කේතු කියන්නෙ මම කැමතිම ග්‍රහයෙක්. කේතු තරම් මට වාසි අත් කරලා දුන්නු වෙනත් ගරහ්යෙක් නෑ. මේ කියන්නෙ මගේ කේන්දරයේ ඉන්න කේතු මට උදා කරපු වාසි ගැන නෙමෙයි. අනුන්ගෙ කේන්දරවල ඉන්න කේතු මට සෑහෙන්න උදව් කරලා තියෙනවා. මට ඒ අය ගැන වගේම ඒ අය ජීවත් වන තැන් ගැනත් බොහෝ දේවල් හෙළිදරව් කරලා දීල තියෙනවා. විශේෂයෙන්ම තත්කාල සාස්තරයෙදි සෑහෙන්න උදව් කරනවා. ජ්‍යොතිෂය සම්බන්ධයෙන් ලියන එක හොඳටම අඩු වෙලා තිබුණත් කේතු ගැන නොලියා ඉන්න බැරි වුණේ ඒකයි. බොහෝ තැන්වල කේතු ගැන ලියැවෙන විස්තර දැක්කත් මට හමුවන කේතු ඊට වඩා වෙනස් කියල මට හිතෙනවා.
කේතු ගුප්තයි. රහස්‍යයි. ඒක ඕනැම කෙනෙක් දන්නවා. සමහර දේවල් පුදුම විදියට හංගන ග්‍රහයෙක්. ඒ හින්දම කේතු හරියට හඳුනා ගැනීම ඉතාමත් වාසිදායකයි. කේතු ලිංගිකත්වය ප්‍රතික්ෂේප කරන ග්‍රහයෙක් බව සමහරු සඳහන් කරනවා. පොත් පත්වලත් ඇති එහෙම. මම දන්න කේතු එහෙම කෙනෙක් නෙමෙයි. ' නෑ නෑ එහෙම ග්‍රහයෙක් තමයි...සෘෂි තුමන්ලා කියල තියෙන්නෙත් එහෙම තමයි...' කියලා සමහරු කියයි. මට වැදගත් වෙන්නෙ මම දන්න කේතු මිසක් වෙන අය දන්න කේතු නෙමෙයි.
කේතු කෙනෙක්ව ලෞකික මාර්ගයේ ගෙනියන කොට අනිත් අයට හිතාගන්න බෑ කොහොම සල්ලි හම්බකරනවද කියල. අනිත් අයට නොදැනෙන විදියට නොපෙනෙන විදියට සල්ලි හොයන මාර්ග හදල දෙනවා. අල්ලපු ගෙදර මනුස්සයා දන්නෙ නෑ මෙහා ගෙදර ඉන්න මනුස්සයා මොනවා කරල සල්ලි හම්බකරනවද කියල. කේතුගෙන් බොහෝ දෙනෙක් දියුණුවට පත්වෙන එක හේතුවක් තමයි තමන්ගෙ අරමුණු බලාපොරොත්තු අනිත් අයට හෙළි නොකිරීම. ' මම කරන්න හිතාගෙන ඉන්නෙ මේකයි...මගේ ටාගට් එක මේකයි...' ඒවා නෑ. හැම දෙයක්ම හංගගෙන ඉන්න පුළුවන්.
කේතු ලිංගිකත්වය ප්‍රතික්ෂේප කරනවා කියන කතාව මම විශ්වාස කරන්නෙ නෑ. එතැනදි වෙන්නෙ ලිංගික ජීවිතය, ලිංගික ආශාවන් අමුතු වෙන එක මිසක් ලිංගික ජීවිතයෙන් වෙන් වීම නෙමෙයි. දැනට විවාහ තුනකින් අයින් වෙලා ඉන්න ජනප්‍රිය කලාකාරියක් ඉන්නවා. කේතු හතේ.එයාව ළඟින්ම ආස්සරේ කරන කෙනෙක් එක්ක ඔය ගැන කතා කරන කොට එයා කියනවා ' එයාගෙ රුචිකත්වයට ගැළපෙන කෙනෙක් ලැබුණෙ නැති එකනෙ වුණේ...' කියල. ඒ රුචිකත්වය මොකක්ද කියල මෙහෙම සඳහන් කරන්න බෑ. කොහොම වුණත් කේතු ලිංගික ජීවිතය ඉවතලන ග්‍රහයෙක් විදියට සළකන්න බෑ. එහෙම සිද්දවෙන වෙන හේතු තියෙන්න පුළුවන්. පොදුවේ "කේතු" ගැන කතා කරන කොට කේතු එහෙම කෙනෙක් කියල කියන්න බෑ.
කේතු උපායශීලීයි. අපි දන්නවනෙ බුධත් උපායශීලීයි කියල. කේතුගෙ උපායශීලී ගතිය බුධගෙ උපායශීලී ගතිය වගේ නෙමෙයි. කොහොමත් සමාන වෙන්න බෑ නෙ. ඔය වෙනස කොහොමද තේරුම්ගන්නෙ ? ඕක මුළුමනින්ම තේරුම් කරන්න බෑ. බුධගෙ උපායන් නිර්මාණශීලියි, තාත්විකයි. තැනට උචිත විදියට, පුද්ගලයාට උචිත විදියට නිර්මාණශීලී විදියට උපාය භාවිතා කරනවා. ඒ හින්දා උපායශීලී හැසිරීම සාර්ථක වෙනවා. කේතුගෙ උපාය තුළ එහෙම නිර්මාණශීලී ගතියක් නෑ. ජ්‍යොතිෂවේදියා නිර්මාණශීලී වෙන තරමට මෙන්න මේ වගේ වෙනස්කම් බොහොම හොඳට අවබෝධ කරගන්න පුළුවන් වෙනවා. කියාදෙන්න බැරි දේවල් ඕනැ තරම් තියෙනවා. ඒවා දැනෙන්නම ඕනැ දේවල්. කොහෙන්වත් ගන්න බෑ. ඒවා පිටතින් නෙමෙයි ඇතුළතින් එන දේවල්. ඉඳිකටුවකින් ඇන්නත්, ඉරටු කෑල්ලකින් ඇන්නත්, මිටියෙන් ගැහුවත් කියන්නෙ රිදෙනවා කියල වුණාට ඔය වේදනාවන්වල වෙනස්කම් විස්තර කරන්න භාෂාව ප්‍රමාණවත් නෑ. ඒත් වේදනාව දැනෙන්නෙ වෙනස් විදියට. ග්‍රහයන්ගෙ වුණත් තමන්ට දැනෙන විලාශයන් තියෙනවා.
බොහොමයක් අමනුෂ්‍ය බලපෑම් එක්ක කේතු සමබන්ධ වෙනවා. ගුප්ත ලෝකයනෙ. ගුප්ත ග්‍රහයා ගුප්ත ලෝකය එක්ක සම්බන්ධයි. ඒ පැත්ත කේතු නියමෙට පෙන්නනවා. තව තව අය එක්ක හවුල් වෙලා එහෙම ඒ වැඩේ හරියට හොයාගන්න පාර හදල දෙනවා.
කේතු හදන ලෙඩ ලේසියෙන් නිශ්චය කරගන්න බෑ. තියෙන ලෙඩේට නෙමෙයි බෙහෙත් කරන්නෙ. වෛද්‍යවරුත් හොල්මන් වෙනවා. පරීක්ෂණ කරනවා කෙළවරක් නෑ. කේතුගෙ කාලවලදි ඒ වගේ ප්‍රශ්න බහුලයිනෙ. ඒ වගේ වෙලාවට හඳහන ගොඩක් වටිනවා. බඩේ තියෙන ප්‍රශ්නෙ හොයාගන්න බැරුව වෙන වෙන තැන්වල ලෙඩ හොයන කොට ජ්‍යොතිෂවේදියාට පුළුවන් අඩුම තරමේ ඉඟියක් හරි දෙන්න මෙන්න මෙතැනයි ලෙඩේ තියෙන්නෙ කියල. ඒකත් වටිනවනෙ වෙලාවෙ හැටියට.
කේතු මෝක්‍ෂකාරකයි කියනවා. අන්න හොඳ කතාවක්. මෝක්ෂය කියන්නෙ හින්දු දහමට අනුව නැවත ඉපදීමක් නෑ කියන එකනෙ. අපිට අනුව නම් නිවනනෙ. කේතුගෙ කාලවලදි සමහරු තනි වෙනවා නේද... අනිත් අයට වැඩිය මුහුණ දෙන්නෙ, කතා බහ කරන්නෙ නැතුව තමන්ගෙ පාඩුවෙ ඉන්න බලනවනෙ. සමහරු කාමරයට වෙලා ඉන්නවා. ඇයි තනි වෙන්නෙ? තනි වුණාම තමයි තමන්ට තමන් හමුවෙන්නෙ. ගොඩක් දෙනෙක් තනි වෙන්න බය වෙන්නෙ තනි වුණාම තමන්ට තමන් මුණ ගැහෙන හින්දනෙ. කේතු තනිකම දෙනව. විවෘත ස්වභාවය අඩු කරනවා. කේතුගෙ කාලවලදි සමහරු තනියම ඉන්න හදනව වගේම තදින් කෝපයට පත්වෙනවා. ඇයි කෝප වෙන්නෙ ? තමන් තමන් තුළට එබිලා බලන කොට මොන වගේ කෙනෙක්ද දකින්නෙ? ශාන්තුවරයෙක්ද ? නෑ. ගොඩක් දෙනෙක් තමන් තුළ ඉන්න තමන් දිහා බලන්න කැමති නැත්තෙ හොඳ කෙනෙක් දකින්න නොලැබෙන හින්දයි. තමන් දිහා බැලුවම දකින ඇත්ත මනුස්සයාට බය වෙනවා.කලකිරෙනවා. දුක හිතෙනවා. ඒ තරම් යක්ෂයොනෙ ගොඩක් දෙනෙක්ගෙ ඇතුළෙ ඉන්නෙ. කේතු අවස්ථාව උද කරලා දෙනවා තමන්ව මුණගැහෙන්න. තමන්ට තමන්ව හමු නොවී කොහොමද මොක්ෂයක් දකින්නෙ... මෙහෙම වුණා කියලම කේතු මෝක්ෂය කරා අරගෙන යන්නෙ නෑ. ඒ කාලෙ මෝක්ෂය ගැන හිතන අය වැඩි වුණාට අද කාලෙ ලෞකික පැත්ත ගැන හිතන අය වැඩියි. ඔය අතරෙ දෙපැත්ත සමබර කරගෙන යන්න හදන අයත් ඉන්නවා. මේ ලක්ෂණ දීර්ඝ කාලීන නොවෙන්න පුළුවන්. තව ග්‍රහයො අට දෙනෙක් වෙනස් වෙවී බලපෑම් කරනවා. අන්තර් දශා වෙනස් වෙනවා. ඒත් මේ ගති ලක්ෂණ දැනගෙන ඉන්න එක වටිනවා.
මම දකින කේතු ඔන්න ඔය වගේ කෙනෙක්.
සංජීව කුළුපන බණ්ඩාර
