වරම් දරුවෙක් නැති ගමක් නැති තරම්ය. වරම් දරුවෝ ඒ තරමට සිටිති. වරම් දරුවෝ යනු වරමින් සාස්තර කියන්නෝය. ජනයාගේ අනේකවිධ ගැටළු විසඳා ගැනීමට වරම් බලයෙන් සහාය වන්නෝය. ඔවුන්ගේ දැන්වීම් පුවරුවල සඳහන් පරිදි ඒවා දේව වරම්ය. ඇතැම් වරම් කඩවර දෙවියන්ගේය.ඇතැම් වරම් කතරගම දෙවියන්ගේය. පත්තිනි මෑණියන්ගේ වරමින් කටයුතු කරන්නෝද වෙති. ඔය ආදී වශයෙන් වරම් යනු දේව වරම්ය.
විශ්වය තුළ විශ්මිත කිසිවක් නැත. ඒ විශ්වය අවබෝධ කරගත් උත්තමයින්ටය. පෘථජ්ජන සාමාන්ය ජනයාට විශ්වය තුළ විශ්මිත දේ එමටය. වරමද එවැන්නකි. යක්ෂ,ප්රේත,බහිරව ආදීන් ගැන ද බොහෝ දෙනා තුළ පැහැදිලි අවබෝධයක් නැත. වරම් පිළිබඳව ලියැවෙන මෙම ලිපියෙන් ආරම්භ වන්නේ ඉහත කාරණා සම්බන්ධයෙන් බොහෝ දෙනා තුළ පවතින ගැටළු, සැක සංකා දුරු කිරීම සඳහා වන ලිපි පෙළකි. ගුප්ත ලෝකයේ සියලු තතු විත්ති ඔබට අනාවරණය කර දීමට බලාපොරොත්තු වෙමි.
ඇතැමුන්ට අනුව වරම් යනු දෙවියන් ශරීරයට ආරූඩ වී සාස්තර කීමකි.තවත් අය විශ්වාස කරන පරිදි ආරූඩවීම මානසික රෝගයකි. වරම් යනු අමූලික බොරුවක් යැයි පවසන්නෝද වෙති.වරම්වලට පැමිණෙන්නේ ප්රේතයින් බව තවත් අයගේ අදහසය.
දේව,යක්ෂ,ප්රේත,බහිරව මනුෂ්ය,තිරිසන් ආදී සියල්ලෝ සතර මහා භූතයින්ගෙන් සෑදුණු ජිවියෝය. සතර මහා භූතයෝ නම් ආපෝ, තේජෝ,වායෝ, පඨවි යන සතරය. ලොව සියලු දේ සෑදී ඇත්තේ මෙම මූල ධාතුන්ගෙනි. සක්කාය දිට්ටිය මගින් පෘථජ්ජන මනුෂ්යයා මම යනුවෙන් තදින් අල්ලාගෙන සිටින ශරීරය සෑදී ඇත්තේද මෙම මූල ධාතුවලිනි. මනුෂ්ය තිරිසන් ආදී සත්ව ශරීරවල පඨවි ධාතුව බලවත් බැවින් ඔවුන් පියවි ඇසට පෙනෙන නමුත් අමනුෂ්ය ශරීරවල වායෝ ධාතුව බලවත් බැවින් පියවි ඇසට දැක ගැනීම අපහසුය. දැක ගැනීමේ හැකියාව ඇති අයද නැතුවා නොවේ.
කුසල් අකුසල්, පින් පව් ශක්තින් අනුව දේව,යක්ෂ, ප්රේත,බහිරව ආදීන්ගේ ශක්තිය,ස්වරූපය විවිධාකාර වේ. දෙවිවරු අල්පේශාක්ය මහේශාක්ය වශයෙන් දෙකොටසකි. පින් බලය අනුව සැප වැඩි හා සැප අඩු දෙවිවරු වශයෙනි.සම්යක්දෘෂ්ටික හා මිත්යාදෘෂ්ටික වශයෙන්ද දෙවිවරු දෙකොටසකි. ඒ, ධර්මයට කැමති හා ධර්මයට අකමැති දෙවිවරු වශයෙනි. බුදු දහම තුළ වැඩි වශයෙන් සඳහන්ව ඇත්තේ දිව්ය ලෝකවල වාසය කරන දෙවිවරු ගැනය. ජීවත්ව සිටියදී අන්යයන්ට නොයෙක් ආකාරයෙන් උපකාර කළවුන්, වීර ක්රියා කළවුන්, යුක්තිගරුකව රාජ්ය පාලනය කළවුන් මරණයෙන් පසුව ජනයා විසින් දේවත්වයෙන් අදහනු ලබති. කඩවර,කන්දකුමාර,මහාකාලි, විභීෂණ,සුමනසමන්, දැඩිමුණ්ඩ,වීරමුණ්ඩ,පත්තිනි, රන්වල ආදී තවත් බොහොමයක් දෙවිවරු මේ යටතේ සඳහන් කළ හැකිය. ඔව්හු දිව්ය තලවල වාසය කරන දෙවිවරු නොවෙති.
ප්රේතයින් වර්ග හතරකි.
1. නිජ්ඣාමතන්හික- ගින්නෙන් දවනු ලබන බිල සහිත ගසක් මෙන් ශරීරය ඇතුළත කුසගින්නෙන් දැවෙන ප්රේතයින්.
2. කුප්පිපාසිත- දිගු කලක් ආහාර පාන නොමැතිව සා පිපාසා දෙකින් පීඩිතව සිටින ප්රේතයින්
3. 3.පංසුපිසාචික- වමනය,සෙම්,සොටු,සැරව ආදිය ආහාරයට ගන්නා ප්රේතයින්.
4.පරදත්තූපජීවී- ඥාතීන් විසින් දෙනු ලබන පිනෙන් ජීවත් වන ප්රේතයින්.
මේ අනුව පින් අනුමෝදන් කර ගැනීමට හැකියාව ඇත්තේ පරදත්තූපජීවී ප්රේත කොට්ඨාශයට පමණි. සාස්තර කීම, අඳුන් බැලීම,කර්ණමුණ්ඩ ආදී ගුප්ත කටයුතු සඳහා සම්බන්ධ වන්නේ ද මෙම ප්රේත කොට්ඨාශයයයි.මෙම ප්රෙතයින්ද විවිධාකාර ස්වරූපයන්ගෙන් හා විවිධාකාර ශක්තීන්ගෙන් යුක්ත වූවෝ වෙති. ඇතැමුන් සත්ය පවසන අතර සත්ය අසත්ය දෙකම පවසන ප්රේතයෝද වෙති.
දේව කොට්ඨාශවලට අයත් කිසිදු දෙවියෙක් වරම් සමග සම්බන්ධ නොවේ. වරම් සමග සම්බන්ධ වන්නේ පරදත්තූපජීවී ප්රේත කොට්ඨාශය පමණි.
යක්ෂ,ප්රේත,බහිරව වශයෙන් අමනුෂ්යයන් බෙදී යන්නේ කෙසේදැයි යන්න පිළිබඳව ද පැහැදිලි කළ යුතුය. ප්රචණ්ඩකාරී බව,දැඩි පාපී බව,වේගවත් බව, අධික නොසන්සුන් බව, දුෂ්ට බව යක්ෂ ලෙස හඳුන්වන අමනුෂ්ය කොට්ඨාශය තුළ පොදුවේ දකින්නට ලැබේ. මෙයින් අදහස් කරන්නේ මහසොහොන්,සන්නි,රීරි, කළු ආදී යක්ෂයින් නොවන බවද අවබෝධ කර ගත යුතුය. පොදුවේ ප්රේතයින් වුවද ශක්තිය,වේගය,පාපී බව වැඩි බැවින් යක්ෂ ලෙස හඳුන්වන අමනුෂ්යයින්ය.ඇතැමුන් ආරූඩවී තමන් මහසෝනා,රීරියකා ආදී ලෙස පවසන්නේ නම් අවබෝධ කර ගත යුතු වන්නේ කපටි ප්රේතයෙක් විසින් අන්යයන් රැවටීමට උත්සාහ කරන බවයි. මම එවැනි අවස්ථා රැසක් අත්දැක ඇත්තෙමි.
බහිරවයෝ නම් භූමිය ඇසුරු කරගෙන වෙසෙන අමනුෂ්යයෝය. ඔවුන් ප්රමාණයෙන් ඉතා කුඩා ශරීරවලින් යුක්ත වූවන් බව පොදු පිළිගැනීමයි. එය සත්යයකි. නිධාන්,පෞරාණික ස්ථාන,ආශ්රිතව වෙසෙන බහිරවයෝ සහ සාමාන්ය ඉඩම් ආශ්රිතව වෙසෙන බහිරවයෝ වශයෙන් දෙකොටසකි.බහිරව දෝෂ ලෙස හඳුන්වන්නේ පදිංචි ඉඩම් අශ්රිතව වෙසෙන බහිරවයින්ගෙන් එල්ල වන බලපෑම්ය.
වරම් දෙකොටසකි. බාහිර වාහක වරම් හා අභ්යන්තර වාහක වරම් යනුවෙනි. බාහිර වාහකයෙක් සම්බන්ධ වී සිදුකෙරෙන සාස්තර කීමේදී ආරූඩ වීමක් සිදු නොවේ. ප්රේතයා ශරීරයට ඇතුල් නොවේ.අවශ්ය දේ ප්රේතයා පවසන්නේ වරම් හිමියාගේ කනටය.එවිට ප්රේතයා පවසන දේ වරම් හිමියා විසින් සාස්තරය ඇසීමට පැමිණි තැනැත්තාට පවසයි.කර්ණමුණ්ඩය නමැති ක්රමවේදයේදී සිදුවන්නේ ද මෙයයි.වේවැලකට හෝ වෙනත් යමකට ප්රේතයෙකු බන්ධනය කරගෙන අවශ්ය වූ විට එය කනට තබාගෙන සාස්තර කීම කර්ණමුණ්ඩයෙන් සාස්තර කීම ලෙස හඳුන්වනු ලැබේ. අංජනම් එළි බැලීමේදීද සිදුවන්නේ බාහිර වාහක ක්රමයයි.ඇතැමුන් සිහි වරම් ලෙස හඳුන්වන්නේ කිසිදු වෙනසකින් තොරව සිහියෙන් සිට සාස්තර කීමය.මෙහිදී සිදුවන්නේ ද ප්රේතයා ශරීරයට ඇතුල් නොවී පිටත සිට පවසන දේ වරම් හිමියා අන්යයන්ට පැවසීමය.අවශ්ය දේ ලියා පෙන්වන ප්රේතයෝද වෙති.එනම් ප්රේතයා පැන්සලකට හෝ පෑනකට බන්ධනය වී ක්රියාත්මක වීමය.බාහිර වාහකයෙක් ලෙස කටයුතු කරන ප්රේතයා ශරීරයට ඇතුල් නොවේ.
ප්රේතයෙක් ශරීරයට ආරූඩවී සාස්තර කීම අභ්යන්තර වාහක ක්රමයයි.මෙහිදී සිදුවන්නේ ප්රේතයෙක් හෝ ප්රේතයින් කීප දෙනෙක් ශරීරයට ඇතුල් වී ක්රියාත්මක වීමයි.ඇතැමුන්ගේ ශරීරවලට ඇතුල් වන්නේ එක් ප්රේතයෙක් පමණක් නොවේ.ප්රේතයින් කීප දෙනෙක් සමග කටයුතු කරන්නෝද වෙති.මෙය බාහිර පුද්ගලයින්ට පැහැදිලිව හඳුනා ගැනීමට අපහසුය.
ප්රේතයෙකුට ඕනෑම ශරීරයකට ඇතුල් විය හැකිද?ප්රේතයින් ශරීරයකට ඇතුල්වන්නේ කොහොමද?බොහෝ දෙනා විසින් මෙවැනි ප්රශ්න නගන අවස්ථා තිබේ.
ඕනෑම කෙනෙකුගේ ශරීරය වටා සූක්ෂම ශරීරයක් පවතී. මෙය මනෝකාය ලෙසද හැඳින්වේ.අපට ශරීරයේ මුහුණ,අත,පය ආදියේ කෙළවරවල් පැහැදිලිව පෙනෙන නමුත් සියුම්ව අංශුමය ආකාරයෙන් පිටතට විහිදුණු ප්රමාණයක් ද පවතී.මෙය ශරිවල පමණක් නොව ලොව ජීවී අජීවී සෑම සියලු දෙයක් සමගම සම්බන්ධ වී පවතී. ලොව සියලු දේ සෑදී ඇත්තේ මූල ධාතු සතරකින් බව ඉහත සඳහන් කළෙමි. විසිරුණු ස්වභාවයෙන් යුතුව පවතින මෙම මූල ධාතු ඇසට නොපෙනන වේගයෙන් භ්රමණය වෙමින් අපට පෙනෙන සීමාවෙන් ඔබ්බට විසිරී පවතී.ශරීරයෙන් පිටතට විහිදුණු කොටස මනෝකාය, සූක්ෂම ශරීරය,ශරීර කිරණ ආදී වශයෙන් හඳුන්වන අතර ඉංග්රීසි භාෂාවෙන් එය Human Aura යනුවෙන් හැඳින්වේ.බුදුන්,යේසුස්,මහාවීර වැනි උතුමන්ගේ ශීර්ෂය වටා පවතින්නේද මෙම ශරීර කිරණයි.එය උන්වහන්සේලාගේ ශීර්ෂය වටා පවතින්නේ කෙසේද යන්න ඉදිරි ලිපියකදී විස්තර කිරීමට බලාපොරොත්තු වෙමි.
ශරීරය වටා පිහිටි සූක්ෂම ශරීරය හෙවත් ප්රභා මණ්ඩලය නොයෙක් දෙනාට පිහිටන්නේ නොයෙක් ආකාරයටය.මෙය වඩාත් දීප්තිමත් වීමට හා වඩාත් දුරට විහිදීමට ඇතුලාන්ත සමාධිය අවශ්ය වේ. දුක,කණස්සල්ල,සතුට,ප්රීතිය,කරුණාව,මෛත්රිය,ඊර්ශ්යාව,ක්රෝධය ආදී හැඟීම් හා ගති ස්වභාවයන් සමග ශරීර ප්රභා මණ්ඩලය වෙනස් වේ.අප දන්නා පරිදි වරම් හිමි බොහොමයක් දෙනා අධ්යාපනය,දැනුම,අවබෝධය,සමාජ තත්වය අතින් එතරම් ඉහළ තත්වයක අය නොවේ.සිත තුළ නිතර පවතින පසුගාමී පරාදීන හැඟීම් අනුව ශරීර රශ්මි මණ්ඩලය දුර්වල වෙයි.දුර්වල ශරීර රශ්මි මණ්ඩලයක් හරහා ඇතුළු වී විඥානයක් සමග එක්වීම අමනුෂ්යයෙකුට පහසුය.වරක් අමනුෂ්යයෙකු ඇතුළු වූ ශරීරයකට තවත් අමනුෂ්යින්ට ඇතුළු වීමද පහසුය.ශරීර රශ්මි මණ්ඩලයේ ශක්තිය, ස්වරූපය පවතින්නේ සිතුවිලිවල ස්වභාවය මතය.සිත දුර්වල වන අවස්ථාවල රශ්මි මණ්ඩලයද දුර්වලය.ඇතැම් අමනුෂ්යයෝ එවැනි අවස්ථාවල ශරිවලට ඇතුළු වෙති.තනිව සිටින විට හෝ බියක් දැනුණු විට හිත දුර්වල කර නොගන්නැයි පැරැන්නෝ පැවසුවේ එබැවිනි. නිතර මිය ගිය අයෙක් ගැන සිතමින් කාලය ගත කරන විට එම මිය ගිය පුද්ගලයා ප්රේත ලෝකයේ උපත ලබා සිටින්නේනම් තමන් වෙත සමීප වී ශරීරයට ඇතුල් වීමට ඉඩ තිබේ.තම සිතුවිලි රටාව මගින් සැකසෙන ශරීර රශ්මි මණ්ඩලය ප්රේතයාට හිතකර ලෙස හා ඇතුල් වීමට හැකි ලෙස පැවතිය හැකි බැවිනි.අමනුෂ්යයින් පළමුව සම්බන්ධ වන්නේ ශරීර රශ්මි මණ්ඩලය සමගය.රශ්මි මණ්ඩලය සමග සම්බන්ධ වන අමනුෂ්යයා එය ශරීරය දෙසට තල්ලු කරමින් ශරීරය ග්රහණය කරගෙන පුද්ගලයාගේ විඥානය හැසිරවීමට පියවර ගනියි. අමනුෂ්යයා රශ්මි මණ්ඩලය සමග එක්වූ තැන් පටන් පුද්ගලයාගේ ස්වභාවය වෙනස් වීමට පටන් ගනියි.
වරමක් ලැබෙන විට නොඑසේනම් අමනුෂ්යයෙක් ශරීරයට ඇතුළු වන විට ඕනෑම අයෙකුට තද හිසේ කැක්කුමක් ඇති වන බව නොරහසකි.මෙය සිදුවන්නේ මනෝකායේ මූල ධාතු කොටස් තෙරපීම හේතුවෙන් ස්නායු පද්ධතියට බලපෑම් එල්ල වීම හේතුවෙනි.අමනුෂ්යයින් ආරූඩ වූ විට බොහෝ දෙනා දැඩි අපහසුවකින් දඟලමින්, හිස වනමින් හැසිරෙන ආකාරය ඔබ දැක ඇතුවාට සැකයක් නැත.බොහෝ විට මෙය සිදුවන්නේ වරම් ලැබුණු මුල් කාලයේය.කාලයත් සමග ශරීරය ඊට හුරු වෙයි.
ප්රේතයින්ගේ නොයෙක් ශක්ති මට්ටම් ඇති බව මම කලින් සඳහන් කළෙමි. ඇතැම් වරම් හිමියන් පවසන කරුණු සත්ය වන අතර තවත් අය පවසන කරණු අතර සත්ය හා අසත්ය දෙකම පවතී.උවමනාවෙන්ම අසත්ය පවසන ප්රේතයෝ ද වෙති.ඇතැම් ප්රේතයෝ නොහැකියාව නිසා අසත්ය පවසති.ඇතැම් වරම් සුපිරි මට්ටමේ ඒවා වන අතර ඇතැම් වරම් වැඩකට නැති ඒවාය.ප්රේතයාගේ මූලිකම කාර්යය වන්නේ වරම් හිමියාට උපරිම වාසි අත්වන පරිදි කටයුතු කිරීමය.
සාස්තර ඇසීමට යන පුද්ගලයා සමග ගොස් වරම් හිමියාගේ ශරීරයට ඇතුළු වී සාස්තර කියන ප්රේතයෝද නැතුවා නොවේ.සාස්තරය තිතටම කියැවුණා යැයි කියමින් නිවසට පැමිණෙන පුද්ගලයා තමන් සමග ගිය ප්රේතයා ගැන කිසිවක් නොදනී.ප්රේත ලෝකයේ පුදුමාකාර ප්රේතයින් සිටිති.ප්රේතයින් සමග කටයුතු කිරීමද සීරු මාරුවට කළ යුත්තකි.ඇතැම් ප්රේතයෝ ක්ෂණිකව වෙනස් වන අවස්ථාද ඇත.වරම් එක්වරම අතුරුදන් වන්නේ එබැවිනි.වරම නොපැමිණෙන බව පවසමින් වරම නැවත ලබාගැනීමට ඇතැම් වරම් දරුවන් ඇදුරන් හමුවන්නේ එවැනි අවස්ථාවලදීය.
මළවුන් ගෙන්වීමද ඇතැම් වරම් හිමියන් සිදු කරන තවත් කටයුත්තකි. තම මිය ගිය ඥාතියා ගෙන්වාගෙන කතා බහ කිරීමේ බලාපොරොත්තුවෙන් වරම් හිමියන් වෙත යන්නෝ කොතෙකුත් වෙති.මළවුන් ගෙන්වීමේ කාර්යය සෑම වරම් හිමිකම සිදු නොකරන අතර එම හැකියාව ඇති වරම් හිමියන් නැතුවා නොවේ.මිය ගිය පුද්ගලයා ප්රේත භවයක උප්පත්තිය ලබා ඇත්නම් ඔහු හෝ ඇය ගෙන්වා කතා කිරීමට අවස්ථාව උදා කිරීමේ හැකියාව වරම් හිමියාට ඇත.වරම් හිමියන් සමග කටයුතු කරන ඇතැම් ප්රේතයින් මෙහිදී උපායශීලී ක්රමවේදයන් අනුගමනය කරන බවද ඔබ තේරුම් ගෙන සිටිය යුතුය.එනම් තම මිය ගිය ඥාතියා ලෙස රඟපාමින්, ඒ ආකාරයට කතා කරමින් ඔබ මුලා කිරීමය.ඇතැම් ප්රේතයින්ට විවිධාකාර හැකියාවන් ඇති බව මම මුලින් සඳහන් කළෙමි. මිය ගිය පුද්ගලයෙක් ජීවත්ව සිටියදී කතා කළ ආකාරයට ඒ හඬින්ම කතා කිරීමේ හැකියාව ඇති ප්රේතයෝ වෙති.එබැවින් තමන් හා සන්නිවේදනය කරනු ලබන්නේ තම මිය ගිය ඥාතියාම යැයි නිවැරදිව නිශ්චය කර ගැනීම පහසු නොවේ.ඇතැම් විට වරම් හිමියාගේ ඥාති ප්රේතයා විසින් ඔබ මුලා කරනවා වීමටද ඉඩ තිබේ.
වරම් හිර කිරීම, වරමට පැමිණෙන ඥාතියා ඉවත් කිරීම,හිර කරන ලද වරම් හිර කපා නැවත යථා තත්වයට පත් කිරීම වැනි කටයුතු දක්ෂ අදුරෙකුට
එතරම් අපහසු කාර්යයන් නොවේ.ඒ හා සම්බන්ධ ක්රමවේදයන් විස්තර කිරීමට බලාපොරොත්තු නොවෙමි.එවැනි කටයුතු පාඨක ජනතාවට වැදගත් නොවන බැවිනි.
ප්රේතයින් සමග කටයුතු කිරීම ඉතාමත් ප්රවේශමෙන් කළ යුතු බව මම ඉහත සඳහන් කළෙමි.ප්රේතයින් සමග දීර්ඝ කාලයක් කටයුතු කිරීම වඩාත් අවදානම්ය.තම අවසාන මොහොතේදී කයෙන් ඉවත්වන මනෝකාය ප්රේතයින්ගේ ග්රහණයට හසු වීමට ඇති ඉඩකඩ අධිකය.එවිට සිදුවන්නේ ප්රේත ලෝකය තුළ ප්රේතයෙකු වී කල්ප කාලාන්තරයක් දුක් විඳීමටය.එබැවින් ප්රේතයින් සමග කටයුතු කිරීමෙන් වැළකී සිටීම සෑම අතින්ම ගුණදායකය.
ඇතැම් වරම් දීර්ඝ කාලීන වන අතර ඇතැම් වරම් තාවකාලිකය.ඥාති ප්රේතයා අකමැති ක්රියා කලාපයක් වරම් හිමියා විසින් අනුගමනය කරන අවස්ථාවකදී ඥාති ප්රේතයා ඉවත් වීමට ඉඩ තිබේ.වරම අහිමි වූ බව ඇතැමුන් පවසන්නේ එවැනි අවස්ථාවලදී ය.ප්රේතයා එම ප්රේත භාවයෙන් මිදුණු විට ද වරම අහිමි වේ.ඇතැම් පළපුරුදු වරම් හිමියන් විසින් අනුන්ගේ ඥාති ප්රේතයින් තමන් සතු කරගෙන වරම පවත්වාගෙන යන අවස්ථාද ඇත.
යක්ෂ වරම් ප්රේත වරම්වලට වඩා බලවත්ය.යක්ෂ වරම් යනු සම්මත යක්ෂයින්ගෙන් ලැබෙන වරම් නොවේ.ප්රේත ලෝකයේම ශක්තිය, බලය, විර්යය අතින් ඉහළ මට්ටමක සිටින අයගෙන් ලැබෙන වරම්ය.කෙසේ වෙතත් යක්ෂ වරම් වඩාත් බලවත් වන්නේ යහපත් කටයුතුවලට වඩා අයහපත් කටයුතු සම්බන්ධයෙන්ය.
අධ්යාත්මික ජ්යොතිෂවේදී
සංජීව කුළුපන බණ්ඩාර
.jpg)
zx.jpg)
