයක්.   පුද්ගලයෙකුගේ කේන්දරයේ දහ වැන්නෙන් ඒ පුද්ගලයාගේ රැකියාව ගැන ප්‍රධාන වශයෙන් කියැවෙනවා. ඊට අමතරව ගෞරවය, බලය, ක්‍රියාකලාපය, සාර්ථකත්වය ආදී දේවල් ගැනත් කියැවෙනවා. 
            සෙනසුරු ශ්‍රී ලංකා කේන්දරයේ දහ වැනි භාවයේ කල් ගත කරන කාලය තුල මොනවගේ දේවල් සිද්ද වෙයි ද ?  මීට පෙර සෙනසුරු වෘශ්චික රාශියේ හෙවත් රටේ කේන්දරයේ දහ වැනි භාවයේ ගත කළ අවස්ථා වලදී සිදු වුයේ මොනවාද ?
           1955. 11.12 දින සෙනසුරු වෘශ්චික රාශියට ගමන් කළා. 1955. 11. 12 පටන් 1958  11. 07 දින තෙක් සෙනසුරු වෘශ්චික රාශියේ ගත කළා. මෙම කාලය තුල, එනම් 1956 වර්ෂයේදී එස්.ඩබ්ලිව්.ආර්. ඩී බණ්ඩාරනායක මැතිතුමා ශ්‍රී ලාංකික දේශපාලන ඉතිහාසය තුළ නොමැකෙන සන්දිස්ථානයක් සටහන් කළා. 56 පෙරළිය ගැන අදටත් බොහෝ දෙනා කතා කරනවා.

 (2015 ජනපතිවරණය සම්බන්ධයෙන් අනාවැකියක් ඉදිරිපත් කිරීමට බලවත් උවමනාවක් තිබුණු නමුත් එසේ කිරීමට නොහැකි විය. කිසිදු දේශපාලන අනාවැකියක් නොපවසන බවට රහස් පොලිස් ප්‍රධානියා ඉදිරියේ ප්‍රකාශ කොට අත්සන් තැබීමට මා හට සිදු විය. ඒ 2009 වසරේදී ය. එවන් වාතාවරණයක් යටතේ ජනාධිපතිවරණය සම්බන්ධයෙන් අනාවැකියක් පළකිරීම අතිශයෙන්ම අවදානම් බැවින් සෘජු අනාවැකියක් ඉදිරිපත් කිරීමෙන් වැළකීමට සිදුවිය.

සෙනසුරු ග්‍රහයා මෙවර මෙන්ම 1956 දී ද වෘශ්චික රාශියේ ගත කළ බවත් එවර බණ්ඩාරනායක මහතා දේශපාලන ඉතිහාසය තුළ නොමැකෙන සන්ධිස්ථානයක් සටහන් කළ බවත් පවසා ලිපිය හමාර කළෙමි. එවන් පෙරළියක් 2015.01.08 වැනිදා, එනම් බණ්ඩාරනායක මැතිතුමා ගේ උපන් දිනයදා සිදුවන බව පැවසීමට නොහැකි විය. මෙපමණක් හෝ පැවැසුවේ ජනපතිවරණයට පෙර දිනයේ ය. 

ජනාධිපතිනි චන්ද්‍රිකා බණ්ඩාරනායක මැතිනිය ගේ කාලය තුල වැඩි වශයෙන්ම ප්‍රසිද්ධ ජ්‍යොතිෂ අනාවැකි පැවසූවේ මා විසිනි. එතුමිය කොළඹ නගරසභා පිටියේදී කොටි බෝම්බයකට හසුවී ඇසක් අහිමිවීමට දින දහයකට පෙර " ජනපතිනියට මාරක අපලයි ප්‍රචාරක රැළි ප්‍රවේශමෙන් " යන ශීර්ෂය යටතේ අනාවැකියක් පල කලෙමි. සුනාමි සහන මණ්ඩලය කිසිදා ක්‍රියාත්මක කිරීමට නොහැකිවන බවද පැවසුවෙමි. එවකට කිසිදු රහස් පොලිස් නිලධාරියෙක් මා සොයා පැමිණියේ නැත. )