කිසිම ග්‍රහලෝකයක් හුදකලාවෙ නෑ. විශ්වයේ සියල්ල එකට සම්බන්ධයි. යම් සිදුවීමක් කෙරෙහි වන බලපෑම ඉරු ප්‍රමුඛ සියලු ග්‍රහ වස්තූන්ගේ සුසංයෝගයෙන් සිදුවන්නක් වූවත්, ලෝක සංග්‍රාමයන් සමඟ යුරේනස්ගේ සබැඳියාව ගැන කතා කිරීම ලිපියේ අරමුණ වෙනවා.
1914 ජූලි 28 පළමු ලෝක යුද්ධය ආරම්භ වන විට යුරේනස් සෙනසුරු හිමි මකර රාශියේ ගුරු සමඟ රැඳී සිටියා. සෙනසුරු ප්ලූටෝ සහ බුධ සමඟ මිථුන රාශියේ රැඳී සිටියා. ග්‍රහ මණ්ඩලයේ ප්‍රධානියා රවි ගමන් කළේ යුරේනස්ට සප්තමව කටක රාශියේ. රුධිර කාරක කුජ රවිට අයත් සිංහ රාශියේ. ඒ කේතු සහ සිකුරු සමඟ.
මකර රාශිය රාශි චක්‍රයේ දස වෙනි රාශියයි. විශ්ව කේන්දරයේ ක්‍රියාත්මක ස්ථානයයි. මකරයේ හිමිකරුවා සෙනසුරා යි. සෙනසුරුට අයත් මකර රාශියේ යුරේනස් ගමන් කරන කාල සීමාවන් අනතුරුදායකයි, බිහිසුණුයි. 1827 ඔක්තෝබරයේ රුසියානු,ප්‍රංශ,ඉංග්‍රීසි හමුදා තුර්කිය සමඟ යුධ වදින අවස්ථාවේදී ද යුරේනස් මකර රාශියේ රැඳී සිටියා. තවත් අතීතයට ගියොත් යුරේනස් මකරයේ රැඳී සිටි සෑම අවස්ථාවකදීම ලෝකයේ මහා යුධ ගැටුම් ඇති වුණු බවට පැහැදිලි සාක්ෂි හමුවෙනවා.යුරෝපයේ ගමන් මඟ වෙනස් කළ මහා සංග්‍රාමය 1746 දී බ්‍රිතාන්‍ය භූමිය තුළ සිදුවන අවස්ථාවේදී ද යුරේනස් මකර රාශියේ රැඳී සිටියා.
1939 සැප්තැම්බරයේ, දෙවන ලෝක සංග්‍රාමය සිදුවන අවස්ථාවේදී සෙනසුරු හා කේතු සමඟ යුරේනස් කුජ හිමි මේෂ රාශියේ රැඳී සිටියා. කුජ තම උච්ච භවනය වූ මකරයේ රැඳී සිටියදී ප්ලූටෝ රැඳී සිටියේ කුජට සප්තමව කටක රාශියේ යි. යුද්ධයේදී ජර්මන් නාසි හමුදාව රුසියාව ආක්‍රමණය කළා. නාසි හමුදාවෙන් මව්බිම බේරාගැනීමේ රුසියානු ජයග්‍රාහී මෙහෙයුම නම් කළේ "ඔපරේෂන් යුරේනස්" නමින්.
යුරේනස් මකර රාශියේ ගමන් කරන කාල පරිච්ඡේදයන් මෙන්ම යුරේනස් මේෂ රාශියේ ගමන් කරන කාල පරිච්ඡේදයන් ද සුබදායක නෑ.
2016.06.26 දින යුරේනස් මේෂ රාශියට ගමන් කළා. මේ වන විට මේෂ රාශියේ රැඳී සිටින යුරේනස් 2025.03.18 දින වෘෂභ රාශියට ගමන් කරනවා. 2022.02.24 දින රුසියාව යුක්රේනය ආක්‍රමණය කිරීමත් සමඟ ඇරඹි යුද්ධය තවමත් ඉදිරියට ඇදෙමින් පවතිනවා.
තෙවන ලෝක යුද්ධය මේ වන විට ආරම්භ වී අළු යට ගිනි මෙන් තිබෙනවා විය හැකිද ? එසේත් නැතිනම් 2025.03.19 තෙක් කාලය තුළ කිනම් මොහොතක හෝ සංග්‍රාමය ආරම්භ වෙයිද ? මොනම ආකාරයක හෝ යුද්ධයක් මේ මිහිපිට ඇති නොවේවායි ප්‍රාර්ථනා කරමු. එසේ වූවත් ලෝක නායකයින් (උමතු දේශපාලඥයින්) නොයෙක් ආකාරයේ විනාශකාරී අවි ආයුධ නිපදවමින් ගොඩ ගසාගන්නේ කුමන අරමුණකින්ද ? ඒ වෙනත් ග්‍රහලෝක සමඟ යුධවැදීමට නොවෙයි.
සංජීව කුළුපන බණ්ඩාර
