රාහු කේතු ගේ ගමන මේෂ තුලා ලග්න හිමියන්ට බලපාන හැටි.

 

මේෂ තුලා රාශිවලට රාහු කේතු මාරු වෙලා කාලයක් වෙනවා. ඒක වුණේ මේ අවුරුද්දෙ අප්‍රේල් මාසෙ 12 වෙනිදා. රාහු කේතු මාරුව මේෂ තුලා ලග්න හිමියන්ට කොහොමද කියන එක ගැන කතා කරන්න හදන්නෙ දැන්. මේ වෙනකල් කාලයෙදි මේෂ තුලා ලග්න හිමියො අත්විඳපු දේවල්, මුහුණ දුන් දේවල් එක්ක 2023.10.30 වෙනකල් ඉදිරි කාලය කොහොම වෙයිද ? කොහොම ඉන්න ඕනැද ?  කියන එක ටිකක් කතා කරන්න හිතුණා. 2023.10.30 කියන්නෙ රාහු කේතු මේෂ තුලා ලග්නවලින් ඉවත් වෙලා යන දවස. අන්න ඒ හින්දයි ඒ වෙනකල් කාලය ගැන කතා කරන්නෙ.

දැන් මේ කාලෙ මේෂ ලග්න හිමියො "රාහු" ඔළුවෙ තියාගෙන ඉන්නවා. තුලා ලග්න හිමියො "කේතු" ඔළුවෙ තියාගෙන ඉන්නවා. 2023.10.30 වෙනකල් ඔය දෙගොල්ලො රාහු කේතු ඔළුවෙ තියාගෙන ජීවන අභියෝගවලට මුහුණ දෙනවා.  මේ වෙන කොටත් මාස 5 ක් ඔය විදියට ගෙවාගෙන ආවා.  ගෙවුණු කාලයට වඩා ගෙවන්න තියෙන කාලය වැඩියි.   2023.10.30 තෙක් ගත කරන්න තියෙන කාලය තුළ මේෂ තුලා ලග්න දෙකට මේ ග්‍රහයො දෙන්නගෙන් එල්ල වෙන බලපෑම් මොනවද...මේ කාලය තුළ ඉන්න ඕනැ කොහොමද...කියන කාරණා ගැන යමක් කියන්න ඕනැ.

❋❋❋❋❋❋❋❋❋❋❋❋❋❋❋

මේෂ ලග්න හිමියො.

මේෂ ලග්න හිමියන්ගෙ ලග්න ස්ථානයේ රාහු ගමන් කරනවා 2023.10.30 වෙනකල්. රාහු කියන්නෙ දුන්නෙන් ගිලිහුණු ඊතලයක් වගේ වේගවත් ග්‍රහයෙක්නෙ. නම්‍යශීලී ගතියක් නෑ. කඩාගෙන බිඳගෙන යනවා. එහෙම ග්‍රහයෙක් ඔළුවේ ඉන්නව කියන්නෙ නම්‍යශීලී ගතිය නැති වෙනවා. මේෂ ලග්න හිමියන්ට කොහොමත් නම්‍යශීලී ගතියක් නෑනෙ...කියල ලග්නෙ ගැන දන්න කෙනෙක් කියන්න පුළුවන්. ඒක තමයි වැදගත්ම කාරණය. නම්‍යශීලී නැති මේෂ ලග්න හිමියො නම්‍යශීලී නැති රාහු ඔළුවෙ තියාගෙන ඉන්න කොට කොහොමද... කිසිම ඉවසීමක් නැතුව යනවා. පුදුම හදිස්සියක් ඇති වෙනවා. ඔළුව නිස්කලංක නැතුව යනවා. ඉක්මනට කෝප වෙනවා. ප්‍රචණ්ඩ වෙනවා. එතකොට ඉතින් ප්‍රශ්නනෙ. අඟහරුගෙ, රාහුගෙ දශාවකුත් ගත වෙනව නම් ඔය වේගය, කෝපය, හදිස්සිය තවත් වැඩි වෙනවා. පොඩි දේවල් ලොකු කරගෙන දඟලනවා. මේක බොහොම ඉවසීමෙන් වැඩ කරන්න ඕනැ කාලයක්. හරි දේවල් වැරදියට පේන්න පුළුවන්. වැරදි දේවල් හරි වගේ පේන්න පුළුවන්. සන්සුන්ව, නිරවුල්ව බැලුවොත් තමයි ඇති සැටියෙන් පේන්නෙ.

රාහු ඔළුවෙ කියන්නෙ කේතු හතේ කියන එකයි. හත කියන්නෙ විවාහය. ඉතින්, විවාහක මේෂ ලග්න හිමියො ගෙදර සාමය කඩ නොවන විදියට බොහොම සාමකාමීව ඉන්න ඕනැ. යුග ජීවිතයෙ හැලහැප්පීම් සිද්ද වෙන්න පුළුවන්. නොරුස්සන ගති ඇති වෙන්න පුළුවන් කාලයක්.

වැඩ කරන තැනදි එහෙම අනිත් අය එක්ක නොහොඳ නෝක්කාඩුකම් ඇති වෙන්න පුළුවන්. වචනයක් අල්ලගෙන දුර දිග ගෙනියන්නෙ නැතුව මොනවත් වැඩිය ගාණකට නොගෙන හිනා වෙලා ඉන්න එක හැම අතින්ම හොඳයි. ඉක්මන් තීරණවලින් කොහොමත් වැළකිලා ඉන්න ඕනැ. මොනවත් වැඩි ගාණකට නොගෙන ඉන්න එක හතුරො ඇති කරගන්නවට වඩා හොඳයි.

සෙම් අසනීප වගේම වරින් වර හිස කැක්කුම් ඇති වෙන්නත් පුළුවන්. ලේ විෂ වීම්, සමේ ඇති වෙන ආසාදන වගේ දේවල්වලටත් ඉඩ තියෙනවා.

❋❋❋❋❋❋❋❋❋❋❋❋❋❋❋

තුලා ලග්න හිමියො. 

තුලා ලග්න හිමියො 2023.10.30 වෙනකල් කේතු හිස මත තියාගෙන කාලය ගෙවනවා. තුලා ලග්න කාරයො එච්චර කලබල කාරයො නෙමෙයි. කේතු කියන්නෙත් කලබල ග්‍රහයෙක් නෙමෙයි. ඒත් මේ යන විදියට ප්‍රශ්න ටිකක් මතු වෙනවා. හිතට එච්චර හරි නෑ. කිසි දේකින් හිත පිරෙන්නෙ නැති ගතියක් හිටිනවා. හේතුවක් නැතුව සමහරු ඈත් වෙනව වගේ දැනෙන්න පුළුවන්. කරදර තියෙනව වගේ දැනෙන්න පුළුවන් කාලයක්. කොටින්ම කියනවා නම්, නැති කරදර මවාගන්න කාලයක්. අනිත් අයට තමන්ව රුස්සන්නෙ නෑ වගේ දැනෙනවා. උද්යෝගිමත් ගතිය අඩු වෙනවා. අභූත චෝදනා එල්ල වෙන්නත් බැරි කමක් නෑ. මුහුණෙ සෝබාව දීප්තිය අඩු වෙන්නත් පුළුවන්. කල්පනාවට බර වෙනවා. නිතර විඩාබර ගති දැනෙනවා. වැඩිය මහන්සි නොවී ඔහේ ඉන්න හිතෙනවා. මානසික ප්‍රබෝධය අඩු වෙනවා. මොන තරම් කැපවීමෙන් වැඩ කළත් හිතට හරියන ඇගයීමක් නොලැබෙන්න පුළුවන්. බැබලීම,ප්‍රසාදය අඩු වෙනවා. හොඳ කරන්න ගිහින් නරක නාම අහගන්න සිද්ද වෙන්න පුළුවන්.

තමන්ට අයිති වටිනා බඩු භාණ්ඩ නාස්ති වෙන්න පුළුවන්. මිල මුදල් අස්ථාන ගතවෙන්න, සොර සතුරො අතට පත් වෙන්න පුළුවන්. හැම දෙයක්ම හොඳට පරිස්සම් කරලා තියාගන්න ඕනැ. 

කේතු ඔළුවෙ කියන්නෙ රාහු හතේ කියන එකනෙ. යුග ජීවිතයේ සතුට,සැනසුම, සාමය අඩු වෙන්න පුළුවන් කාලයක්. සහකරු හෝ සහකාරිය නිතර තමන්ව නොරුස්සන තත්වයක් ඇති වෙන්න පුළුවන්. යුග දිවිය තුළ හැකි තාක් ඉවසීමෙන් කටයුතු කරන එක තමයි කරන්න තියෙන්නෙ. හැම දෙයක්ම ලොකුවට ඔළුවට අරගෙන හරියන්නෙ නෑ. කළකිරීම් ඇති කරගන්න හොඳ නෑ. හිත ලෙඩ වුණාම කය ලෙඩ වෙනවා.

සම ආශ්‍රිත අසනීප, මුත්‍රා ආබාධ, උෂ්ණ අසනීප ආදිය මතු වෙන්න පුළුවන්. සුළු වැටීම්, අනතුරුවලට එහෙමත් ඉඩ තියෙන හින්දා පරිස්සමෙන් වැඩ කටයුතු කරන එක හොඳයි. විශේෂයෙන් හිස, මුහුණ ආශ්‍රිතව තුවාල සිදු වෙන්න පුළුවන්.

❋❋❋❋❋❋❋❋❋❋❋❋❋❋❋

දැන් ඉතින් හිතන්න එපා සියලු මේෂ ලග්න හිමියන්ට , සියලු තුලා ලග්න හිමියන්ට අඩුවක් නෑර ඔය ටික ඔය විදියටම වෙනවාය කියල. සමහරුන්ට ඕවා වැඩි වෙන්නත් පුළුවන්, අඩු වෙන්නත් පුළුවන්, නැති වෙන්නත් පුළුවන්. 

සංජීව කුළුපන බණ්ඩාර.