මිනිස්සු අහනවා "රාහු මහ දශාවෙදි මොකද වෙන්නෙ?" කියලා. රාහු මහ දශාව මෙහෙමයි ගතවෙන්නෙ කියල ජ්‍යොතිෂවේදීන් විස්තර කරනවා.
"රාහු දශාවෙදි ඉගෙනීම කඩාකප්පල් වෙනවා කියන්නෙ ඇත්තද ?" මිනිස්සු අහනවා.
උසස් පෙළ විභාගය ඉහළින් සමත්ව විශ්ව විද්‍යාල වෙත පිවිසෙන ළමුන් අතරේ රාහු මහ දශාව ගත කරන ළමුන් කොතෙක් නම් ඉන්නවද... ඒවගෙම, පාප මිතුරු ඇසුරට, මත් ද්‍රව්‍ය භාවිතයට යොමුව ජීවිතය අඳුරු කරගන්නා අයත් ඉන්නවා. රාහු දශාව ගතවෙන්නෙ මෙන්න මෙහෙමයි කියල කාටවත් කියන්න බෑ. එක විදියෙ කේන්දර දෙකක් ලෝකෙ කොහෙවත් නෑ. ඇතැම් කේන්දර එකම විදියට පේන්න පුළුවන්. ඒක හඳුනාගැනීමේ දුෂ්කරතාවයක් මිස කේන්දර දෙකේ සමානතාවයක් නෙමෙයි.
රාහු දශාව ගත කරන ඇතැමෙක් අත ගහන සියලු දේ ඉහළින්ම සාර්ථක තත්වයට පත් කරගන්නා අතරෙ ඇතැමෙක් කිසිවක් කර කියා ගත නොහැකි තරමේ අසරණ තත්වයට පත් වෙනවා.
කෙනෙකුගේ මාපට ඇඟිලි සලකුණ ලෝකයේ මීට පෙර විසූවෙකුට හෝ හිමිව නොතිබීම මොන තරම් විශ්මයජනක කාරණයක්ද...එය අනාගතයේ උපදින කිසිවෙකුට හිමි වන්නේ ද නෑ. එය තමන්ගෙ පමණයි. කේන්දරය කියන්නෙත් එතරම් සියුම් පෞද්ගලික ගිණුමක්. එකම එක අයිතිකරුවෙක් පමණයි.
රාහු දශාව පමණක් නෙමෙයි කිසිම ග්‍රහයෙකුගෙ දශාවක් දෙන්නෙකුට එක සමාන වෙන්නෙ නෑ. ඒත් පොත්වල තියෙනවා. ඒ ඒ මහ දශාව තුළ, ඒ තුළ ලබන අතුරු දශා තුළ ලැබෙන්නෙ මෙන්න මේ ප්‍රතිඵල කියල. පොතට එහා නොගිය මිනිස්සු, ඉන් එහා අවබෝධයක් නැති අය කෙනෙකුගෙ මහ දශාවට, අතුරු දශාවට පොතේ සඳහන් ඵලාඵල කියනවා.
දැනුම,ප්‍රඥාව පොත්වලින්ම ගත යුතු බව බොහෝ දෙනෙක් විශ්වාස කරනවා. තමන්ට ලැබුණු, තමන් පරිශීලනය කරන පොත් ගැන නිතර කතා කරන අය, පොත් සහ ඒවායේ අන්තර්ගතය නිතර ප්‍රදර්ශනය කරන අය ප්‍රඥාවෙන් ඉහළ තත්වයෙහි තබා සළකන අයත් ඉන්නවා. ජ්‍යොතිෂ සමූහ තුළ පමණක් නෙමෙයි කීප දෙනෙක් එකතු වෙලා පවත්වාගෙන යන චැට් ගෲප් ඇතුළෙත් පොතේ ගුරුන්නාන්සේලාට ඉහළ තැනක් හිමි වෙනවා.
ප්‍රඥාව වඩවා ගත හැකි විධි තුනක් තියෙනවා.
1.චින්තාමය ප්‍රඥාව
2 සුතමය ප්‍රඥාව
3 භාවනාමය ප්‍රඥාව
.
✱ අනුන්ගේ උපදෙස් නොලබා තමන් විසින්ම කල්පනා කොට ඇති කරගන්නා දැනීම චින්තාමය ප්‍රඥාව යි.
✱ අනුන්ගෙන් අසා, අනුන්ගේ උපදෙස් අනුව ඇති කරගන්නා දැනීම සුතමය ප්‍රඥාව යි.
✱ භාවනාවෙන් ඇති කරගන්නා දැනීම භාවනාමය ප්‍රඥාව යි.
ඒ අනුව, පොතපත කියවා ලබාගන්නා දැනුම එකක් පමණයි. විශේෂයෙන්ම ආධ්‍යාත්මික විෂය ක්ෂේත්‍ර තුළ තමන් විසින්ම අවබෝධ කර ගත යුතු ප්‍රමාණය බොහොමයි. ඒ සඳහා කැප වීමෙන් යුතුව සිදු කරන නිසි ගවේෂණය මහත් සේ වැදගත් වෙනවා. එසේ නොවුණ හොත් අනුන්ගේ දේ පමණක් ගෙන එයම කියවන "ගිරවෙක්" බවට පත් වෙනවා.
සංජීව කුලුපන බණ්ඩාර
