කැලය මාරු වූවාට කොටියාගේ පුල්ලි මාරු නොවන බව සැබෑය. එහෙත් කොටියාට හරියන්නේ කැලෑවක්මය. කාන්තාරයට ගැළපෙන්නේ ඔටුවාය. කිඹුලා වීරයෙකු වන්නේ ජලයේදීය. වෛද්‍යවරයාට ගැළපෙන්නේ රෝහල මිස උසාවිය නොවේ. නීතීඥයාට ගැළපෙන්නේ උසාවිය මිස රෝහල නොවේ. ග්‍රහයින්ටත් ගැළපෙන නොගැළපෙන තැන් තිබේ. ගුරු නොම්බර එකේ සුබ ග්‍රහයා යැයි කිව්වාට ගුරුටත් කටඋත්තර නැති තැන් තිබේ. සෙනසුරු යාචකයා යැයි කිව්වාට සුපිරි දස්කම් පෙන්විය හැකි තැන් සෙනසුරුට තිබේ. මේ කතාව කේන්දරය ඇතුලෙ ග්‍රහයො සුපිරි වැඩකාරයො වෙන තැන් ගැනය.
ග්‍රහයින් බලවත් වන ආකාර 6 කි. ඊට "ෂඩ් විධ බලය" යැයි කියනු ලැබේ. ඒ ආකාර හය මෙසේය.
01 ස්ථාන බලය
02 දිග් බලය (දිශා බලය)
03 වේෂ්ටා බලය
04 කාල බලය
05 දෘෂ්ටි බලය
06 නෛසර්ගික බලය.
මෙහි විස්තර කෙරෙන්නේ දිග් බලය හෙවත් දිශා බලය ගැනයි.
කේන්දරයේ සතර දිග්භාගය හෙවත් දිශා හතර මුළින්ම දැන ගත යුතුය.
ලග්නය හෙවත් පළමු භාවය නැගෙනහිර දිශාවයි.
සිව්වැනි භාවය උතුරු දිශාවයි.
දසවැනි භාවය දකුණු දිශාවයි.
හත්වැනි භාවය බටහිර දිශාවයි.
පළමු භාවයට හෙවත් නැගෙනහිර දිශාවට ගැළපෙන්නේ බුධ සහ ගුරුය. මේ ඔළුව ගැන ඔළුවේ ක්‍රියාකාරිත්වය ගැන කියන තැනයි. ඔළුව යැයි කිව්වාට මින් අදහස් කරන්නේ මුහුණ හිසකෙස් ආදී පිටට පෙනෙන දේවල් පමණක් නොවේ. පළමු භාවයෙන් මනසේ ස්වභාවය එළිදරවු කෙරේ. මනස තුල ස්නායු මිලියන ගණනකි. වෛද්‍ය විශේෂඥයින්ගේ මතය අනුව රෝගවලින් සියයට අසූවක් ශරීරයේ නොව මනසේය. බටහිර ඇතැම් රටවල මිනිසුන් මිලියන ගණනක් දිනකට මනෝ විශ්ලේෂකන්ගේ පිහිට පතයි. මනසේ වැදගත්කම වටිනාකම මෙපමණ යැයි වචනයෙන් දැක්විය හැකි නොවේ. දකින්නට තිබෙන සියල්ල අතර සරු දේ සරු ලෙසටත් නිසරු දේ නිසරු ලෙසටත් දැකීමේ ශක්තිය පළමු භාවයේ සිටින බුධ ලබා දෙයි. ඕනෑම අවස්ථාවකට මුහුණ දිය යුතු නිවැරදිම ක්‍රමය, අදාල තැන කටයුතු කළ යුතු හොඳම විදිය, කෙනෙක් සමඟ සන්නිවේදනය කළ යුතු හරිම විදිය නූලට තිතට කියාදෙන්නේ බුධ ය. ගොනා හැරෙන්නේ පොල් පැලේ කන්නටය කිව්වා වගේ මෙයා මේ එන්නේ හොඳටද නරකටදැයි අවබෝධ කරගැනීම බුධ ලග්නයේ සිටින පුද්ගලයාට එතරම් අපහසු නොවේ.
බොහෝ දෙනා මනස වෙත පනවා ඇති සීමා කිරීම්, තහනම් කිරීම් හේතුවෙන් මනසට හිමි නිරායාස බවට, සහජතාවයට අනුකූලව මනස තුළ වූ දේ මනස විසින්ම ප්‍රකාශවත් වීමට ඉඩ නොදෙයි. සෑම දෙයක්ම අස්වාභාවික ව්‍යාජ බවට පත් කරයි. සියලු දේ තිරපටවලින් වසා තැබුවා මෙනි. මනසින් විශාල කොටසක් අඳුර තුළ තෙරපා තබයි. ඒ දෙසට පහනක් රැගෙන යා හැකි වීමට නම් පළමු භාවය බුධ විසින් ශක්තිමත් කළ යුතුය. සාම්ප්‍රදායන්, සමාජ මතයන්, විශ්වාසයන් තුළ හිර වී, කොටු වී නොසිට මනසේ සහජභාවය සමඟ කටයුතු කිරීමට ඉඩ කඩ ලබාදෙන්නේ බුධ ය.
මිනිසා යනු කැප්සූලයක හිර කර තබා සිටින සත්වයෙකි. ස්වභාවධර්මය විසින් මිනිසාගේ දැනීම,ඇසීම, පෙනීම සීමා කර තිබේ. දැනෙන පරාසයක්, පෙනෙන පරාසයක්, ඇසෙන පරාසයක් තිබේ. පවත්නා සියලු ගන්ධයන් සුගන්ධයන් දැනෙන්නට වූවා නම්, සියලු ශබ්දයන් ඇසෙන්නට වූවා නම්, විශ්වයේ තිබෙන සියලු දේ පෙනෙන්නට වූවා නම් කුමකින් කුමක් වේ දැයි සිතාගැනීමට නොහැක. එසේ වන්නේ නම් ඇතැමෙක් උමතු වන්නටද, ඇතැමෙක් මැරී වැටෙන්නද ඉඩ තිබේ. ප්‍රශ්නය නම් නොදැනෙන ගඳ සුවඳ හෝ, නොඇසෙන ශබ්ද හෝ නොපෙනෙන දේවල් නොවේ. ප්‍රශ්නය නම් දැනිය යුතු දේවල්වත් නොදැනීම ය. කෙනෙක්ගෙන් හමන්නේ මනුෂ්‍යත්වයේ සුවඳද තිරිසන් ගඳදැයි හඳුනා ගැනීමට අපොහොසත් වන්නෝ ජීවීත කාලකන්නි තත්වයට පත් කර ගනිති. තමන්ව මේ කැඳවාගෙන යන්නේ මොන දීපන්කරයකට දැයි නිනව්වක් ඔවුන්ට නැත. අද කාලයේ පමණටත් වැඩියෙන් උදාහරණ දකින්නට තිබේ. කෙනෙක් සාවදානකාමී මානසික ස්වභාවයක, නිවැරදි සිහියෙන් පසු වන විට හාත්පස සිදුවන බොහෝ දේ අවබෝධ කරගැනීමට හැකි වෙයි. ආත්ම දමනය පුද්ගලයෙකුට ආරක්ෂකයෙක් බඳුය. මධ්‍යස්ත ස්වභාවය, යුක්තිගරුක බව, ආත්ම දමනය, සදාචාරාත්මක බව හිමි කර දෙන ගුරු නැගෙනහිරට හෙවත් ලග්න භාවයට හොඳටම හොඳය.
උතුරු දිශාව නම් කේන්දරයේ සිව්වැන්න ය. හදවත ය.හදවතේ ස්ථානය මාතෘ ස්ථානය ද වෙයි. එතනට ගැළපෙන්නෙ සඳු සහ සිකුරුය. සඳු සිකුරු යනු සිසිලස නියෝජනය කරන ග්‍රහයින් දෙදෙනාය. දෙදෙනාම කාන්තාවෝය. බාඳුරා මල් වැනි නපුරු භයානක කාන්තාවන් ද සිටින බව සැබෑවකි. එසේ වූවත් කාන්තාවකට ආවේනික මුදු මොළොක් බව ස්ත්‍රී පුරුෂ සෑම හදවතක තිබිය යුතුය. මෙතැනට ප්‍රශස්ථ ග්‍රහයින් ලෙස නියම කර තිබෙන්නේ සඳු සහ සිකුරුය. ආදරය ඇති විය යුත්තේ හදවත තුළ මිසක මනස තුළ නොවේ. මනස තුළින් ආදරය කරන මිනිසුන්ගේ ආදරය ව්‍යාජ ආදරයකි. ආදරය සම්බන්ධයෙන් යමක් කිරීමට මනසට නොහැක. එය තනිකරම හදවතේ කාර්යභාරයකි. හදවතේ තත් සම්පූර්ණයෙන්ම ලිහිල් වූවොත් එයින් ආදරයේ සංගීතය පැන නොනගී. හදවතේ තත් පමණට වඩා ඇදී ඇත්නම් ආදරය කෙසේ වෙතත් උමතුව පැන නගින්නට ඉඩ තිබේ. හදවතේ තත් ආදරයේ රිද්මයට පැවතිය යුතුය. මනසේ තත් සහ හදවතේ තත් නිවැරදිව සමබර වූ විට ජීවිතයේ සංගීතය මදුර මනෝහර තත්වයට පත් වෙයි. මේ කාරණා නිරවුල්ව අවබෝධ කරගැනීමට "වචනාර්ථ" ජ්‍යොතිෂයෙන් ඔබ්බට යා යුතුය. සිව්වැන්නෙන් කියැවෙන දේපළ, ගේදොර, යානවාහන ගැන කතා කිරීමට අදහස් නොකරමි. ඒ සම්බන්ධයෙන් විස්තර ඕනැවටත් වඩා දකින්නට තිබෙන බැවිනි. හදවත සතුටු කරවන සියලු දේ ලබාදෙන්නේ සඳු සහ සිකුරුය.
බටහිර දිශාව හිරු බැස යන දිශාවයි. හිරු බැස යාමත් සමඟ එබිකම් කරන්නේ අඳුරයි. සෙනසුරු බටහිරට මෙන්ම අඳුරට ද අධිපතියාය. කේන්දරයේ බටහිර දිශාව යනු හත් වැනි භාවය යි. හත් වැනි භාවය යනු විවාහය ගැන කියැවෙන ස්ථානයයි. දරාගැනීමේ හා ඔරොත්තුදීමේ ශක්තිය ඇතිකරන්නේ සෙනසුරුය. ඔරොත්තුදීම සහ දරාගැනීම විවාහ ජීවිතයේදී අනිවාර්යයෙන්ම අවශ්‍ය වෙයි. විවාහයක් මධුසමයෙන් නිමා වන අතර එතැන් පටන් මුහුණ දිය යුතු වන්නේ සැබෑවට හෙවත් යථාර්තයට යි. යථාර්ථයට මුහුණ දීමේ ශක්තිය ඇති කිරීම සෙනසුරුට මහ ලොකු දෙයක් නොවේ. පෙම්වතුන් අතර වචන අඩුය. දෑත් පටලාගෙන එකම තරංග ආයාමයක සිටින ඔවුන්ට දෙනෝදාහක් යන එන වැව් ඉස්මත්තේ වාඩිවී නොසොල්මනේ වැව දෙස බල සිටිය හැකිය. නිසොල්මනේ සිටිය සිටිනවා යනු ඔවුන් සන්නිවේදනය නොකරනවා නොවේ. සන්නිවේදනය වචනවලින් නොවේ. සිතුවිලිවලිනි. භාවිතා කරන වචන ස්වල්පයද පිටතට නෑසෙන තරම් සිහින්ය. විවාහය තුළ මේ තත්වය උඩු යටිකුරු වී කතාබස්, තර්ක විතර්ක, හැලහැප්පීම් වැඩි වෙයි. හදවතේ සිටිනවා යැයි කියමින් ආදරය පෑ අනෙකාට කතා කරන්නේ හදවතේ සිටින කෙනාට නොව අහල පහලට ද ඇසෙන තරම් හඬිනි. ඒ යථාර්තය යි. ඒ සැබෑව තුළ සෙනසුරුගේ වටිනාකම අති මහත්ය.
දසවැන්න වූ දකුණු දිශාවට ගැළපෙන ග්‍රහයෝ නම් කුජ සහ රවි ය. දසවැන්න ක්‍රියාත්මක තැනයි. පීතෘ ස්ථානයයි. ජන්මියාගේ ක්‍රියාකාරිත්වය නිවේදනය කරන භාවයයි. භාව නිර්වචනයේදී හඳුන්වන්නේ රැකියා ස්ථානය ලෙසයි. ග්‍රහ මණ්ඩලයේ හොඳම ක්‍රියාකාරීන් දෙදෙනා කුජ සහ රවි ය. මොවුන් ගැළපෙන්නේ මනසටවත් හදවතටවත් නොව ක්‍රියාන්විතයට ය. ක්‍රියාකාරීත්වය තුළ පසු බැසීම, මන්දගාමී වීම ජීවිතයේ දියුණුව සාර්ථකත්වය අඩාල වීමට හේතු වෙයි. රවි කුජ දෙදෙනාගේ පසු නොබැසීමේ ගුණය මෙතැනට ඉතාමත් වැදගත් ය.වර්තමානයේ මිනිසා ක්‍රියාකාරීත්වයෙන් ටිකෙන් ටික ඈත් වෙමින් සිටිය ද අතීතයේ පුද්ගල ක්‍රියාකාරීත්වය අතිශයින් වැදගත් විය. සමාජය ජන්මියා පිලිබඳව ඇති කරගන්නා පොදු හැඟීම පෙන්වන්නේ දසවැන්නෙනි. කෙනෙකුගේ මනස හෝ හදවත පිටතට නොපෙනේ. සමාජය දකින්නේ ක්‍රියා කරන ආකාරය යි. පුද්ගලයෙකුගේ සෘජු ක්‍රියාකලාපය සමාජ ගෞරවයට පාත්‍ර වීමට හේතු වෙයි. දසවැන්න ලෞකික ජීවිතය හා තදින් බැඳුණු ස්ථානයකි.
දිග් බලය එයයි. නිතර විස්තර කෙරෙන කරුණු කාරණාවලට වඩා තරමක් වෙනස් කරුණු සටහන් කළේ "වචනාර්ථ" ජ්‍යොතිෂ රාමුවෙන් තරමක් හෝ ඔබ්බට ආධුනිකයින් රැගෙන යාමේ අරමුණෙනි. ග්‍රහයින් බලවත් වන තවත් ආකාරයක් පිළිබඳව නැවත කතා කරමු.
සංජීව කුළුපන බණ්ඩාර.
