කුජ කියන්නෙ මොන වගේ ග්‍රහයෙක්ද කියලා ජ්‍යොතිෂය ගැන උනන්දු වෙන හැමෝම දන්නවා. කුජ 2020.08.16 වෙනිදා මේෂ රාශියට ගියා. සැප්තැම්බර් 10 වෙනිදා ඉඳලා වක්‍ර වෙන්න පටන් ගත්තා. නොවැම්බර් 14 වෙනිදා වෙනකල් කුජ වක්‍ර ගමනෙ යෙදෙනවා.
කුජ වක්‍ර වීමෙන් අනතුරු බහුල වෙනවා. දැනටමත් දිනපතා මාරක අනතුරු ගැන අහන්න ලැබෙනවා. අනතුරු විතරක් නෙමෙයි, වලි ගෝරි එහෙමත් සෑහෙන්න වැඩි වෙනවා. ඉවසීම අඩු වෙනවා. පොඩි දේකටත් විශාල රණ්ඩු කෝලාහල ඇති වෙනවා. සිය දිවි නසාගැනීම් ගැනත් නිතර අහන්න ලැබෙයි. කුජ ගෙ මහ දශා, අන්තර් දශා ගත කරන අය වඩාත් ඉවසිලිමත්ව කටයුතු කරන එක හොඳයි. පොදුවේ හැමෝම සන්සුන්ව, ඉවසිලිමත්ව වගේම නිසි කල්පනාවෙන් යුතුව කටයුතු කිරීම වැදගත් වෙනවා.
කුජ මේෂ රාශියේ වක්‍ර වන කාලය තුළ එනම්, ඔක්තෝබර් 4 වෙනිදා තෙක් වඩාත් කල්පනාකාරී විය යුතුයි. වාහන පැදවීමේදී, පාර මාරු වීමේදී, මහගඟ පයින් ගමන් කිරීමේදී, අවදානම් සහිත කටයුතු වලදී, ක්‍රීඩා කටයුතුවලදී වගේම අන්‍යයන් සමඟ එක්ව කරන කටයුතුවලදී ද නිවැරදි කල්පනාව නිරවුල් මානසිකත්වය පවත්වාගැනීම වැදගත් වෙනවා.
කුජ මහ දශා, අන්තර් දශා ගෙවමින් සිටින අය වගේම මේෂ, කන්‍යා, තුලා,ධනු, මකර,මීන ලග්න හිමියන් ද ඉවසිලිමත්ව කටයුතු කළ යුතුයි. ගෘහ ජීවිතයේදී සුළු ප්‍රශ්න දුර දිග නොයවා ගොඩින් බේරාගැනීමට ද වග බලා ගත යුතුයි. අන්‍යයන් සමඟ කතා බහ කිරීමේදී ඉවසිලිමත් විය යුතුයි.
කුජ වක්‍ර වන කාලය තුළ උද්ඝෝෂණ, වැඩ වර්ජන, මහජන කැළඹීම් ද සිදු වෙනවා.
දැනට වක්‍ර ගමනේ යෙදෙන කුජ ඔක්තෝබර් 4 වෙනිදා මීන රාශියට ගමන් කර, නොවැම්බර් 14 වෙනිදා පටන් නිවෘතව, දෙසැම්බර් 24 වෙනිදා නැවත මේෂ රාශියට ගමන් කරනවා. කුජ මේෂ රාශියෙන් සමු ගන්නේ 2021. පෙබරවාරි 22 වෙනිදා යි.
කුජ මේෂ රාශියේ ගත කරන කාල සීමාවන් තුළ මිථුන ලග්න හිමියන්ට විශේෂ ධන ලාභ හිමි වෙනවා.
ජ්‍යොතිෂවේදී සංජීව කුළුපන බණ්ඩාර
