ප්ලූටෝ මකර රාශියට ගමන් කළේ මේ වසරේ පෙබරවාරි 28 වෙනිදා ය. ඒ වසර 250 කට පසුව ය. මීට පෙර ප්ලූටෝ මකර රාශියට ගමන් කළේ 1770 දී ය. මෙවර මකර රාශියට ගිය ප්ලූටෝ ශනි සමඟ සංයෝග විය. මේ වන විට ප්ලූටෝ හා ශනිට අමතරව කුජ සහ ගුරු ද මකර රාශියේ ය. මේ සිව් ග්‍රහ සංයෝගය ඉතාමත් සුවිශේෂ ය.
සියල්ලට මත්තෙන් මේ ප්ලූටෝ කවුදැයි සොයා බැලිය යුතුය. මොකද ප්ලූටෝ ගැන එතරම් විස්තරයක් අපේ අය නොදන්නා නිසාය. අපේ ජ්‍යොතිෂය තුළ ද ප්ලූටෝට එතරම් තැනක් නැත. මේ සිදුවන සිදුවීම් අනුව ප්ලූටෝ යනු තව දුරටත් ගණන් නොගෙන සිටිය යුතු ග්‍රහයෙක් නොවේ. ඒ, මකර රාශියට ගොස් ශනි සමඟ එකතු වීමට මාස දෙක තුනකට පෙර සිටම ප්ලූටෝ ගේ බලපෑම ලෝකයට දැනෙන්නට වූ නිසාය. අපේ ජ්‍යොතිෂවේදීන් සිදු කළ වරද නම් හැම දාම සෙනසුරු ගැන විපරම් කළා මිස ප්ලූටෝ ගැන කිසිදු තැකීමක් නොකිරීම ය. ප්ලූටෝ ශනි සමඟ එක්වීමෙන් නව යුගයක් ආරම්භ වන බවට බටහිර ජ්‍යොතිෂවේදීන් අනාවැකි පල කළේ පසු ගිය වසරේය. ඒ ඔවුන් ප්ලූටෝ මහ ඉහළින් ගණන් ගන්නා නිසාය.
බටහිර ජ්‍යොතිෂයේ ප්ලූටෝ හැඳින්වෙන්නේ පාතාලයේ දෙවියා ලෙසය. පෙරදිග ජ්‍යොතිෂය තුළ හඳුන්වන්නේ 'යම' ලෙසය. කොහොම හැඳින්වූවද මේ කියන්නේ ප්ලූටෝ අපායේ පාලකයා කියාය. යම රජ්ජුරුවන්ගේ කාරිය අපාගත වන පව් කාරයින්ට දඬුවම් පැමිණවීමය. එහෙව් කෙනෙකුට ප්ලූටෝ සම කළේ නිකම් වෙන්නට විදියක් නැත. 'යම' මකර රාශියට ගොස් එකතු වුණෙත් නොම්බර එකේ ග්‍රහයා සමඟය. සෙනසුරුට කියන්නෙත් යුක්තිය පසිඳලන ග්‍රහයා කියාය. දුකට අධිපතියා ද කියයි. දෙන්නා ජාඩියට මූඩිය වගේය.
ප්ලූටෝ යනු පරිවර්තනයේ ප්‍රධානියා ලෙස සැළකේ. අවසන් කිරීම හා නැවත ආරම්භ කිරීම නියෝජනය කරන ග්‍රහයා ලෙසද හඳුන්වයි. අලුත් දේ සඳහා ඉඩක් ලබා දීම වෙනුවෙන් පැරණි දේ බිඳ දැමීමේ වගකීම ප්ලූටෝ සතු බව පැවසේ. ඇතැම් තැනක ප්ලූටෝ හඳුන්වා දී ඇත්තේ 'නින්ජා ග්‍රහයා' ලෙසය. ඒ, ප්ලූටෝ හදිසියේ ක්‍රියාත්මක වන නිසාය. ක්‍රියාකාරිත්වය දිගු කල් පවත්වා ගැනීමද ප්ලූටෝගේ සිරිත ය. ප්ලූටෝ ද සෙනසුරු මෙන්ම බිය උපදවන ග්‍රහයෙකි. නව ආරම්භයක් ඇති කිරීම වගේම ඒ ආරම්භයට පෙර පරණ සහ නොගැළපෙන දේවල් විනාශ කර දැමීම ද ප්ලූටෝ ගේ ක්‍රමවේදයයි. ප්ලූටෝ පවසන්නේ 'පරණ දේවල් සමඟ පිටවන්න,අලුත් දේවල් සමඟ ඇතුල් වන්න'කියාය. විනාශය,මරණය, වෛරස්, විෂබීජ,නව සොයාගැනීම්,පිපිරවීම්,අද්භූත දේවල්, න්‍යෂ්ටික අවි, කල් ඇදෙන විශාල යුද්ධ, පරිවර්තන ආදිය සම්බන්ධයෙන් ප්ලූටෝ බලපවත්වයි.
ප්ලූටෝ සෙනසුරු සමඟ කල් ගෙවන 2023 ජනවාරි 17 තෙක් කාලය ලෝකයට ඉතාමත් සුවිශේෂය. අඛණ්ඩව නොවුණද මෙම කාලය තුළ වරින් වර ශනි සමඟ එක්වන ප්ලූටෝ ලෝකය තුළ විශාල පරිවර්තනයක් කරනවා නියතය. එහිදී සිදුවන විනාශයන්ට මුහුණ දීමට අපට සිදුවනු ඇත. 2020.02.28 - 2020.09.10 අතර කාලය, 2021.01.04 - 2022.04.29 අතර කාලය, 2022.07.13 - 2023.01.17 අතර කාලය සුවිශේෂය.
ලෝකායන ජ්‍යොතිෂයේදී අතිශයින්ම වැදගත් වන යුරේනස්,නෙප්චූන්,ප්ලූටෝ යන ග්‍රහයින් ගැන නිවැරදිව හැදෑරීම,තොරතුරු ගවේෂණය කිරීම මෙන්ම ඒ පිළිබඳ දැනුම හා අත්දැකීම් බෙදා හදාගැනීම ජ්‍යොතිෂවේදීන් සතු යුතුකමකි.
සංජීව කුළුපන බණ්ඩාර
ඉටු දෙවියෝ පිලිබඳව කෙරෙන කතාබහ, සකච්ඡා නොයෙක් විට දකින්නට ලැබේ. බොහෝ ජ්‍යොතිෂවේදීන් මේ සම්බන්ධයෙන් විශේෂඥ තර්ක ගෙන හැර දක්වමින් කතා කරන අයුරු පෙනේ. ඔවුන් කේන්දරය තුළින් ඉටු දෙවියන් සොයා ගන්නා ආකාරය නොයෙක් ක්‍රම සහ විධි අනුව පෙන්වා දෙන නමුත් මෙතෙක් කොපමණ දෙනෙකුට ඉටු දෙවියෝ හමු වුණාදැයි යන්න ගැටලුවකි. ඉටු දෙවියෝ සැබවින්ම වැඩ සිටින්නේ කුමන ස්ථානයකද ? ඉටු දෙවියන්ගේ පිහිට ලබන්නේ කෙසේද ? මෙය නිවැරදිව අවබෝධ කරගත්තෝ සීමිත ය.
කේන්දරය තුළ හෝ අන් තැනක ඉටු දෙවියන් සෙවීම පැළඳ සිටින උපැස් යුවළ සොයමින් වෙහෙසීම වැනි වූ ක්‍රියාවකි.
ඉටු දෙවියෝ වූ කලී ඉන්ද්‍රජාලික බලයකි. මෙම ඉන්ද්‍රජාලික බලයට සම කළ හැකි වෙනත් බලයක් ලොවෙහි නැත. මෙම ඉන්ද්‍රජාලික බලය ඔබ සහ මම මෙලොව ජනිත වන්නට පෙර සිටම, පන්සල්,පල්ලි,කෝවිල් හා සියලු ආගම්,දර්ශන ඇතිවන්නට පෙර පටන් තිබුණේය. එය අප මෙතෙක් ගත කළ සෑම ආත්ම භවයකම අප සමඟ රැඳෙමින් අප ලබාගත් සියලු යහපත් හා අයහපත් අත්දැකීම් සුරකිමින් අදත් හෙටත් අප සමඟ සිටින්නේය.
මනුෂ්‍යයින් වර්ග දෙකකි. ආකර්ෂණ ගතියෙන් යුතු වූවෝ සහ විකර්ෂණ ගතියෙන් යුතු වූවෝය. ආකර්ෂණය එක් කරගත්තෝ පූර්ණ විශ්වාසයෙන් හා ආත්ම විශ්වාසයෙන් අනූන වූවෝ වෙති. තමන් මෙලොව ජනිත වී සිටින්නේ සාර්ථක වීමට ජයග්‍රහණය අත් කරගැනීමට බව ඔවුහු දනිති. විකර්ෂණය ඇත්තෝ තුළ නිරන්තරයෙන් සැකය හා බිය පිරි ඇත්තේය. අගනා අවස්ථාවන් උදා වූ විට පවා ඔවුහු සැකය හා බිය හේතුවෙන් එම අවස්ථාවන් මඟ හරවා ගනිති. ඉදිරියට යාමට ඇති බිය ඔවුන් සිටින තැනම නවතා තැබීමට හේතු වෙයි. ආකර්ෂණ ශක්තියෙන් යුතු වූවෝ නම් තමන් සතු විශ්ව ව්‍යාපීය ඉන්ද්‍රජාලික බලය නිවැරදිව භාවිතයට ගන්නෝය.
මෙම සනාතන මහා රහස හෙවත් ඉන්ද්‍රජාලික බලය නම් සිත ම මිස අන් කවරක්ද... ඉටු දෙවියෝ නම් සිත ම ය. ඉටු දෙවියෝ වැඩ සිටින්නේ තමන් තුළම ය.
ඔබත් මමත් මේ විශ්වව්‍යාපී මහා බලය අලුතින් අත් කර ගත යුතු නැත. එනම් ඉටු දෙවියන් සොයමින් වෙහෙසිය යුතු නැත. ඉෂ්ට දේව බලය භාවිතයට ගත යුත්තේ කෙසේ දැයි උගත යුතුව ඇත. එය තේරුම් ගත් විට ජීවිතයේ සෑම අංශයකටම ඒ බලය උපයෝගී කර ගැනීමට හැකියාව ලැබෙනු ඇත.
සිත ප්‍රභාශ්වර ය. කීකරුය. බැහැරින් පැමිණෙන නොයෙක් ගැටීම් හේතුවෙන් සිත කිලුටු වන්නේය. අප නින්දේදී පිවිසෙන සිහින ලෝකය මොන තරම් සුන්දර වූවද අවදි වීමෙන් පසුව සිතට නැගෙන සැබෑ ජීවිතයේ ගැටළු හා අභියෝග හේතුවෙන් සිත නැවත කලබලකාරී තත්වයට පත් වන්නේය. මෝහන නිද්‍රාවේදී සිත ඉතාමත් කීකරුය. ස්වාපනවේදියාගේ ඕනෑම ප්‍රශ්නයකට පිළිතුරු ලබාදෙන්නේ සැහැල්ලුවෙනි. මෝහාන නිද්‍රාවෙන් අවධි වූ පසුව එම කීකරු නම්‍යශීලී බව තුරන්ව යන්නේය.
ජ්‍යොතිෂවේදියා යනු යමෙකුගේ අනාගතය පුරෝකථනය කරන්නෙකු පමණක් නොවිය යුතු අතර තම සේවාදායකයින්ගේ සිත සුවපත් කරවන මනෝ චිකත්සකයෙකු විය යුතුය. තම සේවාදායකයාගේ ජන්ම පත්‍රය තුළින් ඔහුගේ හෝ ඇයගේ මානසික ස්වභාවය, සිතුවිලි රටාව තේරුම් ගැනීම ජ්‍යොතිෂවේදියෙකුට අපහසු කාර්යයක් නොවේ. එසේ වූවද සිත නිරීක්ෂණය කිරීම කෙරෙහි ජ්‍යොතිෂවේදීන්ගේ අවදානය යොමුවන්නේ ඉතාමත් අඩුවෙනි. සිත නිරීක්ෂණය කිරීම යනු සාංසාරිකව පවත්වාගෙන පැමිණි සිතුවිලි රටාව හඳුනා ගැනීමය. සාංසාරික සිතුවිලි රටාව හඳුනා ගැනීමෙන් තොරව කරදරවලින් නිදහස් වීමේ මාර්ග හෙවත් අපලවලට පිළියම් තේරුම් කළ නොහැක. අපල යනු සාංසාරිකව පවත්වාගෙන පැමිණි අයහපත් සිතුවිලි හේතුවෙන් මුහුණ දීමට සිදුවන කරදර හා මානසික පීඩාවන් ය. එනම් කෙලෙස් හේතුවෙන් ඇතිවන විඳවීම් ය.
කරදර , මානසික පීඩා ආදියෙන් නිදහස් වීම සඳහා සිතුවිලි රටාව වෙනස් කර ගත යුතුය. තමන් පස් පවින් වැළකී සිටින්නේ යැයි පවසන බොහෝ දෙනා සිතින් පව් කරන්නෝ වෙති. ඊට උදාහරණ සොයා ගැනීමට එතරම් දුර යාමට අවශ්‍ය නොවන අතර ඒ සඳහා මුහුණු පොත හොඳටම ප්‍රමාණවත්ය. තම ආගමික ශාස්තෘවරයාණන්ගේ පින්තූරවලින් හා දාන මාන කටයුතුවලට සහභාගී වන අවස්ථාවන්හිදී ගත් ඡායාරූපවලින් මුහුණු පොත සරසාලන ඇතැමුන් තවත් තැනක සටහන් කරන පාපිෂ්ට,අපහාසාත්මක හා සාපකාරී ප්‍රකාශ දෙස බලන විට ඔවුන් ගේ විනාශකාරී සිතුවිලි රටාව තේරුම් ගත හැකිය. ඇතැම් විට ඔවුන් ඉටු දෙවියා යැයි සොයා ගත් දෙවියෙකුට නිතර පුද පූජා ද පවත්වනවා විය හැක. අයහපත් සිතුවිලිවලට ලැබෙන අයහපත් ප්‍රති විපාකවලින් ඔවුන්ට ගැලවීමක් නැත.
මෙම භවය තුළ ඇති කර ගත හැකි වැරදි චේතනාවන් හා ඊට ලැබිය හැකි ප්‍රති විපාක කේන්දරය තුළ සටහන්ව ඇති නමුත් ඒවා වෙනස් කර ගැනීමේ හැකියාව තමන් සතුව පවතී. මෙහිදී සිතෙහි ඉන්ද්‍රජාලික බලය භාවිතා කිරීම ඉතාමත් වැදගත් ය. සසරෙහි රැස් කරන ලද කෙලෙස් හේතුවෙන් මෙම භවය තුළ මුහුණ දීමට සිදුවන ගැටළුකාරී, පීඩාකාරී කාල සීමාවන් හඳුන්වන්නේ අපල කාල සීමාවන් ලෙස යි. පීඩාකාරී කාලයකදී මානසික සමාධිය ඇති කර ගැනීම දුෂ්කර වන අතර නිතර ආවේගශීලී,කෝපාවිෂ්ට ගති ලක්ෂණ මතුවෙයි. මේ අනුව ඇති වන අයහපත් සිතුවිලි හේතුවෙන් පීඩාකාරී තත්වය තවත් වර්ධනය වනු ඇත. පීඩාවන් ගෙන් නිදහස ලැබීමට නම් සිතුවිලි රටාව යහපත් අතට හරවා ගත යුතුය.
"පරාධීන මානසිකත්වයකින් හිඟමන් යැදීමටවත් නොහැක" යනුවෙන් කියමනක් තිබේ. නියත වශයෙන්ම හිඟමන් ලැබෙන බවට වූ විශ්වාසය රහිත යාචකයාට හිඟමන් නොලැබෙයි. විවාහය,ප්‍රේම සම්බන්ධය,රැකියාව ආදී නොයෙක් දේ සම්බන්ධ ගැටලුවලින් පීඩා විඳින්නෝ ජ්‍යොතිෂවේදීන් හමුවට පැමිණෙති. ගැටලු විසඳීමට නම් ප්‍රථමයෙන් කළ යුත්තේ ඔවුන් තුළ ජයග්‍රාහී මානසිකත්වයක් ඇති කිරීමය. ඔවුන් නිරන්තරයෙන් තම ගැටලුව සමඟ ගැටෙමින් කල් ගෙවන බැවින් ජයග්‍රාහී මානසිකත්වයක් ඇති නොකර කුමන ප්‍රතිකර්මය යෙදුව ද ඉක්මන් සාර්ථක ප්‍රතිඵලයක් ලබා ගැනීම දුෂ්කර වනු ඇත.
ඇතැම් වෛද්‍යවරුන් හඳුන්වන්නේ 'වන් ෂොට්' නමිනි. ඒ, එක බෙහෙත් වේලෙන්ම ලෙඩේ කම්මුතු කරන බැවිනි. සමත්ව ඇත්තේ එකම විභාගය වූවද සෑම වෛද්‍යවරයෙක්ම ප්‍රතිකාර කිරීමෙහිදී එක සේ දක්ෂයෝ නොවෙති. වෛද්‍යවරයාගේ මානසික ශක්තිය නැතිනම් ඉටු දෙවියන්ගේ බලපෑම ද වැදගත් වෙයි. " ඒ දොස්තර මහත්තයා පපුවට නලාව තිබ්බත් ඇති...." යනුවෙන් ඇතැමුන් පවසන්නේ එවන් වෛද්‍යවරුන්ට ය. ඉහළ මිල ගණන් ගෙවා අපලයට යන්ත්‍ර පැළඳගන්නෝ බොහෝය. අදාල යන්ත්‍රයට මන්ත්‍ර බලය කාවැද්දවීම පමණක් සෑහෙන්නේ නැත. ඇදුරා සතුව මනා සමාධියක් තිබිය යුතුය. තම ඉටු දෙවියන්ගේ ආශිර්වාදාත්මක බලය තවත් කෙනෙකු වෙනුවෙන් භාවිතා කිරීමේ හැකියාව තිබිය යුතුය. අමනුෂ්‍යයින් සමඟ ගණුදෙනු කිරීමේ මානසික ශක්තිය රහිත ඇදුරාට අමනුෂ්‍යයින් හා සම්බන්ධ කටයුතු කළ නොහැක. අමනුෂ්‍යයින් සමඟ සම්බන්ධ විය යුත්තේ සිතුවිලි මඟිනි.
ඔබ වනාහි ඔබගේ සිතුවිලි සමූහයෙහි ඒකාබද්ධ සමස්තයයි. ඔබට අඳුරෙන් ගැලවිය හැක්කේ එළිය වෙත යාමෙනි. සීතල ජය ගත හැක්කේ උණුසුම මඟිනි. අයහපත දුරු කළ යුත්තේ යහපත පිළිගැනීමෙනි. යහපත සිතන්න. අයහපත ඉවත්ව යනු ඇත.
ජ්‍යොතිෂවේදී, ගුප්ත වෛද්‍ය
සංජීව කුළුපන බණ්ඩාර
උසස්ම මුදුන් පමුණුවා ගැනීම් ක්‍රියාත්මක කරගන්නේ බෙහෙවින්ම රාගාධික පුද්ගලයෝය. එහි සරළම අදහස නම් කුමන ක්ෂේත්රයක වූවද ඉහළම සාර්ථකත්වය අත් කරගන්නෝ රාගාධික පුද්ගලයෝය යන්නයි. සරාගී උද්වේගය දමනය කළ නොහැකි බලවේගයකි. මේ බලයෙන් යුක්ත වූ විට ක්‍රියාත්මක වීමේ සුපිරි බලයක් ඇතිවෙයි.
මිනිසාගේ නැතහොත් සතෙකුගේ ලිංග ග්‍රන්ථි ඉවත් කෙරුණු හොත් එයින් සිදුවන්නේ ක්‍රියාකාරීත්වයෙහි ප්‍රධාන ප්‍රභාවය නැතුව යාමකි. මේ සඳහා සාක්ෂි අවැසි නම් වන්ධ්‍යකරණයට භාජනය කෙරුණු සතෙකුට එයින් පසුව සිදුවන්නේ කුමක් දැයි විමසා බැලිය යුතුය. ලිංගේන්ද්‍රිය වෙනසකට බඳුන් කෙරුණු ගොනුන් එළදෙනුන් තරමට නිවට නියාලු වෙයි. බඩු ප්‍රවාහනය සඳහා කරත්ත යොදා ගැනුණු කාලයේ එම කරත්ත ඇදීම සඳහා යොදා ගැනුණු ගොනුන් පුස්සා කරනු ලැබිය. පුස්සා කිරීම යනු ලී කැබලි කීපයක් ආධාරයෙන් සැකසූ මෙවලමක් මඟින් ගොනුන්ගේ වෘෂණ කෝෂ තැලීමයි. එසේ කරන ලද්දේ ඔවුන්ගේ දරදඬු භාවය සහ විරුද්ධ ලිංගයේ සතුන් කෙරෙහි ඇල්ම දුරු කර පූර්ණ කාලීනව බර ඇදීම සඳහා යොදා ගැනීමටය.
රාගාධික බව උසස්ම මුදුන් පමුණුවා ගැනීම් සිදු කරවන සුපිරි බල ශක්තියක් නම් ස්ත්‍රී දුෂණ, බාල අපචාර හේතුවෙන් ඇතැමුන් නීතියේ රැහැනට හසුව සිරගත වන්නේ මන්දැයි ගැටළුවක් මතු වීමට ඉඩ තිබේ.
ලිංගේන්ද්‍රිය පිනවීමේ ආශාව සහජ ස්වභාවික ධර්මතාවයකි. එය යටපත් කළ යුත්තක් හෝ දුරු කළ යුත්තක් හෝ නොවේ. එහෙත් එය භාවිතා කළ යුත්තේ ශරීරයත්, මනසත්,අධ්‍යාත්මික ගුණයත් දියුණු වන ආකාරයටය. එසේ නොවූව හොත් එය කායික ආකාරයෙන් පමණක් පිතටත යාමේ මාර්ග සොයනු ඇත. ගඟකට වේල්ලක් හරස් කොට එහි ජලය කෙටි කලකට පාලනය කළ හැකි වූවද අවසානයේදී කවර ස්ථානයක් හෝ බිඳගෙන ගලා යයි. රාගයද එසේමය. එය කෙටි කළකට දමනය කරගැනීමට හැකි වීමට ඉඩ තිබෙන නමුත් ප්‍රකාශයට පත් කිරීමේ මාර්ග එය විසින්ම ජනනය කරණු ලබයි. නිර්මාණාත්මක ප්‍රයත්නයක් සමඟ ගලපා නොහැසුරුවොත් ගුණයෙන් අඩු ආකාරයකින් ප්‍රකාශයට පත් වීමට ඉඩ තිබේ. මනුෂ්‍ය ආශාවන්ගේ ප්‍රබලතම ආශාව වූ ලිංගික ආශාව කවර ක්ෂේත්රයක වූවද ප්‍රබල නිර්මාණාත්මක ශක්තියක් බවට හරවා ගත හැකිය.
සරාගී උද්වේගය නිර්මාණාත්මක ප්‍රයත්නයක් දෙසට යොමු කරන ආකාරය සොයාගන්නා මිනිසා සැබැවින්ම වාසනාවන්තයෙකි. ඒ වාසනාව ජන්ම පත්‍රය තුළ ප්‍රකාශයට පත් කරනු ලබන්නේ කුමන ග්‍රහයන් විසින්ද ? කුමන ආකාරයටද ?
ග්‍රහයින් අතර සරාගීතම ග්‍රහයා සිකුරුය. සිකුරු ග්‍රහයා මලවි යනුවෙන්ද හඳුන්වනු ලැබේ. මලවි යනු අනංගයා හැඳින්වීමට ද භාවිතා කරන නමකි. 'මලවි කරළිය' කුමක්දැයි නොදන්නා අයෙක් නැත. සිකුරුගේ රුව ගුණ අවබෝධ කරගැනීමට වෙනත් වංහුං අවශ්‍ය නොවේ. සිකුරුගේ බලය ලබන්නෝ රාගාධිකයෝය. සිකුරුගෙන් උදාවන බලවත්ම යෝගය මාලව්‍ය යෝගය හෙවත් මාලවි යෝගයයි. කේන්ද්‍රස්ථාන වූ පළමු වෙනි, සිව් වෙනි, හත් වෙනි හා හා වෙනි භාවස්ථාන අතරින් එක් භාවයක සිකුරු උච්චව හෝ ස්වක්ෂේත්රව පිහිටි කළ මාලවි යෝගය උදා වෙයි. යෝගයේ විපාක ලෙස අලංකාර ගේදොර, යාන වාහන, ධනය,සැප සම්පත් උරුම වෙයි. සිකුරු මනුෂ්‍යයා වෙත උරුම කරණු ලබන්නේ ආකර්ෂණ ශක්තිය හෙවත් සරාගී බලයයි. කාම ශක්තියෙන් හීන කලාකරුවාත්, කථකයාත්,නීතිඥයාත්, අලෙවිකරුවාත් සෙස්සන් පොළඹවා ගැනීම මිණුම් දණ්ඩ සේ ගෙන බලන විට අසාර්ථක පුද්ගලයෝ වෙති. අන්‍යයන් තමන් වෙත පොළඹවාගැනීමේ බලය හිමි කර දෙන්නේ සිකුරු විසිනි.
සිකුරු බලවත් වූ පමණින්ම ඔහු හෝ ඇය සියලු සැප සම්පත් උරුම කර ගනු ඇතැයි ද පැවසිය නොහැක. කුජ මනුෂ්‍යයා ආවේගශීලී, අති ධාවනකාරී තත්වයට පත් කළ හැකි ග්‍රහයෙකි. නොමනා ලෙස සටහන් වුණු කුජගේ බලපෑමට සිකුරු ලක් වුණු කල්හි කාම ශක්තිය කායික ආකාරයෙන් පමණක් ප්‍රකාශයට පත් වීමට ඉඩ තිබේ. එවිට තම කාම ශක්තිය වෙනත් තත්වයකට පරිවර්තනය කරගැනීමේ හැකියාව නොලැබී යනු ඇත. නොමනා ආකාරයට පිහිටි රාහුගේ බලපෑමට සිකුරු ලක් වී ඇත්නම් තත්වය වඩාත් කණගාටුදායකය. සාර්ථකත්වය මුදුන් පමුණුවා ගැනීම කෙසේ වෙතත් තම ලෛංගික ආශාවන් තෘප්ත කරගැනීම පිණිස ගනු ලබන ක්‍රියාමාර්ග හේතුවෙන් බලවත් ගැටළුවලට මුහුණ දීමට සිදු වනු ඇත.
මනුෂ්‍ය සිත වඩාත් සංවේදී තත්වයට පත් කරවන ග්‍රහයා සඳු ය. සඳු සිකුරු සංයෝගයේ ප්‍රතිඵලය ලෙස ජන්මියා සරාගී තත්වයට පත් වෙයි. ජීවිතය විඳවන්නට නොව විඳීමට ප්‍රිය කරවන ග්‍රහ සංයෝගයකි. ආකර්ෂණ ශක්තිය නොමදව හිමි කර දෙමින් සැපවත් ජීවිතයකට මඟ විවර කර දෙයි. මෙහිදීද සඳු හා සිකුරු නොමනා තත්වයේ පසුවන කුජගේ හෝ රාහුගේ බලපෑමට ලක් වුණු කල්හි තත්වය ඛේදනීය වීමට ඉඩ තිබේ.
විශාල ධනස්කන්ධ රැස් කරගෙන සිටින මිනිසුන් මෙන්ම කලාව,සාහිත්‍ය,ව්‍යාපාර හා වෙනත් වෘත්තීය ක්ෂේත්‍රවලින් විශිෂ්ට කීර්තියක් අත් කරගෙන මිනිසුන් තම ප්‍රවර්තන ශක්තිය ලබා ඇත්තේ ගැහැණියකගේ බලපෑමෙන් බව විද්‍යාත්මක පර්යේෂණයන්ගෙන් අනාවරණය වී තිබේ. ලිංගික ආශාව නමැති උත්තේජනය මඟින් සිත් තුළ නිර්මාණශීලී පරිකල්පන ශක්තිය ඇති කළ ගැහැණුන්ගේ අභාෂය හේතුවෙන් තම අරමුණු උසස්ම ආකාරයෙන් මුදුන් පමුණුවා ගත් ශ්‍රේෂ්ඨ නායකයින් පිළිබඳව කොතෙකුත් සඳහන්ව තිබේ. "සෑම සාර්ථක පිරිමියෙකු පිටුපසම ගැහැණියක් සිටියි" යන්නෙහි සැබෑ තේරුම මෙයම මිස අනෙකක් නොවේ. ඉහළම ශ්‍රේෂ්ඨත්වයට, උපරිම සාර්ථකත්වයට පත් වන මිනිසුන්ගේ භාර්යාවන් සතු උත්තේජනීය ආනුභාවය එම භාර්යාවන් ගේ ජන්ම පත්‍ර තුළ පැහැදිලිව සටහන්ව පවතී. තම සරාගී හැඟීම් කායිකව පමණක් ප්‍රකාශයට පත් කිරීමේ නොමනා මාර්ග සොයා ගිය ගැහැණුන් නිසා විනාශ වුණු ස්වාමි පුරුෂයින්ද හිඟ නොවේ. යහපත හෝ අයහපත රඳා පවතින්නේ තම සරාගී බලය කුමන ආකාරයට ප්‍රකාශයට පත් වන්නේ දැයි යන්න මතය.
දැනට මැදි වියේ පසුවන මේෂ ලග්නය හිමි කාන්තාවකි. ඇයගේ ජන්ම පත්‍රයේ හත් වෙනි භාවයේ සිකුරු ස්වක්ෂේත්රව රවි සමඟ යෝගව සිටියි. නවාංශක සටහනේ සිකුරු ස්වක්ෂේත්රව වෘෂභ රාශියේ ය. දැඩි සරාගී තැනැත්තියකි. මේ වන විට මහා ධනස්කන්ධයකට හිමිකම් කියන අතර ව්‍යාපාර කීපයක හිමි කාරියකි. අන්‍යයන්ටද නොමසුරුව ආධාර උපකාර කරමින් අධි සුඛෝපභෝගී ජීවිතයක් ගත කරයි. අලුයම අවදි වී භාවනාවක යෙදීම ඇයගේ දින චරියාවේ අංගයකි. මැදි වියේ පසු වූවද තවමත් විසි ගණන් වියැති යෞවනියකගේ රූප කායකට හිමි කම් කියයි. තම ලෛංගික බලය මඟින් ඇති කරන චිත්ත ආවේග තත්වය නිර්මාණාත්මකව ගළපා ගනිමින් ඉහළම මුදුන් පමුණුවා ගැනීම් ක්‍රියාත්මක කළ කාන්තාවකි.
ප්‍රසිද්ධ පුද්ගලයින්ගේ මෙන්ම ශ්‍රේෂ්ඨ නායකයින්ගේ ජන්ම පත්‍ර ද උදාහරණ ලෙස ඉදිරිපත් කළ හැකි වූව ද එමඟින් සිදුවන්නේ ලිපිය වඩාත් දීර්ඝ වීමය.
බෙහෙවින් රාගාධික වීම ආශීර්වාදයකි. එසේ වූවද රාගාධික ගැහැණුන් සහ පිරිමින් නොමනා, පාපකාරී පිරිසක් ලෙස සැළකීමට බොහෝ දෙනා පුරුදුව ඇත. ඇතැමුන් තමන් විරාගික බව පෙන්වීමට නිතර උත්සාහ දරන්නේද රාගික බව බලවත් අසාර, නොමනා ගුණයක් බවට සිතෙහි පවතින විශ්වාසය නිසාය. සරාගී බව සල්ලාලකම බවට පත්වන්නේ නොදැනුවත් බව හේතුවෙනි. එය ජ්‍යොතිෂය ඇසුරින් මනාව විග්‍රහ කළ හැකිය. අනර්ථකාරී කාම යෝග යටතේ එය විග්‍රහ කිරීමට බලාපොරොත්තු වෙමි.
සංජීව කුළුපන බණ්ඩාර
